RUF 4
4
Bʋas jaa Ruf
1Ŋɩɩ nɛ Bʋas mʋ hɔŋ ba taŋ-la boiŋ niiŋ, lee-la ba sɩɩ hilimu, dɩ Ɛlɩmɛlɛk naambile wɩaa Bʋas sɩ bʋla kʋʋ bal. Bʋas yɩrʋ, “Nandɔŋ, kʋ hɔŋ daha.” Ŋɩɩ nɛ ʋ mʋ a hɔŋ. 2Bʋas yɩrɛ taŋ-la nɩhɩasɩŋ fii ba kʋ pɛ ba lɛ. Ŋɩɩ nɛ ʋ bʋl, “Ma ma hɔŋ daha.” Ŋɩɩ nɛ ba hɔŋ. 3Ba sɩ kʋ hɔnɔ dɛrɛ, ŋɩɩ nɛ Bʋas bʋla pɩ ʋ naambile sɩ maga dɩ ʋ dii Ɛlɩmɛlɛk dʋa, “Nawomi sɩ lɩɩ Mʋab tinteeŋ kɔ, ka chɛ dɩ ʋ yallɛ la naambie Ɛlɩmɛlɛk ŋmaŋkaaŋ nɛ. 4Mɩɩ chɛ dɩ ŋ jɩŋ wɩɩŋ deeŋ lɛ nɛ, dɩ ŋ nɩɩ chɛ ŋmaŋkaa-la, laa yɔɔ nɩhɩasɩŋ deemba kala sɩ hɔŋ daha sɩpaaŋ dɩ ba na. Dɩ ŋ nɛ bɩra bɩ chɛ ma, leŋ dɩ mɩ jɩŋ. Bɛɛ wɩaa ŋ nɛ maga ŋ yɔɔ ŋmaŋkaaŋ deeŋ, a lɩɩ ŋ harɩŋ mɩ ma nɛ tɩga.” Ŋɩɩ nɛ baal-la bʋl, “Mɩ jaŋ yɔɔ.” 5Bʋas sɩ, “Ŋ wasa nɛ, ta jɩŋ, dɩ ŋ nɛ yɔɔ ŋmaŋkaa-la Nawomi teeŋ, ŋɩɩ daga arɩ ŋ nɛ tɩɩ Ruf ma, Mʋab tɩŋŋaa tolo-la bala sɩ sʋba, dɩ ŋmaŋkaa-la hɛ nɩsʋʋ-la dɩa nɩaa nɩsɩŋ lɛ.”
6Ŋɩɩ nɛ baal-la bʋl, “Dɩ ŋɩɩ-na nɛ mɩ bɩ jaŋ yɔɔ ŋmaŋkaa-la, bɛɛ wɩaa, ŋɩɩ daga dɩ mɩ nɛ sʋba, mɩ biiriŋ bɩ ŋmaŋkaa-la wuo tɩɩ. Laa yɔɔ, mɩ-na bɩ jaŋ wuo.”
7Faafaa-la Iziral tɩŋŋaa naabarɩŋ lɛ, dɩ nʋʋ nɛ maga dɩ ʋ yɔɔ nɩsʋʋŋ kɩaa aŋ vɩa ka nʋʋ dɔŋ laa yʋyɔɔ, nɩɩ-la sɩ vɩa maga dɩ ʋ chaarɛ ʋ nɛntɛŋŋɛɛ pɩ nɩɩ-la sɩ laa yʋyɔɔ nɛ. Dɩ ʋ nɛ ŋaa ŋɩɩ, wɩɩ-la wasa nɛ ŋɩɩ.
8Ŋɩɩ nɛ baal-la bʋla pɩ Bʋas, “Ŋ tɩtɩa laa ŋmaŋkaa-la yɔɔ,” aŋ chaarɛ ʋ nɛntɛŋŋɛɛ pɩ Bʋas.
9Ŋɩɩ nɛ Bʋas bʋla pɩ nɩhɩasɩ-la arɩ nɩalɩŋ kala fa sɩ hɛ nɩmɛ, “Jɩnɩŋ ma kala pɛ na nɛ arɩ mɩ nɛ yɔɔ Ɛlɩmɛlɛk arɩ ʋ biiriŋ Kilioŋ arɩ Malɔŋ dʋa kala Nawomi teeŋ. 10A lɩɩ ŋɩɩ harɩŋ, Ruf, Mʋab tɩŋŋaa tolo-la Malɔŋ fa sɩ jaa, ma lɛɛlɛ ŋaa mɩ haala nɛ. Ŋɩɩ nɛ jaŋ leŋ dɩ nɩsʋʋ-la yɩrɩŋ sɩ́ lɛl ʋ nɩaa tʋɔŋ, dɩ ʋ dʋa ma hɛ ba nɩsɩŋ lɛ. Jɩnɩŋ ma ŋaa pɛ-naara nɛ wɩɩŋ deeŋ lɛ.”
11Ŋɩɩ nɛ nɩhɩasɩ-la arɩ nɩalɩŋ kala sɩ hilimi taŋ-la boi-baalɩŋ niiŋ bʋl, “Oo, la pɛ na nɛ, La TƖƖNA jaŋ pɛ ŋ haal-la lɛ dɩ ʋ nagɛ Rakɛl arɩ Liya sɩ lʋl biiriŋ yʋgɛ ŋɩɩ a pɩ Jekɔb doho nɩaa. Wɩa jaŋ leŋ dɩ ŋ kɛŋ yɩrɩŋ Ɛfɩraf doho nɩaa tʋɔŋ a ŋaa nɩbal Bɛtɩlɛhɛm lɛ. 12La TƖƖNA jaŋ leŋ dɩ biiri-la tol-bie deeŋ sɩ jaŋ lʋla pɩŋ nagɛ Pɛrɛs, bile Tama sɩ lʋla pɩ Juda.” 13Ŋɩɩ nɛ Bʋas jaa Ruf ba pɛ bɔsɔ, La TƖƖNA pɛ Ruf lɛ ʋ kɛŋ luoruŋ a lʋl hambolibie. 14Ŋɩɩ nɛ haalaa bʋla pɩ Nawomi, “Dɛnnɛ La TƖƖNA, jɩnɩŋ ʋ pɩŋ nihiŋ nɛ dɩ ʋ beniŋ. Wɩa jaŋ leŋ dɩ bie deeŋ kɛŋ yɩrɩŋ Iziral tinteeŋ lɛ. 15Ŋ bii-haala choŋ nɛ, ʋ paala kɩɩ hambolibiisiŋ balɩpɛ. Lɛɛlɛ ʋ lʋl nihiŋ sɩ jaŋ leŋ dɩ wɩaa bɩra zɔmɔ pɩŋ nɛ ŋ mɩɩsɩŋ lɛ, dɩ ŋ nɛ kʋ hɩɛsɛ ma ʋ jaŋ bibeniŋ.”
16Ŋɩɩ nɛ Nawomi joŋ bile hɛ ʋ naasɩŋ lɛ, a bibeŋ ʋ nyuŋ woruŋ. 17Haala-la sɩ hɛ lee-la hɛ bile yɩrɩŋ Ɔbɛd, aŋ bʋla pɩ nʋʋkala arɩ ba lʋl hambolibie nɛ a pɩ Nawomi. Ɔbɛd nɛ sii lʋl Jesi, Jesi ma lʋl Devit. 18Pɛrɛs doho nɩaa nɛ ŋ-la: Pɛrɛs nɛ lʋl Hɛzɩrɔŋ. 19Hɛzɩrɔŋ ma nɛ lʋl Ram. Ram ma nɛ lʋl Amɩnadab. 20Amɩnadab ma lʋl Nasɔŋ. Nasɔŋ ma nɛ lʋl Salɩmɔŋ. 21Salɩmɔŋ ma nɛ lʋl Bʋas. Bʋas ma nɛ lʋl Ɔbɛd. 22Ɔbɛd ma nɛ lʋl Jesi. Jesi ma nɛ lʋl Devit.
Currently Selected:
RUF 4: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014