Filipifɔ 1
1
Itsiaha
1Mɩ Paulo pʋ́ anɩ pio Timoteoá anɩgyi Kristo Yesu asumpʋ dɛ ɔwʋlʋ anfɩ wanlɩn sɩsɩ mlɩ Bulu aha ánɩ́ mlɩbʋ Filipi wulutɔ, mlɩa Yesu Kristo mlɩlabwɛ kʋlɛ. Mlɩa mlɩ ɔpasua ahandɛ pʋ́ amʋ́ abʋapʋ fɛ́ɛ́ anɩdɛ mʋ́ wanlɩn sɩsɩ.
2Anɩ Sɩ Bulu mʋa anɩ Wie Yesu Kristo bʋgyi mlɩ bʋalɛ, abʋha mlɩ iwilwii.
Paulo Atɔkʋlɩ Pʋ́ Ɩpanda
3Ntɛda mɩ Bulu ɩpan nɩ nɛkaɩn mlɩsʋ bregyibrɛ. 4Bregyibrɛá ndɛ mpaɩ bɔ ha mlɩ fɛ́ɛ́ a, ansɩ tegyi mɩ. 5Tsufɛ tsu ɛkɛá mlɩlɔtsɔ asʋn wanklaan amʋ nu a, mlɩdɛ anɩ tsa anɩdɛ mʋ́ ɔkan da bɔtʋ ndɛ. 6Nyin ánɩ́ Bulu amʋʋ olefi agyʋma wanklaan amʋ asɩ mlɩtɔ amʋ kɛn ɔbɔ́yɔ mʋ́sʋ alɩɩ yɔfʋn Kristo Yesu ɔbakɛ amʋ. 7Ɩlɛkana ánɩ́ nósusu mlɩ fɛ́ɛ́ ɩwɩ alɩ, tsufɛ ntɛhɩɛ dwɛ mlɩ. Ɩnɩá nda obu, ntɛ ndɛkɔ asʋn wanklaan amʋ nwunsʋ, mlɩlɩɩ mɩ ɔma a, anɩ fɛ́ɛ́ Bulu dɛ bʋalɛ gyi. 8Bulu yin ánɩ́ ntosusu mlɩ ɩwɩ, ntɛhɩɛ dwɛ mlɩ fɛ alɩá Kristo Yesu tɔdwɛ mlɩ.
9Ndɛ Bulu kokoli mbɛɛ, ɔha amlɩdwɛ aba dʋn alɩ, amlɩtɩn ansɩ, nu asʋn amʋ ɛ asɩ wanklaan, 10mɛnɩ mlɛ́bɩ tɔá ɩhɩɛ ɩbʋ alɛ. Amlɩtsia nkpa ánɩ́ mʋ́ ɩwɩ lɛtɩn, ɔlala ɩma mʋ́ ɩwɩ alɩɩ yɔfʋn ɛkɛá Kristo ɔbɛ́laba. 11Yesu Kristo ɔha mʋ yilebwɛ ɩbʋla mlɩtɔ, fɛ alɩá oyi toswie abi; ɩpʋ numnyam mʋ́a kanfʋ ha Bulu.
Paulo Ɩkantɔdɩ Lɛha Bulu Asʋn Lɛklɛɩ
12Mɩ apio, ilehian ánɩ́ mlɛ́bɩá ɩkplan anfɩ ɩlatʋ mɩ anfɩ laha asʋn wanklaan amʋ laklɛɩ tsɩa. 13Tsufɛ ɔhagyiɔha ánɩ́ ɔbʋ nfɩ, pʋ́ ɩsa akɔpʋá bʋtogyo owie-woyi aná fɛ́ɛ́ babɩ ánɩ́ Kristo-buo sʋ nda ɩkantɔ. 14Mɩ ɩkantɔdɩ sʋ apio tsɔtsɔɔtsɔ bapʋ ansɩ dɩnka anɩ Wiesʋ. Bʋhɩɛ bʋdɛ klʋn wa da asʋn wanklaan amʋ ɔkan, ifu mɛdɛ amʋ́.
15Ɩbʋ mʋ́tɔá mɩ ɩwɩ olu pʋ́ mɩ ɩwɩ ahin sʋ akʋ bʋdɛ Kristo ɩwɩ asʋn amʋ ɔkan da. Tamɛ amʋ́ akʋ ɛ balɛ klʋntɔ bʋdɛ mʋ́ bwɛ. 16Alɩ aha anfɩ bʋdɛpʋ mɩ ɩwɩ ɔdwɛ da asʋn wanklaan amʋ ɔkan. Tsufɛ bʋyin ánɩ́ Bulu lɔpʋ mɩ ba nfɩá mbɛprɩ mʋ asʋn amʋ nwun. 17Aha amʋʋ bʋmɛdɛ Kristo ɩwɩ asʋn amʋ ɔkan da tsu amʋ́ klʋntɔ amʋ mʋ́ a, amʋ́ nkʋlɛ inya sʋ bʋdɛ mʋ́ bwɛ. Nda ɩkantɔ, sʋ bʋdekleá béyinta mɩ ɩwɩ tsɩa.
18Tamɛ ɩmɛdɛ mɩ han, nɩ yile sʋ bʋdɛ mʋ́ bwɛ o, lalahɛ sʋ o. Mʋ́á ɩdɛ mɩ hian gyi, banya bʋdɛ Kristo asʋn amʋ ɔkan da nɩ. Ɩnɩ sʋ ansɩ ɩhɩɛ dɛ mɩ gyi nɩ. 19Tsufɛ nyin ánɩ́ mlɩ mpaɩ pʋ́ Yesu Kristo Ɔŋɛ amʋ ɔbɛ́kpa mɩ, nɛ́dalɩ ɩkplan anfɩtɔ. 20Nhɩɛ nyin, mbʋ hogyiá mmɔ́ɔbwɛ tɔá ɩbɛ́ha pɛlɩ bɛ́kɩta mɩ. Mboun nɛ́tra wa ɩwɩ ɔwʋnlɩn, mɛnɩ nɩ lowu igyi o, nkpa igyi o, mɩ tsiatɔ fɛ́ɛ́ ɩbɔ́wa Kristo numnyam. 21Tsufɛ nɩ ntsie nkpa a, ntsie ha Kristo. Nɩ nowu ɛ a, ɩbɔ́wa mɩ labi dʋn. 22Tamɛ nɩ ntra ntsie ɔyɩtɔ a, négyi gyʋma ánɩ́ ɩbɔ́wa labi ha mɩ. Ɩnɩ sʋ mmowun mʋ́á nlɛ. 23Nagyigya, tamɛ ɩbʋ mɩ alɛá néyetsia Kristo wa mboun. Mʋ́bʋ alɛ dʋn. 24Tamɛ mlɩ sʋ ɩbʋ alɛá nétsia nkpa. 25Nyin alɩ. Mʋ́ sʋ nétsia mlɩ wa abɔ́yɔ agyʋma amʋ, mɛnɩ mlɛ́dan, nya ansigyi mlɩ Kristo hogyi sʋ. 26Mʋmʋ brɛá neyinki ba mlɩ wa a, mlénya ɔkpa kanfʋ Kristo Yesu, ɩtɔ amʋʋ alabwɛ ha mɩ amʋ sʋ.
27Tɔá idehian sei gyi, mlɩha mlɩ tsiatɔ ɩkana Kristo asʋn wanklaan amʋ. Mʋmʋ nɩ nɛba mlɩ wa o, mmɛba o, nónuá mlɩlɩɩ kinkiinkin ɩkʋlɛbwɛtɔ; mlɩdɛ hogyi amʋʋ ɩbʋ asʋn wanklaan amʋtɔ amʋ ɛ nwun prɩ. 28Mlɩmánya aha ánɩ́ bɔ́kʋsʋ lɩɩ mlɩsʋ ifu ɔkpa ɔkʋkʋsʋ. Mlɩ ɩklʋnwa ɩbɔ́bwɛ osuna ha amʋ́á Bulu onuto ɔbɛ́hɩ amʋ́ fɛ́ɛ́, tamɛ ɔbɔ́hɔ mlɩ mʋ́ nkpa. 29Tsufɛ megyi Kristo hogyi nkʋlɛ sʋ Bulu lɔpʋha mlɩ. Mboun alɩá mlówun ipian ha mʋ ɛ. 30Ɩsa amʋʋ mlɩlowun ánɩ́ ndɛkɔ amʋ kɛn mlɩdɛkɔ a. Mʋ́ kɛntɔ ntra mbʋ nɩ.
Currently Selected:
Filipifɔ 1: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation