LEVI DOHO NƖAA 11
11
Kʋdiile-la sɩ kɛŋ disiniŋ arɩ kʋdiile-la sɩ bɩ disiniŋ kɛnɛ
1La TƖƖNA bʋla pɩ Mosis arɩ Arɔŋ, 2“Má bʋla pɩ Iziral-tɩŋŋaa: ‘Pʋsʋŋ arɩ bagɩla-la kala sɩ hɛ tinteeŋ lɛ, kɩalɩŋ ba sɩ jaŋ wuo chɩchaŋ nɛ ŋ-la: 3Ba jaŋ wuo chaŋ pʋna koo bagɩl na-kala sɩ kɛŋ naachɛŋŋɛɛ aŋ gbu kɩaa chɩchaŋ.
4Pʋsʋŋ arɩ bagɩlaa dɔnsʋŋ hɛ nɩmɛ a gbu kɩaa chɩchaŋ aŋ bɩ naachɛŋŋɛɛ kɛnɛ, dɔnsʋŋ ma kɛŋ naachɛŋŋɛɛ aŋ bɩ kɩaa gbu chɩchaŋ, má sɩ́ ba kʋŋkala chaŋ. Bʋntaŋŋa gbu kɩaa a chɩchaŋ nɛ aŋ bɩ naachɛŋŋɛɛ kɛnɛ, ʋ ŋaa disiŋ-kʋŋ nɛ ma teeŋ. 5Bʋŋ-nyuŋ gbuŋgbogo ma gbu kɩaa a chɩchaŋ nɛ aŋ bɩ naachɛŋŋɛɛ kɛnɛ, ʋ ma kɛŋ disiniŋ nɛ ma teeŋ. 6Chuomo ma gbu kɩaa a chɩchaŋ nɛ aŋ bɩ naachɛŋŋɛɛ kɛnɛ, ʋ ma kɛŋ disiniŋ nɛ ma teeŋ. 7Ma teeŋ, tooŋ ŋaa disiŋ kʋŋ nɛ ʋ kɛŋ naachɛŋŋɛɛ nɛ aŋ bɩ kɩaa gbu chɩchaŋ, má sɩ́ ʋ chaŋ. 8Má sɩ́ ba nammɩa chaŋ a sɩ́ ba kʋsʋʋnʋŋ ma digu, ba ŋaa disiŋ kɩaa nɛ.
9Kɩalɩŋ kala sɩɩ jʋʋ lɩɩŋ a kɛŋ horuŋ arɩ kerikee, ma jaŋ wuo chaŋ. 10Ama kʋŋ na-kala sɩɩ jʋʋ lɩɩŋ aŋ bɩ kerikee arɩ horuŋ kɛnɛ maga dɩ maa kɩsɛba nɛ. 11Ma sɩ folo kɩkɩsɛ kɩaa deemba, má sɩ́ ba chaŋ a sɩ́ ba kʋsʋʋnʋŋ ma digu. 12Má sɩ́ kʋŋ na-kala sɩɩ jʋʋ lɩɩŋ aŋ bɩ kerikee arɩ horuŋ kɛnɛ chaŋ.
13Má sɩ́ diibiisiŋ deemba chaŋ: kachuuŋ, duuŋ arɩ duuŋ-bine, 14habal-joŋ doho na-kala, 15gɩlɩŋgaaŋ doho na-kala, 16gʋra-nyilimi, hajaaŋkuŋkuŋ-la sɩ kɛŋ dɩgɩlaa, naliiribommie arɩ kɩl doho na-kala, 17hajaaŋkuŋkuŋ-bine, hajaaŋkuŋkuŋ-bie arɩ kamege, 18hajaaŋkuŋkuŋ-pʋla arɩ hajaaŋkuŋkuŋ-la sɩ hɛ tintee-hɩlɩŋ lɛ arɩ fuoŋ-jimiŋ. 19Diibii-kaŋ-tɔmʋŋ, jɩŋ arɩ kʋlʋŋkʋɔl doho na-kala.
20Fille-la kala sɩ kɛŋ naasɩŋ banɛsɛ bɩ maga dɩ ma chaŋ, maa kɩsɛba nɛ. 21Ma jaŋ wuo chaŋ fille-la dɔnsʋŋ sɩ kɛŋ naasɩŋ banɛsɛ a fɩfɩl tinteeŋ. 22Ma jaŋ wuo chaŋ hɔbɩ doho na-kala, poŋ doho na-kala arɩ nyaŋgɩrɩgɛ doho na-kala. 23Ama má sɩ́ fille-la dɔnsʋŋ kala sɩ kɛŋ naasɩŋ banɛsɛ chaŋ, ba kɛŋ disiniŋ nɛ.
24Fillee deemba kala kɛŋ disiniŋ nɛ. Dɩ nʋʋkala nɛ digi ba kʋsʋʋŋ, ʋ tɩɩna jaŋ kɛŋ disiniŋ tapʋlɩɩ-la kala dɩ wɩa tuu jʋʋ. 25Dɩ ma kʋŋkala nɛ joŋ ba kʋsʋʋŋ, ʋ maga ʋ chɛsɛ ʋ gɛnnɩŋ nɛ. Ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ.
26Pʋsʋŋ arɩ bagɩla-la kala sɩ bɩ naachɛŋŋɛɛ kɛnɛ koo a bɩ kɩaa gbu chɩchaŋ kɛŋ disiniŋ nɛ. Dɩ ma kʋŋkala nɛ digi ba kʋsʋʋŋ, ŋ jaŋ kɛŋ disiniŋ. 27Pʋsʋŋ arɩ bagɩla-la kala sɩ kɛŋ naasɩŋ banɛsɛ arɩ naanii-fɩlaa ŋaa disiŋ kɩaa nɛ ma teeŋ. Dɩ ma kʋŋ nɛ digi ba kʋsʋʋŋ ŋ jaŋ kɛŋ disiniŋ tapʋlɩɩ-la kala dɩ wɩa tuu jʋʋ. 28Dɩ ma kʋŋkala nɛ joŋ ba kʋsʋʋŋ, ʋ maga ʋ chɛsɛ ʋ gɛnnɩŋ nɛ, ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ. Ba ŋaa disiŋ kɩaa nɛ ma teeŋ.
29Kʋnyiere-la kala sɩɩ vɛŋ tinteeŋ tʋɔŋ kɩaa deemba ma kɛŋ disiniŋ nɛ ma teeŋ: mʋtʋrʋŋ, oluŋ, taatɩɩŋ, arɩ habalaa, 30dɩdaaŋ-sʋʋŋ, baaŋ, kʋlʋŋgbɛnɛ arɩ kuŋkoluŋ-bawɩɩ. Ba kala kɛŋ disiniŋ nɛ ma teeŋ. 31Kʋnyiere-la kala sɩɩ vɛŋ tinteeŋ, ba tʋɔŋ kɩalɩŋ sɩ kɛŋ disiniŋ ma teeŋ nɛ la dagɛ ŋɩɩ. Dɩ nʋʋkala nɛ digi ba kʋsʋʋŋ, tapʋlɩɩ-la kala ʋ jaŋ kɛŋ disiniŋ dɩ wɩa tuu jʋʋ. 32Kʋŋ na-kala lɛ kɩaa deemba kʋsʋʋŋ sɩ tele hɛ, dɩ gɛrɩŋ nɛ koo dɩ daaŋ nɛ ba kaa ŋaa kʋ-la, koo dɩ teniŋ nɛ koo bɔtɔ nɛ, kʋ-la kɛŋ disiniŋ nɛ. Ʋ maga dɩ má joŋo sɩŋ lɩɩŋ lɛ a kaa mʋ dɩdaanɩŋ, ŋɩɩ harɩŋ lɛ ʋ bɩra bɩ jaŋ kɛŋ disiniŋ. 33Dɩ kɩaa deemba kʋŋkala nɛ tel pupoiŋ tʋɔŋ, pupoi-la arɩ ʋ tʋɔŋ kɩaa kala kɛŋ disiniŋ nɛ, ʋ maga dɩ má ŋmoo yɛrɛ. 34Dɩ ŋɩɩ dee ka dɩ pupoi-la tʋɔŋ lɩɩŋ digi kʋdiilii na-kala ma sɩ jaŋ wuo dii koo kʋnyʋalɩɩ na-kala ma sɩ jaŋ nyʋa, ba jaŋ kɛŋ disiniŋ. 35Dɩ kɩaa deemba nɛ sʋʋ hɛ pupoiŋ lɛ koo tabʋʋŋ lɛ, má ŋmoo yɛrɛ, ba kɛŋ disiniŋ nɛ. 36Lɩɩ-bulo arɩ vilee lɩɩŋ bɩ disiniŋ kɛnɛ bʋa na-kala, dɩ kɩalɩŋ la sɩ daga kʋŋ nɛ sʋʋ hɛ ba lɛ ma. Ama dɩ nʋʋ nɛ digi kʋsʋʋ-la sɩ tele hɛ, ŋ-na jaŋ kɛŋ disiniŋ. 37Dɩ kɩalɩŋ sɩ kɛŋ disiniŋ kʋŋ nɛ sʋʋ hɛ ma kʋdoho lɛ ma, ba bɩ jaŋ kɛŋ disiniŋ. 38Ama dɩ ba nɛ joŋ kʋdoho hɛ lɩɩŋ lɛ, ka dɩ kɩalɩŋ kʋŋ sʋʋ hɛ, ba kɛŋ disiniŋ nɛ.
39Pʋna koo bagɩl na-kala ma sɩ jaŋ wuo chaŋ, dɩ ʋ nɛ sʋba dɩ ma kʋŋkala digu, ŋ jaŋ kɛŋ disiniŋ tapʋlɩɩ-la kala dɩ wɩa tuu jʋʋ. 40Nɩɩ-la kala sɩ chaŋ nammɩa-la maga ʋ chɛsɛ ʋ gɛnnɩŋ nɛ, ama ʋ ha jaŋ kɛŋ disiniŋ dɩ wɩa tuu jʋʋ. Nɩɩ-la ma kala sɩ joŋ kʋsʋʋ-la maga ʋ chɛsɛ ʋ gɛnnɩŋ, ama ʋ ha jaŋ kɛŋ disiniŋ dɩ wɩa tuu jʋʋ.
41Kʋmuno-la kala sɩɩ vɛŋ tinteeŋ kɛŋ disiniŋ nɛ ma teeŋ, ʋ bɩ maga dɩ má chamba. 42Ma bɩ maga dɩ má chaŋ kɩalɩŋ kala sɩ vaamɛ tinteeŋ, dɩ baa vɛŋ ba luoruŋ nyuŋ nɛ koo dɩ baa vɛŋ naasɩŋ banɛsɛ nyuŋ nɛ koo dɩ baa vɛŋ naa-daŋ nyuŋ nɛ, maa kɩsɛba nɛ. 43Má sɩ́ leŋe dɩ kɩaa deemba kʋŋkala ŋaa dɩ ma kɛŋ disiniŋ. Má sɩ́ ba chaŋ a sɩ́ ba digu. 44Mɩ nɛ ma TƖƖNA Wɩa, má joŋ ma tɩtɩa hɛ mɩ nɩsɩŋ lɛ a sɩ́ disiniŋ kɛŋ, bɛɛ wɩaa mɩ bɩ disiniŋ kɛnɛ. Má sɩ́ leŋe dɩ kɩalɩŋ la sɩ daga ŋaa dɩ ma kɛŋ disiniŋ. 45Mɩ nɛ ŋaa ma TƖƖNA sɩ kɛmma lɩɩ Ijipiti tinteeŋ lɛ dɩ mɩ ŋaa ma Wɩa, ŋɩɩ wɩaa má sɩ disiniŋ kɛŋ, bɛɛ wɩaa mɩ bɩ disiniŋ kɛnɛ.
46Wombie-la sɩ hɛ nɩmɛ a mʋ tɩgɛ pʋsʋŋ arɩ bagɩlaa, zaaraa, fillee, kɩalɩŋ sɩ hɛ lɩɩŋ tʋɔŋ arɩ kɩalɩŋ sɩɩ vaamɛ tinteeŋ nɛ ŋɩɩ. 47Ʋ maga dɩ ma jɩŋ kɩalɩŋ sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ, a jɩŋ kɩalɩŋ sɩ maga dɩ ma chaŋ arɩ kɩalɩŋ sɩ bɩ maga dɩ ma chaŋ.’ ”
Currently Selected:
LEVI DOHO NƖAA 11: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
