Rom Tɩŋŋaa 12
12
Wɩɩ-chʋɔlʋŋ wombii-tɩtɩɩ-la
1Ŋɩɩ wɩaa, mɩ naambiiriŋ, a tɩŋ Wɩa sɩ faasa fá la nenige wɩaa, mɩɩ sʋlma dɩ ma joŋ ma mɩɩsɩŋ kala a pɩ Wɩa, arɩ ba fa sɩ yie kpʋ pʋsʋŋ a ŋaa Wɩɩsʋlʋŋ pɩ Wɩa ŋɩɩ. Ma sɩ joŋ ma tɩtɩa a pɩ Wɩa ŋɩɩ, ma bɩra sɩ́ disiniŋ kɛŋ, dɩ Wɩa wuo laama. Wɩɩ-chʋɔlʋŋ wombiiŋ tɩtɩa nɛ ŋɩɩ. 2Má sɩ́ ma nyuŋ joŋo hɛ dʋnɩa wʋŋaalaa lɛ. Ama má leŋ dɩ Wɩa kɛŋ ma tʋɔbɩɩnaa bɩrɩmɛ dɩ ba zɔŋ. Ŋɩɩ lɛ nɛ ma jaŋ wuo jɩŋ wɩɩ-la Wɩa sɩɩ chɛ. Ma jaŋ wuo jɩŋ wɩɩ-la sɩ zɔmɔ aa tɔrɛ Wɩa tʋɔŋ aŋ pɛ zɔŋ ma woruŋ.
3Wɩa sɩ kɛŋ zile ŋɩɩ mɩ teeŋ, mɩɩ sʋl ma kʋŋkala dɩ ma sɩ́ ma tɩtɩa kaa yʋgɛ a kɩɩ ŋɩɩ ma sɩ maga. Má leŋ dɩ ma sɩaa fɩɛlɛ. Wɩa pɩ nʋʋkala laa diiniŋ nɛ. Ama ba kɩɩ dɔŋɔ nɛ. Nʋʋkala maga dɩ ʋ bɩɩnɛ ʋ nyuŋ lɛ a magɛ ŋɩɩ Wɩa sɩ leŋe ʋ kɛŋ laa diiniŋ. 4Nuhuobiine yaraa ŋaa kʋbala nɛ, ka ʋ nandaasɩŋ yʋgɛ. Nandaasɩ-la kala kɛŋ ba tɩntɩmɩa nɛ. Ba bɩ tɩntɩŋ-bala ka tɩŋ. 5Ŋɩɩ tɩtɩa nɛ la ma nagɛ. La yʋga nɛ, aŋ ka la kala mɛrɛ Kirisito lɛ a ŋaa kʋbala. La ŋaa nɩ-dabaŋ dabamba nɛ a mɛrɛ dɔŋɔ lɛ a ŋaa yarɩ-bala. 6Wɩa pɩla kʋŋkala doluŋ nɛ dɩ la kaa tɩŋ tɩntɩŋ dabaŋ dabamba. Ʋ saa lɩɩ ŋɩɩ lɛ Wɩa sɩ dii zile la lɛ nɛ. Dɩ Wɩa nɛ pɩ nʋʋ doluŋ dɩ ʋ wuo bʋl ʋ wɩaa pɩpɩ nɩaa ʋ Dɩŋ-zɔmʋŋ doluŋ lɛ, má leŋ dɩ ʋ magɛ laa diine-la Wɩa sɩ joŋo pʋ lɛ. 7Dɩ ʋ nɛ joŋ doluŋ pɩŋ dɩ ŋ tɩma pɩpɩ nɩaa, ŋɩŋaa ŋɩɩ. Dɩ ʋ nɛ joŋ doluŋ pɩŋ dɩ ŋ dɩdagɛ nɩaa, ŋ ma ŋɩŋaa ŋɩɩ. 8Dɩ ŋ nɛ kɛŋ doluŋ dɩ ŋ wuo dɩdagɛ nɩaa a leŋ dɩ ba nyuŋ nyɩnyaasɛ, ŋ ma ŋɩŋaa ŋɩɩ. Dɩ nʋʋ nɛ kɛŋ zile a pɩpɛ nɩaa lɛ, ʋ ma ŋɩŋaa ŋɩɩ arɩ tʋɔ-bala. Dɩ ŋ nɛ ŋaa sɩpaalaarʋ, tɩtɩŋ arɩ sɩɩfɩɛsɩŋ. Dɩ ŋ nɛ kɛŋ doluŋ a fɩfá nɩaa nenige, ŋɩŋaa ŋɩɩ arɩ tʋɔtɔrʋŋ.
