NAMBABA 29
29
Gbiele-la ba sɩ jaŋ gbieli a ŋmʋʋ nyilliŋ
1Chɛŋ-pɛɩ tʋɔŋ tapʋl-bumbuŋ, má hilimi mɩ-na ma TƖƖNA yɩrɩŋ lɛ a sɩ́ tɩntɩmɩɩ kala tɩŋ. Tapʋlɩɩ-la ma maga dɩ ma ŋmʋʋ banyilliŋ. 2Má kɛŋ nɛ-bel-pɔrʋŋ, pie-bele arɩ pie-bel-pɔrɔɔ balɩpɛ sɩ yi jɩna jɩna, a kaa kʋ ŋaa kʋnyɩgaa Wɩɩsʋlʋŋ a nyɩga pɩ mɩ-na ma TƖƖNA. Ba kʋŋkala bɩ maga dɩ ʋ kɛŋ nyɔɔ. Ba sʋɔra sɩma nɛ a pɩmɛ. 3Nɛ-bele-la lɛ, má ŋaa mɩaa Wɩɩsʋlʋŋ munuŋ sɩ bɩɩ nʋgʋgʋ kuokuo gbaŋa arɩ kpaa magɛ dɔŋɔ a hɛ nʋʋŋ, aŋ ŋaa mɩaa Wɩɩsʋlʋŋ munuŋ sɩ bɩɩ nʋgʋgʋ kuokuo gbaŋa ma a pɛ pie-bele-la ma lɛ. 4Pie-bel-pɔrɔ-la ma kʋŋkala lɛ, má hɛ mɩaa Wɩɩsʋlʋŋ munuŋ sɩ bɩɩ nʋgʋgʋ kuokuo gbaŋa kpaa magɛ dɔŋɔ. 5Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a pɩɩsɛ ma disiniŋ ta. 6Má jaŋ ŋaa Wɩɩ-sʋlaa deemba a pɛ tapʋlɩɩ kala kʋnyɩgaa Wɩɩsʋlʋŋ kɩaa lɛ, arɩ chɛnɛ na-kala kʋnyɩgaa Wɩɩsʋlʋŋ kɩaa, a pɛ ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kɩaa lɛ. Ba ŋaa Wɩɩsʋllɩ kɩaa ma sɩ jaŋ nyɩga pɩ mɩ-na ma TƖƖNA nɛ. Ba sʋɔra sɩma nɛ a pɩmɛ.
Disiniŋ pɩɩsɩŋ tapʋlʋŋ
7Chɛŋ-pɛɩ-la tʋɔŋ tapʋl fii chɛɛŋ, má vɔɔ niiŋ a sɩ́ tɩntɩmɩɩ kala tɩŋ, aŋ hilimi mɩ yɩrɩŋ lɛ. 8Má kɛŋ nɛ-bel-pɔrʋŋ, pie-bele arɩ pie-bel-pɔrɔɔ balɩpɛ sɩ yi jɩna jɩna, a kaa kʋ ŋaa kʋnyɩgaa Wɩɩsʋlʋŋ a nyɩga pɩ mɩ-na ma TƖƖNA. Ba sʋɔra sɩma nɛ a pɩmɛ. Pʋsʋ-la kʋŋkala bɩ maga dɩ ʋ kɛŋ nyɔɔ. 9Nɛ-bele-la lɛ, má hɛ mɩaa Wɩɩsʋlʋŋ munuŋ sɩ bɩɩ nʋgʋgʋ kuokuo gbaŋa arɩ kpaa magɛ dɔŋɔ a hɛ nʋʋŋ, a hɛ mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa pie-bele-la ma lɛ. 10Pie-bel-pɔrɔɔ-la ma kʋŋkala lɛ, má ŋaa mɩaa Wɩɩsʋlʋŋ munuŋ sɩ bɩɩ nʋgʋgʋ kuokuo gbaŋa kpaa magɛ dɔŋɔ a hɛ nʋʋŋ. 11Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a pɛ wʋbɔŋŋɔɔ joŋo chɛnɩŋ Wɩɩsʋlʋŋ-la ma sɩ laa sɩpaaŋ ŋaa a pɩɩsɛ ma disiniŋ ta lɛ, a pɛ tapʋlɩɩ kala kʋnyɩgaa Wɩɩsʋlʋŋ arɩ ʋ mɩaa Wɩɩsʋlʋŋ arɩ kʋnyʋalaa Wɩɩsʋlʋŋ kɩaa lɛ.
Gbiele-la ba sɩ yie gbieli a hɛ lɛŋŋɛɛ
12Chɛŋ-pɛɩ-la tʋɔŋ tapʋl-fii arɩ banɔŋ chɛɛŋ, má hilimi mɩ-na ma TƖƖNA yɩrɩŋ lɛ, aŋ sɩ́ tɩntɩmɩɩ kala tɩŋ. Má gbieli tapʋlaa balɩpɛ a zil mɩ-na ma TƖƖNA. 13Má kɛŋ nɛ-bel-pɔrɔɔ fii arɩ batori, pie-belliŋ balɩa arɩ pie-bel-pɔrɔɔ fii arɩ banɛsɛ sɩ yi jɩna jɩna a kaa kʋ ŋaa kʋnyɩgaa Wɩɩsʋlʋŋ, a nyɩga pɩ mɩ-na ma TƖƖNA. Ba sʋɔra sɩma nɛ a pɩmɛ. Pʋsʋŋ deemba kʋŋkala bɩ maga dɩ ʋ kɛŋ nyɔɔ. 14Nɛ-bel-pɔrɔ-la fii arɩ batori kʋŋkala lɛ, má ŋaa mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa arɩ kpaa magɛ dɔŋɔ, a hɛ nʋʋŋ. Pie-belli-la balɩa ma kʋŋkala lɛ, má ŋaa mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa pɛ. 15Pie-bel-pɔrɔ-la ma fii arɩ banɔŋ kʋŋkala lɛ, má ŋaa mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa kpaa magɛ dɔŋɔ a pɛ. 16Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a pɛ tapʋlɩɩ kala kʋnyɩgaa Wɩɩsʋlʋŋ arɩ ʋ mɩaa Wɩɩsʋlʋŋ arɩ ʋ kʋnyʋalaa Wɩɩsʋlʋŋ kɩaa lɛ.
17Tapʋl-lɩa chɛɛŋ, má kɛŋ nɛ-bel-pɔrɔɔ fii arɩ balɩa, pie-belliŋ balɩa arɩ pie-bel-pɔrɔɔ fii arɩ banɛsɛ sɩ yi jɩna jɩna a kaa kʋ ŋaa Wɩɩsʋlʋŋ a pɩmɛ. Pʋsʋ-la kʋŋkala bɩ maga dɩ ʋ kɛŋ nyɔɔ. 18Nɛ-bel-pɔrɔ-la, pie-belli-la arɩ pie-bel-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kɩaa a magɛ ŋɩɩ mɩ sɩ dagɛma. 19Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a saa pɛ tapʋlɩɩ kala kʋnyɩgaa Wɩɩsʋlʋŋ arɩ ʋ mɩaa Wɩɩsʋlʋŋ a pɛ ʋ kʋnyʋalaa Wɩɩsʋlʋŋ kɩaa lɛ.
20Tapʋl-tori chɛɛŋ, má kɛŋ nɛ-bel-pɔrɔɔ fii arɩ kʋbala, pie-belliŋ balɩa arɩ pie-bel-pɔrɔɔ fii arɩ banɛsɛ sɩ yi jɩna jɩna a kaa kʋ ŋaa Wɩɩsʋlʋŋ pɩmɛ. Pʋsʋ-la kʋŋkala bɩ maga dɩ ʋ kɛŋ nyɔɔ. 21Nɛ-bel-pɔrɔ-la, pie-belli-la arɩ pie-bel-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ a magɛ ŋɩɩ mɩ sɩ dagɛma. 22Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ, a pɛ tapʋlɩɩ kala kʋnyɩgaa Wɩɩsʋlʋŋ arɩ ʋ mɩaa Wɩɩsʋlʋŋ arɩ kʋnyʋalaa Wɩɩsʋlʋŋ kɩaa lɛ.
23Tapʋl nɛsɛ chɛɛŋ, má kɛŋ nɛ-bel-pɔrɔɔ fii, pie-belliŋ balɩa arɩ pie-bel-pɔrɔɔ fii arɩ banɛsɛ sɩ yi jɩna jɩna a kaa kʋ ŋaa Wɩɩsʋlʋŋ pɩmɛ. Pʋsʋŋ deemba kʋŋkala bɩ maga dɩ ʋ kɛŋ nyɔɔ. 24Nɛ-bel-pɔrɔ-la, pie-belli-la arɩ pie-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ a magɛ ŋɩɩ mɩ sɩ dagɛma. 25Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ, a pɛ tapʋlɩɩ kala kʋnyɩgaa Wɩɩsʋlʋŋ kɩaa arɩ ʋ mɩaa Wɩɩsʋlʋŋ a pɛ ʋ kʋnyʋalaa Wɩɩsʋlʋŋ kɩaa lɛ.
26Tapʋl-nɔŋ chɛɛŋ, má kɛŋ nɛ-bel-pɔrɔɔ nibi, pie-belliŋ balɩa arɩ pie-bel-pɔrɔɔ fii arɩ banɛsɛ sɩ yi jɩna jɩna a kaa kʋ ŋaa Wɩɩsʋlʋŋ a pɩmɛ. Pʋsʋ-la kʋŋkala bɩ maga dɩ ʋ kɛŋ nyɔɔ. 27Nɛ-bel-pɔrɔ-la, pie-belli-la arɩ pie-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kɩaa a magɛ ŋɩɩ mɩ sɩ dagɛma. 28Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a saa pɛ tapʋlɩɩ kala kʋnyɩgaa Wɩɩsʋlʋŋ kɩaa arɩ ʋ mɩaa Wɩɩsʋlʋŋ arɩ ʋ kʋnyʋalaa Wɩɩsʋlʋŋ kɩaa lɛ.
29Tapʋl-dʋ chɛɛŋ, má kɛŋ nɛ-bel-pɔrɔɔ chori, pie-belliŋ balɩa arɩ pie-bel-pɔrɔɔ fii arɩ banɛsɛ a kaa kʋ ŋaa kʋnyɩgaa Wɩɩsʋlʋŋ a pɩmɛ. Pʋsʋ-la kʋŋkala bɩ maga dɩ ʋ kɛŋ nyɔɔ. 30Nɛ-bel-pɔrɔ-la, pie-belli-la arɩ pie-bel-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kɩaa a magɛ ŋɩɩ mɩ sɩ dagɛma. 31Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a saa pɛ tapʋlɩɩ kala kʋnyɩgaa Wɩɩsʋlʋŋ kɩaa lɛ arɩ ʋ mɩaa Wɩɩsʋlʋŋ arɩ ʋ kʋnyʋalaa Wɩɩsʋlʋŋ kɩaa lɛ. 32Tapʋl-pɛɩ chɛɛŋ, má kɛŋ nɛ-bel-pɔrɔɔ balɩpɛ, pie-belliŋ balɩa arɩ pie-bel-pɔrɔɔ fii arɩ banɛsɛ sɩ yi jɩna jɩna a kaa kʋ ŋaa Wɩɩsʋlʋŋ pɩ mɩ-na ma TƖƖNA. Pʋsʋŋ deemba kʋŋkala bɩ maga dɩ ʋ kɛŋ nyɔɔ. 33Nɛ-bel-pɔrɔ-la, pie-belli-la arɩ pie-bel-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ kɩaa a magɛ ŋɩɩ mɩ sɩ dagɛma. 34Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ, a saa pɛ tapʋlɩɩ kala kʋnyɩgaa Wɩɩsʋlʋŋ kɩaa lɛ arɩ ʋ mɩaa Wɩɩsʋlʋŋ a pɛ ʋ kʋnyʋalaa Wɩɩsʋlʋŋ kɩaa lɛ.
35Tapʋl-chori chɛɛŋ, má hilimi mɩ yɩrɩŋ lɛ a sɩ́ tɩntɩmɩɩ kala tɩŋ. 36Má kɛŋ nɛ-bele, pie-bele arɩ pie-bel-pɔrɔɔ balɩpɛ sɩ yi jɩna jɩna kʋ ŋaa kʋnyɩgaa Wɩɩsʋlʋŋ a nyɩga pɩ mɩ-na ma TƖƖNA. Ba sʋɔra sɩma nɛ a pɩmɛ. Pʋsʋŋ deemba kʋŋkala bɩ maga dɩ ʋ kɛŋ nyɔɔ. 37Nɛ-bele-la, pie-bele-la arɩ pie-bel-pɔrɔ-la kʋŋkala lɛ, má ŋaa ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ, a magɛ ŋɩɩ mɩ sɩ dagɛma. 38Má kɛŋ gbuŋgbogo ma a pɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a saa pɛ tapʋlɩɩ kala kʋnyɩgaa Wɩɩsʋlʋŋ kɩaa lɛ arɩ ʋ mɩaa Wɩɩsʋlʋŋ a pɛ ʋ kʋnyʋalaa Wɩɩsʋlʋŋ kɩaa lɛ.
39Gbielee deemba kala ma sɩ jaŋ gbigbieli lɛ, ʋ maga dɩ má joŋ kʋnyɩgaa Wɩɩsʋlʋŋ, mɩaa Wɩɩsʋlʋŋ, kʋnyʋalaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ kɩaa a pɩ mɩ-na ma TƖƖNA, a saa pɛ Wɩɩsʋlʋŋ kɩalɩŋ ma sɩ jaŋ joŋo pɩmɛ a lɩɩsɛ niiri-la ma sɩ hɛ, arɩ ma tʋɔtɔrɛ Wɩɩsʋlʋŋ kɩaa.”
40Ŋɩɩ nɛ Mosis bʋl wɩalɩŋ kala La TƖƖNA sɩ dagʋ a pɩ Iziral tɩŋŋaa.
Currently Selected:
NAMBABA 29: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
