1 Korintofɔ 16
16
Ɩtswɩtswɩ Ha Yerusalem Ahianfɔ
1Ɩtswɩtswɩ ha Bulu aha ánɩ́ bʋbʋ Yerusalem asʋn amʋ ɛ a, mlɩbwɛ mʋ́ fɛ alɩ amʋʋ nɛbla ɔpasua amʋʋ ɩbʋbʋ Galatia ɔmátɔ mbɛɛ, bʋbwɛ mʋ́ amʋ. 2Ɔhagyiɔha ɔkɩ mʋ kɔba alɩá otenya ɔnɔ, ɔlɛ kʋ yaɩ Kwasiedagyikwasieda. Mlɩmágyo mlɩaa, mba asa amlɩtswɩtswɩ mʋ́. 3Nɩ nɛba a, nɔ́wanlɩn nwʋlʋ ha aha ánɩ́ mlɩ onuto mlɛ́lɛ mlɩaa, bʋpʋ atɔ amʋ ya Yerusalemfɔ, pʋlɛ amʋ́ suna amʋ́. 4Nɩ ɩbʋ alɛá nɔ́yɔ a, mʋmʋ bóbuo mɩ yɔ.
Paulo Ɔkpatu Nhɩhɩɛ
5Nɩ nɔkʋsʋ tsu Makedonia a, nɛ́ba mlɩ wa, tsufɛ ndekleá nɔ́tsʋn ɩnʋ asa nɛba. 6Fialɩ nétsia mlɩ wa kpalobi. Fialɩ kʋraa nétsia ɩnʋ nyankpʋ mʋ́a atsalɩ brɛ amʋ fɛ́ɛ́, fówun mlɩlasi mɩ ɔkpa nayɔ ɔtɩnɛgyiɔtɩnɛá nɔ́yɔ. 7Sei mʋ́ a, mmedekleá nɛ́ba bɛka tsʋn mlɩ wa kɛkɛ. Nɩ Bulu lotsula a, nétsia mlɩ wa kpalobi.
8Tamɛ nétsia Efeso nfɩ kpɛfʋn Pentekoste ɛkɛ amʋ. 9Tsufɛ ɔkpa kpɔnkpɔntɩ lafinki ha mɩá nɔ́yɔ agyʋma ánɩ́ ɩbɔ́wa labi. Ɩbʋ mʋ́tɔá mɩ alupʋ tsɔtsɔɔtsɔ bʋbʋ nfɩ mʋ́.
10Nɩ Timoteo owie mlɩ wa a, mlɩmáha ifu ɩkɩta mʋ. Tsufɛ anɩ Wie agyʋma amʋ kɛn ɔdɛyɔ fɛ mɩ. 11Mlɩmáha ɔhaa ɔkɩ mʋ ansɩtɔ kotikoti. Mlɩsi mʋ ɔkpa wanklaan oyinki bɔtʋ mɩ, tsufɛ ntsie ngyo mʋa anɩ apio atrahɛ amʋ.
12Anɩ pio Apolo asʋn amʋ a, nalɩɩ mʋsʋ mbɛɛ, obuo apio amʋ ba mlɩ wa, tamɛ omedekleá ɔbɛ́ba sei. Nɩ onya ɔkpa a, ɔbɛ́ba.
Asʋn Trahɛ
13Mlɩda ɩwɩsʋ, amlɩlɩɩ kinkiinkin mlɩ hogyitɔ. Mlɩwa klʋn, amlɩwa ɩwɩ ɔwʋnlɩn. 14Mlɩpʋ ɔdwɛ bwɛ mlɩ togyitɔ.
15Mɩ apio, mlɩyin ánɩ́ Stefana mʋa mʋ woyitɔ aha gyi agyankpapʋá bɛdamli klʋntɔ Akaia nsaɩntɔ. Basi ɩwɩ ha, bʋdɛ Bulu aha amʋ sum. 16Nokokoli mlɩ, mlɩba ɩwɩasɩ ha amʋ́a aha ánɩ́ bɛ́ba bɛtsɩa amʋ́tɔ, bɔ́pʋ nsi yɔ agyʋma amʋ.
17Ansɩ lagyi mɩ ánɩ́ Stefana mʋa Fortunato pʋ́ Akaiko baba mɩ wa. Tsufɛ bʋdɛ mlɩ ɔbwɛkpa bwɛ. 18Bawa mɩ atɛtɔ-ɔnlɩn wanklaan, fɛ alɩ amʋʋ bɔwa mlɩ amʋ. Mlɩbu aha anfɩ odu.
19Ɔpasua amʋʋ ɩbʋ Asia amʋ fɛ́ɛ́ bʋdɛ mlɩ tsia ha. Akwila mʋa Priska pʋ́ ɔpasua amʋʋ ɩbʋ amʋ́ woyitɔ amʋ ɛ bɛha mlɩ tsia wanklaan anɩ Wie ɩdatɔ. 20Apio aba amʋ fɛ́ɛ́ bɛha mlɩ itsia gyagyagya.
Mlɩlata aba puta Kristotɔ.
21Mɩ Paulo onuto lapʋ mɩ ɩbɩ wanlɩn ɩnɩ, ndɛpʋha mlɩ tsia.
22Nɩ ɔkʋ tamadwɛ anɩ Wie Yesu a, ɩlwɩɩ dɩn mʋsʋ!
Marana-ta! (Mʋ́ asɩ gyi, “Anɩ Wie, ba!”)
23Anɩ Wie Yesu Kristo ogyi mlɩ bʋalɛ.
24Anɩa anɩ Wie Kristo Yesu ɩkʋlɛbwɛ sʋ ntɛhɩɛ dwɛ mlɩ fɛ́ɛ́. Amen!
Currently Selected:
1 Korintofɔ 16: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
