1 PAKI TEA NI KORINTHO 1
1
1Paulo, tea sosoana naga ega vei apostolo sikai ki Yesu Kristo pae namasauana ki Sup̃e, go Sosthene taigida, 2aro midiri paki ekalesia ki Sup̃e waina e doko Korintho, paki tea maga waina eu pei tea maridautaukiana doko Kristo Yesu, tea sosoana naga euga vei tea tautau maga, nara go tea maga mamau puti ni sara tokora waina eu pioso paki nagisa ni Nawota anigida Yesu Kristo, Nawota adeada go anigida: 3nasaup̃iaana ega vei animu go natam̃ateana waina e pae Sup̃e Tamagida go Nawota Yesu Kristo.
4A pasadodom̃ata ki Sup̃e aginau sara ragi nalo kakamu, nalakena nasaup̃iaana ki Sup̃e waina e pei tea vituakiana paki mu doko Kristo Yesu; 5nalakena ku pei tea mariana ku pei sogolapa doko asa, nalo ni sara naleo, nalo ni sara navasaana go ni sara naataeana; 6dapala waina nanoasokisokiana ni Kristo e pei tea lawosokiana doko mu: 7dapala waina ku da pei tea edaku nalo ni te navituaana ni nasaup̃iaana mau; ku do leogoro naumaipakilinaana ki Nawota anigida Yesu Kristo; 8waina ega wo lawo soki mu pa pa paki namatap̃agona edaku mau, naga kuga ta pei tea vasadip̃aana mau naaleatia ki Nawota anigida Yesu Kristo; 9Sup̃e e pei lomau, waina ku pei tea sosoana pae asa paki nasaisaipeaniana ki Natuna Yesu Kristo Nawota anigida.
10Ma a pasa paratiki mu, tai maga, pae nagisa ni Nawota anigida Yesu Kristo, naga kuga mamau puti noa tea sikai maau, go naga natap̃otaeana seara euga ta doko m̃aleoputo kakamu mau; ma naga kuga vei tea mariana kuga wia lua nalo ni namidodoana sikai maau go ni namidoakip̃otaeana sikai maau. 11Nalakena e pei tea noasaiana paki nau nalo kakamu, taigu maga, pae tea maga ni nasum̃a ki Kloe, naga navululuana maga eu doko m̃aleoputo kakamu. 12Ma a noa tea waia, naga sara naata kakamu eu sikasikai naga, Kinau a pei tea ki Paulo; go kinau a pei tea ki Apollo; go kinau a pei tea ki Kefa; go kinau a pei tea ki Kristo. 13Kristo e pei tea tap̃otaeana kite? Paulo e manimu pei tea turiana nakau valadagoto kite? Ku pei tea bapetisoana paki nagisa ni Paulo kite? 14A pasadodom̃ata ki Sup̃e nalakena a da bapetiso te naata sikai kakamu mau, ma a bapetiso Krispo go Caio ero sikida; 15naga te naata ega ta noa naga ku pei tea bapetisoana paki nagisagu mau. 16Go a bapetiso tea ni nasum̃a ki Stefano. Tea p̃ota, a da atae mau naga a bapetiso te naata p̃ota sikai. 17Nalakena Kristo e da dip̃aki lua au naga aga bapetiso mau, ma naga aga rogorogo ki narogorogoana wia: aga ta mari a pae namanumatuaana ni navasaana mau, naga nakau valadagoto ki Kristo ega ta pei tea mariana ega vei tea p̃alo mau.
18Nalakena navasaana ni nakau valadagoto e magi tea maga waina eu do mate puoli pei namanumatavusaana; ma e manigida waina tu do pei tea mautipauriana pei nakasuaana ki Sup̃e. 19Nalakena e pei tea midiriana,
Aga wo mari puoli ki namanumatuaana ki tea manumatua maga.
Go namidoakiataeana ki tea midoaki atae maga aga wo dip̃adoa e.
20Tea manumatua wai? Tea midiri wai? Tea vasapululu ni maramana waia wai? Sup̃e e da mari namanumatuaana ni maramana e manumatavusa kite? 21Nalakena ragi waina e doko namanumatuaana ki Sup̃e naga maramana e da atae Sup̃e pae namanumatuaana kakana mau, Sup̃e e midoaki m̃ata ki nia naga ega mautipauri pae namanumatavusaana ni narogorogokiana tea maga waina eu saralomau. 22Nalakena tea ni Yudea maga eu datago navaivaiana maga, go tea ni Hellas maga eu laaga namanumatuaana: 23ma kinami au dogorogo ki Kristo tea turiana nakau valadagoto, e magi tea ni Yudea maga pei tea tapilagonaana, go e magi tea ni nalauna p̃ota maga pei namanumatavusaana; 24ma e magi tea maga waina eu pei tea sosoana, tea ni Yudea maga go tea ni Hellas maga, pei Kristo nakasuaana ki Sup̃e, go namanumatuaana ki Sup̃e. 25Nalakena namanumatavusaana ki Sup̃e e manumatua liu naatam̃oli maga; go namanainaiana ki Sup̃e e kasua liu naatam̃oli maga.
26Nalakena kuga vunusi nasoso‐muana, tai maga, naga tea manumatua pae nap̃okasi eu da laapa mau, tea kasua eu da laapa mau, tea vakilina p̃ia eu da laapa mau: 27ma Sup̃e e matadoa tea manumatavusa maga ni maramana, naga ega mari tea manumatua maga euga maliere; go Sup̃e e matadoa tea manainai maga ni maramana, naga ega mari tea kasua maga euga maliere; 28go tea vakilina sa maga ni maramana, go tea midoakip̃alokiana maga, Sup̃e e matadoa ra, go tea maga waina eu da doko mau, naga ega mari tea maga waina eu doko euga vei tea m̃oli: 29naga te nap̃okasi seara euga ta pakavakae narae ni Sup̃e mau. 30Ma e m̃elu asa umai naga nimu ku doko Kristo Yesu, waina e pei tea mariana e manigida pei namanumatuaana waina e pae Sup̃e umai, go namarinaleoleanaana go namaridautaukiana, go natauluaana: 31naga, dakiusi waina e pei tea midiriana, Tea waina e pakavakae ega vakavakae Yehovah.
Currently Selected:
1 PAKI TEA NI KORINTHO 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
