Matiu 8
8
Yesu vaarɛ gbege
Maak 1.40-45; Luuk 5.12-16
1Yesu sɩ bʋl wɩaa deemba dɛrɛ, ʋ lɩɩ peeliŋ nyuŋ a kʋ tuu. Ŋɩɩ nɛ nɩ-daŋ tuto ʋ harɩŋ. 2Gbege kʋbala ma kɔ ʋ teeŋ a tuu kpirimi ʋ sɩpaaŋ aŋ sʋlʋ, “Kʋhɩaŋ, dɩ ŋ nɛ cho, ŋaa dɩ mɩ duori.” 3Ŋɩɩ nɛ Yesu lɩɩsɛ ʋ nɩsɩŋ a digu aŋ bʋl, “Mɩ cho nɛ, duori.” Yawɩɩl-la guu leŋ baal-la. 4Yesu bʋla pʋ, “Sɩ́ wɩɩŋ deeŋ bʋla pɩ nʋʋkala. Ama kɛŋ ŋ tɩtɩa mʋ dagɛ Wɩɩsʋllɩ sɩpaalaara, aŋ joŋ ŋ Wɩɩsʋlʋŋ kɩaa pʋ dɩ ʋ kpʋ a pɩɩsɛ ŋ disiniŋ ta arɩ Mosis fa sɩ dagɛma ŋɩɩ. Dɩ ŋ nɛ ŋaa ŋɩɩ, nɩaa jaŋ na arɩ ŋ bɩra bɩ disiniŋ kɛnɛ.”
Yesu vaarɛ Rom laalɩyuori-hɩaŋ dɩa tɩntɩnna
Luuk 7.1-10
5Ŋɩɩ nɛ Yesu sii mʋ Kapɛnam dɩ Rom laalɩyuoroo kʋhɩaŋ kʋ chemu a sʋlʋ dɩ ʋ pɛ ʋ lɛ a bʋl, 6“Mɩ kʋhɩaŋ, mɩ dɩa tɩntɩnnʋ nɩɩ wɩɩlʋ a pɩŋ dɩa lɛ. Ʋ bɩ wuo vɛŋ a nɩna hɛɛŋ woruŋ.” 7Ŋɩɩ nɛ Yesu bʋla pʋ, “Mɩ jaŋ kʋ ŋaa dɩ ʋ duori.” 8Ama baal-la bʋla pʋ, “Mɩ Tɩɩna, mɩ bɩ maga dɩ ŋ kʋ jʋʋ mɩ dɩa. Ŋ-na yaa suri ŋ niiŋ a bʋl dɩ mɩ tɩntɩnnʋ-la duori, ʋ jaŋ duori. 9Mɩ ma paalaa to mɩ laalɩyuori hɩasɩŋ niiŋ nɛ. Laalɩyuoroo dɔnsʋŋ ma tuto mɩ niiŋ. Dɩ mɩ nɛ sɩ nɩa deeŋ mʋ daha, ʋ yie mʋ nɛ, dɩ mɩ nɛ sɩ dɩ nɩa deeŋ kɔ daha, ʋ yie kɔ nɛ. Dɩ mɩ nɛ bʋla pɩ mɩ yomo dɩ ʋ ŋaa wɩɩŋ deeŋ, ʋ yie ŋaa nɛ.” 10Yesu sɩ nɩɩ wɩaa deemba, ʋ ŋaaʋ wʋkpuŋkpere. Ŋɩɩ nɛ ʋ bʋla pɩ nɩ-daŋ-la fa sɩɩ to ʋ harɩŋ, “Wʋtɩtɩɩ nɛ mɩ bʋlaa pɩma, mɩ ha bɩ Wɩa laa diiniŋ deeŋ doho na Iziral nɩaa tʋɔŋ. 11Mɩ bʋlaa pɩma, nɩaa jaŋ yʋgɛ a lɩɩ wɩɩpɔsʋŋ arɩ wɩɩjʋʋlʋŋ a kʋ hɔŋ Wɩa kuorii-la tʋɔŋ dɩ ba dɩ Abɩraham arɩ Aɩzɩk arɩ Jekɔb dii kʋdiilee. 12Ama nɩalɩŋ fa sɩ maga dɩ ba hɛ Wɩa kuorii-la lɛ aŋ bɩ jʋa, ba jaŋ jomba yuo ta jeeŋ harɩŋ dɩ ba hɛ birimiŋ tʋɔŋ a pɩna yiyel aŋ dɩdɩŋ ba nyɩlaa.” 13Ŋɩɩ nɛ Yesu bʋla pɩ laalɩyuori-hɩaŋ-la, “Mʋ dɩa, ŋ sɩ laa dii arɩ wɩɩ-la jaŋ ŋaa, ʋ jaŋ ŋaa.” Bʋa-la tɩtɩa lɛ laalɩyuori-hɩaŋ-la tɩntɩnnʋ-la duori.
Yesu vaarɛ nɩaa yʋgɛ
Maak 1.29-34; Luuk 4.38-41
14Ŋɩɩ nɛ Yesu mʋ Pɩɩta dɩa. Ʋ sɩ jʋa, ʋ na dɩ ʋ hɩɩlɩ-haala pɩna a wʋwɩɩlɛ, ʋ yaraa kala lɩŋ. 15Ŋɩɩ nɛ Yesu digi ʋ nɩsɩŋ lɛ. Ʋ yaraa fa sɩ lɩma ŋɩɩ, ʋ fɩɛlɛ. Ʋ sii ŋaa kʋdiilee pɩba ba dii.
16Dɩdaanɩŋ sɩ yie, ba kɛŋ nɩaa yʋgɛ jɩŋ-bɔŋŋɔɔ sɩ kɛnɛ a kɔ Yesu teeŋ. Yesu bʋl wɩaa a kiri jɩŋ-bɔmɔ-la ta aŋ vaarɛ nɩalɩŋ kala fa sɩɩ wɩɩlʋ. 17Ʋ ŋaa wɩɩŋ deeŋ dɩ wɩalɩŋ Azaaya fa sɩ bʋla kʋ ŋaa wʋtɩtɩɩ nɛ. Azaaya fa ŋaa Wɩa wʋlaabʋllʋ nɛ. Ʋ fa bʋla,
“Ʋ nɛ laa la nyanyalaa kala a chʋŋ.”
Nɩalɩŋ sɩ maga dɩ ba to Yesu harɩŋ
Luuk 9.57-62
18Yesu sɩ na dɩ nɩ-daŋ-la kʋ gollu, ʋ ŋaa ʋ dɩ ʋ harɩ-tooroo chol fuoŋ cholo dɔŋɔ. 19Ŋɩɩ nɛ Wɩa teniŋ kerichi kʋbala kɔ ʋ teeŋ a bʋla pʋ, “Mɩ kʋhɩaŋ, mɩ ŋaa siri dɩ mɩ to ŋ harɩŋ a mʋ lee-na kala ŋ sɩɩ mʋ nɛ.” 20Ŋɩɩ nɛ Yesu bʋla pʋ, “Jolluŋ kɛŋ bʋɔsʋŋ nɛ a jʋjʋʋ, diibiisiŋ ma kɛŋ dɛllɩŋ a jʋjʋʋ, ama mɩ-na Nuhuobiine Bie bɩ dɩpɩnɩŋ kɛnɛ dɩ mɩ pɩna wiesi.” 21Nɩaa dɔnsʋŋ ma fa sɩɩ to Yesu harɩŋ, ba tʋɔŋ kʋbala ma bʋla pʋ, “Mɩ Tɩɩna, leŋ dɩ mɩ laa sɩpaaŋ mʋ hugi mɩ nyɩmma.” 22Ŋɩɩ nɛ Yesu bʋla pʋ, “To mɩ harɩŋ aŋ leŋ dɩ sʋʋnʋŋ huhugi ba tɩtɩa sʋʋnʋŋ.”
