RUF 2
2
Ruf kuuni kɩaa Bʋas baga lɛ
1Nawomi bala Ɛlɩmɛlɛk dɩa nɩaa tʋɔŋ, baal kʋbala nɛ fa hɛ nɩmɛ, ʋ yɩrɩŋ nɛ Bʋas, a kɛŋ kɩaa woruŋ a ŋaa nɩbal. 2Tapʋlɩɩ kʋbala Ruf bʋla pɩ Nawomi, “Mɩ jaŋ mʋ baga kuuni kʋdiilee, mɩ jɩma nʋʋ jaŋ fá mɩ nenige aŋ leŋ dɩ mɩ pɛ tɩŋ.” Nawomi sɩ, “Mɩ tolo, ʋ zɔmɔ, mʋ.” 3Ŋɩɩ nɛ Ruf sii mʋ baga, a tuto tɩntɩnnaa harɩŋ a kukuuni kɩaa. Ruf kʋ jɩŋ arɩ baga-la lɛ ʋ sɩɩ kuuni kɩaa ŋaa Bʋas baga nɛ. Bʋas fa ŋaa Ɛlɩmɛlɛk dɩa nʋʋ nɛ.
4Ʋ bɩ diene dɩ Bʋas lɩɩ Bɛtɩlɛhɛm kɔ, a chʋɔlɛ tɩntɩnna-la aŋ bʋl, “La TƖƖNA Wɩa jaŋ hɛ ma teeŋ.” Ba ma bʋl, “La TƖƖNA jaŋ pɛ ŋ lɛ.”
5Ŋɩɩ nɛ Bʋas pɩɛsɛ ʋ tɩntɩnnɩ-hɩaŋ, “Hantolibii bɛɛ nɛ ŋ-la?”
6Ŋɩɩ nɛ ʋ tɩntɩnnɩ-hɩaŋ-la bʋl, “Mʋab tɩŋŋaa tolo-la sɩ to Nawomi harɩŋ kɔ nɛ ŋɩɩ. 7Ʋ sʋlmɛ nɛ dɩ mɩ leŋ dɩ ʋ to la harɩŋ a kukuuni kɩalɩŋ la sɩ gɛllɛ ta. Chʋchʋɔŋ kala nɛ ʋ kukuuni kɩaa, lɛɛlɛ nɛ ʋ hɔŋ la lɛbɩŋ lɛ dɩ ʋ wiesi mʋa.”
8Ŋɩɩ nɛ Bʋas bʋla pɩ Ruf, “Mɩ tolo, jegile nɩɩ, sɩ nʋʋkala baga mʋ kuuni kɩaa, hɛ baga deeŋ lɛ, a kpagɛ haala-la sɩ tɩma pɩpɩmɛ. 9Mʋ kuuni kɩaa lee-la baala-la sɩɩ tɩŋ, mɩ bʋla pɩba, dɩ ba sɩ́ ŋ walɩmʋ nɛ ka dɩ ŋ to haala-la harɩŋ dɩ ma kala tɩtɩŋ. Dɩ lɩɩnyʋasʋŋ nɛ kɛnɩŋ, mʋ nyʋa loŋ-la lɛ ba sɩɩ nyʋa.”
10Ruf sɩ nɩɩ wɩɩŋ deeŋ, ʋ tuu kpirimi Bʋas sɩpaaŋ aŋ bʋl, “Bɛɛ nɛ tɩɩ mɩ wɩaa faasa chɩlɩŋ ŋ-la? Bɛɛ nɛ tɩɩ ŋ kɛŋ zile mɩ ma nʋhʋɔra deeŋ teeŋ?”
11Ŋɩɩ nɛ Bʋas bɩra bʋla pʋ, “Mɩ nɩɩ wɩalɩŋ kala ŋ sɩ ŋaa pɩ ŋ bala naaŋ nɛ, ŋ bala sʋʋŋ harɩŋ. Mɩ nɩɩ ŋɩɩ ŋ sɩ leŋ ŋ nyɩmma arɩ ŋ naaŋ arɩ ŋ jaŋ aŋ kɔ dɩ ŋ hɛ nɩaa teeŋ ŋ ha sɩ bɩ jɩŋ. 12La TƖƖNA jaŋ timiŋ a tɩŋ wɩalɩŋ kala ŋ sɩ ŋaa lɛ. A leŋ dɩ La TƖƖNA, Iziral tɩŋŋaa Wɩa teeŋ ŋ sɩ kɔ dɩ ʋ pɔŋ, faasa timiŋ yʋgɛ.”
13Ŋɩɩ nɛ Ruf bʋl, “Mɩ nɩhɩaŋ, ŋ zilmi kɩŋkɛŋ nɛ a leŋ mɩ yaraa faasa fɩɛlɛ, a tɩŋ ŋ sɩ fɩɛla bʋl wɩaa mɩ teeŋ. Mɩ paala bɩ mɩ tɩtɩa wuo kaa magɩsɛ ŋ tɩntɩnnɩ-haala-la kʋbala ma.” 14Bʋa-la sɩ yie dɩ ba dii kʋdiilee, Bʋas yɩrɛ Ruf, “Kʋ laa kʋdiilee a kaa yuu sɩ-nyalɩŋ a dii.” Ŋɩɩ nɛ ʋ kɔ ʋ dɩ tɩntɩnna-la hɔŋ, Bʋas joŋ mɩɩ-halaa pʋ, ʋ dii a vɔgɛ aŋ ka. 15Ʋ sɩ sie dɩ ʋ bɩra kuuni kɩaa, Bʋas bʋla pɩ baala-la sɩɩ tɩŋ baga-la lɛ, “Má leŋ dɩ ʋ to a kukuuni pugulo-la ma tʋɔŋ, má sɩ́ leŋe dɩ hɩɩsɩŋ kɛnʋ. 16Má gɛllɛ dɔnsʋŋ ta dɩ ʋ kuuni, má sɩ́ ʋ kiru.” 17Ŋɩɩ nɛ Ruf kuuni kɩalɩŋ baga-la lɛ ŋɩɩ deeŋ deeŋ wɩa tuu jʋʋ. Ʋ sɩ ŋmoo mɩa-la ʋ sɩ kuuno, ʋ na kuokuo-gbansɩŋ banɔŋ nɛ. 18Ʋ kaa mʋ dɩa a kaa dagɛ ʋ bala naaŋ ŋɩɩ ʋ sɩ kuuni kɩaa magɛ, aŋ pɛ joŋ kʋdii-kaana-la ʋ sɩ die aŋ ka pʋ.
19Ŋɩɩ nɛ Nawomi pɩɛsɛ Ruf, “Nɩɩ nɛ ŋ mʋ a kuuni kɩaa magɛ ŋ-la? Kʋbɛɛ baga lɛ nɛ ŋ mʋ kuuni? Wɩa jaŋ pɛ baal-la sɩ cho ŋ wɩaa a pɩŋ kɩaa magɛ ŋ-la.” Ŋɩɩ nɛ Ruf bʋla pɩ Nawomi arɩ nɩɩ-la baga lɛ ʋ sɩ mʋ kuuni kɩaa yɩrɩŋ nɛ Bʋas.
20Ŋɩɩ nɛ Nawomi bʋl, “La TƖƖNA nɩɩ beŋ nɩweyee arɩ nɩsʋʋnʋŋ kala, ʋ jaŋ pɛ Bʋas lɛ. Bʋas ŋaa mɩ bala naambii nɛ. Ʋ nɛ ŋaa nɩalɩŋ dɔŋɔ fa sɩ maga dɩ ʋ bibenla.”
21Ruf, Mʋab tɩŋŋaa tolo-la, bɩra bʋla pɩ Nawomi, “Ʋ sɩ́ dɩ mɩ pɛ tɩtɩŋ baga-la tɩntɩŋŋaa nɛ dɩ ba mʋ dɛrɛ.”
22Ŋɩɩ nɛ Nawomi bʋl, “Mɩ tolo, ʋ jaŋ ŋaa wʋzɔŋ dɩ ŋ nɛ pɛ haala-la sɩ tɩmaa pʋ lɛ dɩ ma tɩtɩŋ, bɛɛ wɩaa dɩ ŋ nɛ mʋ nʋʋ dɔŋ baga, ba jaŋ wuo ŋaaŋ wʋbɔŋ.”
23Ruf pɛ haala-la sɩ tɩmaa pɩ Bʋas lɛ a kuuni kɩaa ŋɩɩ deeŋ deeŋ ba mʋ kʋŋ mɛmpɛ-la arɩ mɩa-la dɛrɛ. Ka ba dɩ ʋ bala naaŋ ha jʋjʋʋ.
Currently Selected:
RUF 2: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014