NAMBABA 10
10
Ba kɛŋ hɔpʋla libi banyilliŋ
1La TƖƖNA bʋla pɩ Mosis, 2“Kɛŋ hɔpʋla libi banyilliŋ balɩa, a kɛmba ŋmʋʋ a yɩrɛ Iziral tɩŋŋaa kʋ hɩhɛ dɔŋɔ, aŋ bɩra kɛmba ŋmʋʋ a bʋla pɩpɩba bʋa-la lɛ sɩ maga dɩ ba sii ba dɩhɔnʋŋ. 3Dɩ ba nɛ ŋmʋʋ banyilli-la kala balɩa, Iziral tɩŋŋaa kala maga ba kʋ hilimi ŋ sɩpaaŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ nɛ. 4Ama dɩ kʋbala nɛ ba ŋmʋʋ, Iziral tɩŋŋaa doho doho sɩpaalaara-la dʋndʋŋa nɛ maga ba kʋ hilimi ŋ sɩpaaŋ. 5Dɩ ba nɛ faasa ŋmʋʋ banyile-la dɔŋɔ, Iziral doho doho-la sɩ hɛ wɩɩpɔsʋŋ dɩɩrɩŋ jaŋ sii ba dɩhɔnʋŋ. 6Dɩ ba nɛ bɩra faasa ŋmʋʋ banyile-la dɔŋɔ lɩa, Iziral doho doho-la sɩ hɔŋ wɩɩpɔsʋŋ nadiiŋ dɩɩrɩŋ ma nɛ jaŋ sii ba dɩhɔnʋŋ. Dɩ ba nɛ fɩɛla ŋmʋʋ banyile-la, ba jaŋ sii ba bugoo lɛ. 7Dɩ ŋ nɩɩ chɛ ŋ yɩrɛ Iziral tɩŋŋaa kala kʋ hɛ dɔŋɔ, ŋ jaŋ faasaa ŋmʋʋ banyilli-la.
8Wɩɩsʋllɩ sɩpaalaara Arɔŋ hambolibiisiŋ nɛ maga ba ŋmʋŋmʋʋ banyilli-la. Ba dɩ ba doho nɩaa nɛ jaŋ ŋɩŋaa wɩɩŋ deeŋ a kaa mʋ wuu. 9Dɩ ma nɛ hɛ ma tinteeŋ lɛ dɩ laalɩŋ sii ma dɩ ma dʋndɔmɔ-la sɩɩ fʋgɛma pɛgɛ, má faasa ŋmʋʋ banyilli-la, mɩ-na ma TƖƖNA Wɩa jaŋ nɩɩ a laama ta ma dʋndɔŋŋɔɔ nɩsɩŋ lɛ. 10Dɩ ma nɩɩ gbieli ma tʋɔtɔrɛ-gbielee: chɛŋ-falɩŋ gbielee arɩ ma gbielee dɔnsʋŋ, a ŋaa kʋnyɩgaa Wɩɩsʋlʋŋ arɩ ma nii-magɛ dɔŋɔ Wɩɩsʋlʋŋ, má maga dɩ ma ŋmʋʋ banyilliŋ deemba, a liliisi mɩ wɩaa. Mɩ nɛ ŋaa ma TƖƖNA Wɩa.”
Iziral tɩŋŋaa sii Sɩnaɩ lɛ
11Iziral tɩŋŋaa sɩ lɩɩ Ijipiti lɛ jɩ-lɩa tʋɔŋ chɛŋ-lɩa tapʋlaa mara chɛɛŋ, duoŋ-bɩlɩmbaaŋ-la sɩ tɔ Wɩa dɩ-zɔŋ-la nyuŋ, lee-la Wɩa niiriŋ daga-la sɩ hɛ, sii. 12Ŋɩɩ nɛ Iziral tɩmma-la lɩɩ Sɩnaɩ tintee-hɩlɩɩ-la lɛ a gɔllɔ baarɛ ŋɩɩ deeŋ deeŋ duoŋ-bɩlɩmbaaŋ-la mʋ chɩŋ tintee-hɩlɩɩ-la ba sɩɩ yɩrɛ Paraŋ lɛ. 13Ba bumbuŋ nɛ ŋɩɩ ba sɩ sie arɩ ŋɩɩ La TƖƖNA sɩ bʋla pɩ Mosis.
14Laalɩyuoro-la sɩ laa sɩpaaŋ sii arɩ ba magɩlɩŋ nɛ ŋaa Juda buguŋ laalɩyuoroo, Ɩsaka laalɩyuoroo arɩ Zebuluŋ laalɩyuoroo. Amɩnadab nanʋala Nasɔŋ nɛ ŋaa Juda laalɩyuoroo sɩpaalaara. 15Zʋaa nanʋala Nɛtanɛl ma nɛ ŋaa Ɩsaka doho nɩaa laalɩyuoroo sɩpaalaara. 16Heloŋ nanʋala Ɛlɩab ma nɛ ŋaa Zebuluŋ doho nɩaa laalɩyuoroo sɩpaalaara. 17Ŋɩɩ nɛ ba polli Wɩa dɩ-zɔŋ-la. Gɛsɔŋ doho nɩaa arɩ Mɛrarɩ doho nɩaa kʋ lɩɩ paa chʋŋ, a sii to.
