Romapụ Ḍiepakụmaye
Ḍiepakụmaye
Pọl ḅe gịẹịn se Romapụ ma sẹịnma fịrịfịrịmaḍiri mị gose gịẹịnye anị se ateli telima Pọl ḅe pịrị se Pọl ḅe ọ̀ tọnsa ḅara mị se mun Rom ḅie sime chọchị mị laḅịa ẹrẹchị-ẹ, se anịsịkị, inia ḅarachụa ḅụ mun Spen mị laḅịa ọkụ. Ori anị gịẹịnmẹ se Kraịst ḍukonwẹngịapụ ḅereni mị ọ̀ nwọ kaịnḅo ḅara mị pufinjiḅịa ẹrẹchị pịkị Kraịst ḍukonwẹngịapụma ḍumo ḅụ anị na. Ḍiri mị Pọl ḅe oria oku ḅụ kọn karama ọkwẹịn mị anịa ḅie omi-ẹ.
Rom mị ḅie sime chọchị mị ḅe apụma nwọ kereni so se ọ̀ tẹkẹ ini pịrịpịrị ọkụ mị ọ̀ nwọ ḍuko ini pịrị so sịkị Pọl ḅe ḍiri mị ḅe ọkwẹịntịḅị mị ḍukomẹ: “Iḅiọkwẹịn mị Tamụnọ Ḅe ḅara-wẹrịma tomoni mịẹse ini ori na kura ọkụ mị nwọ mịẹḅelemamẹ: anị ḅereni ḅụ-ẹ, sakị ḅụ ọkịmun kuluma la.” (1.17)
Pọl ḅe anịsịkị mịn ọkwẹịntịḅị mị ḍukofinjimẹ. Bebe tomoni mamgba, Juapụma na pịkị Jịnsẹapụma na, anị ḅụpalịmaye sọ ini pịrịmẹ; Tamụnọ Ḅe na kura ḍumo kọn mị, anịatịḅị inimgba gbọrị ḅara ḅụ si mị ḅẹrẹtọn ini pịrịaḅẹ. Tomonima ḅo Tamụnọ Ḅe na kura ḍumo ḅụ sọmẹ anị Jizọs Kraịst Ḅe ḅụ ḅereni nyana ḅụ-ẹ. Anịḅe jịnye, Pọl ḅe Kraịst Ḅe na gbọrịḅụsime mị ḅe ịwọ ḍumo mị simeọkụ nwọ ḍukomẹ, anị ịwọma Tamụnọ Ḅe na gbọrịye mịẹ ḅụ. Ḅereniḅọ ḅe na Tamụnọ Ḅe na ogboku deinma omi-ẹ, Tamụnọ Tẹmẹ Ḅe pịkị ọ̀ pọkọpakụmaḅosam, si mị na fị mị na ḅarị ḅẹrẹtọn ọ̀ pịrịka ḅara ḅụ. Sọnọ ḅụ ọkịmun nine karama ḅẹrẹtịḅị mị la, Pọl ḅe pịkị Tamụnọ Oloko mị gose chụa ye mị na pịkị Tamụnọ Tẹmẹ Ḅe ḅereniḅọ ḅe ḍumo ḅụ nyana kụrọ mị na nwọ ḍukomẹ. Anịsịkị, okunwẹngịḅọ ḅe sakị Juapụma na pịkị Jịnsẹapụma na ḅara-wẹrịma ḅo Tamụnọ Ḅe tọn koroma tomoniḅọ goyegoye pịrịye mị ḅie sọ ọkụ nwọ ḍuko finjimẹ. Ò ḍukopẹlẹmẹ na Juapụma Jizọs Ḅe sịkị mị Tamụnọ Ḅe tọn koromamẹ anị mịẹse tomoniḅọ goyegoye Tamụnọ Ḅe ḍikiḅụgerere mị nyanaḅịa ọkụ Jizọs Ḅe ḅie ḅụ, ọ̀ pịkị ḅerenimẹ na Juapụma ini Jizọs Ḅe sịkị gbaso ẹkẹ. Anịḅe kuluma, Pọl ḅe se ḅara-wẹrịma Kraịst ḍukonwẹngịḅọ ḍumo mị kọnḅịa ọkụ mị ọ̀ nwọ gịẹịnmẹ, anịtẹịn anga se jịn apụ ḅẹlẹmaḅịa ḅara gbolomaye mị, ọ̀ ma ọkwẹịntịḅị ma ọkịmẹ anị fịrịnwẹngị Tamụnọ Ḅe pịrị na, sime Kraịst ḍukonwẹngịapụma pịrị fịrị sẹma ḅie na, mịẹ jịnḅọ jịnḅọ pịrịḅịaye na, pịkị tomoniḅọ koroma gboloma ḅẹrẹ ma na. Kereniḅịpị se nweni fịrịma na tokoni se Tamụnọ Ḅe pịrị na ḅe ọkwẹịn ma anị ò se fịrịfịrịma ḍiri mị kulumaye-ẹ.
Ḅẹrẹtịḅị Ma Ọrụrụ Ḅụ Simeọkụ Mị
Ḍiepakụmaye na ọkwẹịntịḅị na 1.1-17
Ḍụaḅọrọma tomoniḅọ ḅụpalịmamẹ 1.18—3.20
Tamụnọ Ḅe oria ḍụaḅọrọma ẹmbẹ 3.21—4.25
Kraịst Ḅe ḅie sime ịwọ ḍumo mị 5.1—8.39
Izrẹl mị Tamụnọ Ḅe tọnkoromaye mị ḅie simeḅara 9.1—11.36
Kraịst ḍukonwẹngịḅọ kọnḅịa ḍumo 12.1—15.13
Kuluma ọkwẹịn na kereniḅịpị ma na 15.14—16.27
Currently Selected:
Romapụ Ḍiepakụmaye: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria