MOSIS KƐŊ IZIRAL TƖŊŊAA LƖƖ 24

Nii-la sɩ hɛ Wɩa arɩ Iziral tɩŋŋaa pɛgɛ kʋ chɩŋ

1Ŋɩɩ nɛ La TƖƖNA bʋla pɩ Mosis, “Má kʋ jɩl mɩ teeŋ, ŋ dɩ Arɔŋ, Nadab arɩ Abihu, arɩ Iziral tɩŋŋaa nɩhɩasɩŋ mahɩŋ batori arɩ fii. Ʋ maga dɩ ma chɩŋ dɩ-bolii nɛ aŋ zilmi. 2Mosis dʋndʋŋa nɛ maga dɩ ʋ kʋ kpagɛmɛ. Nɩhɩasɩ-la bɩ maga dɩ ba kʋ kpagɛ. Iziral tɩŋŋaa nɩkaanaa bɩ maga dɩ ba kʋ jɩl peel-la nyuŋ.”

3Ŋɩɩ nɛ Mosis mʋ bʋla pɩ nɩalɩŋ wɩalɩŋ kala La TƖƖNA sɩ bʋla arɩ wombie-la ʋ sɩɩ chɛ dɩ baa to. Ŋɩɩ nɛ ba kala bʋl, “La jaŋ ŋaa wɩalɩŋ kala La TƖƖNA sɩ bʋla.” 4Ŋɩɩ nɛ Mosis ŋmʋnsɛ wɩalɩŋ kala La TƖƖNA sɩ bʋla a bil.

Ʋ sii chʋchʋɔ-fɩɛla a saa Wɩɩsʋllɩ koruŋ peel-la bʋbʋɔŋ, a paa tabɩaa fii arɩ balɩa pɛ ba nagɛ jebiiŋ. Tabɩɩ kala chɩŋ Iziral doho doho fii arɩ balɩa-la kʋŋkala nyuŋ. 5Ŋɩɩ nɛ ʋ lɩɩsɛ bapʋɔsaa Iziral tɩŋŋaa tʋɔŋ, a leŋ ba ŋaa kʋnyɩgaa Wɩɩsʋlʋŋ aŋ kpʋ nɛ-bel-pɔrʋŋ ma a ŋaa nii-magɛ dɔŋɔ Wɩɩsʋlʋŋ a pɩ La TƖƖNA. 6Mosis kɛŋ pʋsʋ-la chalɩŋ kpaa balɩa a joŋ dɔŋɔ a bɩsa hɛ gbansɩŋ lɛ, aŋ joŋ dɔŋɔ ma mɩsɛ koru-la. 7Ŋɩɩ nɛ ʋ joŋ teŋ-la tʋɔŋ Wɩa niiriŋ sɩ hɛ a karɩma pɩ nɩalɩŋ. Ŋɩɩ nɛ ba bʋl, “Wɩalɩŋ kala La TƖƖNA sɩ bʋla, la jaŋ sɛɩba a tutoba.”

8Ŋɩɩ nɛ Mosis joŋ chal-la mɩsɛ nɩalɩŋ aŋ bʋl, “Chal-la Wɩa sɩ joŋo hɛ niiŋ ʋ dɩ ma pɛgɛ nɛ ŋ-la a tɩgɛ wɩalɩŋ ʋ sɩ bʋla lɛ.”

9Ŋɩɩ nɛ Mosis, Arɔŋ, Nadab, Abihu arɩ Iziral tɩŋŋaa nɩhɩasɩ-la mahɩŋ batori arɩ fii sii jɩl peel-la. 10Ba na Iziral tɩŋŋaa Wɩa, dɩ ʋ chɩŋ tabɩɩ-zɔmɔ kʋbalaba ba sɩ kaa ŋaa wombiiŋ. Tabɩa-la yɩrɩŋ nɛ safɩya a nagɛ diibelimbine a tʋtʋl a nagɛ wɩa-nyuŋ. 11Wɩa bɩ Iziral tɩŋŋaa nɩhɩasɩ-la wɩɩkala ŋaa. Ŋɩɩ nɛ Iziral tɩŋŋaa nɩhɩasɩ-la na Wɩa aŋ hɔnɔ bibenu a dii kɩaa aŋ nyʋa, ka Wɩa bɩ ba wɩɩkala ŋaa.

12Ŋɩɩ nɛ La TƖƖNA bʋla pɩ Mosis, “Kʋ jɩl mɩ teeŋ peel-la nyuŋ a gbɛrɛmɛ, mɩ jaŋ joŋ tabɩɩ-taalɩa-la lɛ mɩ sɩ ŋmʋnsɛ mɩ niiŋ wɩalɩŋ hɛ dɩ ma tuto arɩ wɩalɩŋ mɩ sɩ daga dɩ ma ŋɩŋaa a pɩŋ.”

13Ŋɩɩ nɛ Mosis arɩ Josua ŋaa siri dɩ ba jɩl Wɩa peel-la nyuŋ. Josua fa ŋaa nɩɩ-la sɩ pɛ ʋ lɛ ba tɩtɩŋ nɛ. 14Mosis bʋla pɩ Iziral tɩŋŋaa nɩhɩasɩŋ, “Má gbɛrɛla daha, la jaŋ mʋ aŋ kɔ. Arɔŋ arɩ Huu jaŋ hɛ ma teeŋ. Dɩ nʋʋkala nɛ kɛŋ wɩɩ sɩɩ walɩmʋ, ʋ mʋ naba.”

15Mosis sɩ jɩl peel-la nyuŋ, duoŋ-bɩlɩmbaanɩŋ kʋ tɔ ʋ kala. 16La TƖƖNA tʋla tɔ Sɩnaɩ peel-la kala, duoŋ-bɩlɩmbaaŋ-la tɔ ŋɩɩ tapʋlaa balɩdʋ. Chɛ-pɛɩ chɛɛŋ La TƖƖNA to duoŋ-bɩlɩmbaaŋ-la tʋɔŋ a yɩrɛ Mosis. 17La TƖƖNA tʋla nagɛ nyiniŋ sɩɩ dii nɛ peel-la nyuŋ Iziral tɩŋŋaa sɩaa lɛ. 18Ŋɩɩ nɛ Mosis mʋ jʋʋ duoŋ-bɩlɩmbaaŋ-la tʋɔŋ a jɩl peel-la. Mosis fa chʋa peel-la nyuŋ tɩtaŋɩŋ arɩ wɩɩhɛyɛ tapʋlaa mahɩŋ balɩa nɛ.

Currently Selected:

MOSIS KƐŊ IZIRAL TƖŊŊAA LƖƖ 24: SIS

Highlight

Copy

Compare