MOSIS BƖRA WULLI WƖA WOMBIIŊ 28

La TƖƖNA jaŋ pɛ nɩalɩŋ sɩ sɛɩ ʋ niiŋ lɛ

1Dɩ ma nɛ fɩɛlɛ ma sɩaa a to ma TƖƖNA Wɩa niiŋ arɩ ʋ wɩalɩŋ kala mɩ sɩ dagɛma jɩnɩŋ, ma TƖƖNA Wɩa jaŋ leŋ dɩ ma kɩɩ tinteye-la kala nɩaa sɩ hɛ tinteeŋ lɛ. 2Dɩ ma nɛ sɛɩ ma TƖƖNA Wɩa, ʋ jaŋ pɛ ma lɛ arɩ wɩaa deemba: 3Ʋ jaŋ wasɛ ma tasɩŋ arɩ ma bagɩsɩŋ kala. 4Ʋ jaŋ pɛ ma lɛ dɩ ma lʋl biiriŋ a yʋgɛ, a leŋ dɩ kʋdiilee pʋrɩgɛ ma tinteeŋ lɛ, dɩ ma nɛsɩŋ, piesee arɩ bʋʋnaa ma pʋŋ. 5Ʋ jaŋ wasɛ ma baga kʋpɛrɛɛ arɩ kʋdiile-la ma sɩ jaŋ kɛŋ kɩalɩŋ ŋaa. 6Ʋ jaŋ pɛ ma lɛ wɩɩ na-kala ma sɩɩ ŋaa lɛ.

7La TƖƖNA jaŋ pɛ ma lɛ dɩ ma yuo dii ma dʋndɔmɔ-la sɩ jaŋ kɔ a yuyuoma. Ba jaŋ to dɩ-bala kɔ ma lɛ aŋ mɩɩra fá pɩsɛ dɩ ba laa ba tɩtɩa.

8La TƖƖNA jaŋ pɛ ma lɛ a leŋ dɩ ma virisiŋ su a leŋ dɩ ma tɩntɩmɩɩ-kala wasɛ. Ma TƖƖNA Wɩa jaŋ pɛ ma lɛ tintee-la lɛ ʋ sɩ jaŋ joŋo pɩma lɛ.

9Dɩ ma nɛ to ma TƖƖNA Wɩa wombiee, a ŋaa wɩalɩŋ kala ʋ sɩ daga, ʋ jaŋ leŋ dɩ ma ŋaa ʋ nɩaa sɩ bɩ disiniŋ kɛnɛ arɩ ʋ sɩ hɛ niiŋ ŋɩɩ a pɩma. 10Dʋnɩa nɩaa kala jaŋ na La TƖƖNA sɩ lɩɩsɛma ma ŋaa ʋ nɩaa ŋɩɩ dɩ ba fɩfáma. 11La TƖƖNA jaŋ pɩma dʋa a yʋgɛ tintee-la ʋ sɩ hɛ niiŋ a pɩ ma naabalɩmaba arɩ ʋ jaŋ joŋo pɩma lɛ. Ma jaŋ lʋl biiriŋ woruŋ, a kɛŋ nɛsɩŋ arɩ kʋdiilee yʋgɛ.

12La TƖƖNA jaŋ suri duonuŋ a leŋ dɩ ʋ nɩɩ ʋ bʋa lɛ a pɩma tintee-la lɛ, aŋ pɛ ma lɛ ma tɩntɩmɩɩ-kala lɛ. Tinteyee jaŋ yʋgɛ a chɩŋ kɩaa ma teeŋ, ama ma-na bɩ jaŋ chɩŋ kʋŋ nʋʋkala teeŋ. 13La TƖƖNA jaŋ leŋ dɩ ma ŋaa sɩpaalaara, ma bɩ jaŋ ŋaa harɩ-tooro. Dɩ ma nɛ jegile a nɩɩ ma TƖƖNA Wɩa wɩalɩŋ mɩ sɩ joŋo dagɛma jɩnɩŋ, a fɩɛlɛ ma sɩaa a toba, ma jaŋ laa sɩpaaŋ wɩɩkala lɛ, ma bɩ jaŋ to harɩŋ. 14Ma pɔ má sɩ́ harɩŋ joŋo yɩa wɩalɩŋ kʋŋkala mɩ sɩ joŋo dagɛma jɩnɩŋ, a sɩ́ begile mʋ nadiiŋ koo nagʋa, a mʋ tuto vesiŋ a kpʋkpaarɛba.

