Israelfɔ Ɩlʋ 139
139
Bulu, Tɛtɛ Mɩ Klʋntɔ Kɩ
Dawid kanfʋ-ɩlʋ ha ɩlʋ osunapʋ.
1Oo Nana Bulu, fatɛtɛ mɩ ɩklʋntɔ kɩ,
fabɩ mɩ.
2Fʋyɩn mɩ asɩtsia pʋ́ mɩ kʋsʋbɩ.
Fʋbʋ tsutsuutsu fʋyin mɩ agywɩɩn kugyikʋ.
3Fʋtɛkɩ mɩ natɩ pʋ́ mɩ klɛdɩsʋ,
fʋyin mɩ ɩkpa fɛ́ɛ́ wanklaan.
4Oo Nana Bulu, asa asʋankʋ bɛ́dalɩ tsu mɩ ɔnɔ a,
fʋyin mʋ́ fɛ́ɛ́ dodo.
5Fakpa mɩ wa ɩwɩtɔ,
pʋ ɩbɩ bun mɩsʋ.
6Asʋn anfɩ bɩ ɩhɩɛ bʋ mɩ ifu!
Ɩlɛhɩɛ fʋa dʋn mɩ, mmɛtalɩ nu mʋ́ asɩ.
7Nkʋnʋ nɛ́talɩ natɩ si fʋ Ɔŋɛ amʋ yɔ?
Ntɛ nkʋnʋ nɛ́srɩ si fʋ yɔ?
8Nɩ nɔdʋ yɔ ɔsʋsʋ a, fʋtsie ɩnʋ.
Nɩ nɛyɛklɛdɩ afulitɔ kʋraa a, fʋbʋ ɩnʋ.
9Nɩ nɔkʋsʋ nyankɩ kwɛ atɛ,
fuli yetsia ɔpʋ ɔbɩn kʋraa a,
10fʋ kɛn ɔbɛ́kpa mɩ.
Fʋ tumi ɔbɛ́kɩta mɩ kinkin.
11Nɩ nɛblɩ mbɛɛ, “Oklun ibun mɩsʋ,
wankɩá olobomli mɩ iklun bwɛ onye kʋraa a”,
12oklun amʋ imoklun ha fʋ.
Ɩlɔwankɩ fɛ ɔyɩkɛhɛ,
tsufɛ oklun mʋ́a wankɩ fɛ́ɛ́ igyi ɩkʋlɛ fʋ ansɩtɔ.
13Fʋlɔbwɛ mɩ ɩwɩ atɔ kugyikʋ,
fɔpʋtsa aba mɩ yin iputɔ.
14Ntɛkanfʋ fʋ, tsufɛ alɩá fɔpʋbwɛ mɩ bʋ ifu,
ɩbʋ wanwan.
Fʋ gyumagyihɛ bʋ ifu,
nhɩɛ nyin mʋ́ alɩ.
15Mɩ awú kʋkʋ meŋain fʋ
brɛá fɔbwɛ mɩ ŋaintɔ.
Fɛhɩɛ trʋ mɩ wa abatɔ mɩ yin iputɔ.
16Fɔpʋ ansibi wun mɩ brɛá ngyi obugya-klun.
Fɔwanlɩn nkɛá négyi fɛ́ɛ́ wa fʋ ɔwʋlʋtɔ dodoodo
asa bɛtakwɩɩ mɩ.
17Oo Bulu, fʋ agywɩɩn bʋ mɩ labi dʋbɩ!
Ɩdʋn mɩ kla.
18Nɩ nɔbɔ mbɔdɩá nɛ́kla mʋ́ a, ɩdʋn ɩsɩ.
Brɛá nɔkʋsʋ nyankɩ a, fʋ wa ntra mbʋ.
19Oo Bulu, mɔ lalahɛ abwɛpʋ,
obugya atsitsapʋ abʋdalɩ mɩ ɩwɩ.
20Bʋtɛtɩ fʋ ɩda lalahɛ bregyibrɛ,
bwɛ lalahɛ kʋsʋ lɩɩ fʋsʋ!
21Oo Nana Bulu, yɛ fʋyin ánɩ́ ntɛhɩɛ lu aha ánɩ́ bʋtolu fʋ,
ntekisi aha ánɩ́ bʋtɔkʋsʋ lɩɩ fʋsʋ?
22Ntɛhɩɛ lu amʋ́,
nakla amʋ́ wa mɩ alupʋtɔ.
23“Oo Bulu, tɛtɛ mɩ klʋntɔ kɩ, afʋbɩ alɩá ngyi.
Sɔ mɩ kɩ, afʋbɩ mɩ agywɩɩn kugyikʋ.
24Kɩ bɛɛ, agywɩɩn lalahɛ ɩkʋ bʋ mɩtɔ,
afʋkpa mɩ tsʋn ɔkpa wanklaansʋ brɛ fɛ́ɛ́.”
Currently Selected:
Israelfɔ Ɩlʋ 139: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
