DANIEL 5
5
1Belshassar nawota e magi tea maraki aneana maga manu sikai kakada mari nakaniana warua sikai, po munu waine narae ni manu sikai wanogoe. 2Belshassar, ragi waina e do munudogo waine, e pitip̃aki naga euga tape umai lasa maga ni kold go ni silver waina tamana Nebukadnessar e dape ra dave m̃elu dua ki nasum̃a tapu waina e doko Yerusalem; naga nawota go tea maraki aneana maga, nagoroi aneana maga go narup̃a aneana maga, euga munu ara. 3Ragi wanogoe eu dape umai lasa maga ni kold waina eu dape ra dave m̃elu dua ki nasum̃a tapu ni nasum̃a ki Sup̃e waina e doko Yerusalem; go nawota go tea maraki aneana maga, nagoroi aneana maga go narup̃a aneana maga eu munu ara. 4Eu munu waine, po samasamani sup̃e maga ni kold, go ni silver, ni brass, ni airon, ni nakau, go ni vatu. 5Ragi sa m̃oli wanogoe nakini maga ni nam̃elearu sikai ni naatam̃oli eu dave umai, po midiri kivea ki nakau ni nasulu doko navulutiana ni namalo ni nasum̃a warua ki nawota: go nawota e punusi namagovai ni nam̃elearu waina e midiri. 6Ragi wanogoe narae ni nawota e panop̃ota doko asa, go namidodoana aneana maga eu mari a e mataku; go kolopu maga ni nawarena eu pei tea veresiana, go nap̃atuana ero dum̃ada duki ra. 7Nawota e pioso kasua naga euga viragi paki ekopu tea kikita maga, tea ni Kaldea maga, go tea vasapua maga. Nawota e pasa po noa ki tea manumatua maga ni Babelon, Naata waina ega wo peve namidiriana waia, po noakisai au nanoap̃otaeana kakana, ega wo pei tea sugoroana ki tea miala‐kesakesa, go namori sikai ni kold ega wo doko nanoana, go ega wo pei tea maramara sikai ni tea tolu namarakiana aginau. 8Ragi wanogoe tea manumatua mamau puti ki nawota eu rumai paki ekopu: ma eu da peve atae namidiriana wanogoe mau, go eu marisa mari nanoap̃otaeana ega vei tea ataeana paki nawota. 9Ragi wanogoe nawota Belshassar e mataku p̃arua, go naraena e panop̃ota doko asa, go tea maraki aneana maga eu saram̃akoto. 10Go nawota nagoroi nalakena navasaana maga ki nawota go ki tea maraki aneana maga e umai paki ekopu ni nasum̃a ni namunuana: nawota nagoroi e pasa po noa, Nawota O, p̃a mauri doko mau doko; namidodoana anigo maga euga ta mari ko p̃a mataku mau, go naraem̃a ega ta panop̃ota mau: 11naatam̃oli sikai e doko namarakiana anigo, waina naata ni sup̃e tapu maga e doko asa; go naaleatia maga ki tamam̃a namarama go namidoakiataeana go namanumatuaana, dapala namanumatuaana ki sup̃e maga, e pei tea vap̃aiana asa: go nawota Nebukadnessar tamam̃a, e mari a e pei nap̃au ni tea midiri tapu maga, ni tea kikita maga, ni tea ni Kaldea maga, 12go ni tea vasapua maga, a noa tamam̃a, nawota O, nalakena naatana tatap̃au, go naataeana, go namidoakiataeana, nanoap̃otaeana ni nap̃erea maga, go nanoasaiana ni navasaana maga waina eu pei p̃aia, go naveresiana ni tea sap̃iliana maga eu pei tea vap̃aiana asa, Daniel, waina nawota e dua e nagisa ni Belteshassar. Ragi waia Daniel ega vei tea sosoana, go ega wo noasai nanoap̃otaeana.
