MOSIS KƐŊ IZIRAL TƖŊŊAA LƖƖ 25

Wɩɩsʋlʋŋ kɩalɩŋ ba sɩ jaŋ kaa mʋ Wɩa dɩ-zɔŋ-la

1La TƖƖNA bʋla pɩ Mosis, 2“Bʋla pɩ Iziral tɩŋŋaa dɩ ba kɛŋ kɩaa kʋ ŋaa Wɩɩsʋlʋŋ pɩmɛ, laa kʋ-la kala nʋʋkala sɩ cho dɩ ʋ joŋo pɩmɛ. 3Wɩɩsʋllɩ kɩalɩŋ ŋ sɩ jaŋ laa ba teeŋ nɛ ŋ-la: sɛlɩmɛ, hɔpʋla arɩ kɔlɩɩŋ, 4ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ, gɛrɩpɛ fʋfʋlʋŋ, bʋ-pʋnaa, 5pie-bel tenniŋ ba sɩ hɛ biriŋ ʋ fɩɛsɛ, lɩɩ-nɛŋ tenniŋ arɩ sɔjaamɩŋ daaŋ, 6chaanaa nʋʋŋ, arɩ tegisi-la ba sɩ jaŋ kaa ŋaa Wɩɩsʋllɩ nʋʋŋ arɩ tegisi-la ba sɩ jaŋ kaa ŋaa kʋsʋɔrʋsʋŋ sʋɔra sɩ sɩma, 7tabɩɩ-tʋlaa ba sɩɩ yɩrɛ ɔnɩs arɩ tabɩɩ-zɔŋŋɔɔ dɔnsʋŋ ba sɩ jaŋ joŋo hɛ gɛrɩ-laala-daŋɩɩ-la arɩ bɔɩ-tɔɔrɩ gɛrɩ-la lɛ.

8Leŋ dɩ nɩalɩŋ ŋaa lee sɩ zɔmɔ pɩmɛ, dɩ mɩ hɛ ba tʋɔŋ. 9Ŋaa mɩ dɩ-zɔŋ-la arɩ ʋ tʋɔŋ kpɩɛraa kala dɩ ba nagɛ ŋɩɩ tɩtɩa mɩ sɩ jaŋ dagɩŋ.

Wɩa niiriŋ daga

10Kɛŋ sɔjaamɩŋ daaŋ ŋaa Wɩa niiriŋ daga, dɩ ʋ duomuŋ ŋaa naakieli-bala arɩ mʋa, dɩ ʋ jalɩŋ ma ŋaa naakieliŋ kpaa magɛ dɔŋɔ arɩ mʋa, dɩ ʋ leŋiŋ ma ŋaa naakieliŋ kpaa magɛ dɔŋɔ arɩ mʋa. 11Kɛŋ sɛlɩmɛ sɩ chaasa zɔŋ a taarɛ ʋ tʋɔŋ arɩ ʋ harɩŋ kala aŋ kɛŋ ʋ tɩtɩa mɛ golli. 12Kɛŋ sɛlɩmɛ libi nenii-pɩraa banɛsɛ, a joŋo hɛ naasɩŋ banɛsɛ-la sɩ hɛ ʋ bʋbʋɔŋ lɛ. Balɩa jaŋ hɛ sɛmɛ dɔŋɔ, dɩ balɩa ma hɛ sɛmɛ dɔŋɔ. 13Keri sɔjaamɩŋ daaterigeba, a kɛŋ sɛlɩmɛ taarɛba. 14Joŋ daaterigeba-la tʋʋ nenii-pɩra-la sɩ hɛ daga-la sɛsɩŋ lɛ dɩ ba kɛŋ ba lɛ aa joŋ daga-la. 15Daaterigeba-la jaŋ tʋʋ daga-la nenii-pɩra-la lɛ. Ʋ bɩ maga dɩ ba kɛmba lɩɩsɛ. 16Mɩ jaŋ joŋ tabɩɩ-taalɩa-la balɩa lɛ mɩ sɩ ŋmʋnsɛ mɩ niiŋ wɩalɩŋ hɛ a pɩŋ dɩ ŋ jomba hɛ daga-la tʋɔŋ.

17Kɛŋ sɛlɩmɛ sɩ chaasa zɔŋ ŋaa daga-la nii-tɔlɔ, dɩ ʋ duomuŋ ŋaa naakieli-bala arɩ mʋa, dɩ ʋ jalɩŋ ma ŋaa naakieliŋ kpaa magɛ dɔŋɔ arɩ mʋa. 18Kɛŋ sɛlɩmɛ sɩ chaasa zɔŋ libi kɩaa balɩa dɩ ba nagɛ Wɩa tɩndaaraa a kɛŋ kɩŋkɛnsɩŋ dɩ ba chɩŋ daga-la nii-tɔlɔ nyuŋ. 19Kʋ-la ŋ sɩ kaa libi daga-la nii-tɔlɔ tɩtɩa nɛ maga dɩ ŋ kaa libi kɩalɩŋ sɩ nagɛ Wɩa tɩndaaraa a kɛŋ kɩŋkɛnsɩŋ. Dɔŋɔ jaŋ chɩŋ sɛmɛ dɔŋɔ, dɩ dɔŋɔ ma chɩŋ sɛmɛ dɔŋɔ. 20Kɩalɩŋ ŋ sɩ jaŋ libi dɩ ba nagɛ Wɩa tɩndaaraa a kɛŋ kɩŋkɛnsɩŋ, maga dɩ ba kɩŋkɛnsɩŋ jɛrɛ a tɔ daga-la nii-tɔlɔ, ka ba sɩaa chaasɛ dɔŋɔ a bibeŋ daga-la nii-tɔlɔ. 21Joŋ mɩ niiŋ wɩalɩŋ mɩ sɩ ŋmʋnsa hɛ tabɩɩ-taalɩa-la balɩa lɛ a pɩŋ a hɛ daga-la tʋɔŋ a joŋ daga-la nii-tɔlɔ tɔ. 22Nɩmɛ nɛ mɩ jaŋ kɔ ŋ teeŋ, mɩ jaŋ hɛ kɩalɩŋ balɩa-la sɩ nagɛ Wɩa tɩndaaraa a kɛŋ kɩŋkɛnsɩŋ pɛgɛ daga-la nyuŋ. Nɩmɛ nɛ mɩ jaŋ dagɩŋ wɩalɩŋ kala ŋ sɩ jaŋ bʋla pɩ Iziral tɩŋŋaa dɩ ba tuto.

Wɩa dɩ-zɔŋ-la teebʋl

23Kɛŋ sɔjaamɩŋ daaŋ ŋaa teebʋl, dɩ ʋ duomuŋ ŋaa naakieli-bala, dɩ ʋ jalɩŋ ma ŋaa naakieliŋ kpaa magɛ dɔŋɔ, dɩ ʋ leŋiŋ ŋaa naakieliŋ kpaa magɛ dɔŋɔ arɩ mʋa. 24Kɛŋ sɛlɩmɛ sɩ chaasa zɔŋ taarɛ ʋ kala aŋ kɛŋ sɛlɩmɛ mɛ giriŋ a golli. 25Ŋaa giriŋ dɩ ʋ jalɩŋ magɛ nachala a golli teebʋl-la, a kɛŋ sɛlɩmɛ biere golli. 26Kɛŋ sɛlɩmɛ libi nenii-pɩraa banɛsɛ a joŋo hɛ teebʋl-la gʋnaa lɛ naasɩŋ leree. 27Nenii-pɩra-la maga dɩ ba hɛ a kpagɛ giri-la nɛ a chaga kɛŋ daaterigeba-la ba sɩ kaa jujoŋ teebʋl-la. 28Keri sɔjaamɩŋ daasɩŋ a kaa ŋaa daaterigeba-la a joŋ sɛlɩmɛ taara tɔ ba kala. Daasɩ-la lɛ nɛ ba jaŋ kɛŋ a jujoŋ teebʋl-la. 29Kɛŋ sɛlɩmɛ sɩ chaasa zɔŋ ŋaa teebʋl-la nyuŋ pɩrataba, dasɔsʋŋ, tagɩsɩŋ arɩ gbansɩŋ ba sɩ jaŋ kaa ta lɩɩŋ. 30Má joŋ boroboro-la ma sɩ jaŋ kaa ŋaa Wɩɩsʋlʋŋ pɩpɩmɛ a daŋ teebʋl-la nyuŋ dɩ ʋ chɩŋ mɩ sɩpaaŋ bʋa na-kala.

Chaaŋ daaŋ

31Kɛŋ sɛlɩmɛ sɩ chaasa zɔŋ libi chaanaa sɩɩ daŋ kʋ-la nyuŋ, ʋ bʋbʋɔ-chala arɩ ʋ kerikee kala. Ʋ nyʋnyʋalʋ-la sɩ nagɛ tɩɩ-lugoo arɩ tɩɩfɩɩlaa sɩ pɔsɔ dɩ ba kala mɛrɛ dɔŋɔ a ŋaa kʋbala. 32Chaaŋ daaŋ-la nyuŋ maga dɩ ʋ kɛŋ kerikee balɩdʋ, dɩ batori hɛ sɛmɛ dɔŋɔ, dɩ batori ma hɛ sɛmɛ dɔŋɔ. 33Chaaŋ daa-la kerikee balɩdʋ-la lɛ, libi nyʋnyʋalʋsʋŋ balɩdʋ dɩ ba nagɛ fʋfʋlʋŋ nɛnɛɛ sɩ pɔsɛ. Keriki kala kɛŋ nyʋnyʋala, dɩ batori hɛ sɛmɛ dɔŋɔ, dɩ batori ma hɛ sɛmɛ dɔŋɔ. 34Chaaŋ daa-la nyuŋ kpɩɛraa maga dɩ ba nagɛ fʋfʋlʋŋ fɩɩlaa sɩ lugo aŋ pɔsɛ nɛ, ba kɩaa banɛsɛ. 35Kɩalɩŋ sɩ nagɛ tɩɩfɩɩlaa sɩ lugo aŋ pɔsɛ kʋbala kala maga dɩ ʋ hɛ kerike-la balɩdʋ sɩ hɛ chaaŋ daaŋ lɛ nɛ, kerikee balɩa na-kala pɛgɛ maga dɩ dɔŋɔ hɛ nɩmɛ. 36Kerike-la arɩ kɩalɩŋ sɩ nagɛ tɩɩ-fɩɩlɩŋ sɩ lugo, sɛlɩmɛ sɩ chaasa zɔŋ nɛ maga dɩ ŋ kaa libi, dɩ ba kala nagɛ dɔŋɔ.

37Libi chaanaa balɩpɛ, a joŋo sagɛ kerike-la nyuŋ dɩ ba pʋlʋmʋŋ chaanɛ ʋ sɩpaaŋ. 38Kɛŋ sɛlɩmɛ sɩ chaasa zɔŋ libi kʋ-la lɛ ŋ sɩ jaŋ joŋ chaaŋ-ŋmɛnɩŋ hɛ a mɩlɩma ta ʋ tutuu aŋ jɩjɩl. 39Magɩsɛ sɛlɩmɛ sɩ chaasa zɔŋ dɩ ʋ yuŋuŋ ŋaa kilo mara arɩ fii arɩ banɔŋ a kaa libi chaaŋ daaŋ arɩ ʋ tɩntɩnnɩ kɩaa kala. 40Libi kɩalɩŋ dɩ ba nagɛ ŋɩɩ mɩ sɩ dagɩŋ peel-la nyuŋ.

Currently Selected:

MOSIS KƐŊ IZIRAL TƖŊŊAA LƖƖ 25: SIS

Highlight

Copy

Compare