DANIEL 10
10
1Natau ketolu ki Sairus nawota ni Persia naleo sikai e pei tea noapakasakiana paki Daniel, waina nagisana e pei tea sosoana ki Belteshassar; go naleo wanogoe e pei lomau, go e pei namarinavakaloana warua sikai: go e midoakiatae naleo wanogoe, po peani namidoakiataeana pae navunusiana wanogoe. 2Naaleatia maga wanogoe kinau Daniel a do susue wiik mamau dolu. 3A da gani te navinaga masauana mau, go nap̃okasi go waine ero da sili paki nawokagu mau, go a da dum̃agu puvurai ki nau ki naroro mau, pa pa wiik mamau dolu eu pei tea vakavuroana. 4Go naaleatia rualima dua tamate pati ni atelagi vea, ragi waina kinau a doko pisari nadigi ni noaisara warua waina e pei Hiddekel, 5a sike namatagu maga, po leo punusi, go kuga leo, naatam̃oli sikai waina e pei tea sugoroana ki sugoro maga ni linen, go waina nawarena maga ero pei tea tasokiana ki kold tautau ni Ufas: 6go nap̃atokona e dapala berul, go naraena e dapala navunusiana ni navila, go namatana maga ero dapala mena maga ni nakapu, go naruna maga go natuana maga eu dapala navunusiana ni brass lidalida, go nadaleo ni navasaana aneana maga e dapala nadaleo ni taua sikai. 7Go kinau Daniel a sikigu punusi navunusiana wanogoe: nalakena naatam̃oli maga waina eu sikoti au doko eu, da punusi navunusiana wanogoe mau; ma narurururuana warua sikai e dowo ara, go eu sava pano naga euga tum̃ada dasuru ki da. 8Go kinau a pei tea toropusiana a sikigu doko, po punusi navunusiana warua wanogoe, go te nakasuaana e da pei tea toropusiana doko au mau: go naleom̃atakiana ni naraegu e pei tea roaana doko au paki namarisakiana, go a da mauti te nakasuaana mau. 9Ma a dogo nadaleo ni navasaana aneana maga: go ragi waina a dogo nadaleo ni navasaana aneana maga, kinau a dowo po maturu daratara dap̃olosiwo one. 10Go kuga leo, nam̃elearu sikai e kisidogo au, po lawo ki nau a durururu doko nap̃atuagu maga go nam̃elearugu maga. 11Go e noa ki nau, Daniel O, naatam̃oli waina ku pei tea dodomiana warua, p̃a midoakiatae navasaana maga waina kinau a do pasa ki‐go asa, go p̃a lawodu leana; nalakena a pei tea tip̃akiluaana umai punusi ko ragi waia: go ragi waina e pasa sua navasaana wanogoe paki nau, a lawodu durururu. 12Go e noa ki nau, P̃a ta mataku mau, Daniel; nalakena pae naaleatia vea waina ku pitua ki nap̃op̃om̃a asa naga p̃a midoakiatae, go naga p̃a tum̃am̃a doro ko pakitano narae ni Sup̃e anigo, navasaana anigo maga eu pei tea rogoana: go kinau a po umai nalakena navasaana anigo maga. 13Ma tea maraki ni namarakiana ni Persia e lawodu dugoro au naaleatia rualima dua tamate sikai; ma p̃a leo, Mikael, tea maraki warua liu maga sikai kakada, e umai naga ega silae au: go kinau a doko parau tokora wanogoe pisari nawota maga ni Persia. 14Go a po umai naga aga mari ko p̃a midoakiatae tea waina ega wo pakilina ki narei anigo naaleatia edaku maga: nalakena navunusiana waia e ko pei agi naaleatia laapa. 15Go ragi waina e pasa ki sua au dapala navasaana maga wanogoe, a lawo ki naraegu paki natano, po punuta du. 16Go kuga leo, tea waina e dapala natakiusiana ni naatam̃oli natuna maga e kisidogo nagolegu maga: ragi wanogoe a p̃olagati nawokagu, go a pasa po noa ki tea waina e lawodu kivea ki nau, Nawota aginau O, nalakena navunusiana waia nasusueana aginau maga eu pei tea roaana doko au, go a da mauti te nakasuaana mau. 17Go tea suasua ki nawota aginau waia e mariatae pasa ki nawota aginau waia dapale sava? Go kinau pae ragi wanogoe pa pa te nakasuaana e da doko au mau, go te namerogu e da pei tea toropusiana doko au mau. 18Go tea waina e dapala navunusiana ni naatam̃oli sikai e moro kisidogo au, go e mari au a kasua. 19Go e noa, P̃a ta mataku mau, naatam̃oli waina ku pei tea dodomiana warua: natam̃ateana ega vei anigo, p̃a kasua, go p̃a kasua. Go ragi waina e do pasa ki nau, a pei tea mariana a kasua, go a noa, Nawota aginau ega vasa; nalakena ku po mari au a kasua. 20Go e noa, Ku atae tea waina e pei nalakena a po umai punusi ko kite? Go ragi waia aga wo liliu naga aga marimari dip̃a tea maraki ni Persia: go ragi waina kinau aga wo dave pano, p̃a leo, tea maraki ni Yavan ega wo umai. 21Ma aga wo noasai paki‐go tea waina e pei tea midiriana doko namidiriana ni nalomauana: go sikai e da doko mau waina e silae au dip̃a tea maga wanogoe, ma Mikael tea maraki animu e sikina.
Currently Selected:
DANIEL 10: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
