Filipifɔ 3
3
Yesu Lowu Hɔ Anɩ Nkpa
1Ɩtrahɛ a, mɩ apio, anɩ Wie sʋ mlɩnya ansigyi. Ɩmɔkʋkpɔn mɩá nɛ́tra wanlɩn asʋn kuakʋlɛ anfɩ sɩsɩ mlɩ. Igyi asʋn ánɩ́ ɩbɛ́kpa mlɩ ɛ. 2Mlɩkɩ aha lalahɛ anfɩ bʋgyi fɛ akɩaɩ anfɩ wanklaan. Lalahɛ abwɛpʋ bʋgyi, bʋdɛ aha han bɛɛ, bʋtɩn kete kpaalɩ. 3Tsufɛ anɩ aha amʋʋ anɩtɔpʋ Ɔŋɛ Wankɩhɛ sum Bulu amʋ gyi kete atɩnpʋ onuto nɩ. Mʋ́ sʋ abɛ́talɩ tsu ɩwɩ ɩtɔ amʋʋ Kristo Yesu labwɛ ha anɩ amʋ sʋ. Anɩtamapʋ ansɩ dɩnka tɔá nyankpʋsa lapʋ ɩbɩ bwɛsʋ. 4Mɩ onuto o mbʋ ɔkpa pʋ ansɩ dɩnka mʋ́ anásʋ. Nɩ ɔkʋ ɔbɛɛ, mʋbʋ ɔkpa pʋ ansɩ dɩnka mʋ́sʋ a, mɩ mboun bʋ ɔkpa pʋ ansɩ dɩnka mʋ́sʋ dʋn. 5Tsufɛ bɔkwɩɩ mɩ, tɩn mɩ kete ɛkɛ kwesɩ. Israelyin ngyi. Benyamin abusuantɔ notsu. Mʋ́ sʋ Hebriyin onutonuto ngyi. Mose mbla amʋsʋ gyi ɔkpasʋ ɛ a, Farisiyin ngyi. 6Nɛhɩɛ wa nsi, dɩnka Kristo ɔpasua amʋsʋ. Negyi Mose mbla amʋsʋ wanklaan, ɔlala metsia mɩ ɩwɩ. 7Tamɛ ntobi anfɩ brɛ amʋ ntɛkɩá ɩbʋ mɩ labi anfɩ fɛ́ɛ́ a, Kristo sʋ ndɛ ɩtra megyi mɩ tɔtɔ. 8Mʋ́á ɩdʋn mʋ́ kʋraa gyi, nɩ nɔpʋkɩ alɩá nɔpʋbɩ mɩ Wie Kristo Yesu a, nawun ánɩ́ ɩbʋ labi dʋn togyitɔ. Nawun ánɩ́ nahʋlɩ ntobi anfɩ ntɛkɩá ɩbʋ mɩ labi anfɩ fɛ́ɛ́, alɩá Kristo ɔbɛ́da mɩ ɩbɩ sʋ. 9Ɩnɩ sʋ ɩnɩá mbʋ mʋ wa sʋ a, megyi Mose mbla amʋsʋ gyi ɔbɛ́ha négyi asʋ Bulu ansɩtɔ. Kristo hogyi mboun ɔbɛ́ha négyi asʋ Bulu ansɩtɔ. 10Mɩ agywɩɩn gyi, ndekleá nɛ́bɩ Kristo pʋ́ tumi amʋʋ Bulu lɔpʋkʋsʋa mʋ tsu afulitɔ amʋ tsɩa. Ndekleá nówun ipian fɛ alɩá Kristo lowun ipian wu, 11mɛnɩ ɔkpagyiɔkpasʋ a, mɩ ɛ Bulu ɔbɔ́kʋsʋa mɩ tsu afulitɔ!
Srɩ Buo Kristo
12Mmɛdɛblɩ mbɛɛ, mɩ ɩbɩ lada ntobi anfɩ fɛ́ɛ́ ntɛ Bulu labwɛ mɩ nafʋn. Ntra ndɛ nsi wa alɩá ɩbɔ́bwɛ mɩ ɩbɩ bɛ́da tɔ amʋ sʋ amʋʋ Kristo Yesu ɩbɩ lada mɩ amʋ. 13-14Mɩ apio, mmɛdɛblɩ mbɛɛ, mɩ ɩbɩ lada mʋ́. Ndɛ mʋ́ amʋʋ ɩdɛtsʋn amʋsʋ tan. Mʋ́á ɩda mɩ ansɩtɔ ɔkpa ngya. Mɩ ansɩ lapɛ, mɛnɩ nénya siadɩɛ amʋʋ Bulu ɔbɔ́tsʋn Kristo Yesusʋ tɩ mɩ nɔ́yɛhɔ mʋ wa ɔsʋsʋ amʋ. 15Ilehian ánɩ́ anɩ aha amʋʋ anɩladan hogyitɔ amʋ fɛ́ɛ́ abɔ́hɔ alɩ asʋn anfɩ. Nɩ ɩkʋ mɔwankɩ mlɩ a, Bulu ɔbɔ́wankɩ mʋ́tɔ suna mlɩ. 16Tamɛ mlɩha akɩta ɔnɔkwalɩ amʋʋ Bulu lasuna anɩ amʋtɔ.
17Mɩ apio, mlɩkasɩ mɩ tsiatɔ. Mlɩkasɩ atɔ tsu aha amʋʋ bakasɩ anɩ tsiatɔ amʋ wa. 18Tsufɛ ntetsia bla mlɩ asʋn anfɩ. Napʋ ntsú ntra ndɛ mlɩ bla mbɛɛ, aha tsɔtsɔɔtsɔ tsiatɔ losuna ánɩ́ Kristo oyikpalihɛsʋ lowu amʋ alupʋ bʋgyi. 19Aha anfɩ bɛ́hɩ. Amʋ́ apu gyi amʋ́ Bulu. Amʋ́ numnyam ɛ gyi pɛlɩ. Ɔsʋlʋsʋ atɔ ɩwɩ pɛ bʋtosusu. 20Tamɛ anɩ mʋ́ a, ɔsʋsʋ gyi anɩ otsiakpa. Ɔtɩnɛ amʋʋ anɩdɛ anɩ Ɔhɔpʋ, ogyi anɩ Wie Yesu Kristo ɔkpa kɩá obótsu ba amʋ. 21Mʋbʋ tumi, otegyi togyitɔsʋ. Mʋ ɔbɛ́ba bɛtsɛ anɩ ɔyʋlʋ wuhɛ anfɩ, bwɛ mʋ́ fɛ mʋ numnyam ɔyʋlʋ amʋ.
Currently Selected:
Filipifɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation