Israelfɔ Ɩlʋ 102
102
Bulu, Máka Mɩ Nkpa Itin
Ipian owunpʋ ɔkʋ mpaɩá ɔlɔbɔ ha Nana Bulu.
1Oo Nana Bulu, nu mɩ isu,
afʋhɔ mɩ mpaɩ.
2Nɩ mbʋ ɩkplantɔ a, máŋain mɩ.
Yaa asʋ ha mɩ, nɩ nosu kpoli fʋ,
afʋkɔsɩ sɔ mɩ ɔnɔ.
3Tsufɛ mɩ nkɛ dɛta fɛ ogyasi.
Awútɔ ɩdɛ mɩ ogya tsii fɛ ɔswɩtɔ ogya.
4Nabwɛ fɛ ɩfa bʋhɛá batsatsa mʋ́sʋ.
Atogyihɛ mɛdɩn mɩ ɔwɔlɩ.
5Mɩ kɩmɩ kʋklʋkʋʋ sʋ nawʋlɩ,
si awú kpan.
6Nabwɛ fɛ ɔsʋlʋkpansʋ-kpawu,
fɛ wulu bwiehɛtɔ lasa.
7Nda nkɩ,
fɛ obubwiá ɩlasi mʋ nkʋlɛ obusʋ.
8Mɩ alupʋ bʋtesia mɩ ekekegyiɛkɛ ɔyɩkɛhɛ.
Bʋtɔpʋ mɩ ɩwɩ abususʋ lwɩɩ aha.
9Nwɛla lamli mɩ atogyihɛ,
ntsú ɛ lafra mɩ ntsu nunhɛ.
10Fʋ ansɩpɛpɛ mʋ́a fʋ ɔblɔ sʋ,
fatswɩ mɩ tsalɩfwɩ.
11Mɩ nkpa dɛtsʋn fɛ ntʋpwɛ yiyi.
Nabʋ fɛ ɩfa.
12Tamɛ fʋ Nana Bulu fʋtsie fʋ owie-obiasʋ brɛ fɛ́ɛ́.
Otuntufla fɛ́ɛ́ bɛ́kaɩn fʋ ɩdasʋ.
13Fɔ́kʋsʋ wun Sionfɔ nwɛ.
Brɛá fɔ́pʋwa awɩtɔlɛ ha amʋ́ nɩ.
Ee, brɛ amʋ ɩlafʋn.
14Fʋ asumbi bʋtamatsula ɩnʋ abwisʋ.
Ɩnʋ osublu ɛ bʋ amʋ́ nwɛ.
15Ɔmá fɛ́ɛ́ bénya Nana Bulu ɩda ifu.
Ɔyɩtɔ awie fɛ́ɛ́ ɛ bénya mʋ numnyam ifu.
16Tsufɛ Nana Bulu ɔbɛ́lada Sion wulu.
Ɔbɛ́lɛ ɩwɩ ɔwan numnyamtɔ.
17Obónu aha ánɩ́ bʋtra bʋma tɔtɔ mpaɩ.
Ɔmɔ́ɔkpʋkpʋ nwuntɔ brɛá bʋdɛ mʋ kokoli.
18Bʋwanlɩn asʋn anfɩ tswɩ ha aha ánɩ́ bɛ́ba bɛlɩn fɛ́ɛ́,
mɛnɩ abi-aná fɛ́ɛ́ bɛ́kanfʋ Nana Bulu bɛɛ,
19Nana Bulu tsie ɔsʋsʋ mʋ otsiakpa,
ɔdɛ ɔsʋlʋsʋ kɩ sɩsɩ,
20mɛnɩ obónu obu adɩpʋ isu,
ɔha aha ánɩ́ baha lowu-ɩpɔn abʋgyi ɩwɩ.
21Mʋ́ sʋ bɛ́da mʋ ɩda ɔkan Sion,
kanfʋ mʋ Yerusalem,
22brɛá ɔyɩtɔ aha pʋ́ iwie ogyikpa fɛ́ɛ́ bafia
ánɩ́ bósum mʋ.
23Alaha napɔn mɩ yasʋtɔ,
aladɩnkɩ mɩ nkɛsʋ.
24Ndɛblɩ mbɛɛ, “Mɩ Bulu,
máka mɩ nkpa itin.
Fʋtsie nkpa brɛ fɛ́ɛ́tɔ!”
25“Fʋlɔwa ɔsʋlʋ ntswɩasɩ ɔyɩ asɩtsuabɩ.
Fʋ onuto ɩbɩ fɔpʋbwɛ ɔsʋsʋ.
26Mʋ́ fɛ́ɛ́ bɛ́ta,
tamɛ fʋ mʋ́ fétsia brɛ fɛ́ɛ́.
Mʋ́ fɛ́ɛ́ bɔ́bwɛ dada, fwɩ fɛ tatida,
27tamɛ fʋ mʋ́ fʋtamatsɛ.
Fʋ nkpa mɔ́ɔmɔ ɔnɔ ɛkɛkɛɛkɛ!
28Fʋ asumpʋ abi-aná bénya atsialɛ,
amʋ́ abi-aná bɛ́lɛ nlin fʋ ansɩtɔ.”
Currently Selected:
Israelfɔ Ɩlʋ 102: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