Yesu ŋaa peliŋ kɛrɛ
Maak 4.35-41; Luuk 8.22-25
23Ŋɩɩ nɛ Yesu jʋʋ lɩɩŋ daboro. Ʋ harɩ-tooroo to ʋ harɩŋ jʋʋ. 24Pel-duo kʋbala guu lulu mʋga-la lɛ. Ŋɩɩ nɛ lɩɩ-peliŋ tɔ lɩɩŋ daboro-la. Ama Yesu fa pɩŋ doŋ nɛ. 25Ŋɩɩ nɛ ʋ harɩ-tooroo mʋ chɩsʋ a bʋla pʋ, “La Tɩɩna, laala ta, laa chɛ la sʋʋ nɛ.” 26Ŋɩɩ nɛ Yesu pɩɛsɛba, “Bɛɛ nɛ tɩɩ fawʋllʋŋ kɛmma? Ma Wɩa laa diiniŋ bɩ yʋgɛ.” Ŋɩɩ nɛ ʋ sii kpɩa pel-la lɛ aŋ bʋla pɩ fuo-la ma dɩ ʋ fɩɛla pɩŋ, leriŋ kala guu ŋaa fʋɩɩ. 27Ʋ ŋaa nʋʋkala wʋkpuŋkpere. Ŋɩɩ nɛ ba pɩpɩɛsɛ dɔŋɔ, “Nɩbɛɛ nɛ ŋ-la? Peliŋ arɩ lɩɩ-peliŋ kala tuto ʋ niiŋ.”
Yesu kiri jɩŋ-bɔŋŋɔɔ baalaa balɩa lɛ
Maak 5.1-20; Luuk 8.26-39
28Ŋɩɩ nɛ Yesu sii mʋ tintee kʋbala baa yɩrɛ Gadara. Lee-la fa hɛ fuoŋ cholo nɛ. Dɩ baalaa balɩa lɩɩ vaamaa tʋɔŋ a kʋ chemu. Jɩŋ-bɔŋŋɔɔ nɛ fa kɛmba, ba nyɩnyaasɛ. Ŋɩɩ leŋ nʋʋkala fa bɩ wombii-la wuo to. 29Ba sɩ na Yesu, ba guu ŋmoo niiŋ a pɩɛsʋ, “Bɛɛ nɛ ŋ chɩchɛ dɩ ŋ ŋaa la lɛ Wɩa Bii? Ŋ kɔ dɩ ŋ dɔgɩsɛla nɛɛ, ka bʋa-la ha bɩ yiee?” 30Dɩ toonuŋ ma hɛ lee-la a yʋgɛ a gɔllɔ didii kɩaa. 31Ŋɩɩ nɛ jɩnsɩ-la sʋl Yesu, “Dɩ ŋ nɩɩ chɛ dɩ ŋ kirila dɩ la lɩɩ, leŋ dɩ la mʋ jʋʋ toonuŋ deemba.” 32Yesu bʋla pɩba, “Má lɩɩ.” Ŋɩɩ nɛ ba lɩɩ baala-la lɛ a mʋ jʋʋ toonu-la. Toonu-la kala sii fá a lɩɩ peel-la nyuŋ a tuu tel mʋga tʋɔŋ a sʋʋ. 33To-daara-la kɛŋ wɩɩŋ deeŋ fá mʋ bʋla pɩ ba taŋ-la nɩaa, arɩ wɩɩ-la sɩ ŋaa baala-la fa sɩ kɛŋ jɩŋ-bɔŋŋɔɔ lɛ. 34Ŋɩɩ nɛ nʋʋkala sɩ hɛ taŋ-la lɛ lɩɩ a mʋ dɩ ʋ na Yesu. Ba sɩ mʋ naʋ, ba sʋlʋ dɩ ʋ lɩɩ ba tinteeŋ lɛ.
Currently Selected:
Matiu 8: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
Matiu 8
8
Yesu vaarɛ gbege
Maak 1.40-45; Luuk 5.12-16
1Yesu sɩ bʋl wɩaa deemba dɛrɛ, ʋ lɩɩ peeliŋ nyuŋ a kʋ tuu. Ŋɩɩ nɛ nɩ-daŋ tuto ʋ harɩŋ. 2Gbege kʋbala ma kɔ ʋ teeŋ a tuu kpirimi ʋ sɩpaaŋ aŋ sʋlʋ, “Kʋhɩaŋ, dɩ ŋ nɛ cho, ŋaa dɩ mɩ duori.” 3Ŋɩɩ nɛ Yesu lɩɩsɛ ʋ nɩsɩŋ a digu aŋ bʋl, “Mɩ cho nɛ, duori.” Yawɩɩl-la guu leŋ baal-la. 4Yesu bʋla pʋ, “Sɩ́ wɩɩŋ deeŋ bʋla pɩ nʋʋkala. Ama kɛŋ ŋ tɩtɩa mʋ dagɛ Wɩɩsʋllɩ sɩpaalaara, aŋ joŋ ŋ Wɩɩsʋlʋŋ kɩaa pʋ dɩ ʋ kpʋ a pɩɩsɛ ŋ disiniŋ ta arɩ Mosis fa sɩ dagɛma ŋɩɩ. Dɩ ŋ nɛ ŋaa ŋɩɩ, nɩaa jaŋ na arɩ ŋ bɩra bɩ disiniŋ kɛnɛ.”
Yesu vaarɛ Rom laalɩyuori-hɩaŋ dɩa tɩntɩnna
Luuk 7.1-10
5Ŋɩɩ nɛ Yesu sii mʋ Kapɛnam dɩ Rom laalɩyuoroo kʋhɩaŋ kʋ chemu a sʋlʋ dɩ ʋ pɛ ʋ lɛ a bʋl, 6“Mɩ kʋhɩaŋ, mɩ dɩa tɩntɩnnʋ nɩɩ wɩɩlʋ a pɩŋ dɩa lɛ. Ʋ bɩ wuo vɛŋ a nɩna hɛɛŋ woruŋ.” 7Ŋɩɩ nɛ Yesu bʋla pʋ, “Mɩ jaŋ kʋ ŋaa dɩ ʋ duori.” 8Ama baal-la bʋla pʋ, “Mɩ Tɩɩna, mɩ bɩ maga dɩ ŋ kʋ jʋʋ mɩ dɩa. Ŋ-na yaa suri ŋ niiŋ a bʋl dɩ mɩ tɩntɩnnʋ-la duori, ʋ jaŋ duori. 9Mɩ ma paalaa to mɩ laalɩyuori hɩasɩŋ niiŋ nɛ. Laalɩyuoroo dɔnsʋŋ ma tuto mɩ niiŋ. Dɩ mɩ nɛ sɩ nɩa deeŋ mʋ daha, ʋ yie mʋ nɛ, dɩ mɩ nɛ sɩ dɩ nɩa deeŋ kɔ daha, ʋ yie kɔ nɛ. Dɩ mɩ nɛ bʋla pɩ mɩ yomo dɩ ʋ ŋaa wɩɩŋ deeŋ, ʋ yie ŋaa nɛ.” 10Yesu sɩ nɩɩ wɩaa deemba, ʋ ŋaaʋ wʋkpuŋkpere. Ŋɩɩ nɛ ʋ bʋla pɩ nɩ-daŋ-la fa sɩɩ to ʋ harɩŋ, “Wʋtɩtɩɩ nɛ mɩ bʋlaa pɩma, mɩ ha bɩ Wɩa laa diiniŋ deeŋ doho na Iziral nɩaa tʋɔŋ. 11Mɩ bʋlaa pɩma, nɩaa jaŋ yʋgɛ a lɩɩ wɩɩpɔsʋŋ arɩ wɩɩjʋʋlʋŋ a kʋ hɔŋ Wɩa kuorii-la tʋɔŋ dɩ ba dɩ Abɩraham arɩ Aɩzɩk arɩ Jekɔb dii kʋdiilee. 12Ama nɩalɩŋ fa sɩ maga dɩ ba hɛ Wɩa kuorii-la lɛ aŋ bɩ jʋa, ba jaŋ jomba yuo ta jeeŋ harɩŋ dɩ ba hɛ birimiŋ tʋɔŋ a pɩna yiyel aŋ dɩdɩŋ ba nyɩlaa.” 13Ŋɩɩ nɛ Yesu bʋla pɩ laalɩyuori-hɩaŋ-la, “Mʋ dɩa, ŋ sɩ laa dii arɩ wɩɩ-la jaŋ ŋaa, ʋ jaŋ ŋaa.” Bʋa-la tɩtɩa lɛ laalɩyuori-hɩaŋ-la tɩntɩnnʋ-la duori.
Yesu vaarɛ nɩaa yʋgɛ
Maak 1.29-34; Luuk 4.38-41
14Ŋɩɩ nɛ Yesu mʋ Pɩɩta dɩa. Ʋ sɩ jʋa, ʋ na dɩ ʋ hɩɩlɩ-haala pɩna a wʋwɩɩlɛ, ʋ yaraa kala lɩŋ. 15Ŋɩɩ nɛ Yesu digi ʋ nɩsɩŋ lɛ. Ʋ yaraa fa sɩ lɩma ŋɩɩ, ʋ fɩɛlɛ. Ʋ sii ŋaa kʋdiilee pɩba ba dii.
16Dɩdaanɩŋ sɩ yie, ba kɛŋ nɩaa yʋgɛ jɩŋ-bɔŋŋɔɔ sɩ kɛnɛ a kɔ Yesu teeŋ. Yesu bʋl wɩaa a kiri jɩŋ-bɔmɔ-la ta aŋ vaarɛ nɩalɩŋ kala fa sɩɩ wɩɩlʋ. 17Ʋ ŋaa wɩɩŋ deeŋ dɩ wɩalɩŋ Azaaya fa sɩ bʋla kʋ ŋaa wʋtɩtɩɩ nɛ. Azaaya fa ŋaa Wɩa wʋlaabʋllʋ nɛ. Ʋ fa bʋla,
“Ʋ nɛ laa la nyanyalaa kala a chʋŋ.”
Nɩalɩŋ sɩ maga dɩ ba to Yesu harɩŋ
Luuk 9.57-62
18Yesu sɩ na dɩ nɩ-daŋ-la kʋ gollu, ʋ ŋaa ʋ dɩ ʋ harɩ-tooroo chol fuoŋ cholo dɔŋɔ. 19Ŋɩɩ nɛ Wɩa teniŋ kerichi kʋbala kɔ ʋ teeŋ a bʋla pʋ, “Mɩ kʋhɩaŋ, mɩ ŋaa siri dɩ mɩ to ŋ harɩŋ a mʋ lee-na kala ŋ sɩɩ mʋ nɛ.” 20Ŋɩɩ nɛ Yesu bʋla pʋ, “Jolluŋ kɛŋ bʋɔsʋŋ nɛ a jʋjʋʋ, diibiisiŋ ma kɛŋ dɛllɩŋ a jʋjʋʋ, ama mɩ-na Nuhuobiine Bie bɩ dɩpɩnɩŋ kɛnɛ dɩ mɩ pɩna wiesi.” 21Nɩaa dɔnsʋŋ ma fa sɩɩ to Yesu harɩŋ, ba tʋɔŋ kʋbala ma bʋla pʋ, “Mɩ Tɩɩna, leŋ dɩ mɩ laa sɩpaaŋ mʋ hugi mɩ nyɩmma.” 22Ŋɩɩ nɛ Yesu bʋla pʋ, “To mɩ harɩŋ aŋ leŋ dɩ sʋʋnʋŋ huhugi ba tɩtɩa sʋʋnʋŋ.”
Yesu ŋaa peliŋ kɛrɛ
Maak 4.35-41; Luuk 8.22-25
23Ŋɩɩ nɛ Yesu jʋʋ lɩɩŋ daboro. Ʋ harɩ-tooroo to ʋ harɩŋ jʋʋ. 24Pel-duo kʋbala guu lulu mʋga-la lɛ. Ŋɩɩ nɛ lɩɩ-peliŋ tɔ lɩɩŋ daboro-la. Ama Yesu fa pɩŋ doŋ nɛ. 25Ŋɩɩ nɛ ʋ harɩ-tooroo mʋ chɩsʋ a bʋla pʋ, “La Tɩɩna, laala ta, laa chɛ la sʋʋ nɛ.” 26Ŋɩɩ nɛ Yesu pɩɛsɛba, “Bɛɛ nɛ tɩɩ fawʋllʋŋ kɛmma? Ma Wɩa laa diiniŋ bɩ yʋgɛ.” Ŋɩɩ nɛ ʋ sii kpɩa pel-la lɛ aŋ bʋla pɩ fuo-la ma dɩ ʋ fɩɛla pɩŋ, leriŋ kala guu ŋaa fʋɩɩ. 27Ʋ ŋaa nʋʋkala wʋkpuŋkpere. Ŋɩɩ nɛ ba pɩpɩɛsɛ dɔŋɔ, “Nɩbɛɛ nɛ ŋ-la? Peliŋ arɩ lɩɩ-peliŋ kala tuto ʋ niiŋ.”
Yesu kiri jɩŋ-bɔŋŋɔɔ baalaa balɩa lɛ
Maak 5.1-20; Luuk 8.26-39
28Ŋɩɩ nɛ Yesu sii mʋ tintee kʋbala baa yɩrɛ Gadara. Lee-la fa hɛ fuoŋ cholo nɛ. Dɩ baalaa balɩa lɩɩ vaamaa tʋɔŋ a kʋ chemu. Jɩŋ-bɔŋŋɔɔ nɛ fa kɛmba, ba nyɩnyaasɛ. Ŋɩɩ leŋ nʋʋkala fa bɩ wombii-la wuo to. 29Ba sɩ na Yesu, ba guu ŋmoo niiŋ a pɩɛsʋ, “Bɛɛ nɛ ŋ chɩchɛ dɩ ŋ ŋaa la lɛ Wɩa Bii? Ŋ kɔ dɩ ŋ dɔgɩsɛla nɛɛ, ka bʋa-la ha bɩ yiee?” 30Dɩ toonuŋ ma hɛ lee-la a yʋgɛ a gɔllɔ didii kɩaa. 31Ŋɩɩ nɛ jɩnsɩ-la sʋl Yesu, “Dɩ ŋ nɩɩ chɛ dɩ ŋ kirila dɩ la lɩɩ, leŋ dɩ la mʋ jʋʋ toonuŋ deemba.” 32Yesu bʋla pɩba, “Má lɩɩ.” Ŋɩɩ nɛ ba lɩɩ baala-la lɛ a mʋ jʋʋ toonu-la. Toonu-la kala sii fá a lɩɩ peel-la nyuŋ a tuu tel mʋga tʋɔŋ a sʋʋ. 33To-daara-la kɛŋ wɩɩŋ deeŋ fá mʋ bʋla pɩ ba taŋ-la nɩaa, arɩ wɩɩ-la sɩ ŋaa baala-la fa sɩ kɛŋ jɩŋ-bɔŋŋɔɔ lɛ. 34Ŋɩɩ nɛ nʋʋkala sɩ hɛ taŋ-la lɛ lɩɩ a mʋ dɩ ʋ na Yesu. Ba sɩ mʋ naʋ, ba sʋlʋ dɩ ʋ lɩɩ ba tinteeŋ lɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014