1 Korintofɔ 11
11
1Mlɩkasɩ mɩ tsiatɔ, fɛ alɩá mɩ ɛ nɛkasɩ Kristo klɛ.
Alɩá Atsɩ Bɔ́pʋtsia Ɔpasuatɔ
2Mɩ apio, ntɛkanfʋ mlɩ, tsufɛ mlɩ ansɩ dɩn mɩsʋ. Mlɩdɛbwɛ dɩnka Kristo atosunahɛ amʋʋ nɔpʋha mlɩ amʋ sʋ. 3Tamɛ ndekleá mlɩnu mʋ́ asɩ ánɩ́ oyingyioyin bʋ Kristo asɩ, ɔtsɩgyiɔtsɩ bʋ oyin asɩ, fɛ alɩá Kristo ɛ bʋ Bulu asɩ. 4Ɩnɩ sʋ oyingyioyin ánɩ́ obun atɔ nwun asa ɔdɛ mpaɩ bɔ ntɛ ɔdɛ asʋn ánɩ́ Bulu lapʋwa mʋ ɔnɔ blɩ mɛdɛ Kristo bu. 5Tamɛ ɔtsɩgyiɔtsɩá ɔmɛklɩ nwun asa ɔdɛ mpaɩ bɔ ntɛ ɔdɛ asʋn ánɩ́ Bulu lapʋwa mʋ ɔnɔ blɩ ɛ mɛdɛ mʋ klu bu. Igyi fɛ alakpa nwun. 6Nɩ ɔmɔ́ɔpʋ atɔ klɩ nwun a, mʋmʋ ɔkpa mʋ́. Tamɛ nɩ ɔtsɩ ɔkpa nwun, ɩbʋ mʋ pɛlɩ a, ɔpʋ atɔ klɩ mʋ́sʋ. 7Bulu lɔbwɛ oyin fɛ mʋ ɩwɩ, pʋwa mʋ ɩwɩ numnyam. Mʋ́ sʋ mehian ánɩ́ ɔbɔ́pʋ atɔ bun nwun asa obósum Bulu. Tamɛ ɔtsɩ mʋ́ a, Bulu lɔbwɛ mʋ pʋwa oyin numnyam. 8Tsufɛ oyin mɛdalɩ tsu ɔtsɩtɔ, ɔtsɩ mboun lɛdalɩ tsu oyintɔ. 9Megyi ɔtsɩ sʋ Bulu lɔpwɛ oyin, mboun oyin sʋ ɔlɔpwɛ ɔtsɩ. 10Ɩnɩ sʋ ilehian ánɩ́ ɔtsɩ ɔbɛ́klɩ nwun, pʋsuna ánɩ́ ɔbʋ tumi asɩ, tsufɛ Bulu-abɔpʋ bʋdɛ mʋ kɩ. 11Ɩnɩá anɩa Kristonyɔ anɩlabwɛ kʋlɛ sʋ a, ɔtsɩ lehian oyin, oyin ɛ lehian ɔtsɩ. 12Tsufɛ alɩ amʋʋ ɔtsɩ gyankpapʋ lɛdalɩ tsu oyintɔ amʋ a, alɩ kɛn ɔtsɩ ɛ lɔkwɩɩ oyin nɩ. Tamɛ Bulu lɔbwɛ togyitɔ.
13Mlɩ onuto mlɩyɔ asʋn anfɩtɔ amlɩkɩ. Ɩbʋ alɛá ɔtsɩ mɛ́ɛklɩ nwun asa ɔbɔ́bɔ mpaɩ ha Bulu? 14Fɛ alɩá Bulu lɛlɛ ɔyɩtɔ a, ɩma alɛá oyin obési mʋ imi ɩbɔ́wa ɩswɩ fɛ ɔtsɩ klɛ. 15Imi tɩntɩn igyi numnyam ha ɔtsɩ, tsufɛ Bulu lɔpʋ mʋ́ ha mʋ fɛ nwun-abuntɔ. 16Tamɛ nɩ ɔkʋ dɛ mʋ́ ɩwɩ nwɛn gyi a, asʋn ánɩ́ mbʋ blɩ gyi, mmotsula dɩnka kʋkʋsʋ dʋn ɩnɩ. Alɩ kɛn Bulu ɔpasua atrahɛ fɛ́ɛ́ bʋmotsula dɩnka mʋ́sʋ nɩ.
Ɔpʋnʋasɩyɔ
(Mateo 26:26-29; Marko 14:22-25; Luka 22:14-20)
17Mmɛ́ɛkanfʋ mlɩ asʋn anfɩ nɛba bɛbla mlɩ anfɩ mʋ́tɔ. Tsufɛ yile kʋkʋ tamadalɩ tsu mlɩ ifiatɔ. Lalahɛ koun ɩtɛtɩ ha mlɩ. 18Gyankpapʋ a, babla mɩ bɛɛ mlɩtamabwɛ kʋlɛ nɩ ɔpasua amʋ befia. Nahogyiá asʋn anfɩ kʋ bʋ mʋ́tɔ. 19Lɛlɛ mʋ́ a, ilehian ánɩ́ nwɛngyi bétsia mlɩtɔ, mɛnɩ mlówun ɔnɔkwalɩá ɩbʋ mʋ́tɔ. 20Tamɛ bɛblɩ bɛɛ, nɩ mlefia a, megyi ɔpʋnʋasɩyɔ sʋ mlɩtefia. 21Tsufɛ mlɩtamagyo aba. Akʋ bʋtegyi amʋ́ atɔ, bʋtamaha aba. Mʋ́ sʋ akʋ bʋtonun bʋ, akʋ ɛ bʋtsie akʋn. 22Mlɩ onuto mlɩmá woyiá mlɩtegyi atɔ, nun nta mʋ́tɔ? Ntɛ mlɩdekleá mlɔ́sʋpa Bulu ɔpasua amʋ, amlɩwa ahianfɔ amʋ pɛlɩtɔ? Amansʋ mblɩ tsu ɩnɩ ɩwɩ? Nkanfʋ mlɩ? Ɩnɩtɔ mʋ́ a, ɛkɛkɛɛkɛ, mmɛ́ɛkanfʋ mlɩ!
23Tsufɛ tɔá nosuan tsu anɩ Wie wa kɛn ndɛ mlɩ bla a. Anɩ Wie Yesu lɛlɛ bodobodo ipin onye amʋʋ bɛlɛ mʋ ha amʋ, 24ɔlɛda Bulu ɩpan, biabia mʋ́tɔ, blɩ ɔbɛɛ, “Mɩ ɔyʋlʋá ndɛpʋha mlɩ nɩ. Mlɩtsia bwɛ ɩnɩ pʋkaɩn mɩsʋ.” 25Alɩ kɛn atogyihɛ amʋ ɔma a, olotsu nta-ɛwɛ amʋ blɩ ɔbɛɛ, “Nta-ɛwɛ anfɩ gyi mɩ obugya ánɩ́ Bulu dɛpʋsi ntam pɔpwɛ amʋʋ ɩbʋ mlɩa mʋnyɔ nsɩnɛ amʋsʋ nɩ. Bregyibrɛá mlónun mʋ́ a, mlɩnun mʋ́ pʋkaɩn mɩsʋ.”
26Tsufɛ bregyibrɛá mlɩdɛ bodobodo anfɩ gyi, nun nta tsu ɛwɛ anfɩtɔ a, mlɩdɛ anɩ Wie lowu amʋ ɔkan da kpɛfʋn brɛá obéyinki ba. 27Mʋ́ sʋ ɔha ánɩ́ obégyi alɩ bodobodo anfɩ, nun nta tsu anɩ Wie ɛwɛ anfɩtɔ mábu ɔkpasʋ a, alagyi anɩ Wie ɔyʋlʋ pʋ́ mʋ obugya amʋ ɩwɩ pɔn. 28Ɩnɩ sʋ ilehian ánɩ́ mlɔ́yɔ mlɩ nwuntɔ wanklaan, asa mlégyi bodobodo anfɩ, nun nta ɛwɛ anfɩtɔ. 29Tsufɛ nɩ mlɩmobu anɩ Wie Kristo ɔyʋlʋ, mlɩlegyi bodobodo amʋ, nun nta amʋ ɛ dɩnka ifinsʋ a, Bulu ɔbɛ́ha mlɩ ɩpɔn mʋ́ sʋ. 30Mʋ́ sʋ mlɩtɔ aha tsɔtsɔɔtsɔ bapɔn, akʋ bʋdɛlɔ, akʋ mʋ́ kʋraa bawu nɩ. 31Nɩ anɩtɔyɔ anɩ nwuntɔ wanklaan asa a, tɛkɩ Bulu mɛ́ɛha anɩ pɔn. 32Tamɛ nɩ anɩ Wie ɔlɛ anɩ ɩla, bɩtɩ anɩ ɩsʋ a, ɔmɛ́ɛha anɩa ɔyɩtɔ aha fɛ́ɛ́ ɩpɔn kʋlɛ.
33Ɩnɩ sʋ mɩ apio, nɩ mleyefia ɔpʋnʋ amʋ asɩ a, mlɩtsia gyo aba. 34Nɩ akʋn dɛ ɔkʋ a, ogyi atɔ tsu woyitɔ asa ɔba, mɛnɩ mlɩ ifia amʋ ɩmɛ́ɛtɩ ɩsʋbɩtɩ ha mlɩ. Mɩ onuto nɛ́ba bɛbla mlɩ tɔá mlɩbwɛ tsu asʋn trahɛ amʋ ɩwɩ.
Currently Selected:
1 Korintofɔ 11: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
