1 TIMOTHEO 3
3
1Navasaana waia e pei lomau, Te naata e pe laaga naveitealeoparatikiana e masau nawosiana wia sikai. 2Nalakena tea wanogoe e one tea leo paratiki one naga ega tapala ega ta pei tea vasadip̃aana mau, ega vei anawota ki nagoroi sikai maau, ega ta pei tea matamaloku mau, ega vei tea midodoa p̃ia, tea tum̃ana mari usi a, tea dodomi nam̃enaki maga, tea mari atae pasa piseiki; ega ta pei tea vasa puka mau, 3ega ta pei tea vivitip̃a mau; ma ega vei tea mari matemate, ega ta pei tea vululu mau, ega ta pei tea dodomi m̃ane mau; 4ega vei tea maraki m̃ata ki nasum̃a aneana, doko peani natuna maga euga toko etano paki nia pilake sara naveinavunutawiaana; 5(ma te naata e pe ta atae naga ega maraki nasum̃a aneana mau, ega wo leo paratiki ekalesia ki Sup̃e dapale sava?) 6Ega ta pei tea saralomau vau mau, naga nap̃op̃ona ega ta pakilagi mau, go naga ega ta dowo paki natip̃akotoviana ni diabolo mau. 7Go e one asa one naga ega veani nanoasokisokiana wia m̃elu tea ni etaku maga; naga ega ta dowo paki navasapinoakiana go vaivai ki diabolo mau.
8Dapala nogoe e one diakona maga one naga euga vei navunuta wia, euga ta pei tea daleo dua mau, euga ta pei tea munu p̃arua ki waine mau, euga ta pei tea masau nataluaana sa mau; 9euga to dape soki p̃aia ni nasaralomauana doko natum̃ada atae‐ana tautau. 10Go nara ma euga vei tea maridogoana pea; edaku ki nia eu pe ta pei tea vasadip̃aana mau, euga mari nawosiana ki diakona.
11Dapala nogoe e one nagoroi maga one naga euga vei navunuta wia, euga ta pei tea vasa dip̃a mau, euga ta pei tea matamaloku mau, euga vei lomau nalo ni naleo maga mamau puti.
12Diakona maga euga vei adawota ki nagoroi sikasikai sarasara ra, tea maraki m̃ata ki natuda maga go nasum̃a adeada maga. 13Nalakena tea maga waina eu mari m̃ata ki nawosiana ki diakona eu dum̃ada madeada dalua malo vaduana wia, go naviviariana warua doko nasaralomauana waina e doko Kristo Yesu. 14A midiri tea maga wanogoe paki‐go, doko do leogoro naga aga valoti punusi ko m̃araverave; 15ma a pe mari daliali, naga p̃a atae dapala waina e one ako one naga p̃a to mari a doko nasum̃a ki Sup̃e, waina e pei ekalesia ki Sup̃e mauri, tip̃a go laketano ni nalomauana. 16Go pae nanoasaiana p̃aia ni namatau‐ki‐Sup̃e‐ana e p̃arua; nae waina e pakilina doko nap̃okasi, waina e pei tea marileanakiana doko naatana, waina e pei tea vunusiana ki agelo maga, waina e pei tea rogorogokiana m̃aleoputo ni nalauna maga, waina e pei tea saralomauana doko maramana; waina e pei tea viragiana sake paki nasamasamaana.
Currently Selected:
1 TIMOTHEO 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific