NAMBABA 26
26
Ba bɩra dɩɩsɛ Iziral tɩŋŋaa lɩa
1Nyanyal-bɔŋ-la sɩ jʋʋ Iziral tɩŋŋaa, ŋɩɩ harɩŋ La TƖƖNA bʋl wɩaa pɩ Mosis arɩ Elieza, Arɔŋ sɩ ŋaa Wɩɩsʋllɩ sɩpaalaara nanʋala. 2Ʋ sɩ, “Má dɩɩsɛ Iziral tɩŋŋaa dɩa dɩa, baal na-kala sɩ yi jɩsɩŋ mara koo a kɩɩ a jaŋ wuo mʋ laalɩŋ.” 3Ŋɩɩ nɛ Mosis arɩ Wɩɩsʋllɩ sɩpaalaara Elieza bʋl wɩaa a pɩ Iziral tɩŋŋaa. Bʋa-la lɛ dɩ ba hɛ Mʋab tintee-taalɩsɩ-la sɩ kpagɛ Jɔdaŋ fuo-la, Jeriko cholo. 4Ba sɩ, “Má dɩɩsɛ baal na-kala sɩ yi jɩsɩŋ mara, koo a kɩɩ ŋɩɩ arɩ La TƖƖNA sɩ dagɛ ŋɩɩ.” Iziral tɩmma-la sɩ kʋ lɩɩ Ijipiti tinteeŋ lɛ nɛ ŋ-la:
5Jekɔb bii-bumbuŋ Rubiŋ doho nɩaa nɛ ŋ-la: Hanɔk, ʋ nɛ kʋ ŋaa Hanɔk tɩŋŋaa gentine. Pallu, ʋ nɛ kʋ ŋaa Pallu tɩŋŋaa gentine. 6Hɛzɩrɔŋ, ʋ ma nɛ kʋ ŋaa Hɛzɩrɔŋ tɩŋŋaa gentine. Kaamɩ, ʋ nɛ kʋ ŋaa Kaamɩ tɩŋŋaa gentine.
7Rubiŋ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ batori arɩ zɔɔ-balɩpɛ arɩ mara arɩ fii nɛ. 8Palu nanʋala nɛ fa Ɛlɩab. 9Ɛlɩab ma hambolibiisiŋ nɛ fa Nɛmʋɛl, Dataŋ arɩ Abɩram. Dataŋ deeŋ arɩ Abɩram fa ŋaa Iziral tɩŋŋaa sɩpaalaaraa nɛ. Ba nɛ pɛ Kora arɩ ʋ harɩ-tooro-la lɛ ba vɩa La TƖƖNA niiŋ, aŋ nyɛsɛ Mosis arɩ Arɔŋ nyuŋ ŋɩɩ. 10Ŋɩɩ nɛ tinteeŋ suri a paaba a pɛ Kora lɛ a liŋ. Kora harɩ-tooroo nɛ fa sʋba bʋa-la lɛ nyiniŋ sɩ joŋ baala-la zɔɔ-balɩa arɩ mahɩŋ balɩa arɩ fii dii. Ŋɩɩ ŋaa wɩɩ sɩ pɩna a chɩchagɩlɛ la Iziral tɩŋŋaa. 11Ama Kora doho nɩaa kala fa dee bɩ sʋba. 12Simioŋ doho nɩaa gentisiŋ nɛ ŋ-la: Nɛmʋɛl, ʋ nɛ kʋ ŋaa Nɛmʋɛl tɩŋŋaa gentine. Jamɩŋ, ʋ nɛ kʋ ŋaa Jamɩŋ tɩŋŋaa gentine. Jakɩŋ, ʋ ma nɛ kʋ ŋaa Jakɩŋ tɩŋŋaa gentine. 13Zɛra, ʋ ma nɛ kʋ ŋaa Zɛra tɩŋŋaa gentine. Sawʋl, ʋ nɛ kʋ ŋaa Sawʋl tɩŋŋaa gentine. 14Simioŋ doho nɩaa gentisiŋ nɛ ŋɩɩ. Baala-la ba sɩ dɩɩsa fa ŋaa nɩaa bʋɩ mara arɩ balɩa arɩ zɔɔ-balɩa nɛ. 15Gad doho nɩaa gentisiŋ nɛ ŋ-la: Zefoŋ, ʋ nɛ kʋ ŋaa Zefoŋ tɩŋŋaa gentine. Hagi, ʋ nɛ kʋ ŋaa Hagi tɩŋŋaa gentine. Suni, ʋ nɛ kʋ ŋaa Suni tɩŋŋaa gentine, 16Ozini, ʋ nɛ kʋ ŋaa Ozini tɩŋŋaa gentine. Ɛrɩ, ʋ nɛ kʋ ŋaa Ɛrɩ tɩŋŋaa gentine. 17Arodi, ʋ nɛ kʋ ŋaa Arodi tɩŋŋaa gentine. Areli, ʋ nɛ kʋ ŋaa Areli tɩŋŋaa gentine. 18Gad doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ balɩa arɩ zɔɔ-banɔŋ nɛ. 19Ɛɛ arɩ Onaŋ nɛ fa ŋaa Juda hambolibiisiŋ, ama ba sʋba nɛ Kɛnaŋ tinteeŋ lɛ. 20Juda doho nɩaa gentisiŋ nɛ ŋ-la: Sela, ʋ nɛ kʋ ŋaa Sela tɩŋŋaa gentine. Pɛrɛs, ʋ nɛ kʋ ŋaa Pɛrɛs tɩŋŋaa gentine. Zɛra, ʋ nɛ kʋ ŋaa Zɛra tɩŋŋaa gentine. 21Pɛrɛs doho nɩaa nɛ ŋ-la: Hɛzɩrɔŋ, ʋ nɛ kʋ ŋaa Hɛzɩrɔŋ tɩŋŋaa gentine. Hamʋl, ʋ nɛ kʋ ŋaa Hamʋl tɩŋŋaa gentine. 22Juda doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ batori arɩ fii arɩ balɩdʋ arɩ zɔɔ-banɔŋ nɛ.
23Ɩsaka doho nɩaa gentisiŋ nɛ ŋ-la: Tola, ʋ nɛ kʋ ŋaa Tola tɩŋŋaa gentine. Pʋa, ʋ nɛ kʋ ŋaa Pʋa tɩŋŋaa gentine. 24Jasub, ʋ nɛ kʋ ŋaa Jasub tɩŋŋaa gentine. Sɩmɩrɔŋ, ʋ nɛ kʋ ŋaa Sɩmɩrɔŋ tɩŋŋaa gentine. 25Ɩsaka doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ batori arɩ banɛsɛ arɩ zɔɔ-batori nɛ.
26Zebuluŋ doho nɩaa gentisiŋ nɛ ŋ-la: Sɛrɛd, ʋ nɛ kʋ ŋaa Sɛrɛd tɩŋŋaa gentine. Ɛlɔŋ, ʋ nɛ kʋ ŋaa Ɛlɔŋ tɩŋŋaa gentine. Jalɛl, ʋ nɛ kʋ ŋaa Jalɛl tɩŋŋaa gentine. 27Zebuluŋ doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ batori arɩ zɔɔ-banɔŋ nɛ.
28Josɛf biiriŋ nɛ ŋaa Manasɛ arɩ Efirem. 29Manasɛ doho nɩaa gentisiŋ nɛ ŋ-la: Makɩɩ, ʋ nɛ kʋ ŋaa Makɩɩ tɩŋŋaa gentine (Makɩɩ nɛ fa lʋl Gɩlɩad). 30Gɩlɩad biiriŋ nɛ ŋ-la: Ieza, ʋ nɛ kʋ ŋaa Ieza tɩŋŋaa gentine. Hɛlɛk, ʋ nɛ kʋ ŋaa Hɛlɛk tɩŋŋaa gentine. 31Asɩrɩɛl, ʋ nɛ ŋaa Asɩrɩɛl tɩŋŋaa gentine. Sɛkɛm, ʋ nɛ ŋaa Sɛkɛm tɩŋŋaa gentine. 32Sɛmɩda, ʋ nɛ ŋaa Sɛmɩda tɩŋŋaa gentine. Hefa, ʋ nɛ ŋaa Hefa tɩŋŋaa gentine, 33Hefa nanʋala Zelofihad na fa bɩ hambolibiisiŋ lʋla, toloo dʋndʋŋa nɛ ʋ lʋl. Ba yɩraa nɛ ŋ-la: Mala, Nowa, Hogila, Mɩlɩka arɩ Tɩɩza. 34Manasɛ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ fii arɩ balɩa arɩ zɔɔ-balɩpɛ nɛ. 35Efirem doho nɩaa arɩ ba gentisiŋ nɛ ŋ-la: Sutela, ʋ nɛ kʋ ŋaa Sutela tɩŋŋaa gentine. Bɛka, ʋ nɛ kʋ ŋaa Bɛka tɩŋŋaa gentine. Tahaŋ, ʋ nɛ kʋ ŋaa Tahaŋ tɩŋŋaa gentine. 36Sutela nanʋala nɛ Ɛraŋ, ʋ nɛ kʋ ŋaa Ɛraŋ tɩŋŋaa gentine. 37Efirem doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mara arɩ fii arɩ balɩa arɩ zɔɔ-banɔŋ nɛ. Josɛf nanʋala Efirem doho nɩaa nɛ ŋɩɩ.
