Popular Bible Verses from Rom Tɩŋŋaa 12

Share

Má sɩ́ ma nyuŋ joŋo hɛ dʋnɩa wʋŋaalaa lɛ. Ama má leŋ dɩ Wɩa kɛŋ ma tʋɔbɩɩnaa bɩrɩmɛ dɩ ba zɔŋ. Ŋɩɩ lɛ nɛ ma jaŋ wuo jɩŋ wɩɩ-la Wɩa sɩɩ chɛ. Ma jaŋ wuo jɩŋ wɩɩ-la sɩ zɔmɔ aa tɔrɛ Wɩa tʋɔŋ aŋ pɛ zɔŋ ma woruŋ.

Ŋɩɩ wɩaa, mɩ naambiiriŋ, a tɩŋ Wɩa sɩ faasa fá la nenige wɩaa, mɩɩ sʋlma dɩ ma joŋ ma mɩɩsɩŋ kala a pɩ Wɩa, arɩ ba fa sɩ yie kpʋ pʋsʋŋ a ŋaa Wɩɩsʋlʋŋ pɩ Wɩa ŋɩɩ. Ma sɩ joŋ ma tɩtɩa a pɩ Wɩa ŋɩɩ, ma bɩra sɩ́ disiniŋ kɛŋ, dɩ Wɩa wuo laama. Wɩɩ-chʋɔlʋŋ wombiiŋ tɩtɩa nɛ ŋɩɩ.

Má jʋjʋɔsɛ a tɩŋ wɩalɩŋ ma sɩɩ yɩɛlʋ lɛ. Dɩ ma nɩɩ na hɛɛŋ, má dii kenyiri. Má pɛsɛ a chʋchʋɔlɛ Wɩa.

Má sɩ́ leŋe dɩ wʋbɔŋŋɔɔ ŋaanɩŋ wuoma. Ama má leŋ ma wʋzɔŋŋɔɔ yuo dii ma wʋbɔŋŋɔɔ.

Má cho ma dɔnsʋŋ tɩŋŋaa sɩ laa Wɩa wɩaa dii woruŋ arɩ naambiiriŋ sɩ cho dɔŋɔ ŋɩɩ, a zizil dɔŋɔ.

Má cho dɔŋɔ arɩ wʋtɩtɩɩ. Má bɛrɛ wʋbɔŋŋɔɔ, aŋ joŋ ma tɩtɩa hɛ wʋzɔŋŋɔɔ ŋaanɩŋ lɛ.

Dɩ ma nɛ wuolo, má leŋ dɩ ma dɩ nʋʋkala sɩŋ.

Mɩ nandɔsɛ, dɩ nɩaa nɛ ŋaa wʋbɔŋŋɔɔ ma lɛ, má sɩ́ ba chɩmɩŋ tiŋ. Má leŋ dɩ Wɩa nɛ na baanɩŋ ba nyuŋ, a tiŋ ba chɩmɩŋ. Ba ŋmʋnsɛ ŋɩɩ Wɩa teniŋ tʋɔŋ arɩ Wɩa sɩ, “Mɩ jaŋ laa yuo pɩma, a tiŋ ma chɩmɩŋ.”

Má sɩ́ yarɩwɩɩŋ kɛŋ, ama má faasa joŋ ma nyuŋ kala hɛ La Tɩɩna tɩntɩŋŋaa lɛ, Wɩa Dɩŋ-zɔmʋŋ doluŋ lɛ.

Wɩa sɩ kɛŋ zile ŋɩɩ mɩ teeŋ, mɩɩ sʋl ma kʋŋkala dɩ ma sɩ́ ma tɩtɩa kaa yʋgɛ a kɩɩ ŋɩɩ ma sɩ maga. Má leŋ dɩ ma sɩaa fɩɛlɛ. Wɩa pɩ nʋʋkala laa diiniŋ nɛ. Ama ba kɩɩ dɔŋɔ nɛ. Nʋʋkala maga dɩ ʋ bɩɩnɛ ʋ nyuŋ lɛ a magɛ ŋɩɩ Wɩa sɩ leŋe ʋ kɛŋ laa diiniŋ.

Dɩ nʋʋ nɛ ŋaa wʋbɔŋ ma lɛ, ma-na sɩ́ wʋbɔmʋŋ joŋo timu. Ama má-na ŋaa wɩɩ-la nʋʋkala sɩ jɩma dɩ ʋ zɔmɔ.

Má chɩl dɔŋɔba wɩaa, má sɩ́ ma tɩtɩa kaa yʋgɛ. Má kɛŋ ma tɩtɩa mɛrɛ nɩalɩŋ sɩ bɩ nɩbala ŋaa lɛ. Má sɩ́ bɩɩna arɩ ma kɛŋ wʋjɩmɩŋ.

“Ama dɩ losuŋ nɛ kɛŋ ŋ dʋndɔmɔ, ŋaa kʋdiilee pʋ, dɩ lɩɩnyʋasʋŋ ma nɛ kɛnʋ, ŋaa lɩɩŋ pʋ dɩ ʋ nyʋa. Dɩ ŋ nɛ wuo ŋaa ŋɩɩ, hɩɩsɩŋ jaŋ kɛnʋ kɩŋkɛŋ.”

Má sʋl Wɩa dɩ ʋ pɛ nɩalɩŋ sɩ to naasɩŋ dʋdɔgɩsɛma lɛ, aŋ sɩ́ kalɩba hɛ ba lɛ. Dɩ nɩaa tʋɔŋ nɛ tɔrɔ, ŋ ma leŋ dɩ ŋ tʋɔŋ tɔrɛ, dɩ nɩaa tʋɔŋ nɛ cheye, ŋ ma chɩl ba tʋɔ-cheeŋ wɩaa.

Má pɛ ma naambiiriŋ sɩ laa Wɩa wɩaa dii lɛ arɩ kɩalɩŋ ba sɩɩ chɛ, aa kɛŋ nʋhʋɔraa woruŋ.

Nuhuobiine yaraa ŋaa kʋbala nɛ, ka ʋ nandaasɩŋ yʋgɛ. Nandaasɩ-la kala kɛŋ ba tɩntɩmɩa nɛ. Ba bɩ tɩntɩŋ-bala ka tɩŋ. Ŋɩɩ tɩtɩa nɛ la ma nagɛ. La yʋga nɛ, aŋ ka la kala mɛrɛ Kirisito lɛ a ŋaa kʋbala. La ŋaa nɩ-dabaŋ dabamba nɛ a mɛrɛ dɔŋɔ lɛ a ŋaa yarɩ-bala.