1 Korintofɔ 15
15
Kristo Kʋsʋ tsu Afulitɔ
1Mɩ apio, sei a, nkaɩn mlɩ asʋn wanklaan amʋʋ nɛda mʋ́ ɔkan suna mlɩ, mlɩlɔhɔ mʋ́sʋ gyi, mlɩ hogyi ɩlɩɩ mʋ́sʋ amʋ. 2Asʋn anfɩ ɔbɛ́ha mlɩ nkpa ánɩ́ ɩtamata, nɩ lɛlɛ mlɩlɔhɔ mʋ́sʋ gyi nɩ. Tamɛ nɩ mlekina mʋ́sʋ hogyi mʋ́ a, mlɩ hogyi labwɛ kpaalɩ!
3Tsufɛ asʋn ánɩ́ ɩhɩɛ dehian bɔpʋha mɩ nɔpʋba mlɩ igyi. Mʋ́gyi, Kristo lobowu anɩ lakpan sʋ, fɛ alɩá Bulu asʋn wanlɩnhɛ amʋ lɛblɩ. 4Bopula mʋ, Bulu lɔkʋsʋa mʋ tsu afulitɔ ɛkɛ sasɩ fɛ alɩá Bulu asʋn wanlɩnhɛ amʋ ɩlɛblɩ. 5Ɔlɛlɛ ɩwɩ ɔwan suna Petro. Mʋ́ ɔma a, ɔlɛlɛ ɩwɩ ɔwan suna sumbi ayɔpʋ duanyɔ amʋ fɛ́ɛ́. 6Ɩnɩ ɔma a, ɔlɛlɛ ɩwɩ ɔwan suna mʋ abuopʋ tsɔtsɔɔtsɔá bʋdʋn aha lafanu (500) ɔtsawʋlɛ. Amʋ́tɔ akʋ bawu, tamɛ ɔdʋdʋɔ bʋtra bʋtsie nkpa. 7Ɔlɛlɛ ɩwɩ ɔwan suna Yakobo ɛ. Ɔma a, ɔlɛlɛ ɩwɩ ɔwan suna sumbi ayɔpʋ amʋ fɛ́ɛ́.
8Ɩtrahɛ-trahɛ a, ɔlɛlɛ ɩwɩ ɔwan suna mɩ onuto anfɩ nesin ɔma ba anfɩ. 9Tsufɛ mɩgyi sumbi ayɔpʋ amʋtɔ ɔkʋsʋ nɩ. Tɛkɩ mmɔfʋn ánɩ́ bɛ́tɩ mɩ sumbi ɔyɔpʋ kʋraa, tsufɛ nɛdɩnka Bulu ɔpasua amʋsʋ. 10Tamɛ Bulu awɩtɔlɛ sʋ ndɛ namli alɩ. Mʋ awɩtɔlɛ amʋ ɩmɔbwɛ kpaalɩ. Tsufɛ nayɔ agyʋma dʋn amʋ́tɔ okugyiɔkʋ. Tamɛ megyi mɩ ɔwʋnlɩn nɔpʋyɔ mʋ́. Mʋ awɩtɔlɛ amʋ dɛ mɩ kpa. 11Ɩnɩ sʋ nɩ mɩlɛtra da asʋn amʋ ɔkan o, amʋ́ o, mʋ́á idehian gyi mlɩlɔhɔ anɩ asʋn amʋsʋ gyi.
Anɩ Kʋsʋ Tsu Afulitɔ
12Nɩ anɩtɛda Bulu asʋn amʋ ɔkan anɩaa, Bulu lɔkʋsʋa Kristo tsu afulitɔ a, ntogyi sʋ mlɩtɔ akʋ mʋ́ bɛɛ, awupʋ bʋmɔ́ɔkʋsʋ tsu afulitɔ? 13Nɩ awupʋ bʋmɔ́ɔkʋsʋ mʋ́ a, idesuna ánɩ́ Bulu mɔkʋsʋa Kristo ɛ. 14Nɩ Kristo mɔkʋsʋ tsu afulitɔ a, tɛkɩ anɩ asʋn wanklaan amʋ ɔkanda igyi kpaalɩ. Mlɩ mʋ́sʋ hogyi ɛ igyi kpaalɩ. 15Nɩ Bulu tamakʋsʋa awupʋ mʋ́ a, mʋmʋ afunu anɩdɛwa tɩn Bulu ɔnɔ, blɩ anɩaa alakʋsʋa Kristo tsu afulitɔ. Nɩ ɔtamakʋsʋa awupʋ a, mʋmʋ asʋn anfɩ ɩma mʋ́tɔ. 16Nɩ ɔmɔ́ɔkʋsʋa amʋ́ mʋ́ a, mʋmʋ ɔmɔkʋsʋa Kristo ɛ nɩ. 17Nɩ ɔmɔkʋsʋa Kristo a, mʋmʋ kpaalɩ mlɩlahɔ mʋ gyi. Idesuna ánɩ́ mlɩlasin lakpantɔ. 18Mʋmʋ ɩtra desuna ánɩ́ Kristo ahogyipʋá bawu ɛ bafwɩ. 19Nɩ ɔyɩ anfɩtɔ nkpa nkʋlɛsʋ anɩ ansɩdɩn Kristosʋ mʋ́ a, mʋmʋ anɩ ɩla bʋ nwɛ dʋn ɔhagyiɔha.
20Tamɛ ɔnɔkwalɩá ɩda gyi, Bulu lakʋsʋa Kristo tsu afulitɔ. Kristo labwɛ aha ánɩ́ Bulu ɔbɔ́kʋsʋatɔ ogyankpapʋ. 21Alɩ amʋʋ lowu lɛba tsʋn nyankpʋsasʋ amʋ a, alɩ kɛn kʋsʋ tsu afulitɔ ɛ ɩlɛba tsʋn nyankpʋsasʋ nɩ. 22Tsufɛ alɩ amʋʋ aha bʋtowu amʋ́a Adam ɩkʋlɛbwɛ sʋ amʋ a, alɩ kɛn amʋ́a Kristo ɩkʋlɛbwɛ sʋ amʋ́ fɛ́ɛ́ bénya nkpa nɩ. 23Tamɛ anɩtɔ okugyiɔkʋ bʋ mʋ brɛ. Kristo Bulu legyankpa kʋsʋa tsu afulitɔ. Nɩ Kristo oyinki ba a, mʋ ɛ ɔbɔ́kʋsʋa mʋ aha fɛ́ɛ́. 24Mʋ́ ɔma a, Kristo obégyi ɔŋɛtɔ tumi lalahɛ, iwiegyi pʋ́ tumiá ɩdɛ ɔyɩsʋ gyi fɛ́ɛ́sʋ asa ɔyɩ ɔbɔ́mɔ ɔnɔ. Mʋ́ ɔma a, obéyinkia iwiegyi amʋ wa anɩ Sɩ Bulu ɩbɩtɔ. 25Tsufɛ ilehian ánɩ́ Kristo obégyi iwie kpɛfʋn brɛá alagyi mʋ alupʋ fɛ́ɛ́sʋ, pʋ mʋ ayabi tsa amʋ́sʋ. 26Olupʋ trahɛá ɔbɛ́hɩ gyi lowu. 27Tsufɛ Bulu asʋn wanlɩnhɛ amʋ ɩlɛblɩ ɔbɛɛ, “Bulu lɔpʋ togyitɔ wa mʋ asɩ.” Ɩnɩ imosuna ánɩ́ Bulu bʋ Kristo asɩ. 28Nɩ Kristo ogyi togyitɔsʋ ta a, ɔbɔ́pʋ ɩwɩ wa Bulu asɩ. Mʋlɛha mʋ tumi dɩnka togyitɔsʋ, fówun Bulu ɛ obégyi togyitɔá ɩbʋ ɔtɩnɛgyiɔtɩnɛsʋ.
29Nɩ Bulu mɔ́ɔkʋsʋa awupʋ a, ntogyi sʋ aha bʋdɛ asu bɔ ha aha ánɩ́ bawu? Ntogyi sʋ bɛ́ha bɔ́bɔ amʋ́ asu ha amʋ́? 30Ntɛ ntogyi sʋ anɩ mʋ́ abɔ́pʋ anɩ nkpa plei bregyibrɛ? 31Mɩ apio, nɛkasɛ, ntefia alowusʋ ekekegyiɛkɛ! Igyi tɔá ntɔpʋtsu ɩwɩá mlɩa anɩ Wie Kristo Yesu mlɩlabwɛ ɩkʋlɛ. 32Mʋ́ sʋ kpaalɩ nɔkɔ Efesofɔá bʋgyi fɛ mbwɩkɩta-atɔ? Nɩ Bulu mɔ́ɔkʋsʋa awupʋ mʋ́ a, “Mʋmʋ mlɩha agyi, awɩ, anun, tsufɛ ɔkɛ sɛsɛbrɛ anɩlawu.” Fɛ alɩá bɔwanlɩn wa Bulu asʋn amʋtɔ.
33Mlɩmáha aha ánɩ́ bʋtɛblɩ asʋn anfɩ odu abʋmlɛ mlɩ! Tsufɛ ahandɛ bɛɛ, “Mba lalahɛ gyi teyinta ɔha.” 34Mlɩlabwɛ agywɩɩn wanklaan, amlɩsi lakpan bwɛ. Tsufɛ mlɩtɔ akʋ bʋtepi bʋmeyin Bulu. Ndɛ asʋn anfɩ wanlɩn sɩsɩ mlɩ pʋsʋpa mlɩ.
Ɔyʋlʋá Abɔ́pʋkʋsʋ Tsu Afulitɔ
35Ɔkʋ ɔbɛ́fɩtɛ ɔbɛɛ, “Nkalɩ Bulu ɔbɔ́kʋsʋa awupʋ? Ɔyʋlʋ mɔmʋ bɔ́pʋkʋsʋ?” 36Ɔha mimlahɛ! Bɩá nɩ fodu atɔ-abi a, ɩtɔplɔ asa ɩtɔkwɛ. 37Megyi itobi amʋʋ fɔpʋwa ɔsʋlʋtɔ amʋ gyi ɔban amʋʋ ɩtɛdan amʋ. 38Bulu tɛha mʋ́ ɔyʋlʋ pɔpwɛá mʋ onuto odekle. Ɔtɛha atɔ-abi kugyikʋ mʋ́ ɔyʋlʋ ɔtsan.
39Alɩ amʋʋ atɔ-abi ɔtsan-ɔtsan bʋ ɩnʋ amʋ a, alɩ togyitɔ ɔyʋlʋ igyi ɔtsan nɩ. Anyankpʋsa, mbwɩ, mbubwi pʋ́ ntsutso aye fɛ́ɛ́tɔ okugyiɔkʋ ɔyʋlʋ ɔtsan.
40Ɔsʋsʋ-atɔ bʋ ɩnʋ, ɔsʋlʋsʋ-atɔ ɛ bʋ ɩnʋ. Mʋ́ fɛ́ɛ́ ɩbʋ ɔyʋlʋ ɔtsan-ɔtsan. Ɔsʋsʋ klɛ numnyam ɔtsan, ɔsʋlʋsʋ klɛ ɛ numnyam ɔtsan. 41Owi numnyam igyi ɔtsan ha ɔtsra. Ɔtsra klɛ ɛ igyi ɔtsan ha ntsrakpabi. Ɔtsrakpabi kugyikʋ na ɔtsan, mʋ́ numnyam ɛ ɩna ɔtsan ha mʋ́ ba.
42Alɩ ɩbɔ́bwɛ brɛá Bulu ɔbɔ́kʋsʋa awupʋ nɩ. Anɩ ɔsʋlʋsʋ-ɔyʋlʋ anfɩ itowu, plɔ anfɩ ɩbɔ́tsʋn ɔtsan ha mʋ́á Bulu ɔbɔ́kʋsʋa tsu afulitɔ, tsufɛ mʋ́ mʋ́ imóowu ɛkɛkɛɛkɛ. 43Anɩ ɔyʋlʋ anfɩ tɔpɔn brɛá bopula mʋ́, tamɛ nɩ Bulu ɔkʋsʋa mʋ́ a, itenya ɔwʋnlɩn, wa numnyam. 44Ɔsʋlʋsʋ-ɔyʋlʋ igyi sei, tamɛ nɩ Bulu ɔkʋsʋa mʋ́ a, ɩbɔ́bwɛ ɔŋɛtɔ ɔyʋlʋ. Tsufɛ alɩ amʋʋ ɔsʋlʋsʋ-ɔyʋlʋ bʋ ɩnʋ amʋ a, alɩ ɔŋɛtɔ klɛ ɛ bʋ ɩnʋ nɩ. 45Bulu asʋn wanlɩnhɛ amʋ lɛbla anɩ ɔbɛɛ, “Adam gyankpapʋ amʋ lɔbwɛ ɔkɩankpapʋ.” Tamɛ Adam trahɛ, ogyi Kristo amʋ mʋ́ gyi Ɔŋɛá ɔtɛha nkpa. 46Ɔsʋlʋsʋ-ɔyʋlʋ anɩtegyankpa nya asa anɩtebenya ɔŋɛtɔ klɛ. 47Ɔsʋlʋtɔ-ɩsɩ Bulu lɔpʋpwɛ nyankpʋsa gyankpapʋ, ogyi Adam amʋ. Kristo, amʋʋ obuo amʋ mʋ́ otsu ɔsʋsʋ. 48Nyankpʋsa okugyiɔkʋ bʋ ɔsʋlʋsʋ-ɔyʋlʋ fɛ Adam, tamɛ anɩ ɔsʋsʋ-ɔyʋlʋ mʋ́ ɩbɔ́bwɛ fɛ Kristo klɛ. 49Alɩ amʋʋ anɩgyi fɛ ɔsʋlʋsʋ Adam amʋ a, alɩ kɛn abɔ́bwɛ fɛ Kristo amʋʋ otsu ɔsʋsʋ amʋ ɛ ɛkɛkʋ nɩ.
50Apio, tɔá ndɛblɩ gyi, anɩ ɔyʋlʋ anfɩ igyi ɔyʋlʋ mʋ́a obugya anfɩ iméenya ogyikpa Bulu iwiegyi amʋtɔ. Tɔá iteyinta ɩmɛ́ɛtalɩ nya ogyikpa tɔá ɩtamayintatɔ.
51Tamɛ mlɩyaa asʋ amlɩnu asʋn ŋainhɛ kʋá Bulu lalɛ suna mɩ. Ɔbɛɛ, megyi anɩ fɛ́ɛ́ obówu, tamɛ anɩ fɛ́ɛ́ ɔyʋlʋ ɩbɛ́tsɛ. 52Nɩ ɔkpɛ trahɛ ɩfʋlɩ pɛ a, anɩ fɛ́ɛ́ abɛ́tsɛ ɔtsawʋlɛ pɛ. Bulu ɔbɔ́kʋsʋa awupʋ amʋ. Amʋ́ ɔyʋlʋ ɩmɛ́ɛtra yinta, ɔbɛ́tsɛ anɩ nkpa atsiapʋ ɛ fɛ́ɛ́. 53Tsufɛ ilehian ánɩ́ Bulu ɔbɛ́tsɛ anɩ ɔyʋlʋ anfɩ itowu plɔ anfɩ, ha anɩ ɔyʋlʋá ɩtamawu, ɩtamaplɔ. 54Nɩ ɩba mʋ́tɔá Bulu latsɛ tɔá itowu, bwɛ mʋ́ tɔá ɩtamawu, tɔá ɩtɔplɔ ɛ labwɛ tɔá ɩtamaplɔ a, ɩnʋ Bulu asʋn wanlɩnhɛ anfɩ ɩbɛ́ba mʋ́tɔ nɩ. Ɔbɛɛ, “Batu lowu asɩ plɩplɩplɩplɩ. Ɩsʋgyi onuto laba.”
55Bulu asʋn wanlɩnhɛ kʋ ɛ lɛblɩ ɔbɛɛ, “Oo lowu, nkʋnʋ fʋ ɔkpɛ bʋ?
Nkʋnʋ fʋ ɩsʋgyi bʋ?”
56Lakpan igyi ɔkpɛá ɩtɔmɔ, Mose mbla amʋ ɛ ɩtɛha lakpan tumi. 57Nkalɩ kʋraa abɔ́kʋkʋ da Bulu ɩpan? Mʋlaha anɩlatsʋn anɩ Wie Yesu Kristosʋ gyi asʋ.
58Mʋ́ sʋ apio adwɛpʋ, mlɩlɩɩ kinkiinkin, mlɩmákpɩnkɩ. Mlɩsi mlɩ ɩwɩ fɛ́ɛ́ ha Bulu agyʋma bregyibrɛ, tsufɛ mlɩyin ánɩ́ mlɩ gyumagyihɛ mɔ́ɔbwɛ kpaalɩ.
Currently Selected:
1 Korintofɔ 15: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
