Matiu 4

Sɩtaanɩ magɩsɛ Yesu

Maak 1.12-13; Luuk 4.1-13

1Ŋɩɩ nɛ Wɩa Dɩŋ-zɔmʋŋ kɛŋ Yesu kaa jʋʋ tintee-hɩlɩŋ tʋɔŋ dɩ Sɩtaanɩ magɩsʋ. 2Yesu fa sɩ hɛ tintee-hɩlɩŋ tʋɔŋ ŋɩɩ, ʋ vɔɔ niiŋ tɩtaŋɩŋ arɩ wɩɩhɛyɛ kala tapʋlaa mahɩŋ balɩa, ŋɩɩ nɛ losuŋ kɛnʋ. 3Ŋɩɩ nɛ Sɩtaanɩ kɔ ʋ teeŋ a bʋla pʋ, “Dɩ ŋ nɛ ŋaa Wɩa Bie, leŋ dɩ tabɩaa deemba bɩrɩmɛ kʋdiilee.” 4Ŋɩɩ nɛ Yesu bʋla pʋ, “Ba ŋmʋnsɛ Wɩa teniŋ tʋɔŋ a bʋl,

‘Kʋdiilee dʋndʋŋa dee bɩ nuhuobiine mɩɩsɩŋ ka pa,

ama Wɩa niiŋ wɩalɩŋ ʋ sɩɩ bʋl nɩɩ pa mɩɩsɩŋ.’ ”

5Sɩtaanɩ kɛnʋ kaa mʋ Jerusalɛm a kɛnʋ jɩl Wɩa dɩɩ-balɩŋ nyu-gbaŋa 6aŋ bʋla pʋ, “Dɩ ŋ nɛ ŋaa Wɩa Bie, joŋ ŋ tɩtɩa yuo daha a tuu chigisi tinteeŋ. Ba ŋmʋnsɛ Wɩa teniŋ tʋɔŋ a bʋl,

‘Wɩa jaŋ leŋ dɩ ʋ tɩndaaraa

kʋ cheme kɛnɩŋ,

dɩ ŋ sɩ́ ŋ naaŋ joŋo ŋmoo tabɩɩŋ.’ ”

7Ŋɩɩ nɛ Yesu bʋla pʋ, “Ba bɩra ŋmʋnsɛ Wɩa teniŋ sɛmɛ dɔŋɔ a bʋl,

‘Má sɩ́ ma Tɩɩna Wɩa magɩsʋ.’ ”

8Ŋɩɩ nɛ Sɩtaanɩ bɩra kɛŋ Yesu a kaa jɩl peel-bal kʋbala nyuŋ a dagʋ dʋnɩa kuoruŋ fine arɩ ʋ zɔmʋŋ 9aŋ bʋla pʋ, “Mɩ jaŋ joŋ kɩaa deemba kala pɩŋ dɩ ŋ nɛ jaŋ tuu kpirimi a chʋɔlɛmɛ.” 10Ŋɩɩ nɛ Yesu bʋla pʋ, “Sɩtaanɩ, mʋ nɩmɛ, Wɩa teniŋ tʋɔŋ ba ŋmʋnsa, ‘Má chʋchʋɔlɛ La Tɩɩna Wɩa dʋndʋŋa a tutou.’ ” 11Ŋɩɩ nɛ Sɩtaanɩ viiri aŋ ka Yesu, Wɩa tɩndaaraa kʋ pɛ ʋ lɛ.

Yesu suomi ʋ tɩntɩŋŋaa Galilii lɛ

Maak 1.14-15; Luuk 4.14-15

12Bʋa deeŋ lɛ dɩ ba kɛŋ Jɔɔŋ Wɩa lɩɩ-fooru-la tɔ dɩa. Yesu sɩ nɩɩ ŋɩɩ, ʋ sii Judiya lɛ a mʋ Galilii tinteeŋ. 13Ʋ bɩra bɩ Nazarɛt lɛ hɔnɔ aŋ sii mʋ hɔŋ taŋ kʋbala baa yɩrɛ Kapɛnam lɛ. Taŋ-la kpagɛ Galilii mʋgʋ-bal-la nɛ a hɛ Zebuluŋ arɩ Nafɩtalɩ tinteeŋ lɛ. 14Wɩɩŋ deeŋ ŋaa dɩ wɩalɩŋ Azaaya fa sɩ bʋla kʋ ŋaa wʋtɩtɩɩba nɛ. 15Azaaya fa ŋaa Wɩa wʋlaabʋllʋ nɛ. Ʋ fa bʋl wɩaa a pɩ Zebuluŋ arɩ Nafɩtalɩ doho nɩaa nɛ a chaasɛ mʋgʋ-balɩŋ dɩɩrɩŋ, Jɔdaŋ sɛmɛ, a hɛ Galilii tinteeŋ lɛ. Ba ŋaa nɩalɩŋ sɩ bɩ Juu tɩŋŋaa ŋaa nɛ. 16Ʋ bʋla pɩba,

“Nɩalɩŋ sɩ hɛ birimiŋ tʋɔŋ

na pʋlʋŋ-bal nɛ.

Tintee-la nɩaa fa sɩ hɛ biriŋ lim tʋɔŋ,

pʋlʋmʋŋ lɛɛlɛ chaana hɛ ba lɛ nɛ.”

17Yesu sɩ hɛ Kapɛnam lɛ, ʋ suomi ʋ tɩntɩŋŋaa a bʋl Wɩa wɩaa pɩ nɩaa a bʋl, “Má bɩrɩma lɩɩ ma wʋbɔŋŋɔɔ lɛ, bɛɛ wɩaa, Wɩa kuorii-la kpaga nɛ.”

Yesu yɩrɛ chenfil-kpʋʋraa banɛsɛ

Maak 1.16-20; Luuk 5.1-11

18Yesu fa sɩ joŋ Galilii mʋgʋ-bal-la niiŋ a vɩvɛŋ, ʋ na naambiiriŋ balɩa. Dɔŋɔ yɩrɩŋ nɛ Saamɔŋ, ʋ yɩrɩŋ dɔŋɔ ma nɛ Pɩɩta. Ʋ naambie ma yɩrɩŋ nɛ Anduru. Ʋ naba dɩ baa kɛsɛ chenfilee nɛ fuo-la lɛ arɩ ba jomba, bɛɛ wɩaa ba fa ŋaa chenfil kpʋʋra nɛ. 19Ŋɩɩ nɛ Yesu bʋla pɩba, “Má kʋ to mɩ harɩŋ, mɩ jaŋ ŋaa ma kɩkɛsɛ nɩaa a nagɛ ŋɩɩ ma sɩɩ kɛsɛ chenfilee.” 20Ba guu leŋ ba jomba ta aŋ to ʋ harɩŋ. 21Ŋɩɩ nɛ ʋ bɩra vɛŋ a mʋ na naambiiriŋ balɩa, ba yɩraa nɛ Jeems arɩ Jɔɔŋ. Ba fa ŋaa Zebidi biiriŋ nɛ. Ʋ naba dɩ ba dɩ ba nyɩmma fa hɛ ba lɩɩŋ daboro tʋɔŋ nɛ. Ba kɛŋ ba jomba ŋaa siri dɩ ba yuo. 22Ŋɩɩ nɛ Yesu yɩrɛba. Ba guu leŋ ba lɩɩŋ daboro arɩ ba nyɩmma aŋ to ʋ harɩŋ.

Yesu bʋl Wɩa wɩaa pɩ nɩaa aŋ pɛ vaarɛ nyanyal tɩŋŋaa

Luuk 6.17-19

23Ŋɩɩ nɛ Yesu gɔllɛ Galilii tinteeŋ kala a dɩdagɛ nɩaa ba Wɩɩchʋɔlɛ dɩɩsɩŋ lɛ a bʋbʋl Wɩa wʋzɔmɔ-la wɩaa arɩ Wɩa kuorii-la wɩaa a pɩ nɩaa aŋ pɛ vɩvaarɛ nɩaa nyanyal dosunuŋ kala. 24Yesu wɩaa teeli Siiria tinteeŋ kala. Ŋɩɩ nɛ nɩaa kɛŋ ba nyanyal tɩŋŋaa kɔ ʋ teeŋ arɩ nyanyal dosunuŋ, jɩŋ-bɔŋŋɔɔ fa kɛŋ dɔnsʋŋ, dɔnsʋŋ ma titel kuŋkunsuŋ, dɔnsʋŋ ma fa ŋaa gbɛrɩgɛɛ. Ŋɩɩ nɛ Yesu vaarɛ ba kala. 25Nɩ-daŋ nɛ fa to Yesu harɩŋ. Dɔnsʋŋ lɩɩ Galilii tinteeŋ arɩ tasɩŋ fii. Dɔnsʋŋ ma lɩɩ Jerusalɛm sɩ hɛ Judiya tinteeŋ lɛ, dɔnsʋŋ ma lɩɩ Jɔdaŋ fuoŋ cholo sɛmɛ dɔŋɔ.

Currently Selected:

Matiu 4: SIS

Highlight

Copy