1 Korintofɔ 12
12
Ɔŋɛ Wankɩhɛ Atokiehɛ
1Sei a, apio, ndekleá nɛ́lɛ Ɔŋɛ Wankɩhɛ atokiehɛ asʋn amʋ asɩ wanklaan suna mlɩ.
2Mlɩyin ánɩ́ brɛá mlɩgyi ɔmátɔfɔ a, bosuna mlɩ asunakpan, ɩlɛha mlɩlɔyɔ mlɩdɛ ɩkpɩá bʋtamatɔɩ sum. 3Mʋ́ sʋ ndekleá mlɩbɩ mʋ́á itsu Bulu wa. Ɔhagyiɔha ánɩ́ ɔdɛpʋ Ɔŋɛ Wankɩhɛ tɔɩ mɛ́ɛtalɩ lwɩɩ anɩ Wie Yesu. Ɔha ánɩ́ Ɔŋɛ Wankɩhɛ dɛ mʋ kpa nkʋlɛ ɔbɛ́talɩ blɩ ɔbɛɛ, “Yesu gyi mɩ Wie.”
4Bulu atokiehɛ ɔtsan-ɔtsan bʋ ɩnʋ, tamɛ Ɔŋɛ Wankɩhɛ amʋ kɛn teye mʋ́ fɛ́ɛ́. 5Bulusum agyʋma igyi ɔtsan-ɔtsan, tamɛ anɩ Wie amʋ kɛn anɩ fɛ́ɛ́ anɩdesum. 6Ɔkpa ɔtsan-ɔtsansʋ Bulu tɔyɔ agyʋma tsʋn anɩsʋ, tamɛ Bulu amʋ kɛn dɛ mʋ́ fɛ́ɛ́ bwɛ tsʋn anɩ fɛ́ɛ́sʋ. 7Bulu tɛlɛ mʋ Ɔŋɛ amʋ ɔwan tsʋn ɔkpa ɔkʋsʋ anɩtɔ okugyiɔkʋtɔ, mɛnɩ abɔ́pʋkpa aba. 8Ɔŋɛ Wankɩhɛ tɛha ɔkʋ tɔpʋ nyansa tɔɩ kpla aha, ɔtɛha ɔkʋ ɛ tɛbɩ asʋn. 9Ɔtɛha ɔkʋ tɛhɩɛ hɔ Bulu gyi, ɔtɛha ɔkʋ ɛ tɛtsa aha ɩlɔ. 10Ɔŋɛ Wankɩhɛ amʋ kɛn tɛha ɔkʋ tumi ɔtɔpʋbwɛ ofula, ɔtɛha ɔkʋ ɛ tɛblɩ asʋn ánɩ́ Bulu lɔpʋwa mʋ ɔnɔ. Ɔtɛha ɔkʋ tɛtalɩ bɩ ɔŋɛá itsu Bulu wa pʋ́ mʋ́á itsu ɔŋɛ lalahɛ wa. Ɔtɛha ɔkʋ tɛblɩ ɔblɩ bamba, ɔkʋ ɛ tonu mʋ́ asɩ. 11Ɔŋɛ Wankɩhɛ amʋ nkʋlɛ tɔbwɛ ɩnɩ fɛ́ɛ́, oteye atokiehɛ anfɩ ha ɔhagyiɔha alɩá odekle.
Ɔpasua Amʋ Igyi Nyankpʋsa-oyi Ɔkʋlɛ
12Nyankpʋsa-oyi ɩwɩ atɔ ɩtsɔ, tamɛ mʋ́ fɛ́ɛ́ lɔbwɛ nyankpʋsa amʋ. Alɩ kɛn igyi Kristo ɛ nɩ. Mʋ ɔpasua amʋ gyi mʋ nyankpʋsa-oyi amʋ nɩ. 13Anɩtɔ akʋ anɩgyi Yudafɔ, akʋ Grikifɔ, akʋ nkpábi ntɛ adɩhɩɛ, tamɛ bɔpʋ Ɔŋɛ Wankɩhɛ amʋ bɔ anɩ fɛ́ɛ́ asu wa Kristo ɔyʋlʋ kʋlɛ amʋtɔ, Bulu lɔpʋ Ɔŋɛ amʋ kɛn nuna anɩ fɛ́ɛ́.
14Tamɛ megyi toku kʋlɛ lɔbwɛ nyankpʋsa-oyi amʋ, mboun ɩwɩ atɔ ɔtsan-ɔtsan. 15Nɩ yabi ɔblɩ ɔbɛɛ, “Mma nyankpʋsa-oyi amʋ ɩwɩ, tsufɛ megyi ɩbɩ ngyi” a, ilosuna ánɩ́ megyi nyankpʋsa-oyi amʋ ɩwɩ atɔ ogyi? 16Nɩ ɩsʋ ɛ ɔblɩ ɔbɛɛ, “Mma nyankpʋsa-oyi amʋ ɩwɩ, tsufɛ megyi nsibi ngyi” a, ilosuna ánɩ́ megyi nyankpʋsa-oyi amʋ ɩwɩ atɔ ogyi? 17Nɩ nsibi nkʋlɛ gyi nyankpʋsa-oyi amʋ fɛ́ɛ́ a, nkalɩ ɔbɔ́bwɛ obónu asʋn? Ntɛ nɩ ɩsʋ nkʋlɛ gyi nyankpʋsa-oyi amʋ fɛ́ɛ́ a, nkalɩ ɔbɔ́hɔ atɔ afu? 18Tamɛ Bulu lɔpʋ ɩwɩ atɔ tsɔtsɔɔtsɔ bwɛ nyankpʋsa-oyi amʋ, ɔlɔpʋ kugyikʋ yi ɔtɩnɛá odekle. 19Nɩ ɩwɩ ntobi amʋ igyi toku kʋlɛ a, nkalɩ nyankpʋsa-oyi amʋ ɩbɔ́bwɛ? 20Ɩwɩ ntobi amʋ ɩtsɔ mʋ́, tamɛ mʋ́ fɛ́ɛ́ lɔbwɛ nyankpʋsa-oyi amʋ nɩ.
21Mʋ́ sʋ nsibi mɛ́ɛtalɩ bla ɩbɩ ɔbɛɛ, “Fʋma labi ha mɩ!” ɛkɛkɛɛkɛ. Nwun ɛ mɛ́ɛtalɩ bla yabi ɔbɛɛ, “Fʋma labi ha mɩ!” 22Nɩ akɩ a, ɩwɩ atɔ amʋʋ anɩdɛkɩ anɩaa ɩlɔpɔn amʋ ɩwɩ tehian nɩ. 23Mʋ́ amʋʋ anɩdɛkɩá obú ɩma mʋ́sʋ amʋ anɩtobu dʋn nɩ. Ɔtɩnɛ amʋʋ anɩtamakleá aha bʋwun amʋ ɛ anɩtɔpʋ atɔ tin nɩ. 24Tamɛ anɩtamapʋ atɔ tin anɩ ɩwɩ ntobi amʋʋ ɩbʋ akɩlɛ amʋ. Bulu lɔbwɛ anɩ ɩwɩ atɔ amʋ alɩ, mɛnɩ abóbu mʋ́ amʋʋ ɩma numnyam amʋ, kɩ mʋ́sʋ wanklaan. 25Fówun ɩkʋlɛbwɛ bétsia amʋ́tɔ, mɛnɩ gyɔpɩ okpita bɩna a, bɩna ɛ lakpita gyɔpɩ. 26Nɩ nyankpʋsa-oyi amʋ ɩwɩ tɔkʋ dɛ ɔsɩn wun a, nyankpʋsa-oyi amʋ fɛ́ɛ́ towun mʋ́. Nɩ bɛkanfʋ mʋ́tɔ kʋ ɛ a, ansɩ tegyi nyankpʋsa amʋ.
27Yoo, ayɔ nkpa. Kristo ɔyʋlʋ kʋlɛ amʋ mlɩ fɛ́ɛ́ mlɩgyi. Mlɩgyi mʋ ɔpasua amʋ nɩ. Mlɩtɔ okugyiɔkʋ gyi mʋ nyankpʋsa-oyi amʋ ɩwɩ tɔkʋ. 28Bulu lɛhɩhɩɛ ɩnɩ fɛ́ɛ́ wa mʋ ɔpasua amʋtɔ. Gyankpapʋ, sumbi ayɔpʋ. Nyɔsɩ, Bulu ɔnɔsʋ atɔɩpʋ, sasɩ, atɔ asunapʋ. Mʋ́ ɔma a, ofula abwɛpʋ. Amʋ́á bʋbʋ ɩlɔtsa tumi, bʋalɛ agyipʋ, ahandɛ pʋ́ ɔblɩ bamba ablɩpʋ. 29Amʋ́ fɛ́ɛ́ gyi sumbi ayɔpʋ? Ɛkɛkɛɛkɛ! Amʋ́ fɛ́ɛ́ gyi Bulu ɔnɔsʋ atɔɩpʋ, ntɛ atɔ asunapʋ, ntɛ ofula abwɛpʋ? Ɩmɛ́ɛba mʋ́tɔ alɩ! 30Amʋ́ fɛ́ɛ́ bʋ ɩlɔtsa atokiehɛ? Amʋ́ fɛ́ɛ́ tɛblɩ ɔblɩ bamba, ntɛ amʋ́ fɛ́ɛ́ tɛtalɩ nu ɔblɩ bamba amʋ asɩ? 31Mlɩbɔ mbɔdɩ amlɩdunka atokiehɛ amʋtɔ mʋ́á idehian dʋn.
Nɛlasuna mlɩ ɔkpa ánɩ́ ɩdʋn ɩnɩ tsɩa mʋ́tɔ.
Currently Selected:
1 Korintofɔ 12: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
