MOSIS BƖRA WULLI WƖA WOMBIIŊ 9

Iziral tɩŋŋaa sɩ kɛŋ tʋɔpʋla dee bɩ tɩɩ La TƖƖNA joŋ tintee-la pɩba

1Iziral tɩmma, má jegile nɩɩ, jɩnɩŋ ma jaŋ chol Jɔdaŋ fuo-la a mʋ yuo laa tinteyee nɩaa sɩ yʋga kɩɩma aŋ dolie kɩɩma ma tinteeŋ. Nɩalɩŋ saa kɛrɩsɩŋ sɩ jɩla tɩgɛ wɩa-nyuŋ nɛ a golli ba tasɩŋ. 2Nɩalɩŋ waayi nɛ woruŋ aŋ dol ma, ba nɛ baa yɩrɛ Anakɩ tɩŋŋaa ŋɩɩ. Ma nɩɩ ba wɩaa nɛ arɩ nʋʋ tuo a jaŋ wuo yuo diiba. 3Jɩnɩŋ, má jɩŋ arɩ ma TƖƖNA Wɩa nɛ laa ma sɩpaaŋ dɩ ʋ yuo dii nɩalɩŋ a nagɛ nyiniŋ sɩɩ dii kɩaa ŋɩɩ, dɩ ma kiri ba kala ta dɩ ba lɩɩ tintee-la lɛ arɩ ma TƖƖNA sɩ bʋl ŋɩɩ.

4Dɩ ma TƖƖNA Wɩa nɛ yuo kiri nɩalɩŋ, má sɩ́ bɩɩna arɩ ma sɩ ŋaa tʋɔpʋl tɩmma nɛ tɩɩ ʋ joŋ tinteeŋ deeŋ pɩma. Ama nɩalɩŋ tʋɔbɔmʋŋ nɛ tɩɩ La TƖƖNA chɩchɛ dɩ ʋ kiriba ta tintee-la lɛ. 5Ma tʋɔpʋla arɩ ma wʋtɩtɩɩ wɩaa dee bɩ tɩɩ ma TƖƖNA Wɩa kiri nɩalɩŋ ŋɩɩ. Ba paala ŋaa tinteye nɩaa sɩ ŋaa nɩbɔmɔ nɛ. Aŋ ka ʋ chɩchɛ dɩ nii-la ʋ sɩ hɛ pɩ ma naabalɩmaba Abɩraham, Aɩzɩk arɩ Jekɔb dɩ ʋ chɩŋ. 6Má jɩŋ arɩ ma tʋɔpʋla wɩaa dee bɩ tɩɩ ma TƖƖNA Wɩa joŋ tintee-zɔmʋŋ deeŋ a pɩma. Ma paala ŋaa nyu-duo tɩmma nɛ.

Sɛlɩmɛ nɛ-bie-la ba sɩ libe

7Má sɩ́ yʋ, ŋɩɩ ma sɩ leŋe ma TƖƖNA Wɩa baanɩŋ faasa sii ma nyuŋ tintee-hɩlɩɩ-la lɛ, a chɩŋ bʋa-la lɛ ma sɩ lɩɩ Ijipiti tinteeŋ lɛ a kʋ yi daha, ma vɩa ma TƖƖNA niiŋ nɛ. 8Peel-la ba sɩɩ yɩrɛ Sɩnaɩ leriŋ, ma leŋe La TƖƖNA chaasa na baanɩŋ nɛ ma nyuŋ a magɛ dɩ ʋ cheima. 9Mɩ sɩ jɩl peel-la nyuŋ dɩ mɩ laa tabɩɩ-taalɩa-la balɩa, La TƖƖNA sɩ tuuri ʋ niiri-la ʋ sɩ hɛ ma dɩ ʋ pɛgɛ wɩaa hɛ, mɩ hɛ nɩmɛ wɩɩhɛyɛ arɩ tɩtaŋɩŋ tapʋlaa mahɩŋ balɩa nɛ. Mɩ bɩ kʋŋkala die, mɩ bɩ lɩɩ ma nyʋa. 10Ŋɩɩ nɛ La TƖƖNA joŋ tabɩɩ-taalɩ-la balɩa lɛ ʋ sɩ kɛŋ ʋ tɩtɩa neniiŋ tuuri ʋ niiŋ wɩaa hɛ a pɩmɛ. Tapʋlɩɩ-la ma sɩ kʋ hilimi peel-la bʋbʋɔŋ, wɩalɩŋ tɩtɩa La TƖƖNA fa sɩ hɛ nyiniŋ tʋtʋɔbaanɩŋ aŋ bʋla pɩma nɛ ŋɩɩ. 11Tapʋlɩa-la mahɩŋ balɩa chɛ-dɛrɩŋ nɛ La TƖƖNA joŋ tabɩɩ-taalɩ-la balɩa lɛ ʋ sɩ tuuri ʋ niiri-la sɩ hɛ ma dɩ ʋ pɛgɛ a pɩmɛ. 12Ŋɩɩ nɛ La TƖƖNA bʋla pɩmɛ, “Lɩɩ peel-la nyuŋ a tuu lɩma, bɛɛ wɩaa nɩalɩŋ ŋ sɩ kaa lɩɩ Ijipiti tinteeŋ lɛ yeŋŋe nɛ a ŋaa wʋbɔŋ. Ba vɩa wɩalɩŋ mɩ sɩ dagɛba nɛ, aŋ libi vene a pɩ ba tɩtɩa.” 13Ŋɩɩ nɛ La TƖƖNA bɩra bʋla pɩmɛ, “Mɩ jɩŋ nɩaa deemba nɛ, ba ŋaa nyu-duo tɩmma nɛ woruŋ. 14Mʋ́ aŋ lemmi, mɩ na baanɩŋ nɛ woruŋ ba nyuŋ. Mɩ jaŋ cheiba, dɩ ba yɩrɩŋ lɛl dʋnɩa lɛ aŋ to ŋ lɛ a leŋ dɩ ŋ ŋaa tinteeŋ sɩ kɛŋ yɩrɩŋ a yʋga kɩɩba a dolie kɩɩba ma.”

15Ŋɩɩ nɛ mɩ lɩɩ peel-la nyuŋ a kʋʋ tuu a kori tabɩɩ-taalɩ-la balɩa lɛ Wɩa niiri-la sɩ hɛ, niiri-la sɩ hɛ ma dɩ ʋ pɛgɛ, ka peel-la kala tɔ arɩ nyiŋgeliŋ. 16Mɩ sɩ kʋ tuu, mɩ na dɩ ma vɩa wɩalɩŋ ma TƖƖNA Wɩa sɩ dagɛma nɛ, aŋ ŋaa wʋbɔŋ a kɛŋ sɛlɩmɛ a libi nɛ-bie. Ma guu vɩa wɩalɩŋ La TƖƖNA sɩ dagɛma nɛ. 17Ŋɩɩ nɛ mɩ joŋ tabɩɩ-taalɩa-la balɩa mɩ sɩ koro a yaga yɛrɛ ma sɩpaaŋ. 18Ŋɩɩ nɛ mɩ bɩra gbieni La TƖƖNA sɩpaaŋ wɩɩhɛyɛ arɩ tɩtaŋɩŋ kala tapʋlaa mahɩŋ balɩa, mɩ bɩ kʋŋkala die mɩ bɩ lɩɩ ma nyʋa. Mɩ ŋaa wɩaa deemba kala a tɩŋ ma sɩ ŋaa wʋbɔmɔ-la wɩaa nɛ, a leŋ La TƖƖNA chaasa na baanɩŋ ma nyuŋ. 19Fawʋllʋŋ fa kɛmmɛ nɛ a tɩŋ La TƖƖNA sɩ faasa na baanɩŋ ma nyuŋ a magɛ dɩ ʋ cheima. Ama La TƖƖNA bɩra jegile nɩɩ mɩ sʋla nɛ. 20La TƖƖNA fa na baanɩŋ nɛ woruŋ Arɔŋ ma nyuŋ bʋa-la lɛ, a chɩchɛ dɩ ʋ kpʋʋ. Ŋɩɩ nɛ mɩ sʋla laa ʋ ma. 21Ŋɩɩ nɛ mɩ joŋ ma wʋbɔŋ kʋ-la ma sɩ libe ʋ nagɛ nɛ-bie a hɛ nyiniŋ lɛ ʋ dii. Ŋɩɩ nɛ mɩ lɩɩsɛ a ŋmoo yɛrɛ a nɔŋ ʋ bɩɩ nʋgʋgʋ, mɩ paa hɛ lɩɩ-la sɩ pɛllɛ lɩɩ peeliŋ nyuŋ a tutuu lɛ.

22Ma bɩra leŋe La TƖƖNA na baanɩŋ nɛ ma nyuŋ leree deemba lɛ: Tabɩra, Masa arɩ Kɩbʋrɔf Hataava lɛ. 23La TƖƖNA sɩ sɩ ma lɩɩ Kadɛs Banɩa lɛ a mʋ tintee-la ʋ sɩ jaŋ joŋo pɩma dɩ ʋ ŋaa ma kʋŋ, ma vɩa nɛ. Ma bɩ wɩalɩŋ ma TƖƖNA Wɩa sɩ daga to, ma bɩ ʋ laa dii. 24Mɩ sɩ jɩmma faafaa kala, ma paala bɩ La TƖƖNA niiŋ wɩaa ka nɩɩ.

25Mɩ gbieni La TƖƖNA sɩpaaŋ wɩɩhɛyɛ arɩ tɩtaŋɩŋ kala tapʋlaa mahɩŋ balɩa nɛ, bɛɛ wɩaa La TƖƖNA fa sɩ ʋʋ chɛ dɩ ʋ cheima nɛ. 26Mɩ sʋllʋ a bʋl, “Mɩ Tɩɩna Wɩɩjarɩbakɔ, sɩ́ ŋ nɩaa ŋ tɩtɩa sɩ lɩɩsa chei. Ŋ nɛ laaba arɩ ŋ doluŋ Ijipiti tɩŋŋaa nɩsɩŋ lɛ a kɛmba kaa lɩɩ Ijipiti tinteeŋ lɛ. 27Liisi ŋ tɩntɩnnaa Abɩraham, Aɩzɩk arɩ Jekɔb wɩaa, aŋ sɩ́ nɩaa deemba nyuduoŋ, ba wʋbɔŋŋɔɔ arɩ ba wʋcheelee wɩaa beŋ. 28Dɩ ŋɩɩ dee, Ijipiti tɩŋŋaa jaŋ bʋl arɩ ŋ bɩ wuo kɛŋ ŋ nɩaa kaa yi tintee-la ŋ sɩ sɩ ŋ jaŋ joŋo pɩba, a tɩŋ ŋ sɩ bɛrɛba wɩaa. Ba jaŋ bʋl ŋɩɩ nɛ tɩɩ ŋ kɛmba kʋ lɩɩ dɩ ŋ kpʋba ta tintee-hɩlɩŋ deeŋ lɛ. 29Ba ŋaa ŋ nɩaa nɛ, ŋ nɛ tɩɩba, ŋ nɛ kɛmba arɩ ŋ dol-balɩŋ a kaa lɩɩ Ijipiti tinteeŋ lɛ.”

Currently Selected:

MOSIS BƖRA WULLI WƖA WOMBIIŊ 9: SIS

Highlight

Copy

Compare