RUF 1
1
Nawomi arɩ Ruf
1Bʋa-la lɛ kuoroo fa sɩ tuo Iziral tinteeŋ lɛ ka bawajɩaba bibemba, losu-kʋbala nɛ fa jʋa. Ŋɩɩ nɛ baal kʋbala sɩ ŋaa Bɛtɩlɛhɛm tɩɩna a lɩɩ Juda tinteeŋ, ʋ dɩ ʋ haala arɩ ʋ hambolibiisiŋ balɩa sii mʋ dɩ ba hɔŋ Mʋab tinteeŋ lɛ mʋa. 2Baal-la yɩrɩŋ nɛ Ɛlɩmɛlɛk, ʋ haala ma yɩrɩŋ nɛ Nawomi. Ʋ hambolibiisi-la ma yɩraa nɛ Malɔŋ arɩ Kilioŋ. Ba kala ŋaa Ɛfɩraf tɩŋŋaa nɛ a lɩɩ Bɛtɩlɛhɛm sɩ hɛ Juda tinteeŋ. Ŋɩɩ nɛ ba mʋ hɔŋ Mʋab tinteeŋ lɛ.
3Ŋɩɩ nɛ Ɛlɩmɛlɛk sʋʋ, aŋ ka Nawomi arɩ ʋ hambolibiisi-la balɩa. 4Ʋ hambolibiisi-la jaa Mʋab tɩŋŋaa toloo. Tolie-la dɔŋɔ yɩrɩŋ nɛ Opa, dɔŋɔ ma yɩrɩŋ nɛ Ruf. Ŋɩɩ nɛ ba hɛ nɩmɛ ŋɩɩ a mʋ yi jɩsɩŋ fii, 5Malɔŋ arɩ Kilioŋ ma sʋʋ, aŋ ka Nawomi dʋndʋŋa. Ʋ bɩ bala kɛnɛ, ʋ bɩ bii ma kɛnɛ. 6Nawomi sɩ hɛ Mʋab lɛ aŋ nɩɩ arɩ La TƖƖNA pɛ ʋ nɩaa lɛ nɛ ba na kʋdiilee, ʋ dɩ ʋ bii-haalaa kɛŋ ba tɩtɩa hɛ dɔŋɔ dɩ ba mɩɩra mʋ ʋ jaŋ. 7Ŋɩɩ nɛ ʋ dɩ ʋ bii-haalaa kala sii lee-la ba fa sɩ hɔnɔ, a lɩɩ joŋ wombiiŋ dɩ ba mɩɩra mʋ Juda tinteeŋ.
8Ŋɩɩ nɛ Nawomi bʋla pɩ ʋ bii-haala-la balɩa, “Má mɩɩra mʋ ma naamba teeŋ, La TƖƖNA jaŋ kɛmma woruŋ arɩ ma sɩ kɛmmɛ arɩ nɩalɩŋ sɩ sʋba woruŋ ŋɩɩ. 9La TƖƖNA jaŋ pɛ ma lɛ dɩ ma na balaba a jaa, a hɔŋ arɩ yarɩfɩɛlaa.” Ŋɩɩ harɩŋ, ʋ guoriba a taba dɩ ba viiri, ba faasa yel a bʋl, 10“La jaŋ to ŋ harɩŋ a mʋ ŋ nɩaa teeŋ.”
11Ŋɩɩ nɛ Nawomi bʋla pɩba, “Mɩ toloo, má mɩɩra mʋ ma jaŋ. Bɛɛ nɛ tɩɩ maa chɛ dɩ ma to mɩ harɩŋ mʋ? Ma bɩɩna mɩ jaŋ bɩra wuo lʋl hambolibiisiŋ pɩma dɩ ma jaa? 12Mɩ toloo, má mɩɩra mʋ ma jaŋ, mɩ hɩɛsa nɛ arɩ mɩ sɩ jaŋ bɩra jaa bala a lʋl biiriŋ. Dɩ mɩ nɛ paala jaa bala tɩtaŋɩŋ deeŋ a lʋl hambolibiisiŋ ma, 13ma jaŋ wuo gbɛrɛ dɩ ba waa? Ma jaŋ tɩŋ ba wɩaa a sɩ́ balaba jaa? Mɩ toloo, aɩ, ŋɩɩ bɩ jaŋ ŋaa. Wɩɩ-la wɩɩmɛ a kɩkɩɩma, bɛɛ wɩaa La TƖƖNA vɩamɛ nɛ.”
14Nawomi sɩ bʋl wɩɩŋ deeŋ, ba bɩra yel, ŋɩɩ nɛ Opa-na guori ʋ bala naaŋ a taʋ aŋ mɩɩra mʋ dɩa, ka Ruf-na vɩa aŋ mɛrɛ ʋ lɛ.
15Ŋɩɩ nɛ Nawomi bɩra bʋla pɩ Ruf, “Bee na, ŋ tol-dɔŋɔ mɩɩra nɛ a mʋ ʋ nɩaa arɩ ʋ vesiŋ teeŋ, ŋ ma mɩɩrɛ dɩ ma mʋ.”
16Ama Ruf ma sɩ, “Sɩ́ mɩ kiru ŋ harɩŋ. Lee-la kala ŋ sɩɩ mʋ, mɩ ma jaŋ mʋ, lee-la kala ŋ sɩ jaŋ hɛ, mɩ ma jaŋ hɛ nɩmɛ. Ŋ nɩaa jaŋ ŋaa mɩ nɩaa, dɩ ŋ Wɩa ma ŋaa mɩ Wɩa. 17Lee-la ŋ sɩ jaŋ sʋʋ, nɩmɛ nɛ mɩ ma jaŋ sʋʋ dɩ ba hugimi nɩmɛ. A leŋ dɩ La TƖƖNA dɔgɩsɛmɛ dɩ mɩ nɛ mɩɩrɛ ŋ harɩŋ, see sʋʋŋ nɛ jaŋ kɛnla pɔrɛ.” 18Nawomi sɩ na dɩ Ruf chaasa kɛŋ ʋ tɩtɩa hɛ dɔŋɔ nɛ dɩ ʋ to ʋ harɩŋ, ʋ leŋu ʋ bɩra bɩ ʋ kire.
19Ŋɩɩ nɛ ba to dɔŋɔ a mʋ Bɛtɩlɛhɛm. Ba sɩ mʋ yi nɩmɛ, taŋ-la nɩaa hihirigi, haalaa ŋaa goŋ a pɩpɩɛsɛ, “Nawomi nɛ ŋ-la?” 20Nawomi bʋla pɩba, “Má bɩra sɩ́ mɩ Nawomi yɩrʋ, ma yɩyɩrɛmɛ Mara, bɛɛ wɩaa La TƖƖNA doluŋ kala Tɩɩna leŋe mɩ na hɛɛŋ nɛ woruŋ.” (Nawomi bʋbʋɔŋ nɛ kʋzɔmʋŋ, Mara ma bʋbʋɔŋ nɛ kʋhaaŋ.) 21Mɩɩ lɩɩ daha dɩ mɩ nɩsɩŋ kala suo nɛ, aŋ ka La TƖƖNA mɩɩra kɛmmɛ kɔ arɩ na-hɩllɩŋ. Bɛɛ nɛ saa tɩɩ ma ha jaŋ yɩyɩrɛmɛ Nawomi? La TƖƖNA doluŋ kala Tɩɩna joŋ wʋwalɩmaa a hɛ mɩ lɛ nɛ.
22Nawomi arɩ ʋ bii-haala Ruf lɩɩ Mʋab tinteeŋ a kɔ Bɛtɩlɛhɛm dɩ ba mɩɩ-bumbumba kʋmʋŋ yie yi.
Currently Selected:
RUF 1: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014