ƐZƖKƖƐL 46

1Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ dɩɩ-bal-la tʋɔŋ kaala-la boi-baal-la sɩ chaasɛ wɩɩpɔsʋŋ dɩɩrɩŋ maga ʋ tɔ nɛ tapʋlɩa-la balɩdʋ ma sɩ yie tɩŋ tɩntɩŋŋaa. Ama tapʋl-wiesii-la chɛɛŋ arɩ chɛŋ-falɩŋ gbiele chɛɛŋ, ʋ maga ʋ suri nɛ. 2Tinteeŋ sɩpaalaara maga ʋ to harɩŋ kaala-la a kʋ jʋʋ zawʋra-la a chɩŋ boiŋ nii-jʋʋlʋŋ lɛ, ka Wɩɩsʋllɩ sɩpaalaaraa ŋaa sɩpaalaarʋ-la kʋnyɩgaa Wɩɩsʋlʋŋ arɩ ʋ nii-magɛ dɔŋɔ Wɩɩsʋlʋŋ. Boi-nii-jʋʋlɩɩ-la lɛ nɛ sɩpaalaarʋ-la jaŋ chʋɔlɛmɛ aŋ mɩɩra lɩɩ. Ama boi-baal-la bɩ maga ʋ tɔ a kaa mʋ yi dɩdaanɩŋ. 3Chɛ-wiesii na-kala arɩ chɛŋ-falɩŋ gbiele na-kala lɛ, tintee-la nɩaa maga dɩ ba kɔ mɩ-na ma TƖƖNA sɩpaaŋ boi-baal-la niiŋ nɛ a chʋɔlɛmɛ. 4Kʋnyɩgaa Wɩɩsʋlʋŋ kɩalɩŋ sɩpaalaarʋ-la sɩ jaŋ kaa kʋ pɩ mɩ-na ma TƖƖNA chɛ-wiesii-la chɛɛŋ jaŋ ŋaa pie-pɔrɔɔ balɩdʋ arɩ pie-bele. Ba kʋŋkala bɩ maga ʋ kɛŋ nyɔɔ. 5Mɩaa Wɩɩsʋlɩɩ-la ʋ sɩ jaŋ ŋaa a pɛ pie-bele-la lɛ maga ʋ ŋaa mɩaa gbansɩŋ banɔŋ nɛ. Mɩaa Wɩɩsʋlɩɩ-la sɩ jaŋ pɛ pie-pɔrɔ-la lɛ, ʋ jaŋ ŋaa mɩa-la magɛ ŋɩɩ kala ʋ sɩ cho. Mɩaa Wɩɩsʋlɩɩ-la kʋŋkala lɛ ʋ jaŋ hɛ nʋʋŋ kɔlɩbɔ balɩdʋ. 6Chɛŋ-falɩŋ gbiele tapʋlʋŋ, ʋ maga ʋ kpʋ nɛ-bel-pɔrʋŋ, pie-pɔrɔɔ balɩdʋ arɩ pie-bele a ŋaa Wɩɩsʋlʋŋ. Kɩalɩŋ kʋŋkala bɩ maga ba kɛŋ nyɔɔ. 7Ʋ maga ʋ kɛŋ kɩaa deemba a kaa ŋaa mɩaa Wɩɩsʋlʋŋ: mɩaa gbansɩŋ banɔŋ a pɛ nɛ-bele-la lɛ, aŋ chɛ mɩaa magɛ ŋɩɩ kala ʋ sɩ cho a pɛ pie-pɔrɔ-la lɛ, ka Wɩɩsʋlɩɩ-la kʋŋkala lɛ ʋ hɛ nʋʋŋ kɔlɩbɔ balɩdʋ. 8Dɩ sɩpaalaarʋ-la nɛ kʋʋ jʋʋ mɩ dɩɩ-bal-la, ʋ maga ʋ to zawʋra-la sɩ chɩŋ boiŋ nii-jʋʋlʋŋ lɛ nɛ. Dɩ ʋ nɛ bɩra kʋʋ lɩɩ ma, ʋ maga ʋ to nɩmɛ tɩtɩa nɛ.

