Israelfɔ Ɩlʋ 119
119
Ansɩ Igyi Aha Ánɩ́ Ɔlala Ma Amʋ́ Ɩwɩ (Alɛf)#119:1 Alɛf, Bɛt, Gimɛl aná amʋ: igyi a, b, d; Hebrifɔ bʋtɔpʋwanlɩn atɔ.
1Ansɩ igyi aha ánɩ́ ɔlala ma amʋ́ ɩwɩ,
bʋtɛnatɩ Nana Bulu atosunahɛ ɔkpasʋ.
2Ansɩ igyi aha ánɩ́ ɔlɛ ɔnɔ bʋtegyi mʋ́sʋ,
bʋtɔpʋ amʋ́ ɩklʋn fɛ́ɛ́ dunka mʋ,
3bʋtamabwɛ lalahɛ,
bʋtɛnatɩ mʋ ɔkpasʋ.
4Fɔpʋ fʋ mbla ha anɩ fɛɛ,
agyi mʋ́sʋ wanklaan.
5Oo, tɛkɩ nɩ nɛ́talɩ natɩ
fʋ amandɩɛ amʋsʋ wanklaan,
6hɩɛ gywɩɩn fʋ mbla amʋ fɛ́ɛ́ ɩwɩ wanklaan a,
tɛkɩ pɛlɩ mɛ́ɛkɩta mɩ.
7Nɔ́pʋ ɩklʋn wanklaan kanfʋ fʋ.
Fʋ amandɩɛ ɩda ɔkpa nɩ ndɛ mʋ́ kasɩ.
8Nɔ́bwɛ dɩnka fʋ amandɩɛsʋ,
mási mɩ wa ɔkpa ɛkɛkɛɛkɛ.
Suna Mɩ Fʋ Amandɩɛ (Bɛt)
9Nkalɩ ɔyasubi ɔbɛ́ha mʋ tsiatɔ bɛ́tɩn?
Nkɛtɩ ɔdɛ fʋ asʋnsʋ gyi.
10Napʋ mɩ klʋn fɛ́ɛ́ ndɛ fʋ dunka.
Máha mɩ ampan fʋ mbla amʋsʋ.
11Naŋain fʋ asʋn mɩ klʋntɔ,
mɛnɩ mmɔ́ɔpʋ ɩla gyi fʋ.
12Oo Nana Bulu, kanfʋ ɩbwɛ fʋ klɛ.
Suna mɩ fʋ amandɩɛ.
13Napʋ ɔnɔ kla amandɩɛá
fɔpʋ fʋ ɔnɔ wa fɛ́ɛ́.
14Mɩ ansɩ tegyi ɔnɔá fɛlɛ ɩwɩ,
fɛ alɩá mɩ ansɩ tegyi atonyahɛ ɩwɩ.
15Ntɛhɩɛ gywɩɩn fʋ mbla amʋ ɩwɩ,
pʋ ansɩ yi fʋ ɔkpa amʋsʋ.
16Fʋ amandɩɛ sʋ awútɔ bɛ́sankɩ mɩ,
mmɛ́ɛtan fʋ asʋnsʋ.
Finki Mɩ Ansibi (Gimɛl)
17Bwɛ yile ha mɩ fʋ osumbi, antsia nkpa.
Mɩ angyi fʋ asʋnsʋ.
18Finki mɩ ansibi,
fówun nówun ofula ánɩ́ ɩbʋ fʋ atosunahɛ amʋtɔ.
19Ɔfɔɔ ngyi ɔsʋlʋ anfɩsʋ,
mápʋ fʋ mbla ŋain mɩ.
20Ɩklʋn mɛdɩ mɩ asɩ,
tsufɛ fʋ amandɩɛ ɩdɩn mɩ klʋnsʋ bregyibrɛ.
21Fʋtɔwa ɩyɩn wa aha ánɩ́ bʋtamabu atɔ, fʋ ɩlwɩɩ dɩn amʋ́sʋ,
bafwɩ dalɩ fʋ mbla ɔkpasʋ.
22Dɩnkɩ amʋ́ nsʋpa pʋ́ amʋ́ pɛlɩ lɛ mɩsʋ,
tsufɛ ndɛ ɔnɔá fɛlɛsʋ gyi.
23Nɩ wulu ahandɛ befia bʋdɛ mɩ ɩwɩ agywɩɩn kɩta o a,
mɩ fʋ osumbi mʋ́ ntɔgywɩɩn fʋ amandɩɛ ɩwɩ.
24Fʋ ɔnɔá fɛlɛ tɛha awútɔ tɛsankɩ mɩ.
Mʋ́tosuna mɩ nyansa.
Ha Mɩ Annu Fʋ Mbla Amʋ Asɩ (Dalɛt)
25Nda asɩ tantaantan,
laha mɩ nkpa alɩá fʋ asʋn lɛblɩ.
26Nɛlɛ mɩ tsiatɔ suna fʋ, fɔsɔ mɩ ɔnɔ.
Mʋ́ sʋ suna mɩ fʋ amandɩɛ.
27Ha mɩ annu fʋ mbla amʋ asɩ,
mɛnɩ nɔ́gywɩɩn fʋ ofula ɩwɩ.
28Mɩ ɔkla dɛ awɩrɛhʋ su.
Lawa mɩ ɔwʋnlɩn fʋ asʋn amʋ ɔnɔ.
29Ha afunu ɔkpa ɩwa ɩfɔ mɩ wa,
afʋpʋ awɩtɔlɛ suna mɩ fʋ atosunahɛ amʋ.
30Natsu ɔnɔkwalɩ ɔkpa amʋ.
Napʋ ansɩ dɩnka fʋ amandɩɛsʋ.
31Oo Nana Bulu, ndɛ ɔnɔ amʋʋ fɛlɛ amʋtɔ kinkiinkin.
Máha pɛlɩ ɩkɩta mɩ.
32Nsrɩ fʋ mbla ɔkpa amʋsʋ,
tsufɛ faha nhɩɛ ndɛ mʋ́ asɩ nu.
Suna Mɩ Angyi Fʋ Amandɩɛsʋ (He)
33Oo Nana Bulu, suna mɩ angyi fʋ amandɩɛsʋ,
mɛnɩ nɛ́kɩta mʋ́tɔ yɛfʋn mʋ́ ɔnɔmɔ.
34Ha mɩ annu asʋn asɩ, ankɩta fʋ atosunahɛtɔ,
ampʋ mɩ ɩklʋn fɛ́ɛ́ gyi mʋ́sʋ.
35Kpa mɩ tsʋn fʋ mbla ɔkpa amʋsʋ,
tsufɛ ɩtɛha ɩwɩ tɛsankɩ mɩ.
36Damli mɩ klʋn dɩnka ɔnɔ amʋʋ fɛlɛ amʋsʋ,
megyi sika ɔnsɩpɛsʋ.
37Dɩnkɩ mɩ ansɩ lɛ atɔá ɩma labisʋ,
afʋha mɩ antsʋn fʋ ɔkpa amʋsʋ nya nkpa.
38Bwɛ tɔ amʋʋ fɛhɩɛ yaɩ ha fʋ ifu anyapʋ amʋ
ha mɩ, fʋ osumbi.
39Lɛ mɩ lɛ nsʋpa ánɩ́ ntenya ifutɔ,
tsufɛ fʋ amandɩɛ ɩbʋ alɛ.
40Kɩ, ndekleá négyi fʋ mbla amʋsʋ.
Yile ɔbwɛpʋ fʋgyi, sʋ laha mɩ nkpa.
Máhɔ Fʋ Ɔnɔkwalɩ Asʋn Amʋ Lɛ Mɩ Ɔnɔ (Waw)
41Oo Nana Bulu, ha fʋ ɔdwɛá ɩma ɔka
pʋ́ nkpahɔ amʋʋ fɛhɩɛ yaɩ mɩ amʋ ɩba mɩsʋ,
42mɛnɩ nényaa asʋankʋ kpla mɩ ɔblɔla abwɛpʋ,
tsufɛ mɩ ansɩ dɩn fʋ asʋnsʋ.
43Máhɔ fʋ ɔnɔkwalɩ asʋn amʋ lɛ mɩ ɔnɔ plɩplɩplɩ,
tsufɛ mɩ ansɩ dɩn fʋ amandɩɛsʋ.
44Nétsia gyi fʋ atosunahɛsʋ brɛ fɛ́ɛ́.
Mméesi mʋ́sʋ gyi ɛkɛkɛɛkɛ.
45Nɛ́natɩ iwilwiitɔ,
tsufɛ nakasɩ fʋ mbla.
46Nɛ́lɩɩ awie ansɩtɔ tɔɩ tsu ɔnɔ amʋʋ fɛlɛ amʋ ɩwɩ,
pɛlɩ mɛ́ɛkɩta mɩ.
47Fʋ mbla amʋ sʋ awútɔ tɛsankɩ mɩ,
tsufɛ ntekle mʋ́.
48Ntobu fʋ mbla amʋ, tsufɛ ntekle mʋ́.
Nɔ́gywɩɩn fʋ amandɩɛ ɩwɩ.
Mmɔkʋsi Fʋ Atosunahɛ Amʋ Tswɩ (Sayin)
49Kaɩn asʋn ánɩ́ fɛhɩɛ ha mɩ fʋ osumbisʋ,
ɩlaha ndɛ mʋ́ ɔkpa kɩ.
50Nɩ nowie ɩkplantɔ a,
tɔ amʋʋ fɛhɩɛ yaɩ ha mɩ amʋ ɩtɛlalwii mɩ ɩklʋn.
51Ɩwɩ atsupʋ bʋhɩɛ bʋdɛ mɩ ɔblɔla bwɛ,
tamɛ mmɔkʋsi fʋ atosunahɛ amʋ tswɩ.
52Oo Nana Bulu, nɔgywɩɩn fʋ bɩmbɩ amandɩɛ amʋ ɩwɩ a,
ɩklʋn tolwii mɩ.
53Ɔblɔ tɛhɩɛ kɩta mɩ
aha lalahɛ amʋʋ bakina fʋ atosunahɛsʋ gyi amʋ sʋ.
54Ɔtɩnɛgyiɔtɩnɛá nɔswɩɩ a,
fʋ amandɩɛ amʋ gyi ɩlʋá ɩdɩn mɩ ɔnɔsʋ nɩ.
55Oo Nana Bulu, ntɛkaɩn fʋ ɩdasʋ onye,
gyi fʋ atosunahɛsʋ.
56Ɩnɩ lada mɩ ɩbɩ nɩ,
tsufɛ ndɛ fʋ mbla amʋtɔ.
Nana Bulu, Fʋgyi Mɩ Ogyikpa (Hɛt)
57Nana Bulu, fʋgyi mɩ ogyikpa.
Nahɩɛá négyi fʋ asʋn amʋsʋ.
58Ndɛpʋ mɩ klʋn fɛ́ɛ́ kokoli fʋ,
wun mɩ nwɛ fɛ alɩá fɛhɩɛ.
59Nɩ nɔgywɩɩn alɩá mɩ ɔkpa gyi a,
ntɛdamli begyi fʋ ɔnɔ amʋʋ fɛlɛ amʋsʋ.
60Ntamaba yabi ɔma,
ntɔwa ɔsa gyi fʋ mbla amʋsʋ.
61Lalahɛ abwɛpʋ bafɩnɩ ayibi bomli mɩ o a,
ntamatan fʋ atosunahɛ amʋsʋ.
62Ntɔkʋsʋ ɔyɩnsɩnɛ da fʋ ɩpan,
tsufɛ fʋ amandɩɛ amʋ ɩda ɔkpa.
63Mɩa fʋ ifu anyapʋ pʋ́ fʋ mblasʋ agyipʋ fɛ́ɛ́ bʋ mba.
64Oo Nana Bulu, fʋ ɔdwɛá ɩma ɔka labʋla ɔyɩ fɛ́ɛ́.
Suna mɩ fʋ amandɩɛ.
Suna Mɩ Nyansa Pʋ́ Asʋn-asɩnu (Tɛt)
65Nana Bulu, fabwɛ yile ha mɩ, fʋ osumbi,
fʋ asʋn amʋ ɔnɔ.
66Suna mɩ nyansa pʋ́ asʋn-asɩnu,
tsufɛ nahɔ fʋ mbla amʋsʋ gyi.
67Nɔfwɩ dalɩ fʋ ɔkpasʋ, fɛbɩtɩ mɩ ɩsʋ,
tamɛ sei ndɛ fʋ asʋn amʋsʋ gyi.
68Fʋbʋ alɛ, fʋtɔbwɛ yile,
suna mɩ fʋ amandɩɛ.
69Ɩwɩ atsupʋ baka asʋn dɩnka mɩsʋ fia,
tamɛ mɩ mʋ ntɔpʋ mɩ klʋn fɛ́ɛ́ gyi fʋ mblasʋ.
70Amʋ́ klʋntɔ bʋ odwin fɛ nfɔkpin,
tamɛ mɩ mʋ́ fʋ atosunahɛ tɛha awútɔ tɛsankɩ mɩ.
71Ɩbʋ mɩ alɛá fɛha ɩkplan lɔtʋ mɩ,
mɛnɩ nɛ́kasɩ fʋ amandɩɛ.
72Fʋ atosunahɛ bʋ mɩ labi,
dʋn sika fututu mʋa sika pɛpɛ mpɩmpɩm.
Ha Fʋ Ɔdwɛá Ɩma Ɔka Ilwii Mɩ Klʋn (Yod)
73Ɩbɩ fɔpʋpwɛ mɩ, damli ɩbɩ mɩsʋ.
Ha mɩ annu fʋ asʋn asɩ, mɛnɩ nɛ́kasɩ fʋ mbla.
74Fʋ ifu anyapʋ bówun mɩ nya ansigyi,
tsufɛ ndɛ fʋ asʋn amʋ ɔkpakɩ.
75Oo Nana Bulu, nyin ánɩ́ fʋtobua asʋn ɔnɔkwalɩsʋ.
Ɔnɔkwalɩ ɔkpasʋ fɛha ɩkplan lɔtʋ mɩ.
76Ha fʋ ɔdwɛá ɩma ɔka ilwii mɩ klʋn,
fɛ alɩá fɛhɩɛ ha mɩ, fʋ osumbi.
77Wun mɩ nwɛ, fówun nénya nkpa.
Tsufɛ fʋ atosunahɛ tɛha awútɔ tɛsankɩ mɩ.
78Wa ɩwɩ atsupʋ anfɩ pɛlɩtɔ,
tsufɛ kʋkʋ kpalɩ bʋdɛ mɩ ɔnɔ tɩn.
Mɩ mʋ́ ndɛ fʋ mbla ɩwɩ gywɩɩn.
79Ha fʋ ifu anyapʋá bʋyin ɔnɔ amʋʋ fɛlɛ amʋ
abʋdamli ba mɩ wa.
80Fʋ amandɩɛ amʋ sʋ maha ɔlala itsia mɩ ɩwɩ,
mɛnɩ pɛlɩ mɛ́ɛkɩta mɩ.
Fʋ Nkpahɔ Ladɩnka Mɩ Ɔwɔlɩ (Kaf)
81Fʋ nkpahɔ ladɩnka mɩ ɔwɔlɩ alɩɩ, ɩlapian mɩ.
Fʋ asʋn amʋ ɔkpa ndɛkɩ.
82Nakɩ fʋ ɔkpa fɛ alɩá fɛhɩɛ alɩɩ, ansibi lawu mɩ.
Ndɛfɩtɛ mbɛɛ, “Ɔmɛnkɛ fólwii mɩ klʋn?”
83Nabi tuun fɛ ɔtsabitɔ-akpankogyo,
tamɛ mmɔkʋtan fʋ amandɩɛsʋ.
84Mɩ, fʋ osumbi nkɛ igyi afɩnɩ?
Ɔmɛnkɛ fégyi aha anfɩ bʋdɩn mɩsʋ anfɩ asʋn?
85Ɩwɩ atsupʋ anfɩ bʋtekina fʋ atosunahɛsʋ gyi anfɩ
bakwi ɔbɔ tswɩ mɩ.
86Fʋ mbla amʋ fɛ́ɛ́ igyi ɔnɔkwalɩ.
Kʋkʋ kpalɩ bʋdɩn mɩsʋ.
Mʋ́ sʋ gyi mɩ bʋalɛ.
87Basian mɩ mɔ,
tamɛ mmɔkʋsi fʋ mblasʋ gyi.
88Lapʋ fʋ ɔdwɛá ɩma ɔka wa mɩ ɔwʋnlɩn,
mɛnɩ négyi fʋ ɔnɔá fɛlɛsʋ.
