Filipifɔ 4
4
1Ɩnɩ sʋ apio adwɛpʋ, ntɔdwɛ mlɩ. Ɩdɩn mɩ ɔwɔlɩá nówun mlɩ, tsufɛ mlɩ sʋ ansɩ dɛ mɩ gyi, nénya ɩpanda ɛ! Mɩ adwɛpʋ, alɩ ilehian ánɩ́ mlɛ́lɩɩ kinkin mlɩ Kristo hogyitɔ nɩ.
Tɔá Bʋbwɛ
2Ndɛ mɩ apio tsɩhɛ Euodia mʋa Sintike kokoliá bʋnu aba asɩ, tsufɛ anɩ Wie abuopʋ bʋgyi. 3Mɩ agyʋmayɔba onuto, ndɛ fʋ ɛ kokoli mbɛɛ, fʋtɔɩ kpla amʋ́ abʋbwɛ kʋlɛ. Tsufɛ bawa nsi tsa mɩa Klement pʋ́ atrahɛ amʋ anɩlada asʋn wanklaan amʋ ɔkan. Bulu lawanlɩn amʋ́ ada wa nkpa ánɩ́ ɩtamata atsiapʋ ɔwʋlʋtɔ.
4Mlɩhɩɛ nya ansigyi anɩ Wie sʋ bregyibrɛ! Ntra ndɛ mlɩ bla mbɛɛ, mlɩhɩɛ nya ansigyi!
5Mlɩha ɔhagyiɔha owun ánɩ́ mlɩlolwii. Anɩ Wie ɩbabɩ lafʋn. 6Tɔtɔ ɩmáhan mlɩ. Mboun kugyikʋá igyi a, mlɩbɔ mpaɩ kokoli Bulu dɩnka mʋ́sʋ, amlɩda mʋ ɩpan. 7Mɛnɩ Bulu ɔbɛ́ha mlɩ iwilwiiá ɩdʋn blɩ, ɩbɛ́kpa mlɩ klʋn pʋ́ mlɩ agywɩɩn, mlɩa Kristo Yesu ɩkʋlɛbwɛtɔ.
8Ɩtrahɛ a, mɩ apio, mlɩpʋ mlɩ agywɩɩn dɩnka tɔá igyi ɔnɔkwalɩ, tɔá ɩbɛ́tɩ obú, tɔá ɩda ɔkpa, tɔá mʋ́ ɩwɩ lɛtɩn, tɔá itegyi aha ansɩ pʋ́ tɔá aha bɛ́kanfʋsʋ. Mlɩgywɩɩn tɔá ɩbʋ alɛ, aha bʋtɛkanfʋ aná ɩwɩ. 9Mlɩyɔ mʋ́sʋ amlɩpʋ ntobi anfɩ nasuna mlɩ anfɩ, mʋ́á mlɩlonu tsu mɩ wa pʋ́ mʋ́a mlɩlowun mɩ nɔbwɛ fɛ́ɛ́ wa mlɩ tsiatɔ, mɛnɩ Bulu amʋʋ ɔtɛha iwilwii amʋ ɔbɛ́kpa mlɩ.
Ɩpanda
10Bulu laha ansɩ ɩhɩɛ dɛ mɩ gyi, tsufɛ mlɩlatra kaɩn mɩsʋ. Nawun ánɩ́ mlɩmɔkʋsi mɩ ɩwɩ gywɩɩn, tamɛ talɩ mlɩmɛtalɩ lɛ mʋ́ suna. 11Mmɛdɛ asʋn anfɩ blɩ pʋsuna ánɩ́ mbʋ ɩkplantɔ. Tsufɛ nakasɩ, nabɩ alɩá tɔá mbʋ ɩbɔ́fʋn mɩ, nɩ mbʋ o, mma o! 12Nasuan alɩá nɔ́pʋtsia nɩ mbʋ o, mma o. Nabɩ alɩá tsiatɔ kugyikʋtɔá mbʋ ibégyi mɩ ansɩ. Nɩ ntsie akʋn o, namwɛ o, mbʋ o, mma o. 13Ntɛtalɩ bwɛ togyitɔ, tsufɛ Kristo tɔwa mɩ ɔwʋnlɩn.
14Mʋ́ alɩ o a, ɩbʋ alɛá mlɩlatsu ɩkʋ lɛ mɩ ɩkplan anfɩtɔ. 15Mʋ́ ɔma a, Filipifɔ, mlɩyin ánɩ́ brɛá nɔtsɔ mlɩ Yesu Kristo ɩwɩ asʋn wanklaan amʋ bla, nɛdalɩ Makedonia ɔmátɔ a, mlɩ ɔpasua anfɩ nkʋlɛ dɛ mɩ bʋa, mlɩdɛ mɩ atɔ sɩsɩ nɩ. 16Brɛá ntra mbʋ Tesalonika wulutɔ kʋraa, ɩwɩ lɛkplan mɩ a, mlɩletsia sɩsɩ mɩ. 17Megyi bɛɛ ndɛ tɔkʋ kʋlɩ tsu mlɩ wa. Mboun ndekleá mlɩnya tɔkʋ dɩnka awɩtɔlɛ amʋʋ mlɩdɛwa ha mɩ amʋsʋ. 18Mɩ ɩbɩ lada togyitɔá mlɩlɔpʋha Epafrodito mlɩaa, ɔpʋba mɩ. Ɩtsɔ kʋraa dʋbɩ. Mʋ́ sʋ nanya togyitɔá ibéhian mɩ. Ɩtɔ anfɩ mlɩlabwɛ anfɩ igyi fɛ mlɩlaha Bulu igyiá ɩbʋ ɔfan fanfaanfan, ɩlagyi mʋ ansɩ. 19Mɩ Bulu ɔbɛ́ha mlɩ togyitɔá ɩdɛ mlɩ hian tsu mʋ numnyam atɔ tsɔtsɔɔtsɔá ɩbʋ anɩa Kristo Yesunyɔ ɩkʋlɛbwɛtɔ. 20Numnyam ɩbwɛ anɩ Sɩ Bulu klɛ brɛ fɛ́ɛ́. Amen!
Ɩkla
21Nɛha Bulu aha ánɩ́ bʋgyi Kristo Yesu klɛ fɛ́ɛ́ itsia. Apioá bʋbʋ mɩ wa nfɩ ɛ bɛha mlɩ itsia. 22Bulu aha atrahɛá bʋbʋ mɩ wa nfɩ fɛ́ɛ́ bʋdɛ mlɩ itsia ha. Titriu amʋ́á botsu Roma owie dɛhɛn woyitɔ.
23Anɩ Wie Yesu Kristo ogyi mlɩ bʋalɛ.
Currently Selected:
Filipifɔ 4: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation