1 KI YOANE 5
5
1Sara naata waina e saralomau naga Yesu e pei Kristo e pei tea vesiana m̃elu Sup̃e; go sara naata waina e dodomi tea waina e pesi e moro dodomi tea waina e pei tea vesiana m̃elu asa. 2Tea waia tu atae pae asa naga tu dodomi Sup̃e natuna maga, ragi waina tu dodomi Sup̃e, po mari natip̃akiana aneana maga. 3Nalakena tea waia e pei nadodomi‐Sup̃e‐ana, naga tuga rogo paratiki natip̃akiana aneana maga: go natip̃akiana aneana maga eu da madaga mau. 4Nalakena sara tea waina e pei tea vesiana m̃elu Sup̃e e mari matua ki maramana: go namarimatuaana waina e po mari matua ki maramana e pei tea waia, nasaralomauana anigida. 5Go tea waina e mari matua ki maramana e pei sei, e pe ta pei tea waina e saralomau naga Yesu e pei Sup̃e Natuna? 6Nae wanogoe, Yesu Kristo, e pei tea waina e umai pae noai go nada; e da umai pilake noai sikina mau, ma e pilake noai go nada. 7Go Naatana e pei tea waina e do noa sokisoki, nalakena Naatana e pei nalomauana. 8Nalakena tea waina eu do noa sokisoki eu dolu, Naatana, go noai, go nada: go tea tolu wanogoe eu noa sokisoki tea sikai maau. 9Tu pe tape nanoasokisokiana ki naatam̃oli, nanoasokisokiana ki Sup̃e e p̃arua liu sa; nalakena nanoasokisokiana ki Sup̃e e pei tea waia, naga e noasokisoki nalo ni Natuna. 10Tea waina e saralomau Sup̃e Natuna e peani nanoasokisokiana nap̃alauna: tea waina e da saralomau navasaana ki Sup̃e mau e mari a e pei tea sorosoro; nalakena e da saralomau nanoasokisokiana waina Sup̃e e noa sokisoki a nalo ni Natuna. 11Go nanoasokisokiana e pei tea waia, naga Sup̃e e dua gida namauriana waina e du mau du, go namauriana wanogoe e doko Natuna. 12Tea waina e peani Natuna e peani namauriana wanogoe; tea waina e da peani Sup̃e Natuna mau e da peani namauriana wanogoe mau.
13A midiri dua mu tea maga wanogoe, naga kuga atae naga ku peani namauriana waina e du mau du, nimu waina ku saralomau nagisa ni Sup̃e Natuna. 14Go tea waia e pei naviviariana waina tu peani a paki nia, naga tu pe tatago te navatuna pae namasauana aneana, e dogo gida: 15go tu pe atae naga e dogo gida tea waina tu datago asa, tu atae naga tu peani tea tatagoana maga waina tu po datagovi a ara.
16Te naata e pe vunusi taina e mari te namarinaleosaana waina e da paki namateana mau, ega tatago, go Sup̃e ega wo dua e namauriana ki tea maga waina eu da mari naleo sa paki namateana mau. Namarinaleosaana sikai e doko waina e paki namateana: a da noa naga ega vavara nalo kakana mau. 17Sara namarinaleotageleana e pei namarinaleosaana: go namarinaleosaana sikai e doko waina e da paki namateana mau.
18Tu atae naga sara naata waina e pei tea vesiana m̃elu Sup̃e e da mari naleo sa mau; ma tea waina e pei tea vesiana m̃elu Sup̃e e dum̃ana pavaigoro e, go tea sigisigileo e da kisidogo e mau. 19Tu atae naga tu pei tea ni Sup̃e, go maramana mamau e one tea sigisigileo one. 20Go tu atae naga Sup̃e Natuna e po umai, po dua gida namidoakiataeana naga tu atae tea vei lomau, go tu doko tea vei lomau doko, tu doko Natuna Yesu Kristo. Nae wanogoe e pei Sup̃e lomau, go namauriana waina e du mau du. 21Piakirikiri, kuga tum̃amu pavaigoro mu pa dua ki nasup̃e maga.
Currently Selected:
1 KI YOANE 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
