MOSIS BƖRA WULLI WƖA WOMBIIŊ 10

Mosis yɛrɛ lɩɩsɛ tabɩɩ-taalaa balɩa ba nagɛ bumbuŋ kɩalɩŋ

1Bʋa-la lɛ La TƖƖNA bʋla pɩmɛ, “Yɛrɛ a lɩɩsɛ tabɩɩ-taalaa balɩa dɩ ba nagɛ bumbuŋ kɩalɩŋ a kaa kʋ jɩl mɩ teeŋ peel-la nyuŋ. Kɛŋ daaŋ ŋaa daga ma, ʋ tʋɔŋ nɛ ŋ jaŋ joŋ tabɩa-la hɛ. 2Mɩ jaŋ ŋmʋnsɛ wɩalɩŋ tɩtɩa fa sɩ hɛ bumbuŋ kɩalɩŋ ŋ sɩ joŋo yaga yɛrɛ lɛ, a hɛ ba lɛ, dɩ ŋ joŋo hɛ daga-la tʋɔŋ.”

3Ŋɩɩ nɛ mɩ kɛŋ sɔjaamɩŋ daaŋ a ŋaa daga-la, aŋ yɛrɛ lɩɩsɛ tabɩɩ-taalaa balɩa ba nagɛ bumbuŋ kɩalɩŋ, mɩ kaa jɩl peel-la nyuŋ. 4Ŋɩɩ nɛ La TƖƖNA ŋmʋnsɛ wɩalɩŋ tɩtɩa ʋ fa sɩ ŋmʋnsa hɛ bumbuŋ kɩalɩŋ lɛ a hɛ ba ma lɛ, ʋ niiriŋ fii-la ʋ fa sɩ hɛ nyiniŋ tʋɔŋ peel-la nyuŋ aŋ dagɛma, bʋa-la lɛ ma sɩ hilimi peel-la bʋbʋɔŋ. Ŋɩɩ nɛ La TƖƖNA joŋ tabɩa-la a pɩmɛ. 5Mɩ kɛŋ tabɩɩ-taalɩa-la a lɩɩ peel-la nyuŋ kʋ tuu a joŋo hɛ daga-la tʋɔŋ arɩ La TƖƖNA sɩ dagɛmɛ ŋɩɩ. Tabɩa-la ha hɛ daga-la tʋɔŋ arɩ jɩnɩŋ kala. 6(Ŋɩɩ nɛ Iziral tɩŋŋaa lɩɩ Jakaŋ tɩŋŋaa vile-la leriŋ a mʋ lee kʋbala ba sɩɩ yɩrɛ Mɔsɛra. Nɩmɛ nɛ Arɔŋ sʋʋ ba hugu, ka ʋ nanʋala Elieza laa ʋ nyuŋ a ŋaa Wɩɩsʋllɩ sɩpaalaara. 7Ba lɩɩ Mɔsɛra lɛ a mʋ Gugoda a kiele mʋ Jobata, lee-la fuo-biisiŋ sɩ hɛ. 8Peel-la nyuŋ nɛ La TƖƖNA lɩɩsɛ Levi doho nɩaa baalaa, dɩ ba nɛ chʋchʋŋ Wɩa niiriŋ daga-la aŋ tɩtɩŋ Wɩa dɩa tɩntɩŋŋaa a sʋl Wɩa pɩpɩ Iziral tɩŋŋaa. Ba tɩntɩŋŋaa nɛ ha ŋɩɩ arɩ jɩnɩŋ kala. 9Ŋɩɩ nɛ tɩɩ Levi doho nɩaa bɩ tinteeŋ kpaalɩŋ kɛnɛ Iziral tɩŋŋaa tʋɔŋ ŋɩɩ. Iziral tɩŋŋaa sɩ kɛŋ kɩalɩŋ kʋ ŋaa Wɩɩsʋlʋŋ pɩ La TƖƖNA nɛ ŋaa ba kpaalɩŋ, arɩ ma TƖƖNA Wɩa sɩ bʋl ŋɩɩ a pɩba.)

10Mɩ bɩra sagɛ peel-la nyuŋ wɩɩhɛyɛ arɩ tɩtaŋɩŋ tapʋlaa mahɩŋ balɩa nɛ, a sʋl La Tɩɩna, arɩ mɩ fa sɩ laa sɩpaaŋ ŋaa ŋɩɩ. La TƖƖNA bɩra laa mɩ sʋla. Ʋ chonuŋ dee dɩ ʋ fa paala cheima. 11Ŋɩɩ nɛ La TƖƖNA bʋla pɩmɛ, “Mʋ a laa nɩalɩŋ sɩpaaŋ a kɛmba mʋ tintee-la mɩ sɩ hɛ niiŋ a pɩ ba naabalɩmaba arɩ mɩ jaŋ joŋo pɩba dɩ ba tɩɩʋ.”

Má zizil ma TƖƖNA

12Lɛɛlɛ ma Iziral tɩŋŋaa, má jegile nɩɩ wɩalɩŋ ma TƖƖNA Wɩa sɩɩ chɛ dɩ ma ŋaa. Má zizil ma TƖƖNA Wɩa a ŋɩŋaa wɩalɩŋ kala ʋ sɩɩ chɛ. Má cho ma TƖƖNA Wɩa a tɩma pʋpʋ arɩ ma tʋɔŋ arɩ ma wɩɩ-wɩɩkala. 13Má to ma TƖƖNA niiŋ arɩ ʋ wombie-la mɩ sɩɩ dagɛma jɩnɩŋ, ŋɩɩ jaŋ ŋaa wʋzɔŋ a pɩma. 14Ma TƖƖNA Wɩa nɛ tɩɩ wɩa-nyuŋ, Wɩa-jaŋ arɩ tinteeŋ arɩ kɩalɩŋ kala sɩ hɛ ba lɛ. 15Arɩ ŋɩɩ kala, La TƖƖNA chaasa cho ma naabalɩmaba nɛ. Ŋɩɩ nɛ tɩɩ ʋ bɩ tintee dɔŋ-kala lɩɩsa, aŋ lɩɩsɛma dɩ ma nɛ ŋaa ʋ nɩaa. Ma nɛ ha ŋaa ʋ nɩaa arɩ jɩnɩŋ kala. 16Ŋɩɩ wɩaa a chɩŋ lɛɛlɛ a kaa mʋ, ʋ maga dɩ ma pʋllɛ ma tʋɔŋ, aŋ bɩra sɩ́ nyuduoŋ kɛŋ La TƖƖNA teeŋ. 17Ma TƖƖNA Wɩa nɛ kɩɩ vene kala. Ʋ nɛ kɛŋ doluŋ kʋŋkala lɛ a magɛ dɩ ma zizilu. Ʋ bɩ nɩaa kaa pʋpɔrɛ, nʋʋkala ma bɩ ʋ wuo kpal dɩ ʋ ŋaa wɩɩ. 18Ʋ bɩ biisinsiŋ arɩ yo-haala wɩaa ka sɛɩ. Ʋ cho nɩwogusuŋ a pɩpɩba kʋdiilee arɩ gɛnnɩŋ. 19Ŋɩɩ wɩaa, má cho nʋhʋɔraa, bɛɛ wɩaa ma ma fa ŋaa nʋhʋɔra nɛ Ijipiti tinteeŋ lɛ. 20Má zizil ma TƖƖNA Wɩa a tɩma pʋpʋ. Má kɛŋ ma tɩtɩa mɛrɛ ʋ lɛ a kɛŋ ʋ yɩrɩŋ dʋndʋŋa nɛ a tɩtɩŋ. 21Ʋ nɛ ŋaa ma Wɩa, má zilu. Ma tɩtɩa na wʋduoru-la arɩ wʋkpuŋkperisi-la ʋ sɩ ŋaa pɩma nɛ. 22Ma naabalɩmaba fa sɩɩ mʋ Ijipiti tinteeŋ, ba ŋaa nɩaa mahɩŋ batori arɩ fii dʋndʋŋ nɛ. Ama lɛɛlɛ ma TƖƖNA Wɩa leŋe ma pʋŋ nɛ a nagɛ chɛnwʋlaa sɩ hɛ wɩa-nyuŋ.

Currently Selected:

MOSIS BƖRA WULLI WƖA WOMBIIŊ 10: SIS

Highlight

Copy

Compare