9Má cho dɔŋɔ arɩ wʋtɩtɩɩ. Má bɛrɛ wʋbɔŋŋɔɔ, aŋ joŋ ma tɩtɩa hɛ wʋzɔŋŋɔɔ ŋaanɩŋ lɛ. 10Má cho ma dɔnsʋŋ tɩŋŋaa sɩ laa Wɩa wɩaa dii woruŋ arɩ naambiiriŋ sɩ cho dɔŋɔ ŋɩɩ, a zizil dɔŋɔ. 11Má sɩ́ yarɩwɩɩŋ kɛŋ, ama má faasa joŋ ma nyuŋ kala hɛ La Tɩɩna tɩntɩŋŋaa lɛ, Wɩa Dɩŋ-zɔmʋŋ doluŋ lɛ. 12Má jʋjʋɔsɛ a tɩŋ wɩalɩŋ ma sɩɩ yɩɛlʋ lɛ. Dɩ ma nɩɩ na hɛɛŋ, má dii kenyiri. Má pɛsɛ a chʋchʋɔlɛ Wɩa. 13Má pɛ ma naambiiriŋ sɩ laa Wɩa wɩaa dii lɛ arɩ kɩalɩŋ ba sɩɩ chɛ, aa kɛŋ nʋhʋɔraa woruŋ.
14Má sʋl Wɩa dɩ ʋ pɛ nɩalɩŋ sɩ to naasɩŋ dʋdɔgɩsɛma lɛ, aŋ sɩ́ kalɩba hɛ ba lɛ. 15Dɩ nɩaa tʋɔŋ nɛ tɔrɔ, ŋ ma leŋ dɩ ŋ tʋɔŋ tɔrɛ, dɩ nɩaa tʋɔŋ nɛ cheye, ŋ ma chɩl ba tʋɔ-cheeŋ wɩaa. 16Má chɩl dɔŋɔba wɩaa, má sɩ́ ma tɩtɩa kaa yʋgɛ. Má kɛŋ ma tɩtɩa mɛrɛ nɩalɩŋ sɩ bɩ nɩbala ŋaa lɛ. Má sɩ́ bɩɩna arɩ ma kɛŋ wʋjɩmɩŋ. 17Dɩ nʋʋ nɛ ŋaa wʋbɔŋ ma lɛ, ma-na sɩ́ wʋbɔmʋŋ joŋo timu. Ama má-na ŋaa wɩɩ-la nʋʋkala sɩ jɩma dɩ ʋ zɔmɔ. 18Dɩ ma nɛ wuolo, má leŋ dɩ ma dɩ nʋʋkala sɩŋ. 19Mɩ nandɔsɛ, dɩ nɩaa nɛ ŋaa wʋbɔŋŋɔɔ ma lɛ, má sɩ́ ba chɩmɩŋ tiŋ. Má leŋ dɩ Wɩa nɛ na baanɩŋ ba nyuŋ, a tiŋ ba chɩmɩŋ. Ba ŋmʋnsɛ ŋɩɩ Wɩa teniŋ tʋɔŋ arɩ Wɩa sɩ,
“Mɩ jaŋ laa yuo pɩma, a tiŋ ma chɩmɩŋ.”
20“Ama dɩ losuŋ nɛ kɛŋ ŋ dʋndɔmɔ, ŋaa kʋdiilee pʋ,
dɩ lɩɩnyʋasʋŋ ma nɛ kɛnʋ, ŋaa lɩɩŋ pʋ dɩ ʋ nyʋa.
Dɩ ŋ nɛ wuo ŋaa ŋɩɩ, hɩɩsɩŋ jaŋ kɛnʋ kɩŋkɛŋ.”
21Má sɩ́ leŋe dɩ wʋbɔŋŋɔɔ ŋaanɩŋ wuoma. Ama má leŋ ma wʋzɔŋŋɔɔ yuo dii ma wʋbɔŋŋɔɔ.
Currently Selected:
Rom Tɩŋŋaa 12: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
