1 TIMOTHEO 6
6
1Tea maga waina eu pei naviti etano ki nakau ni nanoa euga midoaki nawota adeada maga naga eu p̃ia ki sara nadodomadaganiana, naga nagisa ni Sup̃e go navasapiseikiana eroga ta pei tea vasasakiana mau. 2Go tea maga waina eu peani nawota saralomau maga, euga ta midoaki p̃alo kida mau, nalakena eu pei taida maga; ma euga madeada suasua ega warua rua, nalakena tea maga waina eu mamau dape namarim̃atakiana eu pei tea saralomau go tea dodomiana. Tea maga wanogoe p̃a to pasa piseiki da ara go p̃a to pasa parati ki da ara.
3Te naata sikai e pe vasa piseiki panop̃ota, po da umai paki navasaana maga ni namauriana mau, navasaana maga ki Nawota anigida Yesu Kristo, go navasapiseikiana waina e pae namatau‐ki‐Sup̃e‐ana; 4e pe vei tea p̃op̃o vakilagi, doko da atae te navatuna mau, ma e sasana nalo ni navusuusuana maga go navululuana maga ni navasaana maga, waina tea maga waia eu m̃elu ara pakilina, naroitoiana, navileana, navasasakiana maga, 5namidodoana sa maga, navululuana kasua varau maga ki naatam̃oli maga waina namidodoana adeada e madada, go waina nalomauana e pei tea vutiluaana kiada, waina eu do midoaki nia naga namatauki‐Sup̃eana e pei napua sikai ni nataluaana. 6Ma namatauki‐Sup̃e‐ana pilake namaroana e pei nataluaana warua: 7nalakena tu da dape te navatuna umai paki maramana mau, go nalakena tu da mari atae dape te navatuna m̃elu dua ki nia pano mau; 8ma tu pe veani navinaga go nakovagoroana maga tuga wo peani tea laapa tea maga wanogoe. 9Ma tea maga waina eu masauna naga euga vei sogolapa eu dowo paki namaridogoana go vaivai sikai go namasauana sa laapa tea manumatavusa maga go tea marisaki maga, tea tapala waina eu diroa ki naatam̃oli maga paki namarisakiana go namatepuoliana. 10Nalakena nadodomi‐m̃ane‐ana e pei nakoa ni sara nasaana maga mamau puti: waina te seara eu dum̃ada sai ki da paki asa po sasap̃o pano m̃elu dua ki nasaralomauana, po dum̃ada lawo sasama ara ki narogokitesaana laapa.
11Ma nigo, naatam̃oli ki Sup̃e O, p̃a sava dua ki tea maga wanogoe; go p̃a sava dausi namarinaleoleanaana, namatauki‐Sup̃eana, nasaralomauana, nadodomiana, nasokiana, namatemateana. 12P̃a mari pilele navileleana wia ni nasaralomauana, p̃a vua soki namauriana waina e du mau du, waina ku pei tea sosoana paki asa, go ku noa sai nanoasaiana wia namata ni tea noa sokisoki laapa. 13A pasa parati ki‐go namata ni Sup̃e, waina e do paka mauri ki naleo maga mamau puti, go ni Kristo Yesu, waina e noa sokisoki narae ni Pontio Pilato nanoasaiana wia; 14naga p̃a vavaigoro natip̃akiana, ega ta loa mau, ega ta pei tea vasadip̃aana mau, pa pa paki navakilinaana ki Nawota anigida Yesu Kristo: 15waina ega wo pisei ki da asa ragi aneana maga, waina e pei tea maropa go waina e sikina pei Nawota Kasua mau, Tea Maramara ki tea maramara maga, go Nawota ki nawota maga; 16waina e sikina peani namatesap̃oana, po doko namarama waina te naata e da mari atae paki asa mau; waina te naatam̃oli sikai e ko da punusi a mau, go e da mari atae punusi a mau: waina nadodomadaganiana ega vei aneana go namarakiana waina e du mau du. Amen.
17P̃a tip̃aki tea maga waina eu pei sogolapa doko maramana waia, naga euga ta pei tea p̃op̃ovakilagi mau, go naga euga ta leogoro‐pavatu natikaana ni nalomauana ni nasogolapaana mau, ma naga euga leogoro pavatu Sup̃e, waina e do dua gida pae nasogolapaana naleo maga mamau puti naga tuga maro ara; 18naga euga to mari m̃ataki, naga euga vei sogolapa nalo ni nawosiana wia maga, naga euga vei tea vituam̃oliki p̃ia, tea suasua mari p̃olosi; 19doko do dum̃ada madeada doropusi dauaki laketano wia sikai raki ragi waina ega wo umai, naga euga vua soki namauriana waina e pei namauriana lomau.
20Timotheo O, p̃a vavaigoro tea waina e pei tea vituakiana paki‐go, go p̃a to maradoa m̃elu dua ki nadaleo p̃alo m̃oli maga, go ki natugoroana maga ni tea waina e pei tea sosoana sorosoro ki naataeana; 21waina te seara eu lagasai a po papele nalo ni nasaralomauana. Nasaup̃iaana ega sikoti ko.
Currently Selected:
1 TIMOTHEO 6: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
