ƐZƖKƖƐL 45

Ba kɛŋ Iziral tinteeŋ kpaa

1Dɩ ma nɛ kɛŋ tintee-la kpɩkpaa dɩ ʋ ŋaa ma kʋŋ, má maga ma keri tintee-la sɛmɛ dɔŋɔ a pɩ mɩ-na ma TƖƖNA nɛ. Ʋ duomuŋ maga ʋ ŋaa naakieliŋ bʋɩ fii arɩ balɩa arɩ zɔɔ-banɔŋ, ʋ jalɩŋ ma ŋaa naakieliŋ bʋɩ fii. Lee-la kala jaŋ ŋaa lee sɩ bɩ disiniŋ kɛnɛ mɩ teeŋ. 2Leriŋ deeŋ ma sɩ jaŋ keri tʋɔŋ, ma jaŋ bɩra keri leriŋ dɩ ʋ sɛsɩŋ banɛsɛ kala magɛ dɔŋɔ, dɩ sɛmɛ kala duomuŋ ŋaa naakieliŋ zɔɔ-balɩa arɩ mahɩŋ balɩa arɩ fii. Nɩmɛ nɛ mɩ dɩɩ-bal-la jaŋ chɩŋ, ka dɩ wuoluŋ sɩ ŋaa naakieliŋ mara arɩ banɔŋ ka a golli dɩa-la. 3Mɩ-na ma TƖƖNA tintee-la tʋɔŋ, ma magɩsɛ leriŋ dɩ ʋ duomuŋ ŋaa naakieliŋ bʋɩ fii arɩ balɩa arɩ zɔɔ-banɔŋ, dɩ ʋ jalɩŋ ma ŋaa naakieliŋ bʋɩ banɔŋ. Tintee-la lɛ nɛ mɩ dɩɩ-balɩŋ tʋɔŋ lee-la zɔmʋŋ sɩ bɩ magɩa kɛnɛ jaŋ hɛ. 4Tintee-la sɩ ŋaa dɩ-zɔŋ mɩ-na Wɩa teeŋ lɛ nɛ Wɩɩsʋllɩ sɩpaalaaraa jaŋ hɛ. Ba nɩɩ tɩŋ mɩ dɩɩ-bal-la lɛ ŋɩɩ mɩ sɩpaaŋ. Lee-la nɛ ba dɩɩsɩŋ arɩ mɩ dɩɩ-bal-la jaŋ hɛ. 5Ma jaŋ keri lee-la sɛmɛ dɔŋɔ dɩ ʋ duomuŋ ŋaa naakieliŋ bʋɩ fii arɩ balɩa arɩ zɔɔ-banɔŋ, dɩ ʋ jalɩŋ ma ŋaa naakieliŋ bʋɩ banɔŋ a pɩ Levi tɩmma-la sɩɩ tɩŋ mɩ dɩɩ-bal-la lɛ dɩ ba saa ba dɩɩsɩŋ nɩmɛ a jʋjʋʋ.

6Ma jaŋ bɩra keri leriŋ a tɩgɛ tintee-la sɩ ŋaa dɩ-zɔŋ mɩ-na Wɩa teeŋ lɛ, dɩ ʋ ŋaa naakieliŋ bʋɩ fii arɩ balɩa arɩ zɔɔ-banɔŋ, dɩ ʋ jalɩŋ ma ŋaa naakieliŋ bʋɩ balɩa arɩ zɔɔ-banɔŋ. Ba jaŋ saa tabalɩŋ nɩmɛ dɩ ʋ ŋaa Iziral tɩŋŋaa kala kʋŋ.

7Tinteeŋ sɩpaalaara maga dɩ ʋ kɛŋ tinteeŋ nɛ. A chɩŋ lee-la sɩ ŋaa mɩ-na Wɩa lee wɩɩjʋʋlʋŋ dɩɩrɩŋ bʋa lɛ, ʋ tinteeŋ jaŋ chɩŋ nɩmɛ a mʋ wɩɩjʋʋlʋŋ dɩɩrɩŋ a mʋ yi Mediterenia mʋgʋ-bal-la. Mɩ tintee-la wɩɩpɔsʋŋ dɩɩrɩŋ bʋa ma lɛ, ʋ tinteeŋ jaŋ chɩŋ nɩmɛ a mʋmʋ wɩɩpɔsʋŋ dɩɩrɩŋ, a mʋ yi doho doho-la dɔnsʋŋ tinteeŋ, dɩ ʋ duomuŋ ma magɛ tintee-la ba sɩ kere pɩ Iziral doho doho-la dɔŋɔ. 8Tintee-la nɛ jaŋ ŋaa ʋ kʋa Iziral tinteeŋ lɛ. Mɩ sɩpaalaaraa deemba bɩra bɩ jaŋ dɔgɩsɛ mɩ nɩaa, ama ba jaŋ leŋ dɩ Iziral doho doho-la kala tɩɩ tinteye-la ba sɩ kere pɩba.”

9Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Iziral sɩpaalaaraa, ma ŋaa wʋbɔŋŋɔɔ kieli nɛ. Má leŋ doluŋ diiniŋ arɩ nɩaa dɔgʋsʋŋ, aŋ to wʋtɩtɩɩ a ŋɩŋaa wɩaa ba bʋa lɛ. Má leŋ mɩ nɩaa tinteeŋ kaa laanɩŋ. Mɩ-na ma TƖƖNA Wɩɩjarɩbakɔ nɛ bʋla. 10Dɩ ma nɩɩ yallɛ kɩaa koo aa yɔɔ kɩaa, má magɩsɛ ba ʋ bʋa lɛ. 11Gbansɩ-la ma sɩ jaŋ kaa mɩmagɩsɛ kɩaa kala maga ba magɛ dɔŋɔ nɛ, dɩ kɔlɩbɔba-la ma ma sɩ jaŋ kaa mɩmagɩsɛ lɩɩŋ kɩaa kala magɛ dɔŋɔ. 12Sɛkɩl kʋbala yuŋuŋ nɛ ŋaa gɛra ba mara. Sɛkɩlba mahɩŋ batori yuŋuŋ ma ŋaa mɩna kʋbala.

Wɩɩsʋlʋŋ kɩaa arɩ chɛ-wiesee

13Wɩɩsʋlɩɩ-la ma sɩ jaŋ ŋaa nɛ ŋ-la: Nʋʋkala maga ʋ kɛŋ mɛmpɛ ʋ sɩ pɛrɛ kpaa leree mahɩŋ batori, a kɛŋ kʋbala kʋ ŋaa Wɩɩsʋlʋŋ, a kɛŋ ma mɩaa ma kpaa ŋɩɩ tɩtɩa a kɛŋ kʋbala kʋ ŋaa Wɩɩsʋlʋŋ. 14Ma jaŋ kɛŋ olif nʋʋŋ ma ma sɩ na kaa kpaa leree zɔlɔ, a kɛŋ kʋbala kɔ. 15Ma piesee ma ma sɩ dɩɛsa Iziral tinteeŋ lɛ zɔɔ-balɩa kala tʋɔŋ, ʋ maga ma lɩɩsɛ pie-bala nɛ. Kɩaa deemba nɛ ma jaŋ kaa ŋaa mɩaa Wɩɩsʋlʋŋ, kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ a pɩɩsɛ ma wʋbɔŋŋɔɔ ta. Mɩ-na ma TƖƖNA Wɩɩjarɩbakɔ nɛ bʋla. 16Tintee-la nʋʋkala nɛ maga ʋ kɛŋ kɩaa deemba mʋ pɩ Iziral tinteeŋ sɩpaalaara. 17Tinteeŋ sɩpaalaarʋ-la nɛ maga ʋ chɛ kʋnyɩgaa Wɩɩsʋlʋŋ kɩaa, mɩaa Wɩɩsʋlʋŋ kɩaa arɩ kʋnyʋalaa Wɩɩsʋlʋŋ kɩaa chɛŋ-falɩŋ gbiele lɛ, chɛ-wiesiŋ gbiele arɩ Iziral tɩŋŋaa gbielee dɔnsʋŋ lɛ. Ʋ jaŋ chɛ wʋbɔŋŋɔɔ joŋo chɛnɩŋ Wɩɩsʋlʋŋ kɩaa, mɩaa Wɩɩsʋlʋŋ kɩaa, kʋnyɩgaa Wɩɩsʋlʋŋ kɩaa arɩ nii-magɛ dɔŋɔ Wɩɩsʋlʋŋ kɩaa a pɩɩsɛ Iziral tɩŋŋaa wʋbɔŋŋɔɔ ta.”

18Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Chɛŋ-bumbuŋ tapʋl-bumbuŋ, ma jaŋ kɛŋ nɛ-bel-pɔrʋŋ sɩ bɩ nyɔɔ kɛnɛ a kaa pɩɩsɛ mɩ dɩɩ-bal-la disiniŋ ta. 19Wɩɩsʋllɩ sɩpaalaara jaŋ ŋaa wʋbɔŋŋɔɔ joŋo chɛnɩŋ Wɩɩsʋlʋŋ pʋna-la chalɩŋ a taa mɩ dɩɩ-bal-la boiŋ niiree nyuŋ, a ŋaa taa Wɩɩsʋlʋŋ koru-la ma nyuŋ gʋnaa banɛsɛ, a ŋaa taa mɩ dɩɩ-bal-la tʋɔŋ kaala-la ma boi-baalaa nyuŋ. 20Chɛnɛ-la tapʋl-pɛɩ chɛɛŋ, ŋ jaŋ ŋaa ŋɩɩ a pɩ nʋʋkala sɩ bɩ sɛnɛ aŋ ŋaa wʋbɔmʋŋ. Ŋɩɩ nɛ ma jaŋ ŋaa a pɩɩsɛ mɩ dɩɩ-bal-la disiniŋ ta.

21Chɛŋ-bumbuŋ tapʋl fii arɩ banɛsɛ chɛɛŋ, ma jaŋ gbieli dɩɩsɩŋ kiele bal gbiele-la tapʋlaa balɩpɛ. Gbiele-la lɛ ma jaŋ dii boroboro sɩ bɩ sɩbʋrʋŋ kɛnɛ. 22Tapʋlɩɩ-la, tinteeŋ sɩpaalaara maga ʋ chɛ nɛ-bele dɩ ba kaa ŋaa ʋ dɩ tintee-la nɩaa kala wʋbɔŋŋɔɔ joŋo chɛnɩŋ Wɩɩsʋlʋŋ. 23Gbiele-la tapʋlaa balɩpɛ-la kala lɛ, ʋ jaŋ chɛ nɛ-belliŋ balɩpɛ arɩ pie-belliŋ balɩpɛ sɩ bɩ nyɔɔ kala kɛnɛ a ŋaa kʋnyɩgaa Wɩɩsʋlʋŋ pɩ mɩ-na ma TƖƖNA. Ʋ jaŋ chɛ gbuŋgbogo a ŋaa wʋbɔŋŋɔɔ joŋo chɛnɩŋ Wɩɩsʋlʋŋ ma. 24Ʋ jaŋ chɛ mɩaa gbansɩŋ banɔŋ arɩ nʋʋŋ kɔlɩbɔ balɩdʋ a pɛ nɛ-bele arɩ pie-bele-la kʋŋkala lɛ. 25Lɛŋŋɛɛ gbiele-la ma sɩ jaŋ gbieli tapʋlaa balɩpɛ, ʋ nɛ jaŋ suomi chɛŋ-pɛɩ tapʋlaa fii arɩ banɔŋ ŋɩɩ. Sɩpaalaarʋ-la maga ʋ chɛ pʋsʋ-la doho tɩtɩa nɛ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ, kʋnyɩgaa Wɩɩsʋlʋŋ, mɩaa Wɩɩsʋlʋŋ arɩ nʋʋŋ.

Currently Selected:

ƐZƖKƖƐL 45: SIS

Highlight

Copy