Fʋ Mbla Amʋ Lɛhɩɛ Tɛɩ (Lamed)
89Oo Nana Bulu, fʋ asʋn lɛlɛ nlin ɔsʋsʋ,
ɩbʋ ɩnʋ brɛ fɛ́ɛ́.
90Fʋ ɔnɔkwalɩ bʋ ɩnʋ ha otuntufla fɛ́ɛ́.
Fɛyaɩ ɔsʋlʋ asɩ, ɩlɩɩ kinkiinkin.
91Ɩlɩɩ fʋ amandɩɛsʋ bɔtʋ ndɛ,
tsufɛ fʋ togyitɔ desum.
92Nɩ fʋ atosunahɛ mɛha ɩwɩ mɛsankɩ mɩ a,
tɛkɩ nowu sin mɩ asʋn wunhɛtɔ.
93Mmɛ́ɛtan fʋ mbla amʋsʋ ɛkɛkɛɛkɛ,
tsufɛ mʋ́sʋ fɔtsʋn laha mɩ nkpa.
94Fʋbʋ mɩ, hɔ mɩ nkpa.
Tsufɛ ntekleá nɛ́kasɩ fʋ mbla.
95Aha lalahɛ bawa oputu gyo mɩ ánɩ́ bɔ́mɔ mɩ,
tamɛ ntɛhɩɛ susu ɔnɔá fɛlɛ ɩwɩ.
96Nawun yile fɛ́ɛ́ ɔfʋnkpa,
tamɛ fʋ mbla amʋ mʋ́ lɛhɩɛ tɛɩ.
Fʋ Atosunahɛ Tɛhɩɛ Wa Mɩ Ɔdwɛ (Mem)
97Oo, fʋ atosunahɛ tɛhɩɛ wa mɩ ɔdwɛ.
Ntɔgywɩɩn mʋ́ ɩwɩ ɔyɩkɛhɛ fɛ́ɛ́.
98Fʋ mbla laha natɩn ansɩ dʋn mɩ alupʋ,
tsufɛ ɩda mɩ wa brɛ fɛ́ɛ́.
99Ntonu asʋn asɩ dʋn mɩ asunapʋ fɛ́ɛ́,
tsufɛ ntɔgywɩɩn ɔnɔ amʋʋ fɛlɛ amʋ ɩwɩ.
100Ntonu asʋn asɩ dʋn ahandɛ,
tsufɛ ntegyi fʋ mblasʋ.
101Nalɛ ɩwɩ lɛ lalahɛ kugyikʋ ɔkpasʋ,
mɛnɩ négyi fʋ asʋn amʋsʋ.
102Fʋ onuto losuna mɩ fʋ amandɩɛ.
Mʋ́ sʋ ntamasi mʋ́ tswɩ.
103Fʋ asʋn ɩhɩɛ bʋ mɩ ɔdwɛ.
Ɩbʋ mɩ ɔdwɛ debidebi dʋn ɔkwɛn.
104Fʋ mbla tɛha ntonu asʋn asɩ.
Mʋ́ sʋ nakisi afunu kugyikʋ.
Fʋ Asʋn Gyi Mɩ Ayabiasɩ Ɔkandɩɛ (Nun)
105Fʋ asʋn gyi mɩ ayabiasɩ ɔkandɩɛ,
ɩtɔwankɩ wʋlɩ mɩ ɔtsʋnkpa.
106Naka ntam, tsula dɩnka mʋ́sʋ ánɩ́
négyi fʋ amandɩɛsʋ, tsufɛ ɩda ɔkpa.
107Oo Nana Bulu, lakʋsʋa mɩ fɛ alɩá fɛblɩ,
tsufɛ nhɩɛ ndɛ asʋn wun.
108Nana Bulu, hɔ fʋ kanfʋ-afɔdɩɛ,
afʋsuna mɩ fʋ amandɩɛ.
109Ndɛ mɩ nkpa ɩbɩtɔ,
tamɛ ntamatan fʋ atosunahɛ amʋsʋ.
110Aha lalahɛ bafɩnɩ mɩ yibi,
tamɛ mmɔkʋfwɩ fʋ mbla ɔkpasʋ.
111Ɔnɔá fɛlɛ igyi mɩ siadɩɛ brɛ fɛ́ɛ́.
Ɩtɛha mɩ ɩklʋn tenya ansigyi.
112Nabwɛ agywɩɩn mbɛɛ,
kugyikʋá igyi négyi fʋ amandɩɛsʋ brɛ fɛ́ɛ́.
Fʋgyi Mɩ Ɔtanʋkpa Pʋ́ Mɩ Ɩwɩ Ɩban (Samɛk)
113Ntekisi aha ánɩ́ amʋ́ agywɩɩn tamalɩɩ tsukʋlɛ,
tamɛ fʋ atosunahɛ bʋ mɩ ɔdwɛ.
114Fʋgyi mɩ oŋainkpa pʋ́ mɩ kʋtʋ.
Fʋ asʋn ɔkpa ndɛkɩ.
115Lalahɛ abwɛpʋ, mlɩkpʋkpɛ tɛɩ mɩsʋ,
mɛnɩ nɛ́talɩ gyi mɩ Bulu mblasʋ.
116Ha mɩ anlɩɩ kinkin fɛ alɩá fɛhɩɛ, mɛnɩ nétsia nkpa.
Fʋ ɔkpa ndɛkɩ, máha pɛlɩ ɩkɩta mɩ.
117Kɩ mɩsʋ wanklaan, mɛnɩ nénya nkpa,
fówun négyi fʋ amandɩɛsʋ bregyibrɛ.
118Fekina aha ánɩ́ bafwɩ fʋ amandɩɛ ɔkpa.
Kpalɩ bʋdɛ amʋ́ ɩwɩ mlɛ.
119Fʋtɔtswɩ ɔyɩtɔ lalahɛ abwɛpʋ fɛ́ɛ́ tsitsa fɛ ipi.
Mʋ́ sʋ fʋ ɔnɔlɛ bʋ mɩ alɛ.
120Fʋ ɩwɩ ifu tɛha awútɔ tɔkpɩnkɩ mɩ.
Fʋ asʋnbua bʋ mɩ ifu.
Ntekle Fʋ Mbla Asʋn Dʋn Sika Pɛpɛ (Ayin)
121Nabwɛ tɔá ɩda ɔkpa, ɩbʋ alɛ.
Mási mɩ wa mɩ asisipʋ ɩbɩtɔ.
122Lɩɩ fʋ osumbi ɔma kinkin.
Maha ɩwɩ atsupʋ abʋsisi mɩ.
123Nakɩ ɔkpa ha fʋ nkpahɔ pʋ́ yileá fɛhɩɛá fɔ́bwɛ ha mɩ alɩɩ,
ansibi lawu mɩ.
124Pʋ fʋ ɔdwɛá ɩma ɔka kpa mɩ, fʋ osumbi,
afʋsuna mɩ fʋ amandɩɛ.
125Fʋ osumbi ngyi, ha mɩ asʋn-asɩnu,
fówun nɛ́bɩ ɔnɔ amʋʋ fɛlɛ amʋ.
126Oo Nana Bulu, ɩlafʋn ánɩ́ fɔ́kʋsʋ asɩ,
tsufɛ batswɩ fʋ atosunahɛ tsalɩfwɩ.
127Ntekle fʋ mbla asʋn dʋn sika pɛpɛ,
dʋn sika pɛpɛ onuto kʋraa.
128Mʋ́ sʋ natsu mʋ́á fʋ mbla amʋtɔ kugyikʋ bʋ alɛ,
ntekisi afunu kugyikʋ.
Damli Kɩ Mɩ, Afʋwa Awɩtɔlɛ Ha Mɩ (Pe)
129Ɔnɔ amʋʋ fɛlɛ amʋ ɩbʋ wanwan.
Mʋ́ sʋ ntegyi mʋ́sʋ nɩ.
130Nɩ bɛsankɩ fʋ asʋn amʋtɔ a, mʋ́tɔ tɔwankɩ.
Ɔha ánɩ́ mʋ agywɩɩn ma ɔsa kʋraa tonu mʋ́ asɩ.
131Nayaa ɔnɔ gblaun,
tsufɛ fʋ mbla dɩn mɩ ɔwɔlɩ.
132Damli kɩ mɩ, afʋwa awɩtɔlɛ ha mɩ,
fɛ alɩá fʋ amandɩɛ igyi ha fʋ adwɛpʋ.
133Ha mɩ annatɩ dɩnka tɔá fɛhɩɛsʋ.
Máha lalahɛ kʋkʋ igyi mɩsʋ ɛkɛkɛɛkɛ.
134Hɔ mɩ lɛ mɩ asisipʋ ɩbɩtɔ,
mɛnɩ négyi fʋ mblasʋ.
135Wa awɩtɔlɛ ha mɩ fʋ osumbi,
afʋsuna mɩ fʋ amandɩɛ.
136Mɩ ansɩ ntsú ɩsrɩ dɛtsʋn blablabla,
tsufɛ aha bʋmɛdɛ fʋ atosunahɛsʋ gyi.
Nana Bulu Asʋnbua Da Ɔkpa (Sade)
137Nana Bulu, fʋtɔbwɛ yile.
Fʋ asʋnbua ɩda ɔkpa.
138Yilebwɛ mʋ́a ɔnɔkwalɩwasʋ
ɔnɔ amʋʋ fɛlɛ amʋ ɩlɩɩ.
139Fʋ asʋn amʋ sʋ ɔblɔ ɩhɩɛ dɛ mɩ,
tsufɛ mɩ alupʋ batan mʋ́sʋ.
140Fɛhɩɛ sɔ tɔá fɛhɩɛ yaɩ kɩ.
Mɩ, fʋ osumbi ntekle mʋ́ asʋn.
141Kebikʋsʋ ngyi, bʋtamabu mɩ wa tɔtɔɔtɔtɔ,
tamɛ mmɔkʋtan fʋ mblasʋ.
142Fʋ yilebwɛ da ɔkpa brɛ fɛ́ɛ́,
fʋ atosunahɛ ɛ igyi ɔnɔkwalɩ.
143Ɩkplan mʋ́a asʋn wunhɛ latʋ mɩ,
tamɛ fʋ mbla tɛha awútɔ tɛsankɩ mɩ.
144Ɔnɔ amʋʋ fɛlɛ amʋ ɩda ɔkpa brɛ fɛ́ɛ́.
Ha mɩ annu mʋ́ asɩ, mɛnɩ nénya nkpa.
Fʋ Mbla Amʋ Fɛ́ɛ́ Ɩbʋ Mʋ́tɔ (Kof)
145Oo Nana Bulu, ndɛ fʋ kpoli tsu mɩ klʋntɔ, sɔ mɩ ɔnɔ.
Négyi fʋ amandɩɛsʋ.
146Ndɛ fʋ kpoli, hɔ mɩ nkpa.
Négyi ɔnɔ amʋʋ fɛlɛ amʋsʋ.
147Ntɔkʋsʋ asa nsaɩntɔ tɔwankɩ, ndesu kpoli fʋ
ndɛ fʋ asʋn amʋ ɔkpa kɩ.
148Onye fɛ́ɛ́ mmɛdɩdɩ,
ndɛ tɔá fɛhɩɛ ɩwɩ susu.
149Oo Nana Bulu, fʋ ɔdwɛá ɩma ɔka sʋ nu mɩ isu.
Fʋ asʋngyi ɔnɔkwalɩsʋ ɩlaha mɩ nkpa.
150Aha ánɩ́ bapʋ agywɩɩn lalahɛ bʋgya mɩ batʋ mɩ ta.
Bʋbʋ ɩfɔ fʋ atosunahɛ ɩwɩ,
151tamɛ Oo Nana Bulu, fʋbʋ mɩ wa.
Fʋ mbla amʋ fɛ́ɛ́ ɩbʋ mʋ́tɔ.
152Nɛbɩ ɔnɔ amʋʋ fɛlɛ amʋ dodoodo.
Nowun ánɩ́ fɔbwɛ mʋ́ ánɩ́ ibétsiá brɛ fɛ́ɛ́.
Fʋ Asʋn Blɩhɛ Fɛ́ɛ́ Nwun Gyi Ɔnɔkwalɩ (Rɛs)
153Kɩ ipian ánɩ́ ndewun, afʋlɛ mɩ,
tsufɛ mmɔkʋtan fʋ atosunahɛsʋ.
154Lɩɩ mʋ́tɔ ha mɩ, afʋka lɛ mɩ.
Lakʋsʋa mɩ fɛ alɩá fɛhɩɛ.
155Nkpahɔ bʋ ɩfɔ lalahɛ abwɛpʋ wa,
tsufɛ bʋmegya fʋ amandɩɛ ɔkpa.
156Oo Nana Bulu, fʋ nwewun ɩtsɔ.
Fʋ asʋnbua ɔnɔkwalɩsʋ sʋ lakʋsʋa mɩ.
157Aha ánɩ́ bʋdɩn mɩsʋ pʋ́ mɩ adʋn bʋtsɔ,
tamɛ mmɔkʋkina ɔnɔ amʋʋ fɛlɛ amʋ.
158Aha ánɩ́ bʋtɛdalɩ fʋ ɔma ɩwɩ tɔwa mɩ ɔblɔ,
tsufɛ bʋtamagyi fʋ asʋnsʋ.
159Kɩ alɩá ntekle fʋ mbla,
afʋlapʋ fʋ ɔdwɛá ɩma ɔka ha mɩ nkpa.
160Fʋ asʋn blɩhɛ fɛ́ɛ́ nwun gyi ɔnɔkwalɩ.
Fʋ amandɩɛ kugyikʋ da ɔkpa, ibetsia brɛ fɛ́ɛ́.
Nana Bulu, Fʋsʋ Mɩ Ansɩ Dɩn (Sin)
161Wulu ahandɛ bʋdɩn mɩsʋ kʋkʋ kpalɩ,
tamɛ ntenya fʋ asʋn amʋ ifu tsu mɩ ɩklʋntɔ.
162Fʋ asʋn amʋ tegyi mɩ ansɩ,
fɛ ɔha ánɩ́ alamɛntɩ itoyile tsu ɩsatɔ.
163Ntamafia afunu, ɩbʋ mɩ nyanya,
tamɛ ntekle fʋ atosunahɛ amʋ asʋn.
164Ntɛkanfʋ fʋ tse sienɔ ɛkɛwʋlɛ,
tsufɛ fʋ amandɩɛ da ɔkpa.
165Fʋ atosunahɛ adwɛpʋ bʋtenya iwilwii kpɔnkpɔɔnkpɔntɩ,
tɔtɔ ɩmɛ́ɛha amʋ́ abʋsrɛɩ.
166Oo Nana Bulu, fʋsʋ mɩ ansɩ dɩn ánɩ́ fɔ́hɔ mɩ nkpa.
Ntegyi fʋ mblasʋ.
167Ntegyi ɔnɔ amʋʋ fɛlɛ amʋsʋ,
ilegyi mɩ ansɩ.
168Ntegyi fʋ mbla pʋ́ ɔnɔá fɛlɛsʋ,
tsufɛ mɩ bwɛhɛ fɛ́ɛ́ ɩda fʋ ansɩtɔ.
Dunka Mɩ Fʋ Osumbi (Taw)
169Oo Nana Bulu, nu mɩ isu,
afʋha mɩ annu asʋn asɩ, fɛ alɩá fɛblɩ.
170Nu mɩ kokoli,
afʋhɔ mɩ fɛ alɩá fɛhɩɛ yaɩ.
171Mɩ ɔnɔ ɩbɛ́kanfʋ fʋ, lakanfʋ fʋ,
tsufɛ fasuna mɩ fʋ amandɩɛ.
172Nɔ́wa atɔá fɛhɩɛ yaɩ ɩwɩ ɩlʋ,
tsufɛ fʋ mbla fɛ́ɛ́ ɩda ɔkpa.
173Da ɩwɩsʋ afʋgyi mɩ bʋalɛ,
tsufɛ fʋ mbla nalɛ.
174Oo Nana Bulu, fʋ nkpahɔ dɩn mɩ ɔwɔlɩ.
Fʋ atosunahɛ tɛha awútɔ tɛhɩɛ sankɩ mɩ.
175Ha mɩ antsia nkpa, mɛnɩ nɛ́kanfʋ fʋ,
afʋha mɩ anya mbʋa tsu fʋ amandɩɛtɔ.
176Nabwɛ fɛ kufa fwɩhɛ. Dunka mɩ fʋ osumbi,
tsufɛ mmɔkʋtan fʋ mblasʋ.
Currently Selected:
Israelfɔ Ɩlʋ 119: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