9Dɩ tintee-la nɩaa nɛ kɔ mɩ-na ma TƖƖNA sɩpaaŋ ba gbieli-la kʋŋkala lɛ, dɩ nʋʋ nɛ to wɩɩpɔsʋŋ nagʋa boi-baalɩŋ jʋʋ chʋɔlɛmɛ, ʋ maga ʋ to wɩɩpɔsʋŋ nadiiŋ boi-baalɩŋ nɛ a lɩɩ. Dɩ nʋʋ ma nɛ to wɩɩpɔsʋŋ nadiiŋ boi-baalɩŋ jʋʋ, ʋ maga ʋ to wɩɩpɔsʋŋ nagʋa boi-baalɩŋ nɛ a lɩɩ. Nʋʋkala bɩ maga ʋ to boi-la ʋ sɩ to kʋ jʋʋ a lɩɩ, ama ʋ maga ʋ to boi-la dɔŋɔ sɩ chaasɛ kʋ-la ʋ sɩ to kʋ jʋʋ nɛ a lɩɩ. 10Sɩpaalaarʋ-la arɩ nɩalɩŋ kala maga dɩ ba to dɔŋɔ nɛ a kʋ jʋʋ. Dɩ ba nɛ bɩraa lɩɩ ma, ba kala maga dɩ ba bɩra to dɔŋɔ nɛ a lɩɩ.

11Gbieli-la kʋŋkala lɛ, ma jaŋ ŋaa mɩaa Wɩɩsʋlʋŋ munuŋ gbansɩŋ banɔŋ a pɛ nɛ-bele lɛ, a ŋaa gbansɩŋ banɔŋ a pɛ pie-bele ma lɛ. Ama pie-pɔrɔ-la-na lɛ, ma jaŋ ŋaa munuŋ magɛ ŋɩɩ kala ma sɩ cho, a hɛ nʋʋŋ kɔlɩbɔ bʋlɩdʋ. 12Dɩ sɩpaalaarʋ-la nɛ kɛŋ ʋ tʋɔtɔrɛ Wɩɩsʋlʋŋ kɩaa kʋ pɩ mɩ-na ma TƖƖNA, dɩ kʋnyɩgaa Wɩɩsʋlʋŋ kɩaa nɛ koo dɩ nii-magɛ dɔŋɔ Wɩɩsʋlʋŋ kɩaa nɛ, ʋ maga ma kɛŋ boi-baal-la sɩ chaasɛ wɩɩpɔsʋŋ dɩɩrɩŋ nɛ suro pʋ. Ʋ jaŋ ŋaa ʋ kʋnyɩgaa Wɩɩsʋlʋŋ koo ʋ nii-magɛ dɔŋɔ Wɩɩsʋlʋŋ a nagɛ ʋ sɩ yie ŋaa ŋɩɩ chɛ-wiesii-la chɛɛŋ. Dɩ ʋ nɛ dɛrɛ aŋ lɩɩ, ma jaŋ kɛŋ boi-baal-la tɔ.

13Tapʋlɩɩ na-kala chʋchʋɔŋ, ma jaŋ kɛŋ pie-bie sɩ yi jɩna aŋ bɩ nyɔɔ kala kɛnɛ a kaa kʋ ŋaa kʋnyɩgaa Wɩɩsʋlʋŋ a pɩ mɩ-na ma TƖƖNA. 14Ma jaŋ pɛ kɛŋ ʋ mɩaa Wɩɩsʋlʋŋ munuŋ mʋa tuo gbaŋa chʋchʋɔ na-kala, a joŋ nʋʋŋ kɔlɩbɔ balɩa a kaa buu muŋ-la. Wombii-la ma sɩ to a ŋaa mɩaa Wɩɩsʋlʋŋ deeŋ a pɩpɩ mɩ-na ma TƖƖNA jaŋ hɛ nɩmɛ a kaa mʋ wuu. 15Pie-bie-la arɩ mɩaa Wɩɩsʋlʋŋ muŋ-la, a pɛ nʋʋŋ lɛ, ʋ maga dɩ ma kɛmba ŋaa kʋnyɩgaa Wɩɩsʋlʋŋ pɩ mɩ-na ma TƖƖNA nɛ chʋchʋɔ na-kala a kaa mʋ wuu.

16Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Dɩ sɩpaalaarʋ-la nɛ joŋ ʋ tintee-la sɛmɛ dɔŋɔ a pɩ ʋ hambolibiisiŋ dɔŋɔ, tintee-la jaŋ ŋaa ʋ nanʋal-la arɩ ʋ doho nɩaa kʋŋ. 17Ama dɩ ʋ nɛ joŋ ʋ tinteeŋ sɛmɛ dɔŋɔ a pɩ ʋ tɩntɩnnaa dɔŋɔ, ʋ jaŋ ŋaa tɩntɩnnʋ-la kʋŋ. Ama dɩ jɩna-la sɩ maga dɩ nɩaa mɩɩra joŋ nɩaa kɩaa sɩ hɛ ba teeŋ pɩ ba tɩŋŋaa nɛ yie, sɩpaalaarʋ-la jaŋ bɩra laa ʋ tinteeŋ. Ʋ tintee-la ŋaa ʋ dɩ ʋ hambolibiisiŋ dʋndʋŋa kʋŋ nɛ. 18Sɩpaalaarʋ-la bɩ maga ʋ kɛŋ Iziral tɩŋŋaa tinteeŋ laa, a kiriba ta ba tinteeŋ lɛ. Ʋ maga ʋ keri tintee-la sɩ ŋaa ʋ kʋa nɛ a pɩ ʋ hambolibiisiŋ, dɩ mɩ nɩaa kʋŋkala tinteeŋ sɩ́ lɛl ba nɩsɩŋ lɛ.”

19Ŋɩɩ nɛ baal-la kɛmmɛ mʋ dɩɩsɩ-la sɩ chaasɛ wɩɩpɔsʋŋ nagʋa boiŋ niiŋ, a kpagɛ boi-baal-la sɩ hɛ tʋɔŋ kaala-la wɩɩpɔsʋŋ nadiiŋ dɩɩrɩŋ. Dɩɩsɩ-la fa ŋaa Wɩɩsʋllɩ sɩpaalaaraa dɩɩsɩŋ nɛ, ba bɩ disiniŋ kɛnɛ. Baal-la dagɛmɛ lee wɩɩjʋʋlʋŋ dɩɩrɩŋ. 20Ʋ sɩ, “Leriŋ deeŋ nɛ Wɩɩsʋllɩ sɩpaalaaraa jaŋ chɔ cheeriŋ Wɩɩsʋlʋŋ nammɩa arɩ wʋbɔŋŋɔɔ joŋo chɛnɩŋ Wɩɩsʋlʋŋ nammɩa, a pɛ wʋwasɛ mɩaa Wɩɩsʋlʋŋ munuŋ, dɩ ŋɩɩ leŋ ba sɩ́ kɩalɩŋ sɩ ŋaa Wɩa kɩaa kaa kʋ lɩɩ harɩŋ kaala dɩ nɩalɩŋ kʋŋ digu dɩ wʋbɔŋ ŋaa ʋ lɛ.”

21Ŋɩɩ nɛ ʋ kɛmmɛ kʋ lɩɩ harɩŋ kaala-la, la golli ʋ gʋnaa banɛsɛ kala, gʋŋ kala lɛ, kaala hɛ nɩmɛ. 22Kaala-la gʋnaa banɛsɛ lɛ, kaalɩ-biisiŋ nɛ hɛ nɩmɛ ba saa. Ba kʋŋkala duomuŋ ŋaa naakieliŋ mara, jalɩŋ ma ŋaa naakieliŋ fii arɩ banɔŋ. 23Kaalɩ-biisi-la tʋɔŋ dɩɩrɩŋ, ba kɛŋ tabɩaa nɛ saa jebii-kuuŋ a golli, aŋ saa leree ba sɩ jaŋ hɩhɛ nyiniŋ a yelli jekuunu-la. 24Ŋɩɩ nɛ baal-la bʋla pɩmɛ, “Leree deemba nɛ nɩalɩŋ sɩɩ tɩŋ Wɩa dɩɩ-bal-la lɛ jaŋ chʋchɔ nɩaa Wɩɩsʋlʋŋ nammɩɩsɩŋ.”

Currently Selected:

ƐZƖKƖƐL 46: SIS

Highlight

Copy