LEVI DOHO NƖAA 17
17
Wɩa sɩ Iziral tɩŋŋaa sɩ́ chalɩŋ dii
1La TƖƖNA bʋla pɩ Mosis, 2“Bʋla pɩ Arɔŋ arɩ ʋ hambolibiisiŋ arɩ Iziral tɩŋŋaa kala: ‘Wɩɩŋ deeŋ nɛ mɩ-na ma TƖƖNA dagɛ: 3Dɩ Iziral tɩɩna kala nɛ kɛŋ nɛ-bele koo pie-pɔrʋŋ koo bʋʋŋ a ŋaa Wɩɩsʋlʋŋ ma dɩhɔnʋŋ lɛ koo dɩ ʋ kaa lɩɩ ma dɩhɔnʋŋ lɛ nɛ, 4aŋ bɩ kaa mʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ a ŋaa Wɩɩsʋlʋŋ pɩ mɩ-na ma TƖƖNA Wɩa dɩ-zɔŋ-la sɩpaaŋ, má joŋ tɩɩna arɩ ʋ jaasɛ chalɩŋ nɛ. Ʋ sɩ jaasɛ chal-la ŋɩɩ, má keru ta ʋ nɩaa tʋɔŋ. 5Ŋ-la daga arɩ Iziral tɩɩna kala sɩ́ ʋ Wɩɩsʋlʋŋ pʋna kpʋ pɔkɔŋ nyuŋ. Ba maga dɩ ba kɛŋ kɩalɩŋ kaa mʋ pɩ Wɩɩsʋllɩ sɩpaalaara lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ dɩ ʋ joŋo sʋl nii-magɛ dɔŋɔ Wɩɩsʋlʋŋ a pɩ mɩ-na ma TƖƖNA. 6Wɩɩsʋllɩ sɩpaalaara jaŋ joŋ pʋna-la chalɩŋ a mɩsɛ Wɩɩsʋlʋŋ koru-la sɩ chɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ aŋ joŋ pʋna-la nʋʋŋ nyɩgɛ, ba sʋɔra sɩma nɛ a pɩ mɩ-na ma TƖƖNA. 7Ʋ bɩ maga dɩ ba bɩra kpaarɛ vʋɩ kala, kɩalɩŋ lɛ ba fa sɩ to a ŋɩŋaa wʋlɩɩlɩŋ. Wɩɩŋ deeŋ ŋaa nii nɛ a pɩ ma dɩ ma doho kala dɩ ma tuto.’ 8Bʋla pɩba, ‘Dɩ Iziral tɩɩna koo dɩ nʋhʋɔrʋ nɛ hɛ ba tʋɔŋ a ŋaa kʋnyɩgaa Wɩɩsʋlʋŋ koo Wɩɩsʋlɩɩ dɔŋ, 9aŋ bɩ kaa mʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ a pɩ mɩ-na ma TƖƖNA, ʋ maga dɩ ba keru ta ʋ nɩaa tʋɔŋ.
10Dɩ Iziral tɩɩna koo nʋhʋɔrʋ sɩ hɛ ma tʋɔŋ nɛ dii chalɩŋ, mɩ jaŋ vɩa nɩɩ-la a keru ta mɩ nɩaa tʋɔŋ. 11Kʋŋ na-kala sɩ weye mɩɩsɩŋ hɛ ʋ chalɩŋ lɛ nɛ, ʋ nɛ mɩ joŋo pɩma dɩ ma kaa pɩɩsɛ ma tɩtɩa wʋbɔŋŋɔɔ tɩta Wɩɩsʋlʋŋ koru-la nyuŋ, chalɩŋ nɛ yie pɩɩsɛ nʋʋ wʋbɔŋŋɔɔ ta ka ʋ kɛŋ mɩɩsɩŋ. 12Ŋɩɩ wɩaa mɩ bʋlaa pɩ ma Iziral tɩŋŋaa arɩ nʋhʋɔra-la kala sɩ hɛ ma tʋɔŋ, má sɩ́ chalɩŋ dii.
13Dɩ Iziral tɩɩna koo nʋhʋɔrʋ kala sɩ hɛ ma tʋɔŋ nɛ mʋ nambagɩlɩŋ a kpʋ bagɩl koo diibie kala ma sɩɩ chaŋ, ʋ maga dɩ ma keri ʋ chalɩŋ hugi, 14bɛɛ wɩaa kʋŋkala sɩ weye mɩɩsɩŋ hɛ ʋ chalɩŋ lɛ nɛ. Ŋɩɩ nɛ tɩɩ mɩ sɩ má sɩ́ kʋŋkala chalɩŋ dii ŋɩɩ. Dɩ nʋʋkala nɛ die, ʋ maga ma keru ta ʋ nɩaa tʋɔŋ.
15Dɩ ma kʋŋkala koo nʋhʋɔrʋ nɛ dii kʋŋ sɩ sʋʋ ʋ tɩtɩa lɛ koo dɩ baga kʋŋ nɛ kpʋa, tɩɩna maga dɩ ʋ chɛsɛ ʋ gɛnnɩŋ a fo lɩɩŋ. Arɩ ŋɩɩ kala, ʋ ha jaŋ kɛŋ disiniŋ dɩ wɩa tuu jʋʋ. Dɩ wɩa nɛ jʋa, ʋ bɩra bɩ disiniŋ kɛnɛ. 16Ama dɩ ʋ nɛ bɩ ʋ gɛnnɩŋ chɛsɛ a fo lɩɩŋ, ʋ jaŋ na hɛɛŋ ŋɩɩ bʋbʋɔŋ lɛ.’ ”
Currently Selected:
LEVI DOHO NƖAA 17: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
