Israelfɔ Ɩlʋ 91
91
Bulu, Gyi Mɩ Ɔtanʋkpa Pʋ́ Mɩ Oŋainkpa Kpikpli
1Ɔha ánɩ́ otsie Ɔsʋsʋʋsʋ Mʋ Wie amʋ oŋainkpa,
Bulu Otumipʋ amʋ yiyi bun mʋsʋ,
2ɔbɛ́bla Nana Bulu ɔbɛɛ, “Bulu, fʋgyi mɩ ɔtanʋkpa pʋ́ mɩ oŋainkpa kpikpli,
mɩ Buluá mɩ ansɩ dɩn fʋsʋ.”
3Mʋ ɔbɛ́lɛ fʋ lɛ ɔfɩnɩpʋ yibi
pʋ́ ɩlɔ lalahɛá ɩtɔmɔtɔ.
4Ɔbɔ́pʋ mʋ atɛ bun fʋsʋ.
Fénya ɔtanʋkpa mʋ abamba asɩ.
Mʋ ɔnɔkwalɩ ɩbɔ́bwɛ fʋ kʋtʋ,
ibégyi ɩban wa fʋ.
5Fʋméenya atɔ lalahɛ kʋkʋ ifu onye,
ntɛ mbɩn ánɩ́ bʋdɛtswɩ ɔyɩkɛhɛtɔ,
6ɩlɔ tsankɩhɛá ɩna okluntɔ,
ntɛ mʋ́á ɩtɔmɔ aha ɔpa gyein.
7Ɔpɩm (1,000) bɛ́dɩda fʋ abɩntɔ,
mpɩmdu (10,000) ɛ bɛ́dɩ fʋ gyɔpɩsʋ,
tamɛ fʋ mʋ́ ɩbɔ́tsʋn fʋsʋ.
8Ansibi wʋlɛ fɔ́pʋwun
alɩá Bulu ɔbɛ́ka lalahɛ abwɛpʋ ɩkɔ.
9Fapʋ Nana Bulu bwɛ fʋ ɔtanʋkpa,
pʋ Ɔsʋsʋʋsʋ Mʋ Wie amʋ bwɛ fʋ otsiakpa.
10Mʋ́ sʋ tɔtɔɔtɔ mɔ́ɔbwɛ fʋ,
tsitsa kʋkʋ ɛ mɛ́ɛba fʋ woyisʋ,
11tsufɛ Bulu ɔbɛ́ha mʋ abɔpʋ bɛ́kpa fʋ,
fʋ ɔtsʋnkpa fɛ́ɛ́.
12Bɛ́kpata fʋ ɩbɩtɔ,
mɛnɩ fʋ yabi mɛ́ɛda ibwi.
13Fɛ́tsatsa gyata mʋ́a sapasʋ,
dʋ lɩɩ gyata ɔwʋnlɩnpʋ mʋa ɩwɔsʋ.
14Bulu ɔbɛɛ, “Nɛ́lɛ mʋ,
tsufɛ ɔtɛhɩɛ dwɛ mɩ.
Nótsu mʋ lɩɩ ɔwanklaankpa,
tsufɛ oyin mɩ ɩda.
15Osu kpoli mɩ a, nɔ́sɔ mʋ ɔnɔ.
Nétsia mʋ wa ɩkplanbɩ.
Nɛ́lɛ mʋ, wa mʋ numnyam.
16Nɛ́ha mʋ nkpa tɩntɩn,
obówun mɩ nkpahɔ.”
Currently Selected:
Israelfɔ Ɩlʋ 91: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
