Matiu 3
3
Jɔɔŋ Wɩa lɩɩ-fooru-la bʋl Wɩa wɩaa
Maak 1.1-8; Luuk 3.1-18; Jɔɔŋ 1.19-28
1Bʋa-la lɛ Jɔɔŋ Wɩa lɩɩ-fooru-la sii kɔ Judiya tinteeŋ a jʋʋ tintee-hɩlɩŋ tʋɔŋ a suomo bʋl Wɩa wɩaa pɩpɩ nɩaa. 2Ʋ bʋla pɩba, “Má bɩrɩma lɩɩ ma wʋbɔŋŋɔɔ lɛ, bɛɛ wɩaa Wɩa kuorii-la kpaga nɛ.” 3Wɩa wʋlaabʋlla Azaaya fa bʋl ʋ wɩaa nɛ. Ʋ fa sɩ,
“Nʋʋ nɛ chɩŋ tintee-hɩlɩŋ lɛ a heelee bʋl,
‘Má wasɛ wombiiŋ bil La Tɩɩna lɛ.
Má pori wombii-la dɩ ʋ tʋʋlɛ.’ ”
4Jɔɔŋ gɛnnɩŋ fa ŋaa bʋntaŋŋa pʋnaa nɛ ba kaa sʋa, ʋ kɛŋ tembiiŋ vɔɔ ʋ tɩŋa. Ʋ kʋdiilee nɛ fa nyaŋgɩrɩgɛba arɩ tʋʋŋ. 5Nɩaa lɩɩ Jerusalɛm arɩ Judiya tinteeŋ kala arɩ tasɩ-la kala sɩ golli Jɔdaŋ fuo-la a kɔ ʋ teeŋ, 6a dagɛ ba wʋbɔŋŋɔɔ aŋ tuu Jɔdaŋ fuo-la, ʋ foba Wɩɩchʋɔlɛ lɩɩŋ.
7Jɔɔŋ na Farisii tɩŋŋaa arɩ Saduusi tɩŋŋaa dɩ ba yʋga a kʋkɔ ʋ teeŋ dɩ ʋ foba Wɩɩchʋɔlɛ lɩɩŋ. Ʋ bʋla pɩba, “Ma nɩaa deemba wʋŋaalaa nagɛ dɩŋŋaa nɛ. Ma bɩɩna ma jaŋ wuo fá lɛl chɛɛ-la Wɩa sɩ jaŋ dii nʋʋkala sarɩyaa? 8Máa ŋaa wɩalɩŋ sɩ jaŋ dagɛ arɩ ma bɩrɩma lɩɩ ma wʋbɔŋŋɔɔ lɛ nɛ, 9aŋ sɩ́ bɩɩna bʋl Abɩraham sɩ ŋaa ma naabalɩma ŋɩɩ, Wɩa bɩ jaŋ dɔgɩsɛma. Mɩ jaŋ bʋla pɩma arɩ Wɩa paala jaŋ wuo ŋaa dɩ tabɩaa deemba ma sɩ na bɩrɩmɛ Abɩraham doho nɩaa. 10Na, ba kɛŋ saaŋ jee nɛ a ŋaa siri dɩ ba keri tɩɩsɩŋ lo. Tɩa-la kala sɩ bɩ nɛŋ-zɔŋŋɔɔ ka nɛŋ, ba jaŋ keru lo a joŋo hɛ nyiniŋ lɛ.
11Mɩ-na foma Wɩɩchʋɔlɛ lɩɩŋ a dagɛ arɩ ma bɩrɩma lɩɩ ma wʋbɔŋŋɔɔ lɛ nɛ, ama nɩɩ-la sɩ jaŋ to mɩ harɩŋ kɔ, ʋ nɛ jaŋ joŋ Wɩa Dɩŋ-zɔmʋŋ hɛ ma dɔnsʋŋ lɛ aŋ joŋ nyiniŋ hɛ dɔnsʋŋ ma lɛ. Ʋ nɛ faasa kɛŋ doluŋ kɩɩmɛ. Ʋ paala bɩ maga dɩ mɩ kori ʋ nɛntɛŋŋɛɛ ma. 12Ʋ jaŋ kori ʋ mɩɩ-chaarɩ gbaŋa, dɩ ʋ ŋmoo ʋ mɩaa kala dɛrɛ, ʋ jaŋ kɛŋ gbaŋa-la a kaa chaarɛ a lɩɩsɛ mɩɩ-biiŋ a hɛ ʋ vire lɛ aŋ joŋ jɔrʋŋ a hɛ nyiniŋ lɛ. Nyiŋ-la bɩ jaŋ dɩsɛ.”
Jɔɔŋ fo Yesu Wɩɩchʋɔlɛ lɩɩŋ
Maak 1.9-11; Luuk 3.21-22
13Bʋa-la lɛ Jɔɔŋ fa sɩɩ fo nɩaa Wɩɩchʋɔlɛ lɩɩŋ ŋɩɩ, Yesu sii lɩɩ Galilii tinteeŋ a kɔ Jɔɔŋ teeŋ dɩ ʋ fou Wɩɩchʋɔlɛ lɩɩŋ Jɔdaŋ fuo-la lɛ. 14Ama Jɔɔŋ wʋwalɩmɛ dɩ Yesu kɛŋ ʋ tʋɔbɩɩnaa bɩrɩmɛ. Ŋɩɩ nɛ Jɔɔŋ bʋla pʋ, “Ŋ nɛ maga dɩ ŋ fomi Wɩɩchʋɔlɛ lɩɩŋ, aŋ ka ŋ kɔ dɩ mɩ nɛ foŋ Wɩɩchʋɔlɛ lɩɩŋ ŋɩɩ.”
15Ŋɩɩ nɛ Yesu bʋl, “Ŋaa ŋɩɩ mɩ sɩ bʋla pɩŋ. Ŋ-la nɛ la jaŋ wuo to a ŋaa wɩɩ-la kala Wɩa sɩ cho.” Ŋɩɩ nɛ Jɔɔŋ sɛɩ a fou Wɩɩchʋɔlɛ lɩɩŋ.
16Jɔɔŋ sɩ fo Yesu Wɩɩchʋɔlɛ lɩɩŋ dɛrɛ, ʋ guu lɩɩ lɩɩ-la tʋɔŋ kʋ lɩɩ, wɩa-nyuŋ kpaa balɩa. Ʋ na Wɩa Dɩŋ-zɔmʋŋ dɩ ʋ kʋ tuu a nagɛ kokomo a togili ʋ lɛ. 17Ka ʋ nɩɩ nʋʋ yikoro wɩa-nyuŋ sɩ bʋla, “Mɩ Bii-chooluŋ nɛ ŋ-la, mɩ tʋɔŋ tɔrɛ ʋ nyuŋ.”
Currently Selected:
Matiu 3: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014