RUF 3
3
Ruf mʋ Bʋas teeŋ taha lɛ
1Tapʋlɩɩ kʋbala Nawomi pɩɛsɛ ʋ bii-haala Ruf, “Mɩ tolo, ʋ bɩ jaŋ ŋaa wʋzɔŋ dɩ mɩ nɛ chɛ dɩhɔnʋŋ pɩŋ dɩ ŋ hɔŋ arɩ yarɩfɩɛlaa? 2Ŋ jɩma Bʋas, nɩɩ-la tɩntɩnnɩ haalaa lɛ ŋ sɩ pɛ ma tɩtɩŋ, ŋaa mɩ bala naambii nɛ. Tɩtaŋɩŋ deeŋ ʋ jaŋ chɩchaarɛ ʋ mɩaa taha lɛ. 3Fo lɩɩŋ, a tɩsɛ tʋlaalɩɩ a laalɛ gɛrɩ-zɔmʋŋ a mʋ taha-la. Ama sɩ́ leŋe dɩ ʋ jɩŋ arɩ ŋ hɛ nɩmɛ see dɩ ʋ dii kʋdiilee aŋ nyʋa kɩaa dɛrɛ. 4Dɩ ʋ nɛ pɩna, jɩŋ lee-la ʋ sɩ pɩna dɩ ŋ mʋ a kɛŋ ʋ gɛrɩ-bɔsɔ suri ʋ naasɩŋ dɩɩrɩŋ aŋ pɩŋ nɩmɛ. Ʋ jaŋ dagɩŋ wɩɩ-la ŋ sɩ jaŋ ŋaa.”
5Ruf bʋl, “Mɩ jaŋ ŋaa wɩɩ-la kala ŋ sɩ bʋla.” 6Ŋɩɩ nɛ Ruf mʋ taha-la a ŋaa wɩɩ-la kala ʋ bala naaŋ sɩ dagʋ.
7Bʋas sɩ dii kʋdiilee a nyʋa kɩaa dɛrɛ ʋ yaraa kala fɩɛlɛ ŋɩɩ, ʋ mʋ yelli mɩɩ-bii-la a pɩŋ doŋ. Ruf lʋara mʋ kɛŋ ʋ gɛrɩ-bɔsɔ suri ʋ naasɩŋ dɩɩrɩŋ aŋ pɩŋ nɩmɛ. 8Ŋɩɩ nɛ Bʋas hirige sii tɩta-siesee a bɩrɩma na dɩ haal nɛ pɩŋ ʋ naasɩŋ bʋbʋɔŋ.
9Ŋɩɩ nɛ ʋ pɩɛsɛ, “Kʋbɛɛ nɛ?” Ruf bʋl, “Mɩ-na ŋ tɩntɩnna Ruf nɛ. Kɛŋ ŋ gɛrɩ-bɔsɔ tɔmɛ, bɛɛ wɩaa ŋ ŋaa mɩ bala nyɩmma naambii nɛ.”
10Ŋɩɩ nɛ Bʋas bʋl, “La TƖƖNA jaŋ pɛ ŋ lɛ mɩ tolo, zile deeŋ ŋ sɩ ŋaa mɩ lɛ kɩɩ ŋ sɩ laa sɩpaaŋ ŋaa ŋɩɩ. Ŋ fa jaŋ wuo kire to bapʋɔsaa harɩŋ, dɩ ba kɛŋ kʋŋ koo ba bɩ kʋŋ kɛnɛ, ama ŋ bɩ ŋɩɩ ŋaa. 11Mɩ tolo, lɛɛlɛ sɩ́ leŋe dɩ ŋ bɔyɛ joŋ, mɩ jaŋ ŋaa wɩɩkala ŋ sɩɩ chɛ a pɩŋ. Jaŋ deeŋ lɛ nɩaa kala jɩma arɩ ŋ ŋaa nʋʋ mɛlɛ sɩ zɔmɔ nɛ. 12Ʋ ŋaa wʋtɩtɩɩ nɛ arɩ mɩ ŋaa ŋ bala nyɩmma naambii nɛ, ama la naambie dɔŋɔ hɛ nɩmɛ a kpagɛ ŋ jaanɩŋ a kɩɩmɛ. 13Pɩŋ daha dɩ taŋ pʋl, dɩ la naambile nɛ jaŋ laaŋ ʋ zɔmɔ, dɩ ʋ nɛ bɩŋ laa, La TƖƖNA doluŋ lɛ mɩ-na jaŋ beniŋ, ŋ-na pɩŋ daha dɩ taŋ pʋl.”
14Ŋɩɩ nɛ Ruf pɩŋ Bʋas naasɩŋ bʋbʋɔŋ taŋ pʋl, aŋ laa sɩpaaŋ sii dɩ nʋʋkala bɩ jɩŋ. Bʋas bʋla pɩ Ruf, “Sɩ́ leŋe dɩ nʋʋkala jɩŋ arɩ haal dɩa pɩŋ taha deeŋ lɛ.”
15Bʋas bɩra bʋl, “Kɛŋ gɛrɩ-la sɛmɛ dɔŋɔ ŋ sɩ laala kaa jɛrɛ.” Ʋ sɩ kaa jɛrɛ, Bʋas ŋaa mɩa-la gbansɩŋ fii hɛ pʋ, a kaa chʋŋʋ, ʋ mʋ dɩa.
16Ruf sɩ mɩɩra mʋ dɩa, ʋ bala naaŋ pɩɛsʋ, “Mɩ tolo, ɛɛ nɛ wɩaa vɛŋ?” Ŋɩɩ nɛ Ruf bʋl wɩalɩŋ kala Bʋas sɩ ŋaa pʋ. 17Aŋ bɩra bʋl, “Ʋ sɩ́ ʋ bɩ maga dɩ mɩ kɛŋ na-hɩllɩŋ kɔ dɩa aŋ ŋaa mɩaa gbansɩŋ fii a pɩmɛ.”
18Ŋɩɩ nɛ Nawomi bʋla pʋ, “Mɩ tolo, gbɛrɛ a na wɩɩ-la sɩ jaŋ ŋaa. Bʋas bɩ jaŋ hɔŋ see dɩ ʋ na wɩɩ-la dɩdɛrɩŋ jɩnɩŋ.”
Currently Selected:
RUF 3: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014