13Ragi wanogoe Daniel e pei tea viragiana paki ekopu punusi nawota. Nawota e pasa po noa ki Daniel, Nigo ku pei Daniel, nae waina e pei tea ni tea viragiluapavakotoana maga ni Yudah, waina nawota tamagu e piragi a m̃elu dua ki Yudah umai kite? 14A dogo nalo kakam̃a, naga naata ni sup̃e maga e doko ako, go naga namarama go namidoakiataeana go namanumatuaana tatap̃au e pei tea vap̃aiana ako. 15Go ragi waia tea manumatua maga, tea kikita maga, eu pei tea viragiana paki ekopu punusi au, naga euga veve namidiriana waia, po mari nanoap̃otaeana kakana ega vei tea ataeana paki nau: ma eu da mariatae noasai nanoap̃otaeana ni naleo waia mau. 16Go kinau a dogo nalo kakam̃a, naga ku mariatae noap̃otae nanoap̃otaeana maga, po peresi tea sap̃iliana maga: ragi waia ku pe mariatae peve namidiriana waia, po mari nanoap̃otaeana kakana ega vei tea ataeana paki nau, p̃a wo pei tea sugoroana ki tea miala‐kesakesa, go namori sikai ni kold ega wo doko nanoam̃a, go p̃a wo pei tea maramara sikai ni tea tolu namarakiana aginau. 17Ragi wanogoe Daniel e pasadara po noa narae ni nawota, Navituaana anigo maga euga vei anigo, go namoriana anigo maga p̃a tua tea p̃ota sikai ara; ma aga wo magi nawota peve namidiriana waia, po mari nanoap̃otaeana ega vei tea ataeana paki nia. 18Nigo, nawota O, Sup̃e Vakilagi Mau e dua Nebukadnessar tamam̃a namarakiana, go nawaruaana, go nasamasamaana, go natatap̃auana; 19go nalakena nawaruaana waina e dua e asa, narei mamau puti, nalauna mamau puti, go namena mamau puti eu durururu po mataku padua ki naraena: tea waina e masauna e maripunue a, go tea waina e masauna e mauti a e mauri doko; go tea waina e masauna e mari a e pakilagi, go tea waina e masauna e mari a e pakitano. 20Ma ragi waina nap̃op̃ona e pakilagi, go naatana e kasua naga e mari madaga, e pei tea mariana e siwo m̃elu dua ki malo tasake ni namarakiana aneana, go eu dape lua nasamasamaana kiana: 21go e pei tea kopasiana m̃elu dua ki naatam̃oli natuna maga; go e mari nap̃op̃ona e dapala nalo mila maga, go natokoana aneana e sikoti ass mila maga; eu pagani a ki nam̃enau dapala oks maga, go nap̃atokona e memeu ki nasovaki ni nakoroatelagi: pa pa e atae naga Sup̃e Vakilagi Mau e do maramara namarakiana ni naatam̃oli maga, go naga e pusake dap̃au sa tea waina e masauna. 22Go nigo natuna, Belshassar O, ku da mari nap̃op̃om̃a e pakitano mau, nalakena ku atae tea mamau puti wanogoe; 23ma ku dum̃am̃a dape ko pakilagi dip̃a Nawota ni nakoroatelagi; go eu po dape lasa maga ni nasum̃a aneana umai paki naraem̃a, go nigo go tea maraki anigo maga, nagoroi anigo maga go narup̃a anigo maga, ku po munu waine ara; go ku po samasamani sup̃e maga ni silver, go ni kold, ni brass, ni airon, ni nakau, go ni vatu, waina eu da punusi mau, waina eu da dogo mau, go waina eu da atae mau: go Sup̃e waina namerom̃a e doko nam̃elearuna, go waina napua anigo mamau puti eu pei aneana, ku da dodomadagani a mau. 24Ragi wanogoe namagovai ni nam̃elearu e pei tea tip̃akiluaana m̃elu dua ki naraena, go namidiriana waia e pei tea midiriana. 25Go tea waia e pei namidiriana waina e pei tea midiriana, MENE, MENE, TEKEL, UFARSIN. 26Tea waia e pei nanoap̃otaeana ni naleo waia: MENE; Sup̃e e peve namarakiana anigo po mari a e nopu. 27TEKEL; ku pei tea rowogiana lasa rowogi maga, po pei tea vap̃aiana ku masalesale. 28PERES; namarakiana anigo e pei tea tap̃otaeana, po pei tea vituakiana paki naka ni Media go ni Persia. 29Ragi wanogoe Belshassar e pitip̃aki, go eu sugoro Daniel ki tea miala‐kesakesa, po sara ki namori sikai ni kold e doko nanoana, po dogorogo nalo kakana, naga ega vei tea maramara sikai ni tea tolu namarakiana. 30Nap̃ogiana wanogoe Belshassar nawota ni tea ni Kaldea e pei tea maripunueana. 31Go Darius tea ni Media e dape namarakiana, e pei tea ni natau dapala rualima latesa tamate dua.
Currently Selected:
DANIEL 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