18Laalɩyuoro-la sɩ sii tɩgɛ Gɛsɔŋ tɩŋŋaa arɩ Mɛrarɩ tɩŋŋaa lɛ arɩ ba magɩlɩŋ nɛ ŋaa Rubiŋ buguŋ laalɩyuoroo, Simioŋ laalɩyuoroo arɩ Gad laalɩyuoroo. Sediu nanʋala Elizu nɛ ŋaa Rubiŋ doho nɩaa laalɩyuoroo sɩpaalaara. 19Zurisadai nanʋala Sɛlʋmɩɛl ma nɛ ŋaa Simioŋ doho nɩaa laalɩyuoroo sɩpaalaara. 20Dʋɛl nanʋala Ɛlɩasaf ma nɛ ŋaa Gad doho nɩaa laalɩyuoroo sɩpaalaara. 21Ŋɩɩ nɛ Kohaf doho nɩaa ma sii a paa Wɩa dɩ-zɔŋ-la tʋɔŋ kʋzɔmɔ-la a chʋŋ. Ʋ maga dɩ ba mʋ yiyi lee-la ba sɩ jaŋ hɔŋ, dɩ ba pɛ Wɩa dɩ-zɔŋ-la dɛrɛ nɛ.
22Laalɩyuoro-la ma sɩ sii tɩgɛ arɩ ba magɩlɩŋ nɛ ŋaa Efirem buguŋ laalɩyuoroo, Manasɛ laalɩyuoroo arɩ Bɛnjamɩŋ laalɩyuoroo. Amihud nanʋala Ɛlɩsama nɛ ŋaa Efirem doho nɩaa laalɩyuoroo sɩpaalaara. 23Pedazu nanʋala Gamalɩɛl ma nɛ ŋaa Manasɛ doho nɩaa laalɩyuoroo sɩpaalaara. 24Gidioni nanʋala Abɩdaŋ ma nɛ ŋaa Bɛnjamɩŋ doho nɩaa laalɩyuoroo sɩpaalaara. 25Laalɩyuoro-la ma sɩ sii to ba kala harɩŋ arɩ ba magɩlɩŋ nɛ ŋaa Daŋ buguŋ laalɩyuoroo, Asa laalɩyuoroo arɩ Nafɩtalɩ laalɩyuoroo. Amɩsadaɩ nanʋala Ahieza nɛ ŋaa Daŋ doho nɩaa laalɩyuoroo sɩpaalaara. 26Ɔkɩraŋ nanʋala Pagɩɛl ma nɛ ŋaa Asa doho nɩaa laalɩyuoroo sɩpaalaara. 27Ɛnaŋ nanʋala Ahɩra ma nɛ ŋaa Nafɩtalɩ doho nɩaa laalɩyuoroo sɩpaalaara. 28Ŋɩɩ Iziral tɩŋŋaa laalɩyuoroo sɩ sii vɛŋ nɛ ŋɩɩ.
29Mosis ba-jene nɛ fa Rʋɛl. Rʋɛl ŋaa Midiaŋ tɩɩna nɛ. Ʋ nanʋala nɛ Hobab. Ŋɩɩ nɛ Mosis bʋla pɩ Hobab, “La kɛŋ la tɩtɩa nɛ dɩ la mʋ tintee-la La TƖƖNA sɩ sɩ ʋ jaŋ joŋo pɩla. Kɔ dɩ la mʋ, la jaŋ kɛnɩŋ woruŋ. La TƖƖNA hɛ niiŋ nɛ arɩ ʋ jaŋ ŋaa wʋzɔŋŋɔɔ pɩ la Iziral tɩŋŋaa.”
30Ŋɩɩ nɛ Hobab bʋl, “Aɩ, mɩ bɩ mʋ, mɩ jaŋ mɩɩra mʋ mɩ tinteeŋ, mɩ nɩaa teeŋ.”
31Ama Mosis bʋl, “Mɩɩ sʋlʋŋ, sɩ́ la harɩŋ mɩɩrʋ, ŋ nɛ jɩŋ tintee-hɩlɩɩ-la tʋɔŋ lee-la la sɩ jaŋ hɔŋ, ŋ nɛ jaŋ dagɛla. 32Dɩ ŋ nɛ to la harɩŋ mʋ, wʋzɔŋ na-kala La TƖƖNA sɩ jaŋ joŋo ŋaa la lɛ, ŋ ma jaŋ kɛŋ kpaalɩŋ ba tʋɔŋ.”
33Ŋɩɩ nɛ ba sii La TƖƖNA peel-la nyuŋ, a joŋ Wɩa niiriŋ daga-la, daga-la laa ba sɩpaaŋ ba vɛŋ tapʋlaa batori dɩ ʋ dagɛba lee-la ba sɩ jaŋ hɔnɔ wiesi. 34Dɩ taŋ nɛ pʋla, dɩ ba sii dɩ ba vɛŋ na-kala, La TƖƖNA duoŋ-bɩlɩmbaaŋ-la yie chugili ba nyuŋ nɛ.
35Dɩ ba nɛ joŋ Wɩa niiriŋ daga-la dɩ ba mʋ, Mosis yie bʋl,
“La TƖƖNA, sii,
a ŋmoo ŋ dʋndɔŋŋɔɔ kala pɩsɛ.
Leŋ dɩ nɩalɩŋ sɩ bɩŋ cho nyɩɩgɛ ŋ sɩpaaŋ.”
36Dɩ ʋ nɛ bɩra mʋa dɩ ʋ chɩŋ ma, Mosis yie bʋl,
“La TƖƖNA, mɩɩra kɔ,
a hɛ ŋ nɩaa Iziral tɩŋŋaa nɩ-dandaŋ-la teeŋ.”
Currently Selected:
NAMBABA 10: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