Ŋmɩaŋ-la sɩ jaŋ dii nɩalɩŋ sɩ bɩ La TƖƖNA niiŋ ka to

15Dɩ ma nɛ bɩ ma sɩaa fɩɛla a jegile nɩɩ ma TƖƖNA Wɩa niiŋ a to ʋ wombiee arɩ ʋ wɩalɩŋ kala mɩ sɩ joŋo dagɛma jɩnɩŋ, ŋmɩaŋ deemba nɛ jaŋ diima: 16La TƖƖNA jaŋ kalɩba hɛ ma tasɩŋ arɩ ma bagɩsɩŋ lɛ. 17Ʋ jaŋ kalɩba hɛ ma baga kʋpɛrɛɛ arɩ kʋdiile-la ma sɩ jaŋ kɛŋ kɩalɩŋ ŋaa lɛ. 18Ʋ ŋmɩaŋ jaŋ diima, ʋ bɩ jaŋ leŋ ma lʋl biiriŋ yʋgɛ, a leŋ dɩ kʋdiilee nyaa ma tinteeŋ lɛ, ma nɛsɩŋ, piesee arɩ bʋʋnaa ma bɩ jaŋ pʋŋ. 19La TƖƖNA jaŋ kalɩba hɛ wɩɩ na-kala ma sɩɩ ŋaa lɛ.

20Dɩ ma nɛ vɩa La TƖƖNA, ʋ jaŋ leŋ dɩ ma wɩɩkala vʋgʋmɛ, dɩ wʋwalɩmaa jʋʋma dɩ ma to ŋɩɩ lɛ a kala guu chei, a tɩŋ wʋbɔŋ-la ma sɩ ŋaa lɛ. 21La TƖƖNA jaŋ joŋ nyanyal bɔŋŋɔɔ a hɛ ma lɛ dɩ ma kala sʋʋ dɛrɛ tintee-la ma sɩɩ jʋʋ dɩ ma tɩɩ lɛ. 22La TƖƖNA jaŋ joŋ nyanyalɩa-la sɩ jaŋ leŋ dɩ ma yʋɔlɛ a hɛ ma lɛ, ʋ jaŋ joŋ yarɩ-lɩŋŋaa hɛ ma lɛ a leŋ dɩ ma yaraa ŋmɛrɛ aŋ leŋ dɩ leriŋ faasa lɩŋ, dɩ hɩlɩŋ chɩŋ dɩ ma baga kɩaa ŋmaamɛ. Wʋbɔŋŋɔɔ deemba jaŋ ŋaa ma lɛ ŋɩɩ deeŋ deeŋ dɩ ma sʋʋ dɛrɛ. 23Ma jaŋ lɛ, duonuŋ bɩ jaŋ nɩɩ, dɩ ma tinteeŋ dol a nagɛ hɔɔŋ. 24La TƖƖNA fa sɩ jaŋ leŋ dɩ duonuŋ nɩɩ, ʋ jaŋ mɩɩra leŋ dɩ kʋŋkɔlʋŋ arɩ hagɩla lɩɩ wɩa-nyuŋ a kʋ tɔma dɩ ma sʋʋ.

25La TƖƖNA jaŋ leŋ dɩ ma dʋndɔŋŋɔɔ yuo diima. Ma jaŋ to dɩ-bala a mʋ dɩ ma yuoba, ama ba jaŋ kirima dɩ ma fá pɩsɛ a chɩchɛ dɩ ma laa ma tɩtɩa. Dʋnɩa nɩaa kala jaŋ na wɩɩ-la sɩ ŋaa ma lɛ dɩ fawʋllʋŋ faasa kɛmba. 26Ma jaŋ sʋʋ dɩ zaaraa arɩ baga kɩaa didii ma kʋsʋʋnʋŋ, ka nʋʋkala jaŋ tuo dɩ ʋ kiriba. 27La TƖƖNA jaŋ joŋ mɔpʋllʋ-la doho ʋ fa sɩ joŋo hɛ Ijipiti tɩŋŋaa lɛ a hɛ ma lɛ dɩ ma yaraa kala ŋaa naawɩɩlaa a tɩtɩsɛ. Daaluno kala tuo sɩ jaŋ wuo vaarɛma. 28La TƖƖNA jaŋ joŋ nyɩnyɛrɩŋ arɩ nyʋlʋmʋŋ a hɛ ma lɛ dɩ ma tʋɔŋ kala vʋgʋmɛ. 29Ma jaŋ gɔllɔ laarɛ wɩɩhɛyɛ a nagɛ nyʋlɩma, aŋ bɩ jaŋ na wɛnɩŋ. Ma wɩɩkala bɩ jaŋ kɔ dɩ ʋ wasa. Tapʋlɩɩ-kala nɩaa jaŋ dʋdɔgɩsɛma a kɛŋ ma kɩaa lɩlaa, aŋ ka nʋʋ tuo dɩ ʋ laama ta.

30Ma jaŋ sʋgɛ haala dɩ ma jaa, ka dɩ nʋʋ kɛŋ haal-la pɩŋ. Ma jaŋ saa dɩa aŋ bɩ jaŋ jʋʋ. Ma jaŋ pɛrɛ girep tɩɩsɩŋ baga aŋ bɩ jaŋ dii ʋ nɛnɛɛ. 31Nʋʋ jaŋ kɛŋ ma nɛŋ kpʋ ma sɩɩŋ lɛ, ama ma bɩ jaŋ chaŋ ʋ nammɩa. Ba jaŋ kɛŋ ma kakumo laa ma teeŋ, a kaa viiri. Ba jaŋ laa ma piesee a pɩ ma dʋndɔŋŋɔɔ, ka nʋʋ tuo sɩ jaŋ laaba pɩma. 32Ba jaŋ kɛŋ ma biiriŋ laa pɩ tintee-wogusuŋ nɩaa, ma jaŋ bibeŋ dɩ ma tʋɔŋ wʋwɩɩ, ka ma bɩ wɩɩkala wuo ŋaa. 33Nɩwogusu-la ma sɩ paala bɩ jɩŋ nɛ jaŋ dii ma baga kɩalɩŋ kala ma sɩ suolo na, ka dɩ ba dɔgɩsɛma ŋɩɩ ma mɩɩsɩŋ kala lɛ. 34Wɩalɩŋ ma sɩ jaŋ na jaŋ leŋ dɩ ma nyaasɛ. 35La TƖƖNA jaŋ leŋ dɩ mɔpʋllʋŋ sɩɩ wɩɩ kɩŋkɛŋ ŋmɛrɛ ma naadʋsʋŋ arɩ ma naasɩŋ lɛ ma sɩ bɩ jaŋ wuo tɩɩbɛ. Ba jaŋ ŋmɛrɛ a chɩŋ ma naachɛyɛɛ lɛ a kaa jɩl ma nyu-gbaŋa.

36La TƖƖNA jaŋ kiri ma dɩ ma kuoro kala a mʋ hɛ tintee-wogo lɛ ma dɩ ma nyɩmmaba ha sɩ bɩ jɩŋ. Nɩmɛ ma jaŋ kpaarɛ vesiŋ ba sɩ kɛŋ daasɩŋ arɩ tabɩaa a ŋaa. 37Tintee-wogusu-la lɛ La TƖƖNA sɩ jaŋ kirima mʋ hɛ, ʋ jaŋ ŋaa nɩalɩŋ wʋkpuŋkpere dɩ ba mʋmɔmma aŋ sisieri ma lɛ. 38Ma jaŋ duu kɩaa a yʋgɛ ma bagɩsɩŋ lɛ, ama kɩalɩŋ ma sɩ jaŋ ŋaa bɩ jaŋ yʋgɛ, bɛɛ wɩaa hɔbɔ jaŋ diiba. 39Ma jaŋ pɛrɛ girep tɩɩsɩŋ bagɩsɩŋ a yʋgɛ, a wasa hɛba, ama ma bɩ jaŋ tɔrɛ tɩɩnɛnɛ-la koo a nyʋa ba sɩnɩŋ, bɛɛ wɩaa nanchʋɔlaa jaŋ dii tɩɩsɩ-la kala. 40Olif tɩɩsɩŋ jaŋ yʋgɛ ma tinteeŋ lɛ, ama ma bɩ jaŋ na nʋʋŋ a dii, bɛɛ wɩaa ba nɛnɛɛ kala jaŋ yuoro ta. 41Ma jaŋ kɛŋ hambolibiisiŋ arɩ hantolibiisiŋ, ama ma bɩ jaŋ tɩɩba, bɛɛ wɩaa ba jaŋ yuo kɛsɛba dɩ ba ŋaa yosi. 42Hɔbɩ-laalɩŋ jaŋ dii ma tinteeŋ tɩɩsɩŋ arɩ ma bagɩsɩŋ kɩaa kala.

43Nʋhʋɔra-la sɩ hɛ ma tʋɔŋ nɛ jaŋ kɛŋ nyuŋ kɩɩma, ka dɩ ma-na mɩɩra hɛ naasɩŋ bʋbʋɔŋ. 44Ba nɛ jaŋ mɩɩra joŋ kɩaa a chɩchɩmma, ma-na bɩ jaŋ wuo joŋ kʋŋkala a chɩmba. Ba nɛ jaŋ mɩɩra ŋaa ma sɩpaalaaraa, ka dɩ ma tuto ba harɩŋ.

45Ŋmɩaŋ deemba kala jaŋ diima. Ba jaŋ kire to ma harɩŋ a yuo diima dɩ ma kala mʋ dɛrɛ, bɛɛ wɩaa ma vɩa dɩ ma sɛɩ ma TƖƖNA Wɩa niiŋ a to ʋ wombiee arɩ wɩalɩŋ kala ʋ sɩ dagɛma nɛ. 46Wɩaa deemba jaŋ ŋaa magɩl ma dɩ ma doho nɩaa kala teeŋ aa chagɩlɛma a kaa mʋ wuu, 47a tɩŋ ma TƖƖNA Wɩa sɩ joŋ dʋa-la kala a pɩma, ka ma vɩa dɩ ma tutou arɩ tʋɔtɔrʋŋ. 48Ŋɩɩ wɩaa, ma jaŋ kɛŋ losuŋ, lɩɩnyʋasʋŋ, yarɩ-biree, a nyaabɛ, aŋ pɛ tɩma pɩpɩ ma dʋndɔmɔ-la ma TƖƖNA Wɩa sɩ joŋo hɛ ma lɛ. La TƖƖNA jaŋ leŋ dɩ ma chaasa na hɛɛŋ ŋɩɩ a mʋ sʋʋ.

49La TƖƖNA jaŋ kɛŋ tinteeŋ nɩaa yikoro ma sɩ bɩ nɩɩ a lɩɩ dʋnɩa lee sɩ bolie a kʋ hɛ ma lɛ dɩ ba yuoma a nagɛ kachuuŋ sɩ yie kʋ tuu jiŋŋee lɛ ŋɩɩ. 50Ba ŋaa tintee nɩaa sɩ bɔmɔ nɛ a kɛŋ fawʋllʋŋ, ba bɩ nɩhɩasɩŋ ka zil a bɩ hambiisiŋ ma nenige ka fá. 51Ba jaŋ kpʋ ma pʋsʋŋ a chei ma tinteeŋ kʋpɛrɛɛ kala ŋɩɩ dɩ losuŋ kpʋma dɩ ma sʋʋ. Ba bɩ jaŋ leŋ dɩ ma kɛŋ mɩaa, tɩɩnɛnɛɛ sɩ-falɩŋ koo nʋʋ. Ba bɩ jaŋ leŋ dɩ ma nɛsɩŋ koo piesee koo bʋʋnaa kʋŋkala kɛŋ bii ŋɩɩ deeŋ deeŋ, dɩ ma kala sʋʋ dɛrɛ. 52Ba jaŋ kʋ gollo chu ma tinteeŋ tasɩŋ kala a yuo dii tasɩ-la ma sɩ saa kɛrɩ-duoruŋ sɩ leŋie a golli a joŋ ma yɩɛlaa hɛ dɩ ba kala tel. Ba jaŋ kʋ gollo chu tintee-la ma TƖƖNA Wɩa sɩ jaŋ joŋo pɩma tasɩŋ kala, a pɔ ma sɩ́ kʋŋkala kaa kʋ jʋʋ koo a kaa lɩɩ, 53a tɩŋ hɛɛ-la ma dʋndɔŋŋɔɔ sɩ jaŋ joŋ hɛ ma lɛ bʋa-la lɛ ba sɩ jaŋ gollo chu ma tasɩŋ a pɔ ma sɩ́ kʋŋ kaa jʋʋ koo a kaa lɩɩ ŋɩɩ, ma jaŋ gʋra kɛsɛ ma biiri-la ma TƖƖNA Wɩa sɩ joŋo pɩma a chɩchaŋ. 54Baal-la sɩ hɛ ma tʋɔŋ a ŋaa sɩɩ-fɩɛlɛ tɩɩna ma a bɩ nɩaa ka gbesi, ʋ paala bɩ jaŋ fá ʋ naambie nenige koo ʋ hachooluŋ koo ʋ biiriŋ. 55Dɩ ʋ nɛ kpʋ biiri-la kʋŋ, ʋ bɩ jaŋ yʋ aŋ chɔgɔ pɩ ʋ hachoolii-la koo ʋ naambii, bɛɛ wɩaa ba dʋndɔŋŋɔɔ sɩ kʋ gollo chuba dɩ ba yuo diiba ŋɩɩ, kʋ-la kala ʋ sɩ kɛnɛ nɛ ŋɩɩ. 56Ma tʋɔŋ haal-la sɩaa sɩ fɩɛla a bɩ ʋ nɩaa ka gbesi, a bɩ chɛ dɩ ʋ jʋʋ nʋʋ wɩɩ lɛ, ʋ jaŋ ŋaa wɩalɩŋ tɩtɩa ʋ bala sɩ ŋaa, 57a tɩŋ ba dʋndɔŋŋɔɔ sɩ gollo chu ba tasɩŋ hɛɛ-la jʋʋba wɩaa, ʋ jaŋ lʋara chaŋ ʋ bii-mulo arɩ biriŋ kala aŋ vɔŋ ʋ bala arɩ ʋ biiriŋ.

58Dɩ ma nɛ bɩ ma sɩaa fɩɛla a to Wɩa niiŋ arɩ ʋ wɩalɩŋ kala ba sɩ ŋmʋnsa a hɛ teniŋ deeŋ lɛ, a bɩ ma TƖƖNA Wɩa yɩrɩ-bal-la sɩ kɛŋ fawʋllʋŋ kaa tɩtɩŋ, 59La TƖƖNA Wɩa jaŋ joŋ nyanyal bɔŋŋɔɔ arɩ wʋlɔrʋnʋŋ a hɛ ma dɩ ma doho nɩaa lɛ dɩ ma na hɛɛŋ a dieni kɩŋkɛŋ. Nyanyalɩa-la bɩ jaŋ kɛŋ daaluno kala. 60Ʋ jaŋ joŋ nyanyalɩa-la kala ʋ fa sɩ joŋo hɛ Ijipiti tɩŋŋaa lɛ a hɛ ma lɛ. 61La TƖƖNA bɩra jaŋ joŋ nyanyalaa arɩ wʋlɔrʋnʋ-la doho ba sɩ bɩ ŋmʋnsa hɛ Wɩa wombiee teniŋ deeŋ tʋɔŋ, a hɛ ma lɛ dɩ ma kala sʋʋ a dɛrɛ. 62Ma fa yʋga nɛ woruŋ arɩ chɛnwʋlaa sɩ hɛ wɩa-nyuŋ, ama ma kala jaŋ dɛrɛ aŋ ka nɩaa baŋmɛnɛ, a tɩŋ ma sɩ vɩa ma TƖƖNA Wɩa niiŋ wɩaa. 63La TƖƖNA tʋɔŋ sɩ tɔrɔ ʋ ŋaa ma pʋŋ a kɛŋ dʋa ŋɩɩ, ŋɩɩ tɩtɩa nɛ ʋ tʋɔŋ jaŋ tɔrɛ dɩ ʋ cheima. Ba jaŋ kirima tintee-la ma sɩɩ jʋʋ dɩ ma tɩɩ lɛ. 64La TƖƖNA jaŋ kɛmma pɩsa hɛ dʋnɩa tinteyee kala lɛ. Nɩmɛ nɛ ma jaŋ kpaarɛ vesiŋ ba sɩ kɛŋ daaŋ arɩ tabɩaa a ŋaa, vesi-la ma dɩ ma naabalɩmaba sɩ bɩ jɩŋ. 65Tinteye-la lɛ, ma bɩ jaŋ kɛŋ lee ma sɩ jaŋ hɔnɔ wiesi. La TƖƖNA bɩ jaŋ leŋ dɩ ma tʋɔŋ pɩŋ dɩ-bala a tɩŋ tʋɔ-cheeŋ arɩ wʋwalɩmaa wɩaa. 66Ma wɩɩkala jaŋ ŋaa logo logo dɩ fawʋllʋŋ jʋʋma tɩtaŋɩŋ arɩ wɩɩhɛyɛ kala, dɩ ma chɩl ma mɩɩsɩŋ wɩaa. 67Chʋchʋɔŋ ma jaŋ bʋl, ‘Dɩ dɩdaanɩŋ nɛ fa.’ Dɩdaanɩŋ ma, ma jaŋ bɩra bʋl, ‘Dɩ chʋchʋɔŋ nɛ fa,’ a tɩŋ wɩalɩŋ ma sɩɩ na arɩ fawʋllɩɩ-la sɩ jʋʋma wɩaa. 68La TƖƖNA jaŋ leŋ dɩ lɩɩŋ daborusuŋ paama mɩɩra mʋ Ijipiti tinteeŋ, lee-la mɩ sɩ sɩ ma bɩra sɩ́ mɩɩra mʋ. Nɩmɛ ma jaŋ chɩchɛ dɩ ma joŋ ma tɩtɩa a yalla pɩ ma dʋndɔŋŋɔɔ a ŋaa yosi, ka nʋʋ tuo sɩ jaŋ yɔɔma.”

Currently Selected:

MOSIS BƖRA WULLI WƖA WOMBIIŊ 28: SIS

Highlight

Copy

Compare