NAMBABA 9
9
La TƖƖNA dɩɩsɩŋ kiele bal gbiele
1La TƖƖNA bʋl wɩaa pɩ Mosis Sɩnaɩ tintee-hɩlɩɩ-la lɛ, Iziral tɩŋŋaa sɩ lɩɩ Ijipiti tinteeŋ lɛ jɩ-lɩa tʋɔŋ chɛŋ-bumbuŋ. Ʋ sɩ, 2“Bʋla pɩ Iziral tɩŋŋaa dɩ ba gbieli mɩ dɩɩsɩŋ kiele bal gbiele-la bʋa-la lɛ mɩ sɩ daga. 3Má gbieli gbiele-la chɛŋ-bumbuŋ deeŋ tʋɔŋ tapʋlaa fii arɩ banɛsɛ chɛɛŋ wɩɩ-mul-jʋʋlʋŋ, a to wɩalɩŋ kala sɩ maga.” 4Ŋɩɩ nɛ Mosis bʋla pɩ Iziral tɩŋŋaa arɩ ba gbieli La TƖƖNA dɩɩsɩŋ kiele bal gbiele-la. 5Ŋɩɩ nɛ ba gbieli gbiele-la Sɩnaɩ tintee-hɩlɩɩ-la lɛ chɛŋ-bumbuŋ tʋɔŋ tapʋl fii arɩ banɛsɛ chɛɛŋ wɩɩ-mul-jʋʋlʋŋ, a ŋaa wɩalɩŋ kala arɩ ŋɩɩ La TƖƖNA sɩ dagɛ Mosis.
6Ama Iziral tɩmma-la dɔnsʋŋ bɩ wuo gbieli gbiele-la, bɛɛ wɩaa ba fa kɛŋ disiniŋ nɛ, a tɩŋ ba sɩ digi sʋʋŋ. Ŋɩɩ nɛ ba sii kɔ Mosis arɩ Arɔŋ teeŋ tapʋlɩɩ-la tɩtɩa, 7a pɩɛsɛ Mosis, “La kɛŋ disiniŋ nɛ a tɩŋ la sɩ digi sʋʋŋ, ama ɛɛ nɛ la ma jaŋ ŋaa a wuo kɛŋ la Wɩɩsʋlʋŋ kɩaa kʋ pɩ La TƖƖNA bʋa-la lɛ sɩ maga arɩ Iziral tɩŋŋaa dɔnsʋŋ sɩ kɛŋ ba Wɩɩsʋlʋŋ kɩaa kɔ ŋɩɩ?” 8Ŋɩɩ nɛ Mosis bʋla pɩba, “Má gbɛrɛ, ka mɩ pɩɛsɛ La TƖƖNA a na wɩɩ-la ʋ sɩɩ chɛ dɩ ma ŋaa.” 9Ŋɩɩ nɛ La TƖƖNA bʋla pɩ Mosis, 10“Bʋla pɩ Iziral tɩŋŋaa, dɩ ba dɔŋɔ koo ba doho nɩalɩŋ sɩ jaŋ to ba harɩŋ kɔ dɔŋɔ nɛ kɛŋ disiniŋ a tɩŋ ʋ sɩ digi sʋʋŋ, koo dɩ ʋ paala vɛŋ wombiiŋ ma aŋ ha chɩchɛ dɩ ʋ gbieli mɩ dɩɩsɩŋ kiele bal gbiele-la, ʋ jaŋ wuo gbieli. 11Ba maga ba gbieli gbiele-la chɛŋ-lɩa tʋɔŋ tapʋl-fii arɩ banɛsɛ chɛɛŋ wɩɩ-mul-jʋʋlʋŋ. Ba jaŋ chaŋ gbiele-la pie-bie nammɩa aŋ dii boroboro sɩ bɩ sɩbʋrʋŋ kɛnɛ arɩ pɩpaa-haarɩŋ. 12Ba bɩ maga dɩ ba chaŋ nammɩa-la aŋ ka dɩ ʋ chɩna chʋa, nammɩa-la haŋgbel ma bɩ maga dɩ ʋ yɛrɛ. Dɩ ba nɩɩ gbieli gbiele deeŋ, ʋ maga dɩ ba to wɩalɩŋ kala sɩ maga nɛ. 13Ama dɩ nʋʋ nɛ bɩ disiniŋ kɛnɛ, a bɩ wombiiŋ ma vɛnɛ aŋ vɩa dɩ ʋ gbieli gbiele-la, ʋ maga dɩ ma keri tɩɩna ta nɛ ʋ nɩaa tʋɔŋ, bɛɛ wɩaa ʋ vɩa dɩ ʋ kɛŋ gbiele-la Wɩɩsʋlʋŋ kɩaa kʋ pɩmɛ nɛ bʋa-la sɩ maga lɛ. Tɩɩna maga dɩ ʋ na hɛɛŋ nɛ a tɩŋ wʋbɔŋ-la ʋ sɩ ŋaa wɩaa. 14Dɩ nɩwogo nɛ hɛ ma tʋɔŋ a chɩchɛ dɩ ʋ pɛ gbieli mɩ-na ma TƖƖNA dɩɩsɩŋ kiele bal gbiele-la, ʋ maga dɩ ʋ to wɩalɩŋ kala sɩ maga nɛ. Wɩalɩŋ Iziral tɩŋŋaa sɩ jaŋ to tɩtɩa nɛ nɩwogusuŋ ma maga dɩ ba to.”
Duoŋ-bɩlɩmbaanɩŋ kʋ chɩŋ Wɩa dɩ-zɔŋ-la nyuŋ
15Tapʋlɩɩ-la ba sɩ pɛ Wɩa dɩ-zɔŋ-la, lɛbɩ-la lɛ Wɩa niiriŋ daga-la sɩ hɛ a dɛrɛ, duoŋ-bɩlɩmbaanɩŋ kʋ tuu tɔ lɛbɩ-la, a chɩŋ dɩdaanɩŋ a kaa mʋ chʋchʋɔŋ. 16Duoŋ-bɩlɩmbaaŋ-la tɔ ŋɩɩ nɛ bʋa-la kala lɛ, tɩtaŋɩŋ ʋ nagɛ nyiniŋ. 17Dɩ duoŋ-bɩlɩmbaaŋ-la nɛ sii Wɩa dɩ-zɔŋ-la nyuŋ, Iziral tɩŋŋaa ma yie sii nɛ a vɩvɛŋ. Dɩ ʋ nɛ mʋ chɩŋ lee-kala, ba ma ŋmoo ba buguŋ nɩmɛ. 18Dɩ La TƖƖNA nɛ sɩ Iziral tɩŋŋaa sii, ba yie sii nɛ a vɩvɛŋ, dɩ ʋ nɛ bɩra sɩ ba hɔŋ, ba hɔŋ. Dɩ duoŋ-bɩlɩmbaaŋ-la nɛ chɩŋ Wɩa dɩ-zɔŋ-la nyuŋ, ba ma yie hɔŋ nɛ. 19Dɩ duoŋ-bɩlɩmbaaŋ-la nɛ diene Wɩa dɩ-zɔŋ-la nyuŋ, Iziral tɩmma-la ha yie to La TƖƖNA niiŋ nɛ a bɩ lee-la ka sii. 20Bʋa dɔŋɔ lɛ duoŋ-bɩlɩmbaaŋ-la yie hɛ Wɩa dɩ-zɔŋ-la nyuŋ tapʋlaa baŋmɛnɛ aŋ sii. Dɩ La TƖƖNA nɛ sɩ ba hɔŋ, ba yie hɔŋ nɛ, dɩ ʋ nɛ bɩra sɩ ba sii, ba sii. 21Bʋa dɔŋɔ lɛ duoŋ-bɩlɩmbaaŋ-la yie tɔ Wɩa dɩ-zɔŋ-la a lɩɩ dɩdaanɩŋ a kaa mʋ chʋchʋɔŋ, ʋ sii, ba ma sii. Dɩ duoŋ-bɩlɩmbaaŋ-la nɛ sii Wɩa dɩ-zɔŋ-la nyuŋ tɩtaŋɩŋ koo wɩɩhɛyɛ ma, ba yie sii nɛ. 22Dɩ duoŋ-bɩlɩmbaaŋ-la nɛ chɩŋ Wɩa dɩ-zɔŋ-la nyuŋ tapʋlaa balɩa koo chɛnɛ koo jɩna, Iziral tɩmma-la ma yie hɔŋ ba buguŋ lɛ nɛ, ba bɩ sii. Ama dɩ ʋ nɛ sie, ba ma yie sii nɛ. 23Dɩ La TƖƖNA nɛ sɩ ba sii, ba yie sii nɛ, dɩ ʋ nɛ bɩra sɩ ba hɔŋ, ba hɔŋ. Ba to La TƖƖNA niiŋ nɛ a ŋaa wɩalɩŋ kala ʋ sɩ to Mosis lɛ a dagɛba.
Currently Selected:
NAMBABA 9: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
