NAMBABA 27
27
Zelofihad toloo
1Zelofihad nyɩmma nɛ fa Hefa. Hefa ma nyɩmma nɛ Gɩlɩad, Gɩlɩad ma nyɩmma nɛ Makɩɩ. Makɩɩ ma nyɩmma nɛ Manasɛ. Manasɛ ma nyɩmma nɛ Josɛf. Zelofihad toloo yɩraa nɛ fa Mala, Nowa, Hogila, Mɩlɩka arɩ Tɩɩza. Ŋɩɩ nɛ ba sii 2a mʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ, a chɩŋ Mosis arɩ Wɩɩsʋllɩ sɩpaalaara Elieza, arɩ Iziral tɩŋŋaa sɩpaalaaraa arɩ Iziral tɩŋŋaa kala sɩpaaŋ a bʋl, 3“La nyɩmma bɩ hambolibie lʋla aŋ sʋʋ Sɩnaɩ tintee-hɩlɩɩ-la lɛ, ama ʋ-na fa bɩ Kora arɩ ʋ harɩ-tooro-la sɩ vɩa La TƖƖNA niiŋ aŋ sii nyɛsɛ Mosis nyuŋ lɛ pɛ. Ʋ-na sʋʋ ʋ tɩtɩa wʋbɔŋŋɔɔ sʋʋŋ nɛ. 4Maa chɛ dɩ la nyɩmma yɩrɩŋ lɛl Iziral tɩŋŋaa tʋɔŋ nɛ a tɩŋ ʋ sɩ bɩ hambolibie kɛnɛ wɩaa? La nyɩmma naambiiriŋ tʋɔŋ, dʋa-la fa sɩ jaŋ ŋaa ʋ kʋa, má joŋo pɩla.”
5Ŋɩɩ nɛ Mosis kɛŋ wɩɩ-la ba sɩ bʋla a mʋ La TƖƖNA teeŋ. 6Ŋɩɩ nɛ La TƖƖNA bʋla pʋ, 7“Zelofihad toloo sɩ bʋl wɩɩ-la ŋaa wʋtɩtɩɩ nɛ. Ʋ maga dɩ ma pɩba dʋa ba nyɩmma naambiiriŋ dʋa tʋɔŋ nɛ. Dʋa-la fa sɩ jaŋ ŋaa ba nyɩmma kʋa, má joŋo pɩba.
8Bʋla pɩ Iziral tɩŋŋaa, ‘Dɩ baal nɛ sʋba aŋ bɩ hambolibie kɛnɛ, má joŋ ʋ dʋa a pɩ ʋ toloo. 9Dɩ ʋ nɛ bɩ toloo ma kɛnɛ, má joŋo pɩ ʋ naambiiriŋ. 10Dɩ ʋ nɛ bɩ naambiiriŋ ma kɛnɛ, má joŋo pɩ ʋ nyɩmma naambiiriŋ. 11Dɩ ʋ nyɩmma nɛ bɩ naambiiriŋ kɛnɛ, má joŋo pɩ ʋ dɩ nʋʋ sɩ pɛ chalɩŋ a kpagʋ. Wɩɩŋ deeŋ ŋaa wombii nɛ a magɛ dɩ Iziral tɩŋŋaa tutou arɩ mɩ-na ma TƖƖNA sɩ dagɛ Mosis ŋɩɩ.’ ”
Josua nɛ jaŋ laa Mosis nyuŋ
12La TƖƖNA bɩra bʋla pɩ Mosis, “Mʋ́ jɩl peel-la ba sɩɩ yɩrɛ Abarɩm nyuŋ, a na tintee-la mɩ sɩ joŋo pɩpɩ Iziral tɩŋŋaa. 13Dɩ ŋ nɛ naʋ, ŋ ma jaŋ sʋʋ a nagɛ ŋ naambie Arɔŋ sɩ sʋʋ ŋɩɩ. 14Bʋa-la lɛ Iziral tɩŋŋaa sɩ vɩa mɩ niiŋ Ziŋ tintee-hɩlɩɩ-la lɛ, Mɛrɩba lɩɩ-la sɩ hɛ Kadɛs lɛ, ma vɩa dɩ ma zilmi nɛ nɩalɩŋ sɩpaaŋ arɩ mɩ nɛ kɛŋ doluŋ.”
15Ŋɩɩ nɛ Mosis bʋla pɩ La TƖƖNA, 16“La TƖƖNA Wɩa, ŋ nɩɩ pɩ nuhuobiiŋ kala mɩɩsɩŋ, mɩɩ sʋlʋŋ, lɩɩsɛ nʋʋ sɩ jaŋ wuo laa Iziral tɩŋŋaa sɩpaaŋ, 17a kɛmba mʋmʋ laalɩŋ. La Tɩɩna, ŋ nɩaa bɩ maga dɩ ba nagɛ piesee sɩ bɩ pie-daara kɛnɛ.”
18Ŋɩɩ nɛ La TƖƖNA bʋla pɩ Mosis, “Lɩɩsɛ Nuŋ nanʋala Josua, a joŋ ŋ nɩsɩŋ daŋ ʋ lɛ. Mɩ Dɩma hɛ ʋ lɛ nɛ. 19Kɛnʋ mʋ Wɩɩsʋllɩ sɩpaalaara Elieza arɩ Iziral tɩŋŋaa kala sɩpaaŋ, a leŋ dɩ ba jɩŋ arɩ ʋ nɛ laa ŋ nyuŋ. 20Chɔgɛ ŋ dol-la pʋ dɩ Iziral tɩŋŋaa kala tuto ʋ niiŋ. 21Wɩɩsʋllɩ sɩpaalaara Elieza jaŋ to Urim arɩ Tumim lɛ aa dagɛ wɩɩ-la mɩ-na ma TƖƖNA sɩɩ chɛ a pɩpɩ Josua. Ŋ-la nɛ Josua jaŋ to a dagɛ Iziral tɩŋŋaa wɩalɩŋ mɩ-na ma TƖƖNA sɩɩ chɛ dɩ ba ŋɩŋaa.”
22Ŋɩɩ nɛ Mosis ŋaa wɩɩ-la La TƖƖNA sɩ dagʋ. Ʋ kɛŋ Josua a kaa lɩɩ ʋ chɩŋ Elieza arɩ Iziral tɩŋŋaa kala sɩpaaŋ, 23a joŋ ʋ nɩsɩŋ daŋ ʋ lɛ a leŋ nɩalɩŋ kala jɩŋ arɩ ʋ nɛ ŋaa ba sɩpaalaara, arɩ La TƖƖNA sɩ dagɛ Mosis ŋɩɩ.
Currently Selected:
NAMBABA 27: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
