DANIEL 4
4
1Nebukadnessar nawota paki narei mamau puti, nalauna mamau puti, go namena mamau puti, waina eu doko maramana mamau; natam̃ateana animu ega vei tea mariana ega warua. 2Navaivaiana maga go tea ni namagaana maga waina Sup̃e Vakilagi Mau e mari ra paki nau, a midoa ki nia naga e p̃ia naga aga rogorogo ki da. 3Navaivaiana aneana maga eu p̃arua pa! Go tea ni namagaana aneana maga eu kasua pa! Namarakiana aneana e pei namarakiana waina e du du po du mau du, go naveinawotaana aneana e paki tagona go tagona.
4Kinau Nebukadnessar a dogo kite p̃ia doko nasum̃a aginau, po pei tea malakesa doko nasum̃a warua aginau. 5A punusi nap̃erea sikai waina e mari au a mataku; go namidodoana maga ragi waina a one nawewele aginau go navunusiana maga ni nap̃augu eu mari au a m̃anaunau. 6Go navasakisogiana sikai e pei tea vituakiana m̃elu au naga euga viragi tea manumatua mamau puti ni Babelon euga umai paki ekopu punusi au, naga euga mari nanoap̃otaeana ni nap̃erea ega vei tea ataeana paki nau. 7Ragi wanogoe tea midiri tapu maga, tea kikita maga, tea ni Kaldea maga, go tea vasapua maga eu rumai paki ekopu: go kinau a noa nap̃erea naraeda; ma eu da mari nanoap̃otaeana kakana e pei tea ataeana paki nau mau. 8Ma ragi edaku Daniel e umai paki ekopu punusi au, waina nagisana e pei Belteshassar, pae nagisa ni sup̃e aginau, go waina naatana ni sup̃e tapu maga e doko asa: go a noa nap̃erea naraena, a naga, Belteshassar O, 9nap̃au ni tea midiri tapu maga, nalakena kinau a atae naga naatana ni sup̃e tapu maga e doko ako, go naga te p̃aia seara eu da mari navitinuana paki‐go mau, p̃a noa ki nau navunusiana maga ni nap̃erea aginau waina a po punusi a, go nanoap̃otaeana kakana. 10Go navunusiana maga ni nap̃augu ragi waina a one nawewele aginau: a do punusi go kuga leo, nakau sikai m̃aleoputo ni maramana, go navakilagiana kakana e p̃arua. 11Nakau wanogoe e ulua po p̃arua, go e kasua, go navakilagiana kakana e pa parati ki nakoroatelagi, go navunusiana kakana e paki namatap̃ago ni maramana mamau. 12Nauluna maga eu pei tea leom̃atakiana, go nawana eu laapa, go navinaga agi tea mamau puti e doko asa: nalo mila maga ni namalasi eu sili melu etano kakana, go manu maga ni nakoroatelagi eu doko arana maga, go sara nap̃okasi eu pei tea vaganiana asa. 13A do punusi doko navunusiana maga ni nap̃augu ragi waina a one nawewele aginau, go kuga leo, tea leleogoro sikai go tea tapu sikai e pae nakoroatelagi siwo umai. 14E pioso kasua, po noa dapala waia, Kuga tae nakau ega rowo, go kuga taelua arana maga, kuga varivariakilua nauluna maga, go kuga taperavera ki nawana: nalo mila maga euga sava m̃elu dua ki etano kakana, go manu maga euga m̃elu dua ki arana maga. 15Ma kuga toropusi nalake ni nakoana maga ega toko natano, ega vilake natali sikai ni airon go brass, ega toko nam̃enau manainai ni namalasi; go ega memeu ki nasovaki ni nakoroatelagi, go matele aneana ega sikoti nalo mila maga nam̃enau ni navanua: 16nap̃op̃ona ega vanop̃ota ki agi naatam̃oli, go nap̃op̃o ni nalo mila sikai ega vei tea vituakiana paki nia; go ragi larua euga tagoro e. 17Navasaana wanogoe e pae navasakisogiana ki tea leleogoro maga, go natatagoana wanogoe e pae natip̃akiana ki tea tapu maga: naga tea mauri maga euga atae naga Tea Vakilagi Mau e do maramara namarakiana ki naatam̃oli maga, po pitua ki nia paki tea waina e masauna, po sike lawo ki dap̃au sa tea vakitano mau ni naatam̃oli maga. 18Nap̃erea wanogoe kinau nawota Nebukadnessar a po punusi a: go nigo, Belteshassar O, p̃a noa nanoap̃otaeana, nalakena tea manumatua mamau puti ni namarakiana aginau eu da mariatae mari nanoap̃otaeana ega vei tea ataeana paki nau mau; ma nigo ku mariatae, nalakena naatana ni sup̃e tapu maga e doko ako.
19Ragi wanogoe Daniel, waina nagisana e pei Belteshassar, e saram̃akoto ragi kiki, go namidodoana aneana maga eu mari a e mataku. Nawota e pasadara po noa, Belteshassar, nap̃erea go nanoap̃otaeana eroga ta mari ko p̃a mataku mau. Belteshassar e pasadara po noa, Nawota aginau, nap̃erea ega vei agi tea maga waina eu pilosi ko, go nanoap̃otaeana kakana agi tea maga waina eu kokona ki‐go. 20Nakau waina ku punusi a, waina e ulua po p̃arua, po kasua, waina navakilagiana kakana e pa parati ki nakoroatelagi, go navunusiana kakana e paki maramana mamau; 21waina nauluna maga eu pei tea leom̃atakiana, go nawana eu laapa, go navinaga agi tea mamau puti e doko asa; waina nalo mila maga ni namalasi eu doko etano kakana, go manu maga ni nakoroatelagi eu doko arana maga: 22e pei nigo, nawota O, waina ku po p̃arua po kasua: nalakena nawaruaana anigo e po p̃arua, po pa parati ki nakoroatelagi, go naveinawotaana anigo e paki namatap̃ago ni maramana. 23Go waina nawota e punusi tea leleogoro go tea tapu sikai waina e pae nakoroatelagi siwo umai, po noa, Kuga tae nakau ega rowo, go kuga mari sa ki nia; ma kuga toropusi nalake ni nakoana maga ega toko natano, ega vilake natali sikai ni airon go brass, ega toko nam̃enau manainai ni namalasi; go ega memeu ki nasovaki ni nakoroatelagi, go matele aneana ega sikoti nalo mila maga ni namalasi, pa pa ragi larua euga tagoro e; 24tea waia e pei nanoap̃otaeana, nawota O, go e pei navasakisogiana ki Tea Vakilagi Mau, waina e po pakilina ki nawota aginau nawota: 25naga euga wo kopasi ko m̃elu dua ki naatam̃oli maga, go natokoana anigo ega wo sikoti nalo mila maga ni namalasi, go euga wo mari ko p̃a wo gani nam̃enau dapala oks maga, go euga wo mari ko p̃a wo memeu ki nasovaki ni nakoroatelagi, go ragi larua euga wo dagoro ko; pa pa p̃a wo atae naga Tea Vakilagi Mau e do maramara namarakiana ni naatam̃oli maga, po pitua ki nia paki tea waina e masauna. 26Go waina eu pitip̃aki naga euga toropusi nalake ni nakoa maga ni nakau; namarakiana anigo ega wo manigo pei tea laketoko, edaku ki p̃a wo atae sua naga nakoroatelagi maga eu do maramara. 27Nalakena tea wanogoe, nawota O, navusum̃akiana aginau ega vei tea midoakim̃atakiana anigo, go p̃a marip̃oraworae lua namarinaleosaana anigo maga ki namarinaleoleanaana, go namarinaleotageleana anigo maga ki nadodomiana paki tea rogokitesa maga; e pe vei natokoparauana ni narogokitep̃iaana anigo. 28Tea mamau puti wanogoe eu pakilina ki nawota Nebukadnessar. 29Ragi waina atelagi rualima sikai tamate dua eu nopu, e do surata nap̃au ni nasum̃a warua ni namarakiana ni Babelon. 30Nawota e pasa po noa, Tea waia e da pei Babelon warua, waina kinau a davagi a naga ega vei nasum̃a ni namarakiana, ki namarimatuaana ni nakasuaana aginau, go paki nasamasamaana ni natatap̃auana aginau kite? 31Ragi waina navasaana wanogoe e ko doko nawoka ni nawota, nadaleo sikai e dowo pae nakoroatelagi umai, e noa, Nebukadnessar nawota O, eu noa ki‐go asa: namarakiana e po m̃elu dua ki‐go pano. 32Go euga wo kopasi ko m̃elu dua ki naatam̃oli maga, go natokoana anigo ega wo sikoti nalo mila maga ni namalasi; euga wo mari ko p̃a wo gani nam̃enau dapala oks maga, go ragi larua euga wo dagoro ko; pa pa p̃a wo atae naga Tea Vakilagi Mau e do maramara namarakiana ni naatam̃oli maga, po pitua ki nia paki tea waina e masauna. 33Ragi sa m̃oli wanogoe navasaana wanogoe e pei tea vakavuroana asa paki Nebukadnessar: go e pei tea kopasiana m̃elu dua ki naatam̃oli maga, go e gani nam̃enau dapala oks maga, go nap̃atokona e memeu ki nasovaki ni nakoroatelagi, pa pa naloluna e p̃arua dapala nam̃au ni ikila maga, go natap̃alakisina maga eu dapala tea ni manu maga. 34Go ragi waina naaleatia maga wanogoe eu nopu, kinau Nebukadnessar a sike namatagu maga paki nakoroatelagi, go namidoakiataeana aginau e liliu paki nau, go a pasa m̃ata ki Tea Vakilagi Mau, go a pasa samasamani po dodomadagani tea waina e mauri doko mau doko; nalakena naveinawotaana aneana e pei naveinawotaana waina e doko mau doko, go namarakiana aneana e paki tagona go tagona: 35go tea mamau puti waina eu doko maramana eu pei tea midoakiana naga eu dapala tea p̃alo: go e do mari dapala namasauana aneana taua ni nakoroatelagi, go m̃aleoputo ni tea maga waina eu doko maramana: go te naata e da doko waina e mariatae dugoro nam̃elearuna, kite noa ki nia, Ku mari nasava? 36Ragi wanogoe namidoakiataeana aginau e liliu paki nau, go agi nasamasamaana ni namarakiana aginau, natatap̃auana aginau go nalagaana aginau ero liliu paki nau; go tea vusum̃aki aginau maga go tea maraki aginau maga eu pusuusu ki nau; go a pei tea vusakeana liliu paki namarakiana aginau, go nawaruaana warua liu e pei tea sokariana paki nau. 37Ragi waia kinau Nebukadnessar a do pasa samasamani po do sike paki elagi po do dodomadagani Nawota ni nakoroatelagi; nalakena nawosiana mamau puti aneana eu pei nalomauana, go napua aneana maga eu pei navasap̃otaeana: go tea maga waina eu surata pae naleomadagaana e mariatae mari ra euga vakitano.
Currently Selected:
DANIEL 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
