MOSIS BƖRA WULLI WƖA WOMBIIŊ 27
27
Ba saa Wɩɩsʋllɩ koruŋ peel-la ba sɩɩ yɩrɛ Ɛbal lɛ
1Mosis arɩ Iziral tɩŋŋaa nɩhɩasɩŋ bʋla pɩ ba nɩaa, “Má to wɩalɩŋ kala mɩ sɩ joŋo dagɛma jɩnɩŋ. 2Dɩ ma nɛ chol Jɔdaŋ fuo-la a mʋ tintee-la ma TƖƖNA Wɩa sɩ jaŋ joŋo pɩma, má paa tabɩaa sɩ jalɩa a pɛ, a taarɛ. 3Má ŋmʋnsɛ Wɩa niiriŋ deemba kala a hɛ ba lɛ dɩ ma nɛ jʋʋ tintee-la sɩ sɩma a kɛŋ kɩaa woruŋ, tintee-la ma TƖƖNA, ma naabalɩmaba Wɩa sɩ hɛ niiŋ arɩ ʋ jaŋ joŋo pɩma. 4Dɩ ma nɛ chol Jɔdaŋ fuo-la, má pɛ tabɩa-la peel-la ba sɩɩ yɩrɛ Ɛbal lɛ a taarɛ arɩ mɩ sɩ dagɛma ŋɩɩ jɩnɩŋ. 5Má kɛŋ tabɩaa a saa Wɩɩsʋllɩ koruŋ nɩmɛ a pɩ ma TƖƖNA Wɩa. Má sɩ́ tɩntɩnnɩ kʋŋkala sɩ ŋaa hɔɔŋ kaa digi tabɩa-la. 6Ʋ maga dɩ má kɛŋ tabɩa-la ba sɩ bɩ saa nɛ a saa ma TƖƖNA Wɩa koruŋ, a ŋaa kʋnyɩgaa Wɩɩsʋlʋŋ ʋ nyuŋ a pɩ ma TƖƖNA Wɩa. 7Má kpʋ ma pʋsʋŋ a sʋl nɩɩ-magɛ dɔŋɔ Wɩɩsʋlʋŋ nɩmɛ a diiba aŋ gbigbieli ma TƖƖNA Wɩa sɩpaaŋ. 8Má ŋmʋnsɛ niiri-la hɛ tabɩa-la ma sɩ taara lɛ dɩ ba chaasa lɩɩ woruŋ.”
Ba jɩl peel-la ba sɩɩ yɩrɛ Ɛbal a kalɩbɛ
9Ŋɩɩ nɛ Mosis arɩ Levi doho Wɩɩsʋllɩ sɩpaalaaraa bʋl wɩaa pɩ Iziral tɩŋŋaa a bʋl, “Má kɛŋ goŋ aŋ jegile nɩɩ. Lɛɛlɛ ma ŋaa ma TƖƖNA Wɩa nɩaa nɛ, 10ŋɩɩ wɩaa, má jegile nɩɩ ma TƖƖNA Wɩa teeŋ, a to ʋ niiŋ arɩ wɩalɩŋ mɩ sɩ dagɛma jɩnɩŋ.”
11Tapʋlɩɩ-la tɩtɩa Mosis bɩra bʋla pɩ nɩalɩŋ: 12“Dɩ ma nɛ chol Jɔdaŋ fuo-la, doho doho deemba nɛ maga dɩ ba jɩl peel-la ba sɩɩ yɩrɛ Gɛrɩzɩm a sʋl Wɩa pɩ ma Iziral tɩŋŋaa. Simioŋ doho nɩaa, Levi doho nɩaa, Juda doho nɩaa, Ɩsaka doho nɩaa, Josɛf doho nɩaa arɩ Bɛnjamɩŋ doho nɩaa. 13Dosunuŋ deemba ma nɛ jaŋ jɩl peel-la ba sɩɩ yɩrɛ Ɛbal a kalɩbɛ. Rubiŋ doho, Gad doho nɩaa, Asa doho nɩaa, Zebuluŋ doho nɩaa, Daŋ doho nɩaa arɩ Nafɩtalɩ doho nɩaa. 14Levi doho nɩaa jaŋ heeli a bʋl wɩaa deemba: 15‘La TƖƖNA ŋmɩaŋ jaŋ dii nʋʋkala sɩ kɛŋ daaŋ koo tɩɛrɩŋ koo hɔɔŋ a ŋaa tɔmʋŋ a lʋara kpʋkpaarɛ. La TƖƖNA ka kɩsɛ ŋɩɩ nɛ.’ Nɩalɩŋ kala jaŋ laa bʋl, ‘Amɩɩ.’ 16‘La TƖƖNA ŋmɩaŋ jaŋ dii nɩɩ-la kala sɩ bɩ ʋ nyɩmma arɩ ʋ naaŋ ka zil.’ Nɩalɩŋ kala jaŋ laa bʋl, ‘Amɩɩ.’ 17‘La TƖƖNA ŋmɩaŋ jaŋ dii nɩɩ-la kala sɩ kɛŋ ʋ dɩ ʋ naambie tinteeŋ bʋa magɩlɩŋ gɩrɩmɛ.’ Nɩalɩŋ kala jaŋ laa bʋl, ‘Amɩɩ.’ 18‘La TƖƖNA ŋmɩaŋ jaŋ dii nɩɩ-la kala sɩ dagɛ nyʋlɩma ʋ yeŋŋi.’ Nɩalɩŋ kala jaŋ laa bʋl, ‘Amɩɩ.’ 19‘La TƖƖNA ŋmɩaŋ jaŋ dii nɩɩ-la kala sɩ gʋrɛ nʋhʋɔraa, biisinsiŋ arɩ yo-haalaa.’ Nɩalɩŋ kala jaŋ laa bʋl, ‘Amɩɩ.’ 20‘Nɩɩ-la kala sɩ kɛŋ ʋ nyɩmma haala pɩŋ, hɩɩsɛ ʋ nyɩmma nɛ, La TƖƖNA ŋmɩaŋ jaŋ dii tɩɩna.’ Nɩalɩŋ kala jaŋ laa bʋl, ‘Amɩɩ.’ 21‘La TƖƖNA ŋmɩaŋ jaŋ dii nɩɩ-la kala sɩ kɛŋ pʋna pɩŋ.’ Nɩalɩŋ kala jaŋ laa bʋl, ‘Amɩɩ.’ 22‘La TƖƖNA ŋmɩaŋ jaŋ dii nɩɩ-la kala sɩ kɛŋ ʋ dɩhaala pɩŋ, dɩ ʋ nyɩmma tolo nɛ koo dɩ ʋ naaŋ tolo nɛ.’ Nɩalɩŋ kala jaŋ laa bʋl, ‘Amɩɩ.’ 23‘La TƖƖNA ŋmɩaŋ jaŋ dii nɩɩ-la kala sɩ kɛŋ ʋ hɩɩlɩ-haala pɩŋ.’ Nɩalɩŋ kala jaŋ laa bʋl, ‘Amɩɩ.’ 24‘La TƖƖNA ŋmɩaŋ jaŋ dii nɩɩ-la kala sɩ lʋara kpʋ ʋ naambie.’ Nɩalɩŋ kala jaŋ laa bʋl, ‘Amɩɩ.’ 25‘La TƖƖNA ŋmɩaŋ jaŋ dii nɩɩ-la kala sɩ laa kpalaa aŋ kpʋ nʋʋ sɩ bɩ wɩɩ cheye.’ Nɩalɩŋ kala jaŋ laa bʋl, ‘Amɩɩ.’ 26‘La TƖƖNA ŋmɩaŋ jaŋ dii nɩɩ-la kala sɩ vɩa dɩ ʋ to Wɩa niiriŋ deemba arɩ wɩalɩŋ ʋ sɩ daga.’ Nɩalɩŋ kala jaŋ laa bʋl, ‘Amɩɩ.’
Currently Selected:
MOSIS BƖRA WULLI WƖA WOMBIIŊ 27: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
