LEVI DOHO NƖAA 18
18
Haalaa arɩ baalaa dɔŋɔba pɩnɩŋ wɩaa
1La TƖƖNA bʋla pɩ Mosis, 2“Bʋla pɩ Iziral tɩŋŋaa kala: ‘Mɩ nɛ ŋaa ma TƖƖNA Wɩa. 3Má pɔ má sɩ́ wɩalɩŋ Ijipiti tɩŋŋaa sɩɩ ŋaa to, lee-la ma fa sɩ hɛ, arɩ wɩalɩŋ Kɛnaŋ tɩŋŋaa sɩɩ ŋaa lee-la mɩ sɩ jaŋ kɛmma mʋ. 4Má to mɩ wombiee a ŋaa wɩalɩŋ mɩ sɩ dagɛma, mɩ nɛ ŋaa ma TƖƖNA Wɩa. 5Má to mɩ wombiee arɩ wɩalɩŋ mɩ sɩ dagɛma, nɩɩ-la kala sɩ toba, ŋ jaŋ kɛŋ mɩɩsɩŋ. Mɩ nɛ ŋaa ma TƖƖNA Wɩa.
6Nʋʋkala bɩ maga dɩ ʋ kɛŋ ʋ naambie pɩŋ. Mɩ nɛ ŋaa ma TƖƖNA Wɩa.
7Pʋpɔ ŋ sɩ́ ŋ nyɩmma hɩɩsʋ a kɛŋ ŋ naaŋ pɩŋ. Ŋ naaŋ nɛ, sɩ́ ʋ kaa pɩŋ.
8Sɩ́ ŋ nyɩmma hɩɩsʋ a kɛŋ ŋ naaŋ hadɔŋɔ pɩŋ.
9Pʋpɔ ŋ sɩ́ ŋ dɩhaala kaa pɩŋ, ŋ nyɩmma tolo koo ŋ naaŋ tolo, dɩ ba lʋl ma kala dɩ-bala nɛ koo dɩ ba lʋlʋ lee dɔŋ nɛ.
10Pʋpɔ ŋ sɩ́ ŋ nihiŋ kaa pɩŋ, dɩ ŋ nɛ ŋaa ŋɩɩ, ŋ hɛ ŋ tɩtɩa hɩɩsɩŋ nɛ.
11Pʋpɔ ŋ sɩ́ ŋ naaŋ hadɔŋɔ tolo ŋ nyɩmma sɩ lʋla kaa pɩŋ, ʋ ŋaa ŋ dɩhaala nɛ.
12Pʋpɔ ŋ sɩ ŋ nyɩmma dɩhaala kaa pɩŋ, ʋ ŋaa ŋ nyɩlɩma nɛ.
13Pʋpɔ ŋ sɩ́ ŋ naaŋ ŋaana kaa pɩŋ, ŋ naaŋ kʋbie nɛ.
14Pʋpɔ ŋ sɩ́ ŋ nyɩmma kʋbie hɩɩsɩŋ hɛ a kɛŋ ʋ haala pɩŋ, ŋ naaŋ nɛ.
15Pʋpɔ ŋ sɩ́ ŋ nanʋala haala kaa pɩŋ, ŋ bii-haala nɛ.
16Pʋpɔ ŋ sɩ́ ŋ naambie haala kaa pɩŋ a hɛ ŋ naambie hɩɩsɩŋ.
17Pʋpɔ ŋ sɩ́ haala arɩ ʋ tolo kala kaa pɩŋ koo haal-la nihee. Ma pɛ chalɩŋ nɛ, ŋɩɩ ŋaa wʋbɔŋ nɛ.
18Dɩ ŋ haala nɛ hɛ ʋ mɩɩsɩŋ lɛ, ʋ bɩ maga dɩ ŋ jaa ʋ ŋaana dɩ ba ŋaa hadɔsɛ.
19Dɩ haala nɛ hɛ tɩŋa, pʋpɔ ŋ sɩ́ ʋ kaa pɩŋ, ʋ kɛŋ disiniŋ nɛ.
20Pʋpɔ ŋ sɩ́ nʋʋ haal kaa pɩŋ a ŋaa disiniŋ hɛ ŋ tɩtɩa lɛ.
21Má pʋpɔ ma sɩ́ ma bii kaa pa dɩ ba kaa kpaarɛ vene-la ba sɩɩ yɩrɛ Mɔlɛk, a hɛ ma Wɩa hɩɩsɩŋ. Mɩ nɛ ŋaa ma TƖƖNA.
22Pʋpɔ ŋ sɩ́ ŋ ba-dɔŋɔ kaa pɩŋ, arɩ nɩa sɩ yie kɛŋ haala pɩŋ ŋɩɩ, ʋʋ kɩsɛ nɛ.
23Baal kala bɩ maga dɩ ʋ kɛŋ pʋna pɩŋ. Haal ma bɩ maga dɩ ʋ leŋ dɩ pʋna kɛnʋ pɩŋ. Ŋɩɩ ŋaa wʋberige nɛ.
24Má pʋpɔ ma sɩ́ wɩaa deemba kʋŋ ŋaa a kɛŋ disiniŋ. Lee-la ma sɩɩ mʋ wɩaa deemba nɛ baa ŋaa, mɩɩ chɛ mɩ kiriba ta tintee-la lɛ. 25Wɩalɩŋ nɛ ba ŋaa tintee-la kala kɛŋ disiniŋ, mɩ dɔgɩsɛba a kiriba ta tintee-la lɛ. 26Ma Iziral tɩŋŋaa arɩ nʋhʋɔra-la sɩ hɛ ma tʋɔŋ maga dɩ má to mɩ wombie-la arɩ wɩalɩŋ mɩ sɩ dagɛ nɛ. Má sɩ́ disiŋ wɩaa deemba kʋŋkala ŋaa. 27Nɩalɩŋ sɩ laa sɩpaaŋ hɔŋ tintee-la lɛ ŋaa disiŋ wɩaa deemba nɛ a chei tintee-la kala. 28Dɩ ma nɩɩ ŋaa disiŋ wɩaa deemba tintee-la lɛ, mɩ jaŋ kirima ta arɩ mɩ sɩ kiri nɩalɩŋ sɩ laa sɩpaaŋ hɔŋ tintee-la lɛ ta ŋɩɩ.
29Dɩ nʋʋkala nɛ ŋaa wʋkɩsaa deemba, ʋ maga dɩ má keru ta ʋ nɩaa tʋɔŋ nɛ. 30Má ŋɩŋaa wɩalɩŋ mɩ sɩ dagɛma, aŋ sɩ́ disiŋ wɩalɩŋ nɩalɩŋ fa sɩ hɔŋ tintee-la lɛ a ŋɩŋaa to a ŋaa disiniŋ hɛ ma tɩtɩa lɛ. Mɩ nɛ ŋaa ma TƖƖNA Wɩa.’ ”
Currently Selected:
LEVI DOHO NƖAA 18: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
