Filipifɔ 2
2
Kristo Ɩwɩasɩba Kasɩ
1Mlɩa Kristonyɔ mlɩlabwɛ kʋlɛ. Mʋ́ sʋ alawa mlɩ atɛtɔ-ɔnlɩn. Mʋ ɔdwɛ lalwii mlɩ klʋn. Mlɩa mʋ Ɔŋɛ amʋ ɩkʋlɛbwɛ sʋ alaha mlɩa mlɩ aba mlɩlabwɛ kʋlɛ, mlɩdɛ ɩkʋ tsu lɛ mlɩ aba asʋntɔ, mlɩdɛ aba nwɛ wun. 2Mʋ́ sʋ mlɩbwɛ kʋlɛ, amlɩtsula dwɛ aba tsu mlɩ klʋntɔ. Mlɩbwɛ agywɩɩn kʋlɛ, amlɩyɔ agyʋma wa abatɔ pʋha mɩ ansigyi ɩfʋn. 3Mlɩmábwɛ awʋnsɩpʋ. Mlɩmátsu ɩwɩ. Mboun mlɩba ɩwɩasɩ, amlɩtsu mʋ́á mlɩ aba bʋdʋn mlɩ. 4Mlɩmádunka mlɩ nkʋlɛ klɛ. Mlɩdunka mlɩ aba ɛ klɛ. 5Mlɩha mlɩ agywɩɩn ɩbwɛ fɛ Kristo Yesu klɛ.
6Ɩnɩá ɔlɛlɩan Bulu ɔkpagyiɔkpasʋ o a,
ɔmɔbwɛ agywɩɩn ánɩ́ obótsu mʋ ɩwɩá mʋa Bulu bʋgyi kɛkɛ.
7Mboun olesi mʋ togyitɔ ɔmagya,
bwɛ mʋ ɩwɩ osumpʋ.
Bɔkwɩɩ mʋ fɛ alɩá bɔkwɩɩ ɔhagyiɔha.
8Mʋ nyankpʋsabwɛtɔ a, ɔlɛba ɩwɩasɩ.
Olobu atɔ alɩɩ wu oyikpalihɛsʋ,
fɛ lalahɛ ɔbwɛpʋ.
9Ɩnɩ sʋ Bulu lotsu mʋ fʋa ya ɔsʋsʋʋsʋ,
ha mʋ ɩda ánɩ́ ɩdʋn ada fɛ́ɛ́,
10mɛnɩ ntobiá bʋbʋ ɔsʋ mʋ́a asɩ
pʋ́ ɔsʋlʋ ayasɩ bɛ́da akpawunu ha mʋ.
11Ɔhagyiɔha ɔbɛ́lɛ blɩ ánɩ́ “Yesu Kristo gyi Owie!”
pʋwa anɩ Sɩ Bulu numnyam.
Mlɩwankɩ Fɛ Ntsrakpabi
12Ɩnɩ sʋ apio adwɛpʋ, alɩ amʋʋ mlɩtobu mɩ brɛ amʋʋ mbʋ mlɩ wa amʋ a, ɩnɩá mma mlɩ wa o a, mlɩbɔ mbɔdɩ amlɩbwɛ mʋ́ alɩ. Mlɩpʋ ifu mʋ́a kpɩnkɩ yɔ mlɩ nkpahɔ agyʋma amʋ mɔ ɔnɔ. 13Tsufɛ Bulu onuto dɛ agyʋma yɔ mlɩtɔ. Alaha mlɩlatsula mlɩdɛ mʋ apɛ mʋ́a tɔá otekle bwɛ.
14Mlɩmátɔɩ ntɛ gyi togyitɔá mlɔ́bwɛ ɩwɩ nwɛn, 15mɛnɩ ɔlala méetsia mlɩ ɩwɩ; mlɩ ɩwɩ bɛ́tɩn, fɛ Bulu aha brɛ anfɩ mlɩtsie lakpan kugyikʋ abwɛpʋ ɔyɩ anfɩtɔ. Mlɩwankɩ fɛ ntsrakpabi amʋ́ ansɩtɔ. 16Mlɩyɔ mʋ́sʋ amlɩbla aha asʋn amʋʋ ɩtɛha nkpa amʋ, mɛnɩ mlɩ sʋ nɛ́talɩ pʋ ɩbɩ si kantɔ ɛkɛá anɩ Wie Kristo ɔbɛ́laba, ánɩ́ mɩ mbɔdɩ ntɛ mɩ gyumagyihɛ mɔbwɛ kpaalɩ.
17Tamɛ nɩ ɩbɛ́ba mʋ́tɔá bɔ́pʋ mɩ obugya wʋlɩ asɩ fɛ nta, mlɩ hogyi ɩwɩ afɔdɩɛ pʋ́ Bulu agyʋma ánɩ́ mlɩdɛyɔsʋ kʋraa a, ɩbɔ́wa mɩ ɔdwɛ. Ansɩ bégyi mɩa mlɩnyɔ fɛ́ɛ́. 18Mʋ́ sʋ ɩwa mlɩ ɔdwɛ, ansɩ igyi anɩ fɛ́ɛ́.
Timoteo Mʋa Epafrodito
19Nɩ anɩ Wie Yesu lotsula a, ɩmɔ́ɔwa ɔpá nɔ́wa Timoteo mlɩ wa. Nɩ oyinki bɛbla mɩá mlɩtsie wanklaan a, ansɩ bégyi mɩ. 20Mma ɔha ánɩ́ olotsu ɩkʋ lɛ mlɩ asʋntɔ dʋn mʋ. 21Tsufɛ atrahɛ amʋ fɛ́ɛ́ bʋdɛ amʋ́ onuto klɛ kɩ, megyi Yesu Kristo klɛ. 22Tamɛ mlɩyin alɩá Timoteo lagyi mʋ ɩwɩ adansɩɛ wanklaan. Alatsa mɩ anɩlada asʋn wanklaan amʋ ɔkan fɛ obi mʋ́a ɔsɩ. 23Mʋ́ sʋ ndɛ ɔkpa kɩá nɩ nenya wun tɔá ɩbɛ́ba mɩsʋ nfɩ pɛ a, nɔ́wa mʋ mlɩ wa. 24Nahogyiá anɩ Wie ɔbɛ́kpa mɩ, ɩmɔ́ɔwa ɔpá mɩ onuto nɛ́ba mlɩ wa.
25Tamɛ nɔbwɛ agywɩɩn ánɩ́ nɛ́layinkia Epafrodito sɩsɩ mlɩ. Anɩ pioá mɩa mʋnyɔ anɩdɛ agyʋma yɔ, anɩdɛkɔ asʋn wanklaan amʋ nwunsʋ. Mʋgyi mlɩ biá mlɩlɔwa mlɩaa, ɔba bɛkɩ mɩsʋ nɩ. 26Tsufɛ ɔdɛ mlɩsʋ kaɩn dʋbɩ. Ɩhɩɛ dɛ mʋ han, tsufɛ mlɩlonu mʋ ɩlɔ. 27Lɛlɛ mʋ́ a, alalɔ sian wu, tamɛ Bulu lowun mʋ nwɛ. Megyi mʋ nkʋlɛ, mɩa mʋnyɔ fɛ́ɛ́, mɛnɩ awɩrɛhɔ mɔ́ɔdʋn mɩ kɩta. 28Mʋ́ sʋ nhɩɛ ndekleá nɔ́kɔsɩ wa mʋ mlɩ wa, mɛnɩ nɩ mlɛlawun mʋ a, ansɩ bégyi mlɩ. Mɩ ɛ mɩ asʋn susuhɛsʋ bɛ́kala kuka. 29Mlɩhɩɛ pʋ ansigyi hɔ mʋ, fɛ mlɩ ba Okristoyin, amlɩpʋ obú ha mʋa aha ánɩ́ bʋgyi fɛ mʋ. 30Tsufɛ olesi mʋ nkpa ha Kristo agyʋma amʋ. Olekle owu mʋ́tɔ brɛá ɔlɩɩ mlɩ ɩdatɔ, mʋ nkʋlɛ ɔdɛ togyitɔá tɛkɩ nɩ mlɩbʋ nfɩ mlɔ́bwɛ ha mɩ bwɛ.
Currently Selected:
Filipifɔ 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation