AMƆS 1
1
1Wɩalɩŋ Amɔs sɩ na arɩ duosoo tʋɔŋ a bʋla tɩgɛ Iziral lɛ nɛ ŋ-la. Amɔs fa ŋaa taŋ-la ba sɩɩ yɩrɛ Tɛkʋa pie-daaraa dɔŋɔ nɛ. Bʋa-la lɛ dɩ baal kʋbala baa yɩrɛ Uzia nɛ ŋaa Juda tinteeŋ kuoro, ka Jerobuam nanʋala Jehuas ma ŋaa Iziral tinteeŋ kuoro. Ʋ sɩ bʋl wɩalɩŋ, jɩsɩŋ balɩa nɛ bala ka tinteeŋ-na zigili.
2Amɔs fa bʋla:
“La TƖƖNA jaŋ tʋɔra lɩɩ Zaayɔŋ lɛ, a dɔmɔ lɩɩ Jerusalɛm lɛ.
Piesee dɩ-diilee yaŋ kala jaŋ hɩl,
dɩ peel-la ba sɩɩ yɩrɛ Kamɛl ma nyuŋ yaŋ hɩl.”
La Tɩɩna jaŋ dii tinteye-la sɩ kpagɛ Iziral sarɩya
3Wɩɩ-la La TƖƖNA sɩ bʋla nɛ ŋ-la:
“Mɩ bɩ jaŋ leŋ dɩ mɩ baanɩŋ fɩɛlɛ,
mɩ jaŋ dɔgɩsɛ Damasɩkʋs nɩaa,
a tɩŋ ba wʋbɔŋ dandaŋ-la wɩaa.
Ba nɛ ŋmoo Gɩlɩad tɩŋŋaa a nagɛ ba sɩɩ ŋmoo mɩaa ŋɩɩ.
4Mɩ jaŋ joŋ nyiniŋ hɛ dɩ ʋ dii kuoro Hazɛɛl dɩa
a joŋ nyiniŋ hɛ dɩ ʋ dii kuoro Bɛŋ-Hadad ma dɩɩ-duoruŋ.
5Mɩ jaŋ ŋmoo Damasɩkʋs boi-baalɩŋ lo,
aŋ chei nɩalɩŋ sɩ hɛ Avɛŋ fuonaaŋ lɛ (Avɛŋ bʋbʋɔŋ nɛ wʋbɔŋŋɔɔ),
a chei nɩɩ-la ma sɩɩ beŋ taŋ-la ba sɩɩ yɩrɛ Bɛf Ɛdɛŋ. (Bɛf Ɛdɛŋ bʋbʋɔŋ nɛ tʋɔtɔrʋŋ dɩa.)
Ba jaŋ yuo kɛsɛ Siiria tɩŋŋaa a kaa mʋ yoŋ-baga Kɩɩ tinteeŋ.”
La Tɩɩna nɛ bʋla.
6Ŋ-la nɛ La TƖƖNA bɩra bʋl:
“Mɩ bɩ jaŋ leŋ dɩ mɩ baanɩŋ fɩɛlɛ,
mɩ jaŋ dɔgɩsɛ Gaza nɩaa a tɩŋ ba wʋbɔŋ dandaŋ-la wɩaa.
Ba kɛsɛ ta-pilimee nɩaa nɛ a yalla pɩ Ɛdɔm tɩŋŋaa ba ŋaa yosi.
7Mɩ jaŋ joŋ nyiniŋ hɛ dɩ ʋ dii Gaza
jeyee arɩ ʋ dɩɩ-duoruŋ.”
8La TƖƖNA Wɩɩjarɩbakɔ bɩra bʋla,
“Mɩ jaŋ chei taŋ-la ba sɩɩ yɩrɛ Asɩdɔd nɩaa
arɩ nɩɩ-la ma sɩɩ beŋ taŋ-la ba sɩɩ yɩrɛ Asɩkɛlɔŋ.
Mɩ jaŋ dɔgɩsɛ nɩalɩŋ sɩ hɛ taŋ-la ba sɩɩ yɩrɛ Ɛkʋrɔŋ lɛ ŋɩɩ halɩɩ,
dɩ Fɩlɩsɩtɩa tɩŋŋaa nɩkaana-la sʋʋ dɛrɛ.”
9Wɩɩ-la La TƖƖNA bɩra sɩ bʋla nɛ ŋ-la:
“Mɩ bɩ jaŋ leŋ dɩ mɩ baanɩŋ fɩɛlɛ,
mɩ jaŋ dɔgɩsɛ Taaya nɩaa a tɩŋ ba wʋbɔŋ dandaŋ-la wɩaa.
Ba kɛsɛ ta-pilimee nɩaa nɛ a yalla pɩ Ɛdɔm tɩŋŋaa ba ŋaa yosi,
aŋ bɩ naambii nii-la sɩ hɛ ʋ dɩ ba pɛgɛ kaa tɩŋ.
10Mɩ jaŋ joŋ nyiniŋ a hɛ taŋ-la ba sɩɩ yɩrɛ Taaya jeyee lɛ,
dɩ ʋ dii ʋ dɩɩ-duoruŋ.”
11Wɩɩ-la La Tɩɩna sɩ bʋla nɛ ŋ-la:
“Mɩ bɩ jaŋ leŋ dɩ mɩ baanɩŋ fɩɛlɛ,
mɩ jaŋ dɔgɩsɛ Ɛdɔm nɩaa a tɩŋ ba wʋbɔŋ dandaŋ-la wɩaa.
Ba baanɩŋ sɩ sie a faasa hosi, ba bɩ wuo kɛŋ ba tɩtɩa
aŋ kire to kpʋ ba naambiiriŋ Iziral tɩŋŋaa
a bɩ ba nenige fá.
12Mɩ jaŋ joŋ nyiniŋ hɛ dɩ ʋ dii tasɩ-la ba sɩɩ yɩrɛ
Tɛmaŋ arɩ Bozira dɩɩ-duoruŋ kala.”
13Wɩɩ-la La Tɩɩna bɩra sɩ bʋla nɛ ŋ-la:
“Mɩ bɩ jaŋ leŋ dɩ mɩ baanɩŋ fɩɛlɛ,
mɩ jaŋ dɔgɩsɛ Amɔŋ nɩaa a tɩŋ ba wʋbɔŋ dandaŋ-la wɩaa.
Ba sɩɩ yuo laalɩŋ dɩ ba kɛŋ ba tinteeŋ bʋa jallɛ pɛ,
ŋɩɩ nɛ ba kɛsɛ Gɩlɩad tɩŋŋaa hapuugoo a kpɛrɛ chaarɛ ba biiriŋ ta.”
14La Tɩɩna bɩra sɩ,
“Mɩ jaŋ joŋ nyiniŋ hɛ dɩ ʋ dii taŋ-la ba sɩɩ yɩrɛ Raba jeyee arɩ ʋ dɩɩ-duoruŋ.
Tapʋlɩɩ-la ba dʋndɔŋŋɔɔ jaŋ ŋaa laalɩyuoru goŋ,
aŋ tɔba hɛ a nagɛ pel-vinvilimiŋ a yuoba.”
15La Tɩɩna sɩ, “Ba jaŋ kɛŋ ba kuoro
arɩ ʋ nɩhɩasɩŋ kala kaa mʋ yoŋ-baga.”
Currently Selected:
AMƆS 1: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