38Bɛnjamɩŋ doho nɩaa gentisiŋ nɛ ŋ-la: Bɛla, ʋ nɛ kʋ ŋaa Bɛla tɩŋŋaa gentine. Asɩbɛl, ʋ nɛ kʋ ŋaa Asɩbɛl tɩŋŋaa gentine. Ahɩram, ʋ nɛ kʋ ŋaa Ahɩram tɩŋŋaa gentine. 39Sufam, ʋ nɛ kʋ ŋaa Sufam tɩŋŋaa gentine. Hufam, ʋ nɛ kʋ ŋaa Hufam tɩŋŋaa gentine. 40Bɛla doho nɩaa gentisiŋ nɛ ŋaa Aad arɩ Naamaŋ. Aad, ʋ nɛ kʋ ŋaa Aad tɩŋŋaa gentine. Naamaŋ, ʋ nɛ kʋ ŋaa Naamaŋ tɩŋŋaa gentine. 41Bɛnjamɩŋ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ banɔŋ arɩ zɔɔ-balɩdʋ nɛ. 42Daŋ doho nɩaa gentisiŋ nɛ ŋ-la: Suham, ʋ nɛ kʋ ŋaa Suham tɩŋŋaa gentine. Daŋ doho nɩaa gentine nɛ ŋɩɩ. 43Ba kala ŋaa Suham tɩŋŋaa gentisiŋ nɛ. Baala-la ba fa sɩ dɩɩsa ŋaa nɩaa bʋɩ mahɩŋ batori arɩ banɛsɛ arɩ zɔɔ-banɛsɛ nɛ. 44Asa doho nɩaa gentisiŋ nɛ ŋ-la: Imina, ʋ nɛ kʋ ŋaa Imina tɩŋŋaa gentine. Isivi, ʋ nɛ kʋ ŋaa Isivi tɩŋŋaa gentine. Bɛrɩa, ʋ nɛ kʋ ŋaa Bɛrɩa tɩŋŋaa gentine. 45Bɛrɩa biiriŋ nɛ ŋ-la: Hɛba, ʋ nɛ kʋ ŋaa Hɛba tɩŋŋaa gentine. Malɩkɩɛl, ʋ nɛ kʋ ŋaa Malɩkɩɛl tɩŋŋaa gentine. 46(Asa fa kɛŋ tolo nɛ, baa yɩrɛ Sɛra.) 47Asa doho nɩaa gentine nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ fii arɩ batori arɩ zɔɔ-banɛsɛ nɛ. 48Nafɩtalɩ doho nɩaa gentisiŋ nɛ ŋ-la: Jazɛɛl, ʋ nɛ kʋ ŋaa Jazɛɛl tɩŋŋaa gentine. Guni, ʋ nɛ kʋ ŋaa Guni tɩŋŋaa gentine. 49Jeza, ʋ nɛ kʋ ŋaa Jeza tɩŋŋaa gentine. Sɩlɛm, ʋ nɛ kʋ ŋaa Sɩlɛm tɩŋŋaa gentine. 50Nafɩtalɩ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ banɔŋ arɩ zɔɔ-banɛsɛ nɛ. 51Iziral tɩŋŋaa baala-la kala ba sɩ dɩɩsa fa ŋaa nɩaa bʋɩ zɔɔ-balɩdʋ arɩ kʋbala arɩ zɔɔ-balɩpɛ arɩ mara arɩ fii nɛ.
52La TƖƖNA bʋla pɩ Mosis, 53“Nɩaa deemba ŋ sɩ dɩɩsa, kɛŋ tintee-la kpaa pɩba a magɛ doho kala sɩ magɛ ŋɩɩ. 54Doho-la sɩ yʋga, leŋ dɩ ba kpaalɩŋ yʋgɛ. Doho-la sɩ muuro, leŋ dɩ ba kʋa muuri. Doho kala maga dɩ ʋ laa magɛ ʋ nɩaa sɩ magɛ ŋɩɩ nɛ. 55Má tɔnsɛ a kɛŋ tintee-la kpaa. Nʋʋkala doho nɩaa sɩ magɛ ŋɩɩ nɛ ba jaŋ laa. 56Dɩ ma nɛ tɔnsɔ dɛrɛ, nɩalɩŋ sɩ yʋga, ba jaŋ laa kʋbalɩŋ, nɩalɩŋ ma sɩ bɩ yʋgɛ jaŋ laa kʋbie.”
57Levi doho nɩaa gentisiŋ ba sɩ dɩɩsa nɛ ŋ-la: Gɛsɔŋ, ʋ nɛ kʋ ŋaa Gɛsɔŋ tɩŋŋaa gentine. Kohaf, ʋ nɛ kʋ ŋaa Kohaf tɩŋŋaa gentine. Mɛrarɩ, ʋ nɛ kʋ ŋaa Mɛrarɩ tɩŋŋaa gentine. 58Levi doho nɩaa gentisi-la kʋbiisiŋ ma nɛ ha ŋ-la: Libini tɩŋŋaa gentine, Hɛbʋrɔŋ tɩŋŋaa gentine, Mali tɩŋŋaa gentine, Musi tɩŋŋaa gentine, Kora tɩŋŋaa gentine. Kohaf naabalɩma nɛ Amɩram. 59Amɩram haala yɩrɩŋ nɛ Jokɛbɛd. Ʋ ŋaa Levi doho nʋʋ nɛ. Ba lʋlʋ Ijipiti tinteeŋ lɛ nɛ. Jokɛbɛd nɛ lʋl Arɔŋ, Mosis arɩ ba dɩhaala Mɩrɩam a pɩ Amɩram. 60Ŋɩɩ nɛ Arɔŋ ma lʋl Nadab, Abihu, Elieza arɩ Itama. 61Ama Nadab arɩ Abihu nɛ fa sʋba ba sɩ nyɩgɛ kʋsʋɔrʋsʋŋ La TƖƖNA sɩpaaŋ, ka ʋ bɩ ba ŋɩɩ daga. 62Levi doho nɩaa hambolibiisi-la kala sɩ yi chɛnɛ koo a kɩɩ ŋɩɩ, ba fa sɩ dɩɩsa ŋaa nɩaa bʋɩ mara arɩ batori nɛ. Ba fa bɩ ba-na dɩɩsa pɛ Iziral tɩmma-la dɔnsʋŋ lɛ, bɛɛ wɩaa ba-na bɩ kpaalɩŋ laa ba sɩ kɛŋ tintee-la kpaa tʋɔŋ.
63Nɩaa deemba kala Mosis arɩ Wɩɩsʋllɩ sɩpaalaara Elieza nɛ dɩɩsa, bʋa-la lɛ ba sɩ dɩɩsɛ Iziral tɩŋŋaa Mʋab tintee-taalɩsɩ-la lɛ, dɩ ba kpagɛ Jɔdaŋ fuo-la Jeriko cholo. 64Nɩaa deemba kʋŋkala fa tuo bʋa-la lɛ Mosis arɩ Wɩɩsʋllɩ sɩpaalaara Arɔŋ sɩɩ dɩɩsɛ Iziral tɩŋŋaa Sɩnaɩ tintee-hɩlɩɩ-la lɛ. 65La TƖƖNA fa bʋla pɩ Iziral tɩmma-la arɩ ba jaŋ sʋʋ tintee-hɩlɩɩ-la tʋɔŋ. Ba kala sɛnɛ sʋʋ aŋ ka Jefuni nanʋala Kalɩb arɩ Nuŋ nanʋala Josua dʋndʋŋa.
Currently Selected:
NAMBABA 26: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
