Okunwẹngịapụ 28

Wa Ḅo Mọlta Ama Mị Lamẹ

1Wa deinma ḅo anga lasịkị, mị wa ḅo nemiye-ẹ na anị chọ mị Mọlta ini nwọse anị chịnmẹ. 2Anị ama apụma ini iḅiọkụ se mine na angamẹ. Ene sakị korosam, oḅoku pịkị omi-ẹ, anịgose ini fịnị tọnọ se pịkị iḅiọkụ mine ọkịmẹ. 3Pọl ḅe fịnị tọnọ sanga poku gbala se fịnị mị ḅie chụarịogbo, anị fịnị ọwụ mị gose oruwu pakaḅo ọ̀ ḅara fangalamẹ. 4Ama apụma oruwu ḅe Pọl ḅe ḅara fangalama ḅara mị nwọ ọrị se nwọse jịnḅọ jịnḅọ ḅẹmẹ, “Pikipikiye ofori-ẹ, ḅe ḅọ ḅe niniḅọ-ẹ, ọkụma Tamụnọ karakara ḅẹrẹkọn mị ḅereni ọ̀ pịrị se ò ḍumo ẹkẹ, tọrụ fa mị ḅie ọ̀ pakaḅosam nwọ ḅẹ sọnị.” 5Ọkụma Pọl ḅe oruwu ḅe gugu fịnị mị ḅie chụamẹ ngịsị ọ̀ laye oforika ḅara ḅụ. 6Ini ò foinḅịa sịkị nwọ koru simemẹ anịkanịka ḅụnemika ḅụ ò sokoro koro fịḅịa sịkị. Ọkụma ini koru mun ḅọlọ sịkị la, se kịrịye ọ̀ ḅụ pakaka ḅara nwọ ọrị sịkị, ini inia kuḅie ḍinma se nwọ ḅẹmẹ, “Ḅe tamụnọ-ẹ!”

7Anịanga mị na kpeki nyọ ḅụ Pọbliọs nwọ chịnḅọ kiri nyanamẹ, chọ mị ḅe alaḅọ ḅe. Iḅiye mịẹḅara ḅụ ori iḅiọkụ mine ọkịmẹ, se igoni se tẹrẹ-a ḍin ḅụ mine kọnmẹ. 8Pọbliọs ḍaḅe obi iḅila ọgọnọ ori omi-ẹ, ọfịrị na ḅịẹ na obi ḅụ. Pọl ḅe so ò sime jukuru mị ḅie mun mẹ, se ḅara se oria ọgọnọ gbana, tẹkẹ se ọ̀ gwọmẹ. 9Mịn paka sịkị, chọ mị ḅie sime ísí obiapụ mamgba ḅomẹ, se inimgba ḅụiḅimẹ. 10Tọn-a ḍiepịrịaye ini nwọse wa pịrịmẹ, se wa dọkụpaka sịkị, mịna ḅụpalịmaḅịa tọn-aye ini nwọse arụ mị ḅie sẹịn wa pịrịmẹ.

Wa Mọlta Ḅie Ḅọrọmun Rom Lamẹ

11Tẹrẹ akalụ ḅọrọ sịkị wa Alẹkzandria ḅie ḅo owoin arụ mị nwọ ḅụkụlọ somẹ, “Maịn-Ịkpatụ Tamụnọ,” ini nwọse chịn arụ mị, oḅoku sịkị mị se chọ mị ḅie simeye mị. 12Wa ḅo Saịrakus nwọ chịn ama mị nwọ lamẹ se tẹrẹ-a ḍin nwọse anịnyọ simemẹ. 13Anịanga ḅụ wa wẹrị dọkụpaka ḅo Rijiọm ama mị lamẹ. Anịḅe eneḅa mị ḅụ, chuku fọrụ sakị fiemẹ, se mama ene ḅụ wa ḅo Putiọlị ama mị lamẹ. 14Wa anịnyọ ḅụ da ḅereniapụ nwọ ọrịmẹ ini ḅimẹ na wa sọnọma ḍin se ini na sime. Anịeso wa ḅo Rom mị nwọ lamẹ. 15Rom ḅie sime mịnapụma mine gbolomaye nwọ naa se ḅo mine na ịrịamẹ, anị Apịọs Fẹ mị ḅie na pịkị Tẹrẹ-a Igoniapụ Warị mị ḅie na. Pọl ḅe ini ọrị sịkị ọ̀ mịẹḅaka se Tamụnọ Ḅe ḅẹ se pịkị ò kuḅie kụrọmamẹ.

Rom Ḅie Mịẹye

16Wa ḅo Rom mị lasịkị, ini ḅereni Pọl ḅe pịrịmẹ na ori ngẹrị sime, ò ḍikiḍikiarị gbọrị owuniḅọ ḅe na.

17Tẹrẹ-a ḍin ḅọrọ sịkị Pọl ḅe Juapụma ḅe tịḅịnịma chịn koḅirimamẹ. Ini koḅirima sịkị, ọ̀ nwọse ini ḅẹmẹ, “Ị̀ya mịnapụ, Jerusalẹm ḅie ikoliḅọ ḅara ḅụ ini ị̀ se mịanga ḅomẹ. À se mịna ama apụma mịẹye anịkanịka mịna ḅieju-aḍapụma ḅara wa daọkị ama mịẹmịẹaye ma ḅụ sọ, à mịẹirimaye ofori-ẹ nwọ ḅẹ sọnị, ini ị̀ ḅọrọma Romapụ ma pịrịmẹ. 18Ini ḅẹrẹ se ị̀ gbelasam pịkị ị̀ ḅụ ḅarasin ḅimẹ anịatịḅị Romapụ ma ḍọkịḅomẹ na à mịẹ sima se fị gbẹịnye ofori-ẹ. 19Ọkụma Juapụma mịn mị ḅerenika sịkị, anị ị̀ chukurumamẹ ḅẹrẹ seni Siza ḅe sua, à ye se ị̀ya ama apụma ọgọnọ gbana ẹkẹ nwọ ḅẹ sọnị. 20Anị mịẹse àrị ómine ọrị pịkị ómine na ọkwẹịnma ḅiye-ẹ, anịatịḅị ori Izrẹlapụma tọrụseḍikiarị ḅọ ḅe tịḅị gose anị à ma ikoli ma chụaye-ẹ.”

21Ini nwọse ọ̀ ḅẹmẹ, “Ị́ gboloma ḍiri ma Judia ḅie ḅo mịna ḅara lakẹ, mịna tomonima ḅie pịkị ḅo ị́ gboloma ḅẹrẹ ḍuko wa pịrịḅọ sọ ofori-ẹ. 22Ọkụma wa ị́ ḅịpị naa ḅimẹ ị́ya koroma ma anịa ḅụ wẹrị sime ḅara, anịatịḅị wa nemimẹ, na nyọ mamgba ị́ sime pịrị pẹkẹrẹ mị ḅụ, ini iḅiye ḍukokẹ.”

23Anị ini Pọl ḅe na ene pẹlẹye-ẹ, se inia ḅie tọn-a apụ Pọl ḅe sime nyọ nwọ ḅomẹ. Dede ḅie ọkịmun ḍin la, ori oria oku mị ḍuko ḅelema ini pịrịmẹ Tamụnọ Amanyanakiri mị gbolomaye mị. Ọ̀ pịkị ḅụkụrọma mịẹse Jizọs Ḅe gbolomaye mị inia ḅụokoromẹ, Moziz Oloko mị na ịkịankoroapụma na gịẹịn ayema na nwọse otoma ini pịrị mị ḅụ. 24Oria ọkwẹịn ma inia ḅie dapụ ḅụokoromẹ, ọkụma ísíapụma ini ḅereni ḍụkụkẹ. 25Anị ini soye-ẹ, inia ogboku ḅịpịogbosọka ḅara ḅụ, anị Pọl ḅe mị gbọrị ọkwẹịn mị nwọ kọn so sịkị na: “Iḅi re Fịafịa Tẹmẹ Ḅe ịkịankoro Aịzaya ḅe ḅụ ḅọrọ ọkwẹịn ọ́mịna ḅieju-aḍapụma pịrịmẹ! 26Anịatịḅị ọ̀ nwọ ḅẹmẹ,

‘Mun nwọse mịna apụma ḅẹ:

Ó poki pịkịna pokiḅịa, ọkụma ọ́ kaịnḅo ẹkẹ;

ó ḍiki pịkịna ḍikiḅịa, ọkụma ómine ọrị ẹkẹ,

27anịatịḅị mịna tomonima inia kuḅie ma oḅokumẹ,

ini pịkịna inia ḅeri ma inikimasam

pịkịna inia tọrụmgbọlụma sọnị gbẹịnsam.

Ḅofa, inia tọrụmgbọlụma ye ọrị,

inia ḅerima sọnị ye naa,

inia kuḅie ma sọnị yekaịnḅo,

se ini vinpịkị ị̀ damaḅoḅịa, Tamụnọ Ḅe ọkọ ḅẹmẹ,

se àrị ini gwọḅịa.’ ”

28Se Pọl ḅe ọkwẹịn kuluma ḅụ nwọ ḅẹmẹ: “Anịọkụma, ó nemi na Tamụnọ Ḅe oria ḍụaḅọrọma oku mị ini nwọse Jịnsẹapụma fịrịmasam. Ini pokiḅịa!” 29Pọl ḅe mịn mị ḍuko so sịkị, Juapụma ini somẹ, se kụrọ pụkọ ḅụ wẹrị inia ogboku ḅụ yejineaḅẹ.

30Mama kụra Pọl ḅe nwọse anịnyọ angamẹ ori ọkọ ọ̀ ḅụ pịrị nyọ mị ḅie, se iḅiọkụma ḅo ori ọrị-ẹ ḅo apụ mamgba nwọ ọkịmẹ. 31Tamụnọ Amanyanakiri mị ḅe ḅẹrẹ ọ̀ nwọ ḍuko finjimamẹ se Nyanaḅọ Jizọs Kraịst Ḅe gbolomaye se ini ḍiemẹ, ḅalafa ofori pịkị ngẹrị mịnaḅụ nyanaḅọ ḅara ḅụ.

Currently Selected:

Okunwẹngịapụ 28: OBTP

Highlight

Copy