Roma 3
3
1Mba kuyuka chika ha kubwa Kayuda? Hanji ulemu uka ha kubwa ngalami? 2Chili kuyuka chahiana ha yuma yeswe. Chikuma chitangu, Zambi hanakunjika maliji jenyi kuli Ayuda. 3Kuchi kwamba kevwe, nyi amwe hakachi ko kaabwile ko akwa kushishika, Zambi neye kechi kubwa mukwa kushishika, nyi? 4Ka lume! Chatamba Zambi kubwa wamwenemwene, chibwe mutu mweswe akabwe mukwa mahuza. Ngwe hichinasonewa mu Mukanda wa Zambi ngwo:
“Makakusambisa nikulita ni maliji je.
Muukasamba muze makakubatwila.”
5Alioze, nyi yibi yize twakulinga yinasolola ululi wa Zambi, kuchi mutwamba, Zambi kali chihenge muze akutumwesa lamba, nyi? (Maliji wano ngunahanjika ngwe mutu.) 6Ka lume! Nyi Zambi hi mukwa ululi ko, ngwe kuchi mahasa kubatwila akwa hashi?
7Alioze, nyi mahuza jami kaakusolola pundu umwenemwene wa Zambi ni kufumanyisa uhenya wenyi, kuchi mba ananguhisa ngwe nguli Chivulumunyi? 8Kuchi kevwe kutwahashile kwamba ngwetu: “Tulingenu yibi hanga yibema yikeze”? Chamwenemwene amwe atu kaakwamba ngwo, yami Paulu ngunahanjika yuma ngwe yize. Kaakuchamba ha kungulelesa. Atu wano kumaakahisa ngwe chinalite.
Mukwa ululi niumwe
9Mba kuchi? Yetu Ayuda tunahiana atu akwo, nyi? Ka lume! Hingunambe kulu ngwami, shili jakuyula atu eswe, Ayuda ni waze hi Ayuda ko. 10Ngwe hichinasonewa mu Mukanda wa Zambi ngwo:
“Mukwa ululi niumwe, chibwe umuwika ka.
11Wakuhi niumwe wanyingika Zambi,
wakuhi niumwe Wakufupa Zambi.
12Eswe haanahambuluka mu jila ya Zambi,
eswe haanabu amokomoko.
Wakuhi niumwe wakulinga yibema, chibwe umuwika ka.
13Miliwu yo yili ngwe fuka liawashi,
malimi jo haanazala ni kwonga,
maliji a ku mivumbo yo kaali ngwe ulembe wa chihili.
14Makanwa jo kaanazala ni mashingo asasu.
15Kaakuzomboka nikawashi ha kushiha atu.
16Kaakuhichika kwonona ni lamba kweswe akuya.
17Kaanyingikine jila ya uhwimino.
18Keeshi kuvwila Zambi woma.”
19Tunanyingika ngwetu, yize yeswe Shimbi jinambe, yinahanjikila waze ali mu chiyulo cha Shimbi, hanga usambiso kuuchikatuhuka ku makanwa ja atu, hanga akwa hashi eswe akahie ku meso ja Zambi. 20Mumu Zambi keshi kupwisa mutu niumwe mukwa ululi ha kumanununa Shimbi. Shimbi jakunyingikisa lume ngwo, mutu hanavulumuna.
Chize Zambi akupwisa atu akwa ululi
21Alioze haliabwila Zambi hasolola chize akupwisa atu akwa ululi—ni chize hi cha ku Shimbi ko. Shimbi ni akwa munanyi a Zambi haanashindakenya kulu ha chikuma chino. 22Zambi kakupwisa atu akwa ululi muze akufuliela Yesu Kristu. Chino kakuchilinga kuli eswe waze akufuliela Yesu, mumu kulituchika chakuhi mukachi ka atu: 23eswe haanavulumuna, eswe kaanahono uhenya wa Zambi. 24Alioze Zambi, ku utu wenyi, kakupwisa eswe akwa ululi. Kakuchilinga chawana ku tachi ja Yesu Kristu, yoze wakwatusula ku ubinji wa shili. 25Zambi hanakunjika Yesu Kristu hanga, ku manyinga jenyi, mahasa kukonekena atu milonga yo, muze maafuliela Yesu Kristu. Zambi hanakunjika Kristu ha kulweza chize akupwisa atu akwa ululi. Hatangu, Zambi yalihumikiza no, kamwesene ko lamba ha milonga yo. 26Alioze, haliabwila Zambi kakukaula milonga ha kulweza chize akupwisa atu akwa ululi. Chenacho kanashindakenya ngwenyi, iye mwene kali mukwa ululi, ni nawa, kakupwisa mukwa ululi yoze wakufuliela Yesu Kristu.
27Kuchi? Atu maahasa kulisamba, nyi? Ka, keeshi kuhasa. Kuchi kaahashile kulisamba? Mumu ululi hi chikuma cha yitanga ko, alioze chikuma cha ufulielo. 28Mumu tunashindakenya ngwetu, Zambi kakupwisa atu akwa ululi ha ufulielo wo, hi ha kwononokena Shimbi ko. 29Zambi kali Zambi ya Ayuda wika, nyi? Hi Zambi ya mavungu akwo nawa ko, nyi? Chamwenemwene kali Zambi ya mavungu akwo nawa, 30mumu Zambi kali umuwika. Mapwisa Ayuda akwa ululi ku ufulielo wo. Chimuwika nawa, mapwisa mavungu akwo akwa ululi ku ufulielo wo. 31Chino chinalumbunuka ngwo, ku ufulielo twakulelesa Shimbi, nyi? Ka lume! Shinoho twakujilemesa.
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.