MOSIS BƖRA WULLI WƖA WOMBIIŊ 1
1
La TƖƖNA bʋla pɩ Iziral tɩŋŋaa dɩ ba sii Sɩnaɩ peeliŋ lɛ
1Wɩaa deemba nɛ Mosis bʋl teniŋ deeŋ tʋɔŋ a pɩ Iziral tɩŋŋaa, bʋa-la lɛ ba sɩ hɛ tintee-hɩlɩɩ-la lɛ Jɔdaŋ fuo-la wɩɩpɔsʋŋ dɩɩrɩŋ. Ba hɛ Jɔdaŋ fuonaa-la lɛ nɛ a kpagɛ Suf sɩ hɛ taŋ-la ba sɩɩ yɩrɛ Paraŋ arɩ tasɩŋ deemba pɛgɛ: Tofal, Labaŋ, Hazɛrɔf arɩ Dɩzahab. 2Tapʋlaa fii arɩ kʋbala nɛ ŋ jaŋ joŋ a lɩɩ peel-la ba sɩɩ yɩrɛ Sɩnaɩ a mʋ taŋ-la ba sɩɩ yɩrɛ Kadɛs Banɩa, dɩ ŋ nɛ to peel-la ba sɩɩ yɩrɛ Ɛdɔm wombiiŋ.
3Iziral tɩŋŋaa sɩ lɩɩ Ijipiti tinteeŋ lɛ jɩsɩŋ mahɩŋ balɩa tʋɔŋ, chɛŋ fii arɩ kʋbala tapʋl-bumbuŋ lɛ nɛ Mosis bʋl wɩalɩŋ kala La TƖƖNA sɩ dagʋ a tɩgɛ ba lɛ a pɩba. 4Bʋa-la lɛ dɩ La TƖƖNA yuo dii Amɔrɩ tɩŋŋaa kuoro Sɩhɔŋ sɩ hɛ taŋ-la ba sɩɩ yɩrɛ Hɛsɩbɔŋ lɛ, arɩ Basaŋ tɩŋŋaa kuoro Ɔgɩ ma sɩɩ beŋ tasɩ-la ba sɩɩ yɩrɛ Asɩtarɔf arɩ Ɛdɩrɛ.
5Iziral tɩŋŋaa fa hɛ Jɔdaŋ fuo-la wɩɩpɔsʋŋ dɩɩrɩŋ Mʋab tinteeŋ lɛ nɛ, Mosis suomo dɩdagɛ Wɩa wombie-la ʋ sɩ bile a pɩpɩba. Ʋ sɩ: 6La fa sɩ hɛ peel-la ba sɩɩ yɩrɛ Sɩnaɩ lɛ, La TƖƖNA Wɩa bʋla pɩla, “Má hɔŋ daha dieni nɛ. 7Má sii mʋ Amɔrɩ tɩŋŋaa tintee-la peelee sɩ yʋga arɩ lere-la sɩ hɛ nɩmɛ, a mʋ Jɔdaŋ fuonaa-la, a mʋ wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ, a mʋ wɩɩpɔsʋŋ nadiiŋ, a mʋ mʋgʋ-bal-la ba sɩɩ yɩrɛ Mediterenia niiŋ, a mʋ Kɛnaŋ tintee-la a kiele mʋ Lɛbanɔŋ tinteeŋ, a kɛŋ ŋɩɩ mʋʋ yi fuo-bal-la ba sɩɩ yɩrɛ Yufireti. 8Leree deemba kala nɛ mɩ-na ma TƖƖNA hɛ niiŋ a pɩ ma naabalɩmaba Abɩraham, Aɩzɩk arɩ Jekɔb arɩ mɩ jaŋ joŋo pɩ ba dɩ ba doho nɩaa kala. Má mʋ hɔŋ nɩmɛ, ma nɛ tɩɩʋ.”
Mosis lɩɩsɛ sɩpaalaaraa
9Ŋɩɩ nɛ Mosis bɩra bʋla pɩba: Bʋa-la lɛ la sɩ hɛ Sɩnaɩ peel-la lɛ, mɩ bʋla pɩma arɩ mɩ dʋndʋŋa bɩ jaŋ wuo bemma, 10bɛɛ wɩaa ma TƖƖNA Wɩa leŋe ma pʋŋa yʋgɛ nɛ a nagɛ chɛnwʋlaa sɩ hɛ wɩa-nyuŋ. 11A leŋ dɩ ma Tɩɩna, ma naabalɩmaba Wɩa, leŋ dɩ ma pʋŋa yʋgɛ woruŋ aŋ pɛ ma lɛ arɩ ʋ sɩ hɛ niiŋ pɩma ŋɩɩ. 12Ɛɛ nɛ mɩ dʋndʋŋa saa jaŋ wuo ŋaa a beŋ ma nɩ-daŋ deeŋ arɩ ma wʋwalɩmaa arɩ kaalɛrɛba kala? 13Mɩ bʋla pɩma arɩ ma lɩɩsɛ baala-la sɩ kɛŋ wʋjɩmɩŋ aa nɩɩ wɩaa sɩaa, nɩaa zizilba. Má lɩɩsɛba doho kala lɛ a pɩmɛ dɩ mɩ leŋ dɩ ba bibemma. 14Ŋɩɩ nɛ ma sɛɩ arɩ wɩɩ-la mɩ sɩ bʋla pɩma ŋaa wʋzɔŋ nɛ, aŋ lɩɩsɛ nɩalɩŋ pɩmɛ. 15Ŋɩɩ nɛ mɩ laa nɩalɩŋ ma sɩ lɩɩsa a leŋ dɔnsʋŋ bibeŋ nɩaa bʋɩba, dɔnsʋŋ ma bibeŋ zɔlɔba, dɔnsʋŋ ma bibeŋ mahɩŋ balɩa arɩ fiiba dɔnsʋŋ ma bibeŋ nɩaa fiiba, aŋ leŋ dɔnsʋŋ ma ŋaa tɩntɩnnɩ-hɩasɩŋ doho na-kala lɛ. 16Ŋɩɩ nɛ mɩ bʋla pɩ ma sɩpaalaara-la sɩ jaŋ laa ma wɩaa jɩma pɩpɩma: Dɩ Iziral tɩŋŋaa balɩa nɛ kɛŋ wɩɩ, koo dɩ ba dɩ nɩwogo nɛ, ʋ maga dɩ ma bʋl wɩɩ-la ʋ bʋa lɛ. 17Má dii nʋʋkala sarɩya ʋ bʋa lɛ, má sɩ́ nʋʋkala sɩɩŋ fá, bɛɛ wɩaa wɩalɩŋ kala ma sɩɩ bʋl Wɩa nɛ dagɛma. Wɩɩ-la kala sɩ dolie kɩɩma, má kaa kɔ mɩ teeŋ. 18Bʋa-la lɛ mɩ dagɛma wɩalɩŋ kala sɩ maga dɩ ma ŋaa nɛ.
Nɩalɩŋ ba sɩ tɩma ba mʋ lʋara beŋ Kɛnaŋ tinteeŋ
19La sɩ hɔŋ Sɩnaɩ peel-la leriŋ ŋɩɩ, La TƖƖNA Wɩa bʋla pɩla arɩ la sii. Ŋɩɩ nɛ la sii nɩmɛ a chaasɛ Amɔrɩ tɩŋŋaa tintee-la peelee sɩ yʋga a vɛŋ tintee-hɩlɩɩ-la sɩ jalɩa a kɛŋ fawʋllʋŋ lɛ ŋɩɩ a mʋ yi Kadɛs Banɩa. 20Ŋɩɩ nɛ mɩ bʋla pɩma, “Ma yi Amɔrɩ tɩŋŋaa tintee-la peelee sɩ yʋga nɛ, lee-la La TƖƖNA Wɩa sɩ joŋo pɩpɩla. 21Má bee na tintee-la ma TƖƖNA Wɩa sɩ joŋo pɩma nɛ pɩŋ ma sɩpaaŋ ŋɩɩ, má mʋ a hɔŋ ʋ lɛ a tɩɩʋ arɩ ma nyɩmmaba Wɩa sɩ dagɛma ŋɩɩ. Má sɩ́ leŋe dɩ fawʋllʋŋ kɛmma koo dɩ ma nandaasɩŋ yʋɔrɛ.” 22Ŋɩɩ nɛ ma kala kɔ mɩ teeŋ a bʋl, “Má leŋ dɩ la lɩɩsɛ nɩaa dɩ ba laa sɩpaaŋ mʋ a lʋara beŋ tintee-la maŋŋaa, aŋ kʋ bʋla pɩla wombii-la sɩ maga dɩ la to arɩ tasɩ-la la sɩ jaŋ to jʋʋ.”
23Ŋɩɩ nɛ mɩ na dɩ wɩɩ-la zɔmɔ. Mɩ lɩɩsɛ baalaa fii arɩ balɩa, doho na-kala lɛ nɩbala. 24Ŋɩɩ nɛ ba lɩɩ a mʋ tintee-la peelee sɩ yʋga a mʋ yi Ɛsɩkɔl fuonaa-la a beŋ ʋ kala. 25Nɩmɛ nɛ ba tɔrɛ tintee-la tɩɩnɛnɛɛ dɔnsʋŋ a kaa kʋ dagɛla, aŋ bʋla pɩla, “Tintee-la ŋaa tintee-zɔŋ nɛ La TƖƖNA Wɩa joŋo pɩpɩ la.”
Iziral tɩŋŋaa vɩa La TƖƖNA niiŋ
26Ama ma vɩa ma TƖƖNA Wɩa niiŋ nɛ a bɩ chɛ dɩ ma mʋ tintee-la. 27Ma hɔŋ ma lɛŋŋɛɛ lɛ nɛ a gʋgʋrɩmɛ wɩaa arɩ ma TƖƖNA bɛrɛma nɛ a kɛmma kaa lɩɩ Ijipiti tinteeŋ lɛ kɔ dɩ ʋ jomma hɛ Amɔrɩ tɩŋŋaa nɩsɩŋ lɛ dɩ ba kpʋma. 28Ma sɩ, “Nɩɩ nɛ la jaŋ mʋ? La naambiiriŋ sɩ mʋ beŋ tintee-la joŋ fawʋllʋŋ hɛ la lɛ nɛ.” Ba sɩ, “Nɩalɩŋ sɩ hɛ tintee-la lɛ waa kɩɩla nɛ a dolie kɩɩla ma. Ba tasɩŋ jalɩa, ba saa kɛrɩsɩŋ sɩ jɩla yi wɩa-nyuŋ a golli. La na Anakɩ doho nɩaa nɩwaayiilee ma nɛ tintee-la lɛ.”
29Ŋɩɩ nɛ mɩ bʋla pɩma, “Má sɩ́ leŋe dɩ fawʋllʋŋ kɛmma, má sɩ́ nɩalɩŋ fá. 30Ma TƖƖNA Wɩa sɩ laa ma sɩpaaŋ jaŋ yuo nɩalɩŋ a pɩma arɩ ʋ fa sɩ yuo Ijipiti tɩŋŋaa ŋɩɩ pɩma ma sɩɩŋ lɛ. 31Ma fa sɩ hɛ tintee-hɩlɩɩ-la lɛ, ma na ŋɩɩ ma TƖƖNA Wɩa sɩ pɔma nɛ, a kɛmma kaa kɔ daha a nagɛ bie nyɩmma sɩ yie pɔ ʋ bie ŋɩɩ.”
32Ma na wɩaa deemba kala nɛ aŋ ha bɩ ma TƖƖNA Wɩa laa dii. 33Ʋ fa yie laa ma sɩpaaŋ nɛ tɩtaŋɩŋ a nagɛ nyiniŋ, a laa ma sɩpaaŋ wɩɩhɛyɛ a nagɛ duoŋ-bɩlɩmbaanɩŋ aa dagɛma lere-la ma sɩ jaŋ to arɩ lere-la ma sɩ jaŋ hɔŋ. 34La TƖƖNA sɩ nɩɩ wɩalɩŋ kala ma sɩ gʋrʋma, ʋ na baanɩŋ nɛ ma nyuŋ, aŋ chaasa ŋmɩɛsɛ. 35Ʋ sɩ, “Ma nɩbɔŋŋɔɔ deemba kʋŋkala sɩɩŋ bɩ jaŋ na tintee-zɔŋ-la mɩ sɩ sɩ mɩ jaŋ joŋo pɩ ma naabalɩmaba, 36see Jefuni nanʋala Kalɩb. Ʋ dʋndʋŋa nɛ jaŋ jʋʋ tintee-la. Ʋ dɩ ʋ doho nɩaa nɛ mɩ jaŋ joŋ tintee-la a pa, bɛɛ wɩaa ʋ to mɩ-na ma TƖƖNA arɩ tʋɔŋ kala nɛ.”
37Ma wɩaa nɛ tɩɩ La TƖƖNA na baanɩŋ mɩ ma tɩtɩa Mosis nyuŋ, a bʋl arɩ mɩ ma bɩ jaŋ jʋʋ tintee-la. 38Ama ʋ sɩ dɩ mɩ bʋl wɩaa a nyaasɛ Nuŋ nanʋala Josua nyuŋ, nɩɩ-la sɩ pɛ mɩ lɛ la tɩtɩŋ, bɛɛ wɩaa ʋ nɛ jaŋ laa Iziral tɩŋŋaa sɩpaaŋ a kɛmba jʋʋ tintee-la dɩ ba tɩɩʋ a hɔŋ nɩmɛ. 39Ma biiri-la wɩaa ma sɩɩ yel arɩ ba jaŋ sʋʋ ma dʋndɔŋŋɔɔ nɩsɩŋ lɛ, ma biiri-la ha sɩ bɩ wʋbɔmʋŋ arɩ wʋzɔmʋŋ bʋa jɩŋ, ba jaŋ jʋʋ tintee-la. Mɩ jaŋ joŋu pɩba dɩ ba tɩɩʋ. 40Ama ma-na, má mɩɩra to tintee-hɩlɩɩ-la a mʋ Mʋgʋ-fɩaŋ dɩɩrɩŋ.
41Ŋɩɩ nɛ ma bʋl, “La ŋaa wʋbɔŋ nɛ La TƖƖNA lɛ, la jaŋ mʋ tintee-la a yuo laalɩŋ arɩ La TƖƖNA Wɩa sɩ dagɛ ŋɩɩ.” Ŋɩɩ nɛ ma kʋŋkala paa ʋ bayuori kɩaa a bɩɩnɛ arɩ ʋ ŋaa mɔlɩɩ nɛ dɩ ma mʋ yuo peelee sɩ golli tintee-la nɩaa.
42Ŋɩɩ nɛ La TƖƖNA bʋla pɩmɛ dɩ mɩ bʋla pɩma, “Má sɩ́ laal-la mʋ, bɛɛ wɩaa mɩ bɩ ma harɩŋ chɩna, dɩ ma nɛ vɩa aŋ sɛnsɛ, ma dʋndɔŋŋɔɔ jaŋ yuo diima.”
43Ŋɩɩ nɛ mɩ bʋl wɩɩ-la pɩma, ka ma bɩ jegile nɩɩ, aŋ gɩrɛ vaasɩŋ a mʋ dɩ ma yuo laal-la. 44Amɔrɩ tɩmma-la sɩ hɛ peel-la nyuŋ kʋ lɩɩ a nagɛ tʋʋ-bii-laalɩŋ a kirima a lɩɩ peel-la ba sɩɩ yɩrɛ Ɛdɔm lɛ a kaa mʋ taŋ-la ba sɩɩ yɩrɛ Hɔma. 45Ŋɩɩ nɛ ma mɩɩra kɔ a yel La TƖƖNA sɩpaaŋ, ka ʋ fʋʋla yagɛma. 46Ŋɩɩ nɛ tɩɩ ma hɔŋ Kadɛs lɛ a dieni.
Currently Selected:
MOSIS BƖRA WULLI WƖA WOMBIIŊ 1: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
