JOWƐL 3
3
La TƖƖNA jaŋ dii tinteyee sarɩya
1La TƖƖNA sɩ,
“Dɩ bʋa-la nɛ yie, mɩ jaŋ leŋ dɩ Juda arɩ Jerusalɛm nɩaa mɩɩra lɩɩ yoŋ-baga kɔ.
2Mɩ jaŋ kɛŋ tinteyee kala kʋ hɛ dɔŋɔ,
a kɛmba kʋ tuu fuonaa-la ba sɩɩ yɩrɛ Jehosafat.
(Ʋ bʋbʋɔŋ nɛ La TƖƖNA dii nɩaa sarɩya.)
Nɩmɛ nɛ mɩ jaŋ diiba sarɩya,
a mʋ tɩgɛ mɩ nɩaa Iziral tɩŋŋaa lɛ, nɩalɩŋ mɩ sɩ lɩɩsa,
bɛɛ wɩaa ba ŋaa mɩ nɩaa pɩsa hɛ tinteyee lɛ nɛ a kɛŋ mɩ tinteeŋ kpaa.
3Ba tɔnsɔ nɛ a lɩɩsɛ mɩ nɩaa
a joŋ ba hambolibiisiŋ yallɛ dɩ ba kaa ŋɩŋaa wʋlɩɩlɩŋ,
a yallɛ ba hantolibiisiŋ
a laa moribiee dɩ ba kaa nyʋnyʋa sɩnɩŋ.
4Taaya, Sɩdɔŋ arɩ tasɩ-la kala sɩ hɛ Fɩlɩsɩtɩa tinteeŋ lɛ, lɛɛlɛ wʋbɛɛ nɛ ma kaa chɩŋ mɩ lɛ? Mɩ ŋaa wɩɩ nɛ ma lɛ maa chɛ ma ŋaa timmii? Dɩ wɩɩ nɛ mɩ ŋaa ma lɛ, maa chɛ ma ŋaa timmi, mɩ jaŋ mɩɩra leŋ dɩ wɩɩ-la ma sɩɩ chɛ ma ŋaa mɩ lɛ guu ŋaa ma lɛ lɩma lɩma. 5Ma paa mɩ hɔpʋla arɩ sɛlɩmɛ nɛ, mɩ dʋa-la sɩ zɔmɔ a kaa mʋ ma vesiŋ dɩɩsɩŋ. 6Ma yallɛ Juda arɩ Jerusalɛm nɩaa pɩ Giriik tɩŋŋaa nɛ, dɩ ma leŋ dɩ ba mʋ dɩ-bolii a kagɛ ba tinteeŋ lɛ.
7Má bee na, mɩ jaŋ kɛmba lɩɩ lere-la ma sɩ yallɛba hɛ. Mɩ jaŋ joŋ wɩɩ-la ma sɩ ŋaa ba lɛ a timma. 8Mɩ jaŋ yallɛ ma hambolibiisiŋ arɩ ma hantolibiisiŋ a pɩ Juda nɩaa, dɩ ba ma laa yalla pɩ Sabɩa nɩaa sɩ hɛ tintee-la sɩ bolie lɛ.”
Mɩ-na ma TƖƖNA nɛ bʋla.
9Má heele bʋl wɩɩŋ deeŋ tinteyee tʋɔŋ:
Má kɛŋ ma tɩtɩa hɛ dɔŋɔ a yuo laalɩŋ.
Má leŋ dɩ bayuoroo nyɩgɩlɛ.
Má leŋ dɩ bayuoro-la kala kʋ kpagɛ a yuo.
10Má kɛŋ ma pirisiŋ libi tokobiee
a kɛŋ ma sɩɩkɔrʋsʋŋ ma libi tiŋŋee.
Má leŋ dɩ nɩɩ-la sɩ bɩ doluŋ kɛnɛ bʋl,
“Mɩ kɛŋ doluŋ nɛ.”
11Tinteyee kala, má lɩɩ sɛmɛ na-kala a kɔ lɩma, a hilimi fuonaa-la lɛ.
La TƖƖNA, leŋ dɩ ŋ laalɩyuoroo kʋ tuu.
12“Má leŋ dɩ tinteyee nɩaa kɛŋ ba tɩtɩa hɛ dɔŋɔ,
má leŋ dɩ ba kɔ fuonaa-la lɛ mɩ sɩɩ dii sarɩya,
bɛɛ wɩaa mɩ jaŋ hɔŋ nɩmɛ
a dii tinteye-la sɩ gollima sarɩya.
13Má kɛŋ sɩɩkɔrɔ viisi,
kɩaa bɩa nɛ a magɛ kʋmʋŋ.
Má kɔ a nʋɔsɛ girep nɛnɛɛ,
bɛɛ wɩaa, bʋa-tuo-la lɛ ba sɩɩ chagɛ tɩɩnɛnɛɛ sɩnɩŋ suo nɛ,
ba pupoyee ma su a lɩɩ tɩta.
Nɩalɩŋ wʋbɔŋŋɔɔ chaasa yʋgɛ nɛ.”
14Nɩ-daŋ, nɩ-daŋ
nɛ hɛ fuonaa-la lɛ ʋ sɩɩ dii sarɩya.
La TƖƖNA tapʋlʋŋ kpaga nɛ dɩ ʋ dii sarɩya nɩmɛ.
15Wɩɩpɔsʋŋ arɩ chɛnɛ jaŋ biri,
dɩ chɛnwʋlaa ma sɩ́ chaanʋ.
16La TƖƖNA jaŋ chaŋ Zaayɔŋ lɛ,
a hɛ Jerusalɛm lɛ aŋ kpɩa goŋ.
Tinteeŋ arɩ wɩa-nyuŋ jaŋ jigisi.
Ama La TƖƖNA jaŋ tɔ hɛ ʋ nɩaa lɛ,
ʋ jaŋ ŋaa dɩ-duo a pɩ Iziral tɩŋŋaa.
Wɩa jaŋ pɛ ʋ nɩaa lɛ
17Ŋɩɩ nɛ ma jaŋ jɩŋ arɩ mɩ-na ma TƖƖNA Wɩa
hɛ Zaayɔŋ lɛ nɛ, mɩ peel-la sɩ bɩ disiniŋ kɛnɛ lɛ.
Jerusalɛm jaŋ ŋaa lee sɩ bɩ disiniŋ kɛnɛ.
Nɩwogusuŋ maachie kala bɩra bɩ jaŋ kɔ dɩ ba tɔʋ hɛ.
18Bʋa-la lɛ, girep nɛnɛɛ sɩ-falɩŋ jaŋ lɩlɩɩ peelee lɛ,
dɩ dundolluŋ ma pɩpɛllɛ arɩ nɛ-yɩlɩŋ.
Lɩɩŋ jaŋ pɩpɛllɛ Juda fuonaa luŋie-la kala lɛ.
Fuoŋ jaŋ pɛllɛ lɩlɩɩ La TƖƖNA dɩa lɛ
a mʋ jʋjʋʋ fuonaa-la sɩ kɛŋ sɔjaamaa.
19Ama Ijipiti jaŋ pɩŋ hoi,
dɩ Ɛdɔm ma nagɛ tintee-hɩlɩŋ sɩ bɩ kʋŋkala kɛnɛ,
a tɩŋ dol-la ba sɩ die Juda nɩaa lɛ,
a kpʋ nɩaa sɩ bɩ wɩɩ cheye tintee-la lɛ.
20-21Mɩ jaŋ tiŋ nɩalɩŋ ba sɩ kpʋa chɩmɩŋ.
Mɩ bɩ jaŋ leŋ nɩalɩŋ sɩ kɛŋ cheeriŋ.
Ama nɩaa jaŋ hɛ Juda tinteeŋ arɩ Jerusalɛm lɛ a kaa mʋ wuu.
Mɩ-na ma TƖƖNA jaŋ hɛ Zaayɔŋ peel-la nyuŋ.
Currently Selected:
JOWƐL 3